Minn mindu l-Unjoni Ewropea saret aktar minn korp intergovernattiv, li fih rappreżentanti mill-gvernijiet nazzjonali kienu jiltaqgħu biex jieħdu deċiżjonijiet bil-bibien magħluqa, tressqu proposti għal għodod parteċipattivi, ġew introdotti mekkaniżmi prattiċi u dawk eżistenti ġew riveduti biex jagħmlu ċ-ċittadinanza tal-UE attiva u d-demokrazija parteċipattiva fil-livell transnazzjonali aktar minn idea sabiħa: trid issir prattika ta’ kuljum.
Għalhekk, meta tiddeċiedi li ssir attiv/a bħala ċittadin/a tal-UE u taħdem fil-livell transnazzjonali favur l-idea/it-tħassib/il-proposta tiegħek, jekk jogħġbok l-ewwel evalwa b’attenzjoni l-istrumenti parteċipattivi disponibbli fis-sett ta’ għodod. Hawn taħt ser issib l-aktar għodod importanti s’issa.
Jekk m’intix kuntent/a b’miżura relatata mal-UE, tista’ tressaq ilment formali quddiem l-Ombudsman Ewropew, li joffri formola online bl-24 lingwa uffiċjali tat-Trattati. Huwa importanti tkun taf li dan il-mezz mhuwiex miftuħ biss għaċ-ċittadini tal-UE iżda huwa miftuħ ukoll għar-residenti kollha fl-Unjoni Ewropea, inklużi n-negozji, l-assoċjazzjonijiet u korpi oħra rreġistrati fi ħdan l-UE.
Jekk inti, bħala ċittadin/a jew negozju tal-UE, tiffaċċja ostakli f’pajjiż ieħor minħabba li awtorità pubblika mhix tagħmel dak li hu mitlub mid-dritt tal-Unjoni, tista’ tirrikorri għall-mekkaniżmu għas-soluzzjoni tal-problemi SOLVIT previst mill-Kummissjoni Ewropea. Dan is-servizz online b’25 lingwa (il-lingwi tal-UE u n-Norveġiż) jittratta wkoll problemi b’element transfruntier li jkunu seħħew minħabba l-applikazzjoni ħażina tad-dritt tal-Unjoni mill-awtoritajiet pubbliċi fi ħdan l-Istati Membri tal-UE.
Jekk qed tfittex opportunitajiet ta’ impjieg jew ta’ edukazzjoni fl-Ewropa, hemm servizz, bil-lingwi uffiċjali kollha tal-UE + in-Norveġiż u l-Iżlandiż, imsejjaħ EURES, in-Network Ewropew għall-Impjiegi, li joffri għodod kemm għal dawk li qed ifittxu impjieg kif ukoll għal min iħaddem (u fil-ħarifa tal-2023 kellu mhux inqas minn 3,9 miljun post tax-xogħol vakanti u miljun CV).
