An Pas Eorpach um Dhaonlathas

An Tionscnamh Eorpach ó na Saoránaigh i gCoiste Eacnamaíoch agus Sóisialta na hEorpa

Nuair a tháinig an Tionscnamh Eorpach ó na Saoránaigh (TES) ar an bhfód i dtús ama, bhí CESE ina cheannródaí maidir le creat tacaíochta neamhfhoirmiúil do shaoránaigh ghníomhacha ar fud an Aontais, lena n-áirítear comhairle ghinearálta dóibh, cúnamh aistriúcháin dóibh, agus reáchtáil seisiúin éisteachta le CESE do na TESanna atá ar na bacáin. Formhór na seirbhísí sin, is cuid iad de na hoibleagáidí rialála atá ar institiúidí an Aontais. Áirítear orthu sin Parlaimint na hEorpa agus an Coimisiún Eorpach.

Ós é CESE an institiúid is sine taithí a chuireann tacaíocht ar fáil do na saoránaigh san Aontas, leanann sé air ag soláthar faisnéise, treorach agus ardáin d’eagraíochtaí na sochaí sibhialta agus do ghrúpaí ad hoc de shaoránaigh ghníomhacha atá ag cothú na gné sóisialta de shaol na ndaoine san Eoraip agus ag obair ann leis an daonlathas a neartú.

Ó 2012 i leith, tá CESE ag óstáil na comhdhála bliantúla, Lá an Tionscnaimh Eorpaigh ó na Saoránaigh sa Bhruiséil (Lá TES a thugtar air). Bíonn pointe cruinnithe oscailte á thairiscint aige ann in aisce do ghairmithe agus do ghníomhaithe TES ar fud na hEorpa.

Ina theannta sin, iarrann CESE ar lucht na TESanna rathúla nó na TESanna a bheidh rathúil go luath freastal ar a sheisiúin iomlánacha agus iarrann sé ar lucht na TESanna atá ar bun cheana féin freastal ar chruinnithe na rannóg agus na ngrúpaí chun cur le méadú an idirphlé idir na saoránaigh agus institiúidí an Aontais agus chun tuilleadh eolais faoi na tionscnaimh a scaipeadh sa réimse poiblí Eorpach. I measc na gcuirí sin, bhí Ban Glyphosate (2017), Minority SafePack (2018), Stop Extremism (2019), End the Cage Age, Eat ORIGINal. Unmask your Food (2020), Sábhálaimis na Beacha agus na Feirmeoirí (2022) agus An Eoraip Saor ó Fhionnadh (2023).

Chomh maith le leagan leictreonach CESE de ‘An Pas Eorpach um Dhaonlathas’, tá leagan clóite ar fáil i 23 theanga mar aon le foilseacháin agus seirbhísí eile.

Daonlathas na Rannpháirtíochta

• Is aip ar líne le haghaidh na bhfón cliste í ‘Citizens’ App’ de chuid Pharlaimint na hEorpa, aip ina bhfuil faisnéis faoi ábhair agus faoi áiteanna a dtarlódh gur dhíol spéise duit féin iad. Cuireann sí ar an eolas thú faoi imeachtaí a bheidh ar siúl gar duit; cuireann sí do cheanáin i d’fhéilire pearsanta; taispeánann sí an bealach is fearr duit tríd an aip léarscáile is fearr leat; cuireann sí ábhar ilmheánach ar fáil amhail físeáin, podchraoltaí agus taispeántais sleamhnán; tá sí inchuardaithe agus inroinnte agus is féidir í a shaincheapadh agus a rangú. Le fáil ar Apple Store agus Google Play i 24 theanga.

• Is líonra trasnáisiúnta de lucht tacaíochta an daonlathais é an Comhphobal Daonlathach, líonra atá á óstáil ag ‘Democracy International’. Tá an t-ardán ar oscailt do gach duine chun críocha faisnéise, oideachais agus líonraithe agus cuireann sé scéalta rannpháirtíochta agus deiseanna imeachtaí ar fáil. Is féidir leat tú féin / d’eagraíocht / d’institiúid a chlárú agus próifíl a chruthú a thacaíonn leis an daonlathas.

• Is eagraíocht idirnáisiúnta í an tSeirbhís Gníomhaíochta do Shaoránaigh na hEorpa a bhfuil ballraíocht uile-Eorpach aici. Is é an misean atá aici saoránaigh a chumhachtú d’fhonn Aontas Eorpach níos cuimsithí agus níos láidre a chruthú trí chearta na saoránach a chur chun cinn agus a chosaint agus trí shásraí a fhorbairt d’fhonn rannpháirteachas agus rannpháirtíocht dhaonlathach na saoránach agus na n-eagraíochtaí saoránach a mhéadú san Aontas agus chun tacú leis na sásraí sin.

• Tá an t-ardán Participo á chur ar fáil ag ECFE (An Eagraíocht um Chomhar agus Forbairt Eacnamaíochta). Tá gach cineál eolais anseo faoi thaighde agus cleachtas dhaonlathas na rannpháirtíochta agus an daonlathais dhírigh ar gach leibhéal polaitiúil. Tá an t-ardán mar chuid d’iarracht ECFE chun na hathruithe paraidíme atá faoi lán seoil ó rialtas ionadaíoch traidisiúnta go daonlathas ionadaíoch nua-aimseartha a fhiosrú.