Aktar minn 800 parteċipant minn organizzazzjonijiet taċ-ċittadini u partijiet ikkonċernati madwar l-Ewropa, inklużi organizzazzjonijiet taż-żgħażagħ, NGOs u ġurnalisti, ingħaqdu mal-Ġimgħa tas-Soċjetà Ċivili, organizzata mill-Kumitat Ekonomiku u Soċjali Ewropew mis-17 sal-20 ta’ Marzu 2025. Is-sessjoni tal-ftuħ enfasizzat il-protezzjoni tal-ispazju ċiviku permezz ta’ azzjoni legali, waqt li affermat mill-ġdid ir-rwol ewlieni tas-soċjetajiet ċivili: obbligu ta’ rendikont għall-karigi ta’ poter, ħolqien ta’ rabtiet, appoġġ għar-reżiljenza soċjali, u vuċi lil dawk li spiss jiġu injorati.
Aktar minn 800 parteċipant minn organizzazzjonijiet taċ-ċittadini u partijiet ikkonċernati madwar l-Ewropa, inklużi organizzazzjonijiet taż-żgħażagħ, NGOs u ġurnalisti, ingħaqdu mal-Ġimgħa tas-Soċjetà Ċivili, organizzata mill-Kumitat Ekonomiku u Soċjali Ewropew mis-17 sal-20 ta’ Marzu 2025. Is-sessjoni tal-ftuħ enfasizzat il-protezzjoni tal-ispazju ċiviku permezz ta’ azzjoni legali, waqt li affermat mill-ġdid ir-rwol ewlieni tas-soċjetajiet ċivili: obbligu ta’ rendikont għall-karigi ta’ poter, ħolqien ta’ rabtiet, appoġġ għar-reżiljenza soċjali, u vuċi lil dawk li spiss jiġu injorati.
jindirizza l-polarizzazzjoni dejjem tikber li ġiet xprunata f’dawn l-aħħar snin mill-impatt tal-kriżi finanzjarja, it-tibdil fil-klima u ż-żieda fl-inugwaljanza fl-introjtu;
jenfasizza r-rwol ewlieni li s-soċjetà ċivili jista’ jkollha f’dan il-kuntest;
jinġabru s-soluzzjonijiet u t-talbiet tas-soċjetà ċivili lil dawk li jfasslu l-politika tal-UE sabiex jgħinu fid-depolarizzazzjoni tal-Ewropa permezz tat-tisħiħ tal-koeżjoni tas-soċjetà u l-parteċipazzjoni demokratika f’oqsma ewlenin għas-soċjetà.
Fid-diskors tal-ftuħ tiegħu, il-President tal-KESE Oliver Röpke saħaq li: “Is-soċjetà ċivili għandha tilqa’ l-isfida. Il-parteċipazzjoni, id-djalogu u s-solidarjetà mhumiex biss ideal – huma l-pedament ta’ Ewropa reżiljenti u magħquda. Hekk kif ninsabu miġbura għall-Ġimgħa tas-Soċjetà Ċivili, ejjew naffermaw mill-ġdid l-impenn tagħna għall-inklużjoni u ċ-ċittadinanza attiva. Demokrazija b’saħħitha tiddependi mhux biss mill-istituzzjonijiet, iżda anke mill-involviment tal-poplu kollu tagħha.”
Fid-diskors ewlieni tagħha Albena Azmanova, Professur tax-Xjenza Politika u Soċjali f’City Saint George’s, fl-Università ta’ Londra, tkellmet dwar l-insigurtà ekonomika li qed tikber u li qed jaffaċċjaw il-maġġoranza tan-nies – u li ddeskrivietha bħala “epidemija tal-prekarjetà”. Hija spjegat għaliex is-soċjetà ċivili għandha ċ-ċavetta biex isir avvanz fi żminijiet ta’ insigurtà massiva.
“Għall-biċċa l-kbira tan-nies, l-insigurtà ekonomika massiva xejnet ir-rieda tagħhom li jiġġieldu. Is-soċjetà ċivili għandha r-rieda li tiġġieled. L-attivisti tas-soċjetà ċivili huma xprunati minn sens ta’ skop ikkaratterizzat minn ilmentar speċifiku. Huma l-operaturi viżibbli li jħaddmu d-demokrazija,” qalet.
Kif qal Younous Omarjee, Viċi President tal-Parlament Ewropew, “Aħna neħtieġu soċjetà ċivili li twaħħad liċ-ċittadini, f’dan il-kuntest ta’ individwaliżmu dejjem jikber, u bħala difiża kontra l-ideat tal-lemin estrem li qed jinfirxu.”
Adriana Porowska, Ministru għas-Soċjetà Ċivili, mill-Presidenza Pollakka tal-UE semmiet ir-rwol kruċjali tal-NGOs fir-reżiljenza soċjali u l-appoġġ tagħhom għal gruppi vulnerabbli u maqtugħin, u tkellmet ukoll dwar l-esperjenza Pollakka mas-soċjetà ċivili li tiżgura r-reżiljenza nazzjonali.
Brikena Xhomaqi, kopresident tal-Grupp ta’ Kuntatt tal-KESE man-networks Ewropej tas-soċjetà ċivili, enfasizzat li l-unità fid-diversità, il-mantra tant għal qalb l-UE, titrawwem fil-livell lokali. Madankollu, is-Sinjura Xhomaqi semmiet li l-organizzazzjonijiet tas-soċjetà ċivili u l-NGOs jinsabu taħt attakk, bil-finanzjament u r-rwol tagħhom li qed jiġu kkontestati. “Mingħajr riżorsi, l-organizzazzjonijiet tas-soċjetà ċivili ma jistgħux jiffunzjonaw. Hemm bżonn li l-istituzzjonijiet jipproteġu s-soċjetà ċivili; neħtieġu protezzjoni legali għall-ispazju ċiviku biex inżommu s-soċjetà tagħna flimkien u magħquda fid-diversità.”
“Aħna u nfakkru t-tielet anniversarju tal-gwerra ta’ aggressjoni brutali u mhux provokata tar-Russja kontra l-Ukrajna – attakk mhux biss fuq nazzjon sovran iżda fuq il-valuri fundamentali tad-demokrazija, id-dinjità tal-bniedem u l-ordni internazzjonali bbażata fuq ir-regoli – nesprimu solidarjetà mal-poplu Ukren”, qal il-President tal-KESE Oliver Röpke f’dikjarazzjoni maħruġa fis-sessjoni plenarja tal-KESE fi Frar.
“Aħna u nfakkru t-tielet anniversarju tal-gwerra ta’ aggressjoni brutali u mhux provokata tar-Russja kontra l-Ukrajna – attakk mhux biss fuq nazzjon sovran iżda fuq il-valuri fundamentali tad-demokrazija, id-dinjità tal-bniedem u l-ordni internazzjonali bbażata fuq ir-regoli – nesprimu solidarjetà mal-poplu Ukren”, qal il-President tal-KESE Oliver Röpke f’dikjarazzjoni maħruġa fis-sessjoni plenarja tal-KESE fi Frar.
Sa mill-ewwel jum ta’ din l-invażjoni, appoġġajna lill-Ukrajna – mhux biss simbolikament, iżda b’azzjoni konkreta. Illum, naffermaw mill-ġdid l-impenn sod tagħna li nappoġġjaw is-sovranità, id-demokrazija u l-futur Ewropew tal-Ukrajna. Nappellaw lill-UE biex issostni u ssaħħaħ l-appoġġ politiku, ekonomiku, umanitarju u militari tagħha.
Il-poplu Ukren wera kuraġġ u reżiljenza straordinarji fid-difiża ta’ pajjiżu u l-prinċipji li jorbtuna flimkien bħala Ewropej. Sa mill-ewwel jum ta’ din l-invażjoni, il-KESE, il-membri tiegħu u s-soċjetà ċivili Ewropea li jirrappreżenta appoġġjaw lill-Ukrajna – mhux biss simbolikament iżda b’azzjoni konkreta.
Fi żmien ta’ inċertezza ġeopolitika li qed tikber, id-dikjarazzjonijiet reċenti mir-rappreżentanti tal-Istati Uniti li jiddubitaw l-impenn kollettiv ta’ difiża tan-NATO huma allarmanti ħafna. L-Ewropa ma tistax tkun kompjaċenti.
L-Ukrajna qed tiġġieled mhux biss għas-sopravivenza tagħha iżda għas-sigurtà tal-kontinent Ewropew kollu.
Il-KESE jħeġġeġ lill-mexxejja tal-UE jaħtfu dan il-mument biex isaħħu l-kapaċitajiet Ewropej ta’ sigurtà u difiża, jiddefinixxu mill-ġdid l-awtonomija strateġika, jiddefendu l-multilateraliżmu u japprofondixxu l-kooperazzjoni man-Nazzjonijiet Uniti, u fl-istess ħin isawru sħubijiet globali aktar b’saħħithom ma’ alleati demokratiċi lil hinn mill-Ewropa.
L-Ewropa trid taġixxi issa.
M’hemmx lok għal indeċiżjoni. L-awtokrati u l-aggressuri jiffjorixxu sforz l-eżitazzjoni tal-oħrajn.
Id-demokraziji jridu jkunu magħquda u sodi.
Il-KESE jistieden lill-UE ssaħħaħ l-awtonomija strateġika tagħha, tiddefendi kemm id-demokrazija kif ukoll id-drittijiet fundamentali, u tappoġġja b’determinazzjoni lill-Ukrajna. Issa wasal iż-żmien biex l-UE tieħu azzjoni ġeopolitika strateġika.
Il-kompitu ewlieni tal-Presidenza Pollakka attwali tal-Kunsill tal-Unjoni Ewropea se jkun li l-Ewropa tinżamm magħquda, jintlaħaq progress u jittieħdu deċiżjonijiet rapidi
Il-kompitu ewlieni tal-Presidenza Pollakka attwali tal-Kunsill tal-Unjoni Ewropea se jkun li l-Ewropa tinżamm magħquda, jintlaħaq progress u jittieħdu deċiżjonijiet rapidi
Fis-sessjoni plenarja ta’ Frar, il-Kumitat Ekonomiku u Soċjali Ewropew kellu dibattitu dwar il-prijoritajiet tal-Presidenza Pollakka tal-UE ma’ Magdalena Sobkowiak-Czarnecka, Sottosegretarju tal-Istat tal-Polonja għall-Affarijiet tal-Unjoni Ewropea.
B’referenza għas-sigurtà esterna tal-UE u, b’mod partikolari, għall-gwerra ta’ aggressjoni kontra l-Ukrajna, is-Sinjura Sobkowiak-Czarnecka qalet li: “l-objettiv tagħna huwa li nżommu l-Ukrajna għaddejja u nżommu l-għaqda ġewwa l-Ewropa.” Hija semmiet is-16-il pakkett ta’ sanzjonijiet kontra r-Russja bħala waħda mill-ewwel kisbiet tal-Presidenza Pollakka.
Il-President tal-KESE, Oliver Röpke, enfasizza li l-Polonja kienet qed tieħu f’idejha l-Presidenza b’rotazzjoni tal-UE fi żmien mifni minn sfidi diffiċli bħat-tensjonijiet ġeopolitiċi u l-kriżijiet tal-enerġija.
Huwa żied jgħid li “d-dibattitu tal-lum afferma mill-ġdid l-importanza kritika tal-istabbiltà, ir-reżiljenza u l-għaqda biex insawru l-futur tal-Unjoni Ewropea. Il-prijoritajiet tal-Presidenza Pollakka jallinjaw mill-qrib mal-ambizzjonijiet kollettivi tagħna, b’mod partikolari fit-trawwim ta’ approċċ multidimensjonali għas-sigurtà. Fi żmien ta’ inċertezza globali, l-impenn tagħna għal azzjoni deċiżiva u kooperattiva jibqa’ sod.”
Bis-slogan “Sigurtà, Ewropa!”, il-Presidenza Pollakka tal-UE se taħdem fuq seba’ dimensjonijiet tas-sigurtà – affarijiet esterni, affarijiet interni, ekonomija, ikel, enerġija, saħħa u informazzjoni.
Minn Michal Pintér, delegat tal-Kummissjoni Konsultattiva tal-KESE dwar il-Bidliet Industrijali (CCMI)
Il-Patt għal Industrija Nadifa li ġie mħabbar reċentement jirrikonoxxi l-importanza strateġika tal-industriji intensivi fl-enerġija għall-ekonomija tal-UE u jidentifika b’mod korrett l-isfidi ewlenin tagħhom. Minkejja li l-Patt jinkludi ideat notevoli bħal swieq ewlenin ekoloġiċi, appoġġ għall-ekonomija ċirkolari u finanzjament għad-dekarbonizzazzjoni, il-miżuri ma għandhomx l-urġenza u s-solidità meħtieġa biex ireġġgħu lura t-tnaqqis tal-industriji intensivi fl-enerġija tal-Ewropa.
Minn Michal Pintér, delegat tal-Kummissjoni Konsultattiva tal-KESE dwar il-Bidliet Industrijali (CCMI)
Il-Patt għal Industrija Nadifa li ġie mħabbar reċentement jirrikonoxxi l-importanza strateġika tal-industriji intensivi fl-enerġija għall-ekonomija tal-UE u jidentifika b’mod korrett l-isfidi ewlenin tagħhom. Minkejja li l-Patt jinkludi ideat notevoli bħal swieq ewlenin ekoloġiċi, appoġġ għall-ekonomija ċirkolari u finanzjament għad-dekarbonizzazzjoni, il-miżuri ma għandhomx l-urġenza u s-solidità meħtieġa biex ireġġgħu lura t-tnaqqis tal-industriji intensivi fl-enerġija tal-Ewropa.
Fl-Opinjoni tiegħu adottata dan l-aħħar dwar Il-futur tal-industriji tal‑UE li jużaw ħafna riżorsi u enerġija fid-dawl tal-prezzijiet għoljin tal-enerġija u tal-ispejjeż tat-tranżizzjoni, il-Kumitat Ekonomiku u Soċjali Ewropew irrikonoxxa distakk sinifikanti fil-kompetittività bejn l-industriji intensivi fl-enerġija fl-UE u dawk tal-kompetituri globali. Il-Kummissjoni b’mod korrett semmiet il-prezzijiet tal-enerġija bħala l-kaġun prinċipali. Madankollu, il-Patt u l-Pjan ta’ Azzjoni għall-Enerġija Affordabbli ma jipproponu l-ebda riforma tad-disinn tas-suq tal-elettriku. L-ipprezzar marġinali ħadem meta l-UE kienet qed tibbenefika minn gass bil-pipeline relattivament irħis u stabbli fornit mir-Russja. Sfortunatament, ir-realtà nbidlet, peress li issa ninsabu esposti għal provvisti tal-LNG għaljin u volatili, u x’aktarx hekk se jibqgħu fis-snin li ġejjin. Minkejja sehem dejjem akbar ta’ elettriku bi prezz baxx u ħieles mill-fjuwils fossili fit-taħlita tal-enerġija tal-UE, il-prezzijiet tal-fjuwils fossili jkomplu jiddeterminaw il-formazzjoni tal-prezzijiet tal-elettriku.
L-isforzi ta’ politika biex jiżdiedu s-sorsi tal-enerġija rinnovabbli huma milqugħa, iżda ma jnaqqsux il-kontijiet tal-elettriku minħabba d-disinn attwali tas-suq. Huma meħtieġa miżuri immedjati biex jiġu ttrasferiti l-benefiċċji tal-kostijiet tal-elettriku rinnovabbli lill-industriji u jiġu vvalutati l-għażliet kollha ta’ mitigazzjoni tal-prezzijiet, inkluż id-diżakkoppjament tal-prezzijiet tal-elettriku.
Il-Patt jirrikonoxxi wkoll lakuni fil-Mekkaniżmu ta’ Aġġustament tal-Karbonju fil-Fruntieri (l-ebda soluzzjoni ta’ esportazzjoni, ridistribuzzjoni u ċirkomvenzjoni tar-riżorsi) u strumenti ta’ protezzjoni tal-kummerċ. Madankollu, sfortunatament il-Patt ftit li xejn jgħidilna dwar kif is-suq tal-UE se jiġi protett, u jħalli lill-industriji intensivi fl-enerġija joperaw f’inċertezza fi gwerra kummerċjali globali.
Il-KESE jħeġġeġ lill-istituzzjonijiet tal-UE jimplimentaw miżuri deċiżivi fi pjani ta’ azzjoni speċifiċi għas-settur, sabiex tiġi evitata aktar deindustrijalizzazzjoni u tinżamm il-kapaċità tal-UE għat-trasformazzjoni industrijali.
Il-Kumitat Ekonomiku u Soċjali Ewropew (KESE) qed iħeġġeġ lill-UE timplimenta strateġija industrijali robusta li ssaħħaħ il-kompetittività, toħloq impjiegi ta’ kwalità u tallinja mal-Patt Ekoloġiku. Biex tirnexxi, din l-istrateġija trid tiġi mmonitorjata mill-qrib u adattata għall-isfidi emerġenti.
Il-Kumitat Ekonomiku u Soċjali Ewropew (KESE) qed iħeġġeġ lill-UE timplimenta strateġija industrijali robusta li ssaħħaħ il-kompetittività, toħloq impjiegi ta’ kwalità u tallinja mal-Patt Ekoloġiku. Biex tirnexxi, din l-istrateġija trid tiġi mmonitorjata mill-qrib u adattata għall-isfidi emerġenti.
Fl-Opinjoni, il-KESE enfasizza l-ħtieġa għal qafas ekonomiku u regolatorju b’saħħtu biex jiġu indirizzati l-kostijiet għoljin tal-enerġija u tal-materja prima, l-isfidi tal-investiment fit-tranżizzjoni ekoloġika, id-diskrepanzi fl-infrastruttura, in-nuqqas ta’ ħiliet u d-domanda interna dgħajfa. Politika tal-kompetizzjoni ffukata fuq l-investiment u l-innovazzjoni hija kruċjali biex trawwem il-koeżjoni soċjali u territorjali.
L-appell l-KESE għal azzjoni urġenti qed isir fi żmien ta’ tħassib dejjem jikber rigward is-sigurtà ekonomika tal-Ewropa u d-dipendenzi esterni tagħha. F’era ta’ tali inċertezzi ġeopolitiċi u kummerċjali dejjem akbar, hija meħtieġa politika kummerċjali tal-UE reżiljenti biex tissalvagwardja s-sostenibbiltà industrijali f’ċirkostanzi ta’ għanijiet ta’ dekarbonizzazzjoni asimmetriċi, kapaċità żejda globali, u tensjonijiet kummerċjali li qed jiżdiedu. Biex jintlaħaq dan l-għan hija essenzjali awtonomija akbar fl-iżgurar ta’ materja prima kritika.
Iż-żieda fl-investiment, kif enfasizzat fir-rapport ta’ Draghi, u r-riformi tal-governanza huma kruċjali. Suq uniku unifikat, b’mod partikolari fl-enerġija, se jsaħħaħ l-ekonomija tal-UE. It-tnaqqis tal-piżijiet regolatorji, l-irfinar tal-oqfsa tas-suq tal-elettriku u t-titjib tal-għodod finanzjarji bħall-ftehimiet dwar ix-xiri tal-enerġija se jwieżnu t-tranżizzjonijiet tal-industrija.
Tranżizzjoni ġusta titlob djalogu soċjali b’saħħtu u negozjar kollettiv. Il-politika industrijali trid tallinja mal-istrateġiji tal-edukazzjoni u tal-forza tax-xogħol, b’enfasi fuq ir-riċerka, l-innovazzjoni u l-bini tal-ħiliet. L-investiment fl-infrastruttura tal-enerġija, l-enerġija rinnovabbli u l-inizjattivi tal-ekonomija ċirkolari se jgħin biex jintlaħqu l-għanijiet klimatiċi.
Il-KESE adotta wkoll Opinjoni supplimentari dwar Il-futur tal-industriji tal‑UE li jużaw ħafna riżorsi u enerġija, li tipproponi soluzzjonijiet imfassla apposta biex jiżguratw is-sostenibbiltà fit-tul tagħhom. L-indirizzar tal-isfidi speċifiċi li jaffaċċjaw huwa kruċjali għall-futur industrijali tal-UE. (ll)
Il-mistieden sorpriża tagħna huwa Nicolas Gros-Verheyde, ġurnalist Franċiż, awtur u espert fid-difiża u fil-politika barranija. Huwa janalizza l-ħames proposti tal-pjan ReArm Europe, ippreżentat reċentement mill-Kummissjoni Ewropea biex tissaħħaħ id-difiża Ewropea fost tħassib li qed jiżdied dwar l-impenn tal-Istati Uniti għas-sigurtà Ewropea.
Il-mistieden sorpriża tagħna huwa Nicolas Gros-Verheyde, ġurnalist Franċiż, awtur u espert fid-difiża u fil-politika barranija. Huwa janalizza l-ħames proposti tal-pjan ReArm Europe, ippreżentat reċentement mill-Kummissjoni Ewropea biex tissaħħaħ id-difiża Ewropea fost tħassib li qed jiżdied dwar l-impenn tal-Istati Uniti għas-sigurtà Ewropea.
Nicolas Gros-Verheyde ilu ġurnalist mill-1989. Huwa ħadem għal Ouest France, ARTE, LCI u France Culture bħala korrispondent tal-UE u tan-NATO. Huwa magħruf u rrispettat fiċ-ċrieki Ewropej għall-għarfien estensiv tiegħu dwar l-affarijiet Ewropej u l-politika barranija u ta’ difiża. Huwa direttur editorjali ta’ B2, sit web li nħoloq fl-2008 u jirrappreżenta l-istrument tal-media ewlieni u l-aktar komprensiv dwar id-difiża u d-diplomazija Ewropea. Is-sit web huwa ġestit minn assoċjazzjoni mingħajr skop ta’ qligħ bħala kooperattiva ta’ ġurnalisti, u huwa ffinanzjat mill-abbonamenti. https://club.bruxelles2.eu/
Awtur tal-kotba Défense européenne à l’heure de la guerre en Ukraine (Id-difiża Ewropea fil-kuntest tal-gwerra fl-Ukrajna), La politique européenne de sécurité et de défense commune. “Parce que l'Europe vaut bien une défense” (Il-politika Ewropea ta’ sigurtà u ta’ difiża komuni “Għax l-Ewropa jistħoqqilha difiża”), u Europe de la défense (L-Ewropa tad-difiża) kif ukoll huwa espert tal-aħbarijiet politiċi fuq LN24, France-Info u RTBF.
Fl-okkażjoni tad-69 sessjoni tal-Kummissjoni tan-Nazzjonijiet Uniti dwar l-Istatus tan-Nisa (CSW69) fi New York, il-Kumitat Ekonomiku u Soċjali Ewropew (KESE) u l-Kunsill Ekonomiku, Soċjali u Kulturali tal-Unjoni Afrikana (ECOSOCC tal-UA) affermaw mill-ġdid l-impenn sod tagħhom biex javvanzaw l-ugwaljanza bejn il-ġeneri u l-emanċipazzjoni tan-nisa.
Fl-okkażjoni tad-69 sessjoni tal-Kummissjoni tan-Nazzjonijiet Uniti dwar l-Istatus tan-Nisa (CSW69) fi New York, il-Kumitat Ekonomiku u Soċjali Ewropew (KESE) u l-Kunsill Ekonomiku, Soċjali u Kulturali tal-Unjoni Afrikana (ECOSOCC tal-UA) affermaw mill-ġdid l-impenn sod tagħhom biex javvanzaw l-ugwaljanza bejn il-ġeneri u l-emanċipazzjoni tan-nisa.
Hekk kif il-komunità internazzjonali qed tfakkar it-30 sena mill-adozzjoni tad-Dikjarazzjoni ta’ Beijing u l-Pjattaforma għal Azzjoni, il-KESE u l-ECOSOCC tal-UA jirrikonoxxu kemm il-progress miksub kif ukoll l-isfidi attwali li għadhom ixekklu l-ugwaljanza sħiħa bejn il-ġeneri.
It-tieni dikjarazzjoni konġunta tagħhom tenfasizza l-prijoritajiet ewlenin, inkluża ż-żieda fit-tmexxija min-nisa permezz tal-kwoti tal-ġeneru, it-tmiem tal-vjolenza abbażi tal-ġeneru permezz ta’ konvenzjonijiet internazzjonali, it-tnaqqis tad-distakk diġitali bejn il-ġeneri, u l-promozzjoni tal-emanċipazzjoni ekonomika tan-nisa.
Id-dikjarazzjoni tħeġġeġ politiki aktar b’saħħithom dwar ix-xogħol ta’ kura mhux imħallas, l-inklużjoni tan-nisa fl-isforzi għall-paċi, u t-tfassil tal-politika mmexxi mid-data. Jenfasizza wkoll il-kooperazzjoni globali biex jitneħħew l-inugwaljanzi sistemiċi u jiġu rispettati d-drittijiet tan-nisa. Il-KESE jistieden ukoll lill-UE tiġġieled il-vjolenza abbażi tal-ġeneru, tiżgura l-ugwaljanza bejn il-ġeneri, u tiddefendi r-rwol tas-soċjetà ċivili fl-avvanz tal-ugwaljanza.
Il-President tal-KESE Oliver Röpke qal: “Hekk kif qed infakkru t-30 sena mid-Dikjarazzjoni ta’ Beijing, jeħtiġilna ngħaddu mill-kliem għall-fatti”. L-ugwaljanza bejn il-ġeneri mhijiex privileġġ iżda dritt fundamentali, u l-kisba tagħha hija kritika għal soċjetajiet sostenibbli u inklużivi. Il-KESE jibqa’ sod fl-impenn tiegħu li jxejjen l-ostakli, jiżgura l-parteċipazzjoni sħiħa tan-nisa fit-teħid tad-deċiżjonijiet u jrawwem l-emanċipazzjoni ekonomika. Wasal iż-żmien li l-gvernijiet, l-istituzzjonijiet u s-soċjetà ċivili jaġixxu b’mod deċiżiv – l-ugwaljanza ma tinkisibx mingħajr responsabbiltà.”
Il-Kummissjoni dwar l-Istatus tan-Nisa hija l-korp internazzjonali u intergovernattiv ewlieni li jiġġieled għall-ugwaljanza bejn il-ġeneri. Din kienet it-tieni darba li l-KESE ħa sehem fl-akbar laqgħa annwali tan-NU dwar l-emanċipazzjoni tan-nisa. (tk)
Il-membru tal-KESE Marcin Nowacki, relatur tal-Opinjoni dwar Finanzjament tad-difiża fl-UE, jelenka r-rakkomandazzjonijiet tal-KESE għat-tisħiħ tas-sigurtà tal-UE. Issa li t-theddid għas-sigurtà qed jiżdied u l-alleanzi qed jinbidlu, il-KESE qed jappella għal mekkaniżmu ta’ difiża tal-UE unifikat u robust. L-Ewropa ma tistax tibqa’ tiddependi daqstant bil-qawwa mill-fornituri tal-armi mhux tal-UE, kif inhu l-każ bħalissa. Iżda l-kwistjoni mhijiex biss dwar żieda fl-infiq – hija pjuttost dwar infiq b’mod għaqli u effiċjenti.
Il-membru tal-KESE Marcin Nowacki, relatur tal-Opinjoni dwar Finanzjament tad-difiża fl-UE, jelenka r-rakkomandazzjonijiet tal-KESE għat-tisħiħ tas-sigurtà tal-UE. Issa li t-theddid għas-sigurtà qed jiżdied u l-alleanzi qed jinbidlu, il-KESE qed jappella għal mekkaniżmu ta’ difiża tal-UE unifikat u robust. L-Ewropa ma tistax tibqa’ tiddependi daqstant bil-qawwa mill-fornituri tal-armi mhux tal-UE, kif inhu l-każ bħalissa. Iżda l-kwistjoni mhijiex biss dwar żieda fl-infiq – hija pjuttost dwar infiq b’mod għaqli u effiċjenti.
Il-pjan ReArm Europe ġie ppreżentat mill-President tal-Kummissjoni Ewropea Ursula von der Leyen u ġie approvat mis-27 Stat Membru f’summit speċjali fis-6 ta’ Marzu. Fih ħames proposti ewlenin; ċertament huma interessanti, iżda jistħoqqilhom ukoll aktar diskussjoni.
Il-pjan ReArm Europe ġie ppreżentat mill-President tal-Kummissjoni Ewropea Ursula von der Leyen u ġie approvat mis-27 Stat Membru f’summit speċjali fis-6 ta’ Marzu. Fih ħames proposti ewlenin; ċertament huma interessanti, iżda jistħoqqilhom ukoll aktar diskussjoni.
L-ewwel proposta hija l-flessibbiltà fil-Patt ta’ Stabbiltà u Tkabbir.
Il-Kummissjoni qed tipproponi li tattiva l-klawżola liberatorja tal-Patt ta’ Stabbiltà u Tkabbir, li tippermetti lill-Istati Membri jżidu l-infiq għad-difiża b’ 1,5 % tal-PDG mingħajr ma jirriskjaw il-ftuħ ta’ proċedura ta’ defiċit eċċessiv. L-iffrankar mistenni? “Kważi EUR 650 biljun” fuq erba’ snin. L-Ewropa jeħtieġ li żżid b’mod sinifikanti l-infiq tagħha għad-difiża, targumenta Ursula von der Leyen.
It-tieni proposta hija strument ġdid ta’ self għad-difiża.
Dan l-istrument ikun jiswa EUR 150 biljun, iffinanzjat permezz ta’ self mill-baġit tal-UE taħt sistema simili għall-assistenza makrofinanzjarja. Hija maħsuba biex tintuża f’oqsma ta’ prijorità fejn hemm nuqqasijiet serji: difiża tal-ajru u tal-missili (l-inizjattiva Ġermaniża European Sky Shield), sistemi tal-artillerija, missili u munizzjon, sistemi ta’ drones u ta’ kontra d-drones, abilitanti strateġiċi, protezzjoni tal-infrastruttura kritika (inkluż fir-rigward tal-ispazju), mobilità militari, ċibernetika, intelliġenza artifiċjali u gwerra elettronika.
Biex tħaffef il-proċess, il-Kummissjoni tipproponi li tuża l-Artikolu 122 tat-Trattat: meta jintuża f’ċirkostanzi eċċezzjonali, dan jirrikjedi sempliċement il-qbil tal-Istati Membri fi ħdan il-Kunsill tal-UE, waqt li l-Parlament Ewropew ikun infurmat biss. Dan biex jiġi evitat il-proċess demokratiku li jista’ jiġi kkontestat. Il-pjan biex tissaħħaħ id-difiża tal-Ewropa ġie approvat fis-summit ta’ Versailles f’Marzu 2022 – tliet snin ilu! Jidher li huwa diffiċli li wieħed jiġġustifika li dan jissejjaħ “urġenti”.
It-tielet proposta hija li jintużaw il-fondi reġjonali.
Fuq medda qasira ta’ żmien, il-Kummissjoni tinsisti li l-Unjoni Ewropea tista’ tagħmel aktar bil-baġit Ewropew billi talloka mill-ġdid fondi minn ċerti intestaturi tal-baġit. Tipproponi li l-Istati Membri jingħataw l-għażla “li jużaw il-programmi tal-politika ta’ koeżjoni biex iżidu l-infiq fuq id-difiża”, u trid tiffaċilita l-proċess għal trasferimenti volontarji lejn fondi oħra tal-UE b’objettiv ta’ difiża.
Dan jirrappreżenta tnaqqis kbir fil-pjan baġitarju pluriennali attwali (2021-2027). Il-mistoqsija hija: għandna nissagrifikaw il-koeżjoni soċjali jew reġjonali għall-fini tad-difiża? Din kwistjoni għal dibattitu.
Fl-istess ħin, il-pjattaforma STEP għat-teknoloġiji strateġiċi tista’ tiġi mobilizzata aktar billi tiġi estiża għat-teknoloġiji kollha fis-settur tad-difiża. Possibbiltà oħra, skont il-Kummissjoni, hija r-rilassament tar-restrizzjonijiet eżistenti, bħar-regoli tal-kompetizzjoni jew ir-regoli dwar il-prefinanzjament u l-kofinanzjament.
Ir-raba’ proposta hija s-self mill-BEI.
Il-Bank Ewropew tal-Investiment (BEI) u l-azzjonisti tiegħu (l-Istati Membri) ripetutament esprimew l-oppożizzjoni tagħhom għal kwalunkwe pass ulterjuri lejn self lis-settur purament militari, u li jippreferu s-settur doppju. Il-Kummissjoni għalhekk qed tinsisti li tinbidel il-politika tal-BEI.
Il-ħames proposta hija l-mobilizzazzjoni tal-kapital privat.
L-għan huwa li l-kumpaniji tad-difiża jingħataw l-aħjar aċċess possibbli għall-kapital, għall-finanzjament – problema rikorrenti għall-industrija. Din l-idea għandha tiġi inkluża fil-komunikazzjoni dwar Unjoni tat-Tfaddil u tal-Investimenti.
