KESE info

L-UE impenjat ruħha li taħdem lejn ekonomija sostenibbli b’livell baxx ta’ emissjonijiet ta’ karbonju u aktar effiċjenti fir-riżorsi flimkien mal-għanijiet soċjali. L-iffinanzjar ta’ dawn l-impenji, waqt li jitqiesu l-kriterji ambjentali, soċjali u ta’ governanza, jikkostitwixxi sfida enormi ta’ investiment.

Il-KESE jemmen li l-Istati Membri għandhom bżonn jibnu qafas Ewropew komuni ta’ sostenibbiltà bil-għan li jiġi żgurat l-appoġġ mis-sistema finanzjarja fit-transizzjoni lejn ekonomija sostenibbli. Għalhekk jappoġġja bis-sħiħ il-Pjan ta’ Azzjoni tal-Kummissjoni dwar l-iffinanzjar tat-tkabbir sostenibbli, u jirrakkomanda l-implimentazzjoni rapida iżda gradwali tiegħu. Il-qafas propost ikun xprun importanti biex terġa’ tinkiseb il-fiduċja fis-swieq finanzjarji u li t-tfaddil jintrabat ma’ investiment sostenibbli fl-ekonomija reali.

Għalkemm il-KESE jirrikonoxxi r-rwol ewlieni tal-parteċipanti tas-suq finanzjarju fit-tranżizzjoni, huwa jenfasizza li s-soċjetà inġenerali għandha tkun involuta jekk is-sistema għandha tkun fattibbli.

Jagħmel sens li t-tranżizzjoni titnieda billi tiġi stabbilita tassonomija ta’ sostenibbiltà tal-UE, kif ukoll parametri referenzjarji b’livell baxx tal-karbonju. It-tassonomija għandha tkun dinamika u tqis ir-realtà tan-negozji. L-għan aħħari għandu jkun li t-tassonomija tiġi promossa madwar id-dinja u tiġi inkorporata fil-liġi tal-UE b’mod uniformi u simultanju fl-Istati Membri kollha. Għandhom jiġu introdotti miżuri biex jiġi żgurat li din tkun riveduta u aġġornata regolarment.

Għalkemm il-KESE jaqbel li l-bidu jkun il-konfigurazzjoni u l-introduzzjoni ta’ numru limitat ta’ oqsma u obbligi legali, l-ewwel u qabel kollox fatturi ambjentali, huwa jilqa’ b’sodisfazzjon l-introduzzjoni ta’ garanziji minimi soċjali u ta’ governanza mill-bidu nett. Imbagħad ikun importanti li t-tassonomija u l-obbligi legali inizjali jiġu estiżi għall-għanijiet tas-sostenibbiltà soċjali u ta’ governanza fil-futur.

Fl-aħħar nett, il-KESE jilqa’ l-obbligi fiduċjarji proposti għall-parteċipanti fis-suq finanzjarju. Dan ser jippermetti lill-investituri finali jallinjaw id-deċiżjonijiet tagħhom ta’ investiment mal-preferenzi tagħhom ta’ sostenibbiltà.

Aktar informazzjoni: ECO/456 ECO/466 ECO/467 (jk)

It-titoli koperti minn bonds sovrani (SBBSs) jistgħu jikkontribwixxu għal diversifikazzjoni akbar u tnaqqis tar-riskji għal portafolli ta’ bonds sovrani miżmuma minn banek u operaturi finanzjarji oħrajn. Dan jista’ jkollu impatt pożittiv fuq l-istabbiltà u r-reżiljenza tas-sistema finanzjarja u jtejjeb l-integrazzjoni tas-suq finanzjarju.

Il-KESE għalhekk jappoġġja l-proposta leġislattiva tal-Kummissjoni li tistabbilixxi qafas ta’ abilitazzjoni li jippermetti li l-SBBSs jiġu żviluppati mis-suq. Il-Kumitat jappoġġja l-introduzzjoni u l-ittestjar ta’ SBBSs fuq is-swieq, iżda fl-istess ħin jappella li għadd ta’ mistoqsijiet miftuħa fil-proposta għandhom jiġu indirizzati. 

“L-uniku mod biex naraw jekk il-banek u l-investituri humiex tassew interessati fl-SBBSs huwa billi nittestjawhom”, qal Daniel Mareels, ir-relatur għall-Opinjoni dwar is-suġġett. L-SBBSs jistgħu jgħinu biex ikomplu jdgħajfu r-rabta mill-qrib bejn il-banek u l-pajjiżi ta’ oriġini tagħhom. Il-KESE ilu jappella għal aktar azzjoni biex jinkiseb dan sa mill-aħħar kriżi finanzjarja.

Madankollu, se jkun importanti li niżguraw iċ-ċarezza, l-effikaċja u l-effettività tal-qafas propost u, filwaqt li l-KESE jaqbel ma’ ħafna aspetti tal-proposta, oħrajn jeħtieġ li jissaħħu: il-monitoraġġ mill-ESMA jeħtieġ, pereżempju, li jkun aktar strinġenti u jibda aktar kmieni, jekk entitajiet bi skop speċjali se jitħallew jiċċertifikaw huma stess il-kompożizzjoni tal-portafolli sottostanti tal-SBBSs.

Għadd ta’ mistoqsijiet mhux imwieġba jridu jiġu indirizzati wkoll, inkluż jekk l-SBBSs jaħdmux b’mod effettiv taħt iċ-ċirkustanzi kollha, u se jkun hemm il-ħtieġa għal aktar riflessjoni dwar jekk l-SBBSs għandhomx jiġu offruti għal min ifaddal u l-konsumaturi.

Il-qafas propost għandu jkun żviluppat ulterjorment fi djalogu mill-qrib mal-partijiet interessati kollha. (jk)

Il-KESE jappoġġja l-fond il-ġdid għall-ażil u l-migrazzjoni u l-fond għall-ġestjoni tal-fruntieri u l-viżi. Fl-Opinjoni adottata matul is-sessjoni plenarja tiegħu f’Ottubru u abbozzata minn Giuseppe Iuliano, il-Kumitat jaqbel mad-deċiżjoni tal-Kummissjoni li jiżdied il-baġit għaż-żewġ oqsma ta’ politika, iżda jgħid li l-kelma "integrazzjoni" għandha tibqa’ fl-isem tal-fond għall-migrazzjoni, u li jenħtieġ li jsiru dispożizzjonijiet għall-aċċess regolari fl-UE.

"It-tneħħija tal-kelma 'integrazzjoni' mit-titolu tal-Fond għall-Migrazzjoni u l-Asil hija inkwetanti mhux ħażin," qal Is-Sur Iuliano. "Tista’ tinftiehem li tkun qed tonqos il-preokkupazzjoni dwar din il-kwistjoni. Ejja ma ninsewx li t-trattament ugwali u l-politiki kontra d-diskriminazzjoni huma pilastri tal-politiki Ewropej, flimkien ma’ dawk marbuta mal-integrazzjoni taċ-ċittadini ta’ pajjiżi terzi," kompla jgħid. "Il-kelma 'integrazzjoni' jenħtieġ li titqiegħed lura fit-titolu, peress li l-inklużjoni hija sfida għall-Istati Membri".

Barra minn hekk, il-proposta tal-Kummissjoni tiffoka speċifikament fuq il-wasliet irregolari fil-punti ta’ kontroll fuq il-fruntiera, mingħajr ma ssemmi l-ebda rotot ta’ aċċess standard għall-UE. Bl-istess mod, m’hemm l-ebda referenza speċifika għall-protezzjoni tad-drittijiet fundamentali fil-punti ta’ kontroll fuq il-fruntiera. Il-Kumitat jappoġġja d-dritt għall-ażil u jappella għal politika komuni tal-migrazzjoni, bi strumenti li jiffaċilitaw il-migrazzjoni regolari u ordnata. Neħtieġu progress u innovazzjoni fis-sistema integrata Ewropea dwar il-migrazzjoni. Huwa għalhekk li rridu nirriformaw is-sistema ta’ Dublin. (mp)

Il-KESE huwa kritiku ħafna dwar it-tnaqqis propost ta’ sitta fil-mija fl-allokazzjonijiet tal-Fond Soċjali Ewropew Plus il-ġdid, li fil-perjodu ta’ finanzjament 2021-2027 il-ġdid, se jgħaqqad diversi fondi u programmi eżistenti li għandhom l-għan li jsaħħu d-dimensjoni soċjali tal-Unjoni.

Il-KESE jopponi l-eliminazzjoni tas-sehem minimu obbligatorju tal-fondi allokati għall-FSE+ fil-baġit li jmiss tal-politika ta’ koeżjoni (li attwalment huwa ta’ 23.1%); lanqas ma jaqbel mal-proposta għal tnaqqis fir-rata Ewropea ta’ kofinanzjament tal-Fond.

Il-KESE jappella għal 30% tar-riżorsi għall-politiki tal-UE għall-koeżjoni ekonomika, soċjali u territorjali biex jiġu allokati għall-FSE+ u jirrakkomanda li 30% tar-riżorsi tal-FSE+ jiġu allokati għal miżuri ta’ inklużjoni soċjali.

 “It-tnaqqis ta’ sitta fil-mija fil-finanzjament tal-FSE+ huwa inaċċettabbli meta wieħed iqis ir-rata għolja persistenti tal-faqar fl-UE, li tammonta għal iktar minn 23%,” qal Krzysztof Balon, li kiteb l-Opinjoni tal-KESE dwar il-proposta tal-Kummissjoni għall-FSE+.

Għalkemm jopponi tnaqqis fil-finanzjament, il-KESE jilqa’ l-proposta, fost affarijiet oħra minħabba l-allinjament tagħha mal-Pilastru Ewropew tad-Drittijiet Soċjali u l-fatt li tgħaqqad fondi eżistenti sabiex tissaħħaħ il-ġlieda kontra l-faqar, l-esklużjoni soċjali u l-qgħad.

Skont il-KESE, l-FSE+ għandu jiddedika ammont stabbilit ta’ fondi li jkollu fil-mira tiegħu għall-impjieg taż-żgħażagħ u għat-tisħiħ tal-kapaċitajiet tal-organizzazzjonijiet tas-soċjetà ċivili. Is-soċjetà ċivili għandha tkun involuta bis-sħiħ fl-ippjanar u fl-implimentazzjoni ta’ proġetti marbuta mal-FSE+. (ll)

Il-proposta l-ġdida tal-Kummissjoni għandha tkun aktar ambizzjuża, filwaqt li tqis il-forom kollha disponibbli ta’ trasport. Hija għandha tiffoka fuq l-intermodalità fit-trasport tal-merkanzija u tal-passiġġieri. Fl-opinjoni abbozzata minn Giulia Barbucci u adottata fis-sessjoni plenarja ta’ Ottubru, il-KESE jappoġġa t-Tielet Pakkett dwar il-Mobbiltà ppreżentat mill-Kummissjoni iżda jipproponi proġett aktar ambizzjuż.

Il-KESE jappoġġa l-proposta tal-Kummissjoni bħala pass ulterjuri lejn trasport sostenibbli għall-Ewropa. Madankollu, is-Sinjura Barbucci qalet, "Aħna ninkoraġġixxu lill-Kummissjoni biex tħares lil hinn mit-trasport bit-triq. Għandhom jitqiesu l-forom kollha disponibbli ta’ trasport sabiex jiġi żviluppat trasport sostenibbli u sikur b’mod effettiv. Għandna bżonn viżjoni aktar ambizzjuża, li tħaddan l-intermodalità bejn it-trasport pubbliku u dak privat bħala mod kif jintlaħqu l-għanijiet tal-effiċjenza, il-kwalità tal-ħajja u s-sigurtà."

Il-Kumitat iħeġġeġ ukoll lill-Kummissjoni biex ttalloka biżżejjed fondi għall-programm, jappoġġa l-pjanijiet ta’ azzjoni strateġika fir-rigward tas-sikurezza fit-toroq u l-batteriji, u jfakkar lill-Kummissjoni dwar kwistjonijiet possibbli li jikkonċernaw l-awtomatizzazzjoni sħiħa tal-vetturi u t-tranżizzjoni lejn il-vetturi elettriċi.

F’Mejju 2018, il-Kummissjoni Ewropea ppubblikat it-tielet pakkett tagħha "L-Ewropa Attiva", l-iktar kontribut riċenti tagħha fir-rigward tal-modernizzazzjoni tat-trasport Ewropew. Il-pakkett jiffoka fuq it-trasport bit-triq, b’mod partikulari fuq it-trasport bil-karozza, flimkien mat-tliet elementi maġġuri li ġejjin: is-sikurezza, il-konnettività u l-awtomatizzazzjoni, u t-trasport nadif. (mp)

ll-Programm Ewropa Diġitali li tfassal mill-Kummissjoni jieħu pass fid-direzzjoni t-tajba billi jirrikonoxxi r-rwol ewlieni li jaqdu l-ħiliet diġitali, iżda jista’ jkun aktar marbut mill-qrib tar-realtajiet soċjali. Fl-Opinjoni mfassla minn Norbert Kluge u Ulrich Samm u adottata fis-sessjoni plenarja ta’ Ottubru, il-KESE jappoġġja l-proposta tal-Kummissjoni u jindika li d-diġitalizzazzjoni fl-Ewropa għandha tkun inklużiva, filwaqt li d-“dividend diġitali” għandu jkun distribwit b’mod ugwali permezz ta’ miżuri ta’ politika adegwati.

“Peress li d-diġitalizzazzjoni taffettwa liċ-ċittadini kollha u l-oqsma kollha tal-ħajja, huwa importanti ħafna li ċ-ċittadini kollha tal-UE jkunu jistgħu jibbenefikaw minnha, qal is-Sur Kluge. Kompla jgħid li d-diġitalizzazzjoni fl-Ewropa trid issir inklużiva.”. “Iċ-ċittadini m’għandhomx jiġu esklużi mill-progress diġitali minħabba fatturi bħall-ġeneru, l-istatus soċjali, il-livell ta’ edukazzjoni, il-kwalifiki, il-ħiliet diġitali, l-oriġini, l-età jew id-diżabbiltà.

L-għarfien u l-ħiliet diġitali huma essenzjali u ġew rikonoxxuti bħala element prinċipali fil-programm. Huwa importanti ħafna li n-negozji, il-ħaddiema u l-konsumaturi jiġu megħjuna jakkwistaw u jużaw it-teknoloġiji diġitali kemm bażiċi kif ukoll avvanzati. It-taħriġ jista’ jiġi pprovdut permezz ta’ ċentri tal-innovazzjoni diġitali, stabbiliti fil-lokal fir-reġjuni. “Nilqgħu tikketta Ewropea ta’ eċċellenza għaċ-ċentri tal-innovazzjoni diġitali biex jiġu promossi l-interkonnessjonijiet u jiġi żgurat li jiġu pprovduti ħiliet diġitali,” enfasizza is-Sur Samm.

F’Ġunju 2018 il-Kummissjoni Ewropea ppreżentat Il-programm Ewropa Diġitali għall-perjodu 2021-2027, bil-ħsieb li jiġi stabbilit suq uniku diġitali u l-Ewropa ssir attur ewlieni fid-diġitalizzazzjoni waqt li tiżdied is-saħħa ekonomika tagħha u l-kompetittività tagħha fix-xena dinjija. (mp)

Is-servizzi finanzjarji transfruntiera diġitali żgur mhumiex popolari mal-konsumaturi Ewropej, li xorta għadhom jippreferu l-kuntatt wiċċ imb wiċċ li joffru l-banek nazzjonali tal-bejgħ bl-imnut. Hemm il-ħtieġa għal aktar sforzi sabiex il-konsumaturi Ewropej ikollhom għażla aħjar, prodotti li jinftiehmu faċilment u servizzi affordabbli, filwaqt li nħarsu aktar it-tranżazzjonijiet transfruntiera u nagħmluhom aktar siguri. Dawn kienu l-konklużjonijiet ewlenin li ħarġu minn dibattitu li seħħ fis-sede tal-KESE fis-26 ta’ Settembru.

L-avveniment, intitolat Il-konsumaturi fil-qalba tal-finanzi fl-Ewropa, ġie organizzat mis-Sezzjoni tas-Suq Intern tal-KESE (INT) b’kooperazzjoni mal-ERFF (European Retail Financial Forum). Għaqqad flimkien, fost oħrajn: membri tal-KESE Ariane Rodert, il-President tas-Sezzjoni INT, Petru Sorin Dandea, relatur għall-pjan ta’ azzjoni ta’ FinTech, Carlos Trias Pintó, relatur għall-Pjan ta’ Azzjoni dwar Finanzi Sostenibbli u għar-Regolament dwar id-divulgazzjonijiet u l-konsulenza u korelatur għall-Pjan ta’ Azzjoni dwar is-Servizzi Finanzjarji għall-Konsumatur; rappreżentanti tal-konsumaturi Evangelia Kekeleki u Claude Mader; MEPs Othmar Karas u Molly Scott Cato; Renatas Mazeikas, Kap tal-Unità għall-Politika tal-Konsumatur tal-Kummissjoni Ewropea; rappreżentanti tal-ERFF; u organizzazzjonijiet tal-konsumaturi u uffiċjali pubbliċi nazzjonali.

Id-dibattiti kienu strutturati madwar żewġ panels:

• Konverżjonijiet transfruntiera, mergers u diviżjonijiet
• It-tisħiħ tat-trasparenza u l-fiduċja għal futur sostenibbli

Il-parteċipanti qablu li l-konsumaturi Ewropej ma jaċċettawx id-diġitalizzazzjoni sħiħa, minħabba li l-kuntatt fiżiku għadu importanti ħafna għalihom. Attwalment huma biss 7 % li jagħmlu użu minn tranżazzjonijiet finanzjarji transfruntiera. In-nuqqas ta’ fiduċja huwa aċċentwat mill-fatt li l-leġislazzjoni tal-UE dwar il-konsumatur mhix trasposta b'mod uniformi madwar l-Ewropa. Il-konferenza kkonkludiet li għalkemm il-konsumaturi għadhom 'il bogħod mill-qalba tal-finanzi, dawn għandhom isiru l-fokus prinċipali ta’ dan il-qasam.

L-ewwel panel enfasizza li l-Istati Membri għandhom jinfurmaw liċ-ċittadini tagħhom kemm dwar il-potenzjal u r-riskji taċ-ċibersigurtà kif ukoll dwar il-protezzjoni tad-data sabiex jagħmlu s-Suq Uniku Diġitali realtà. Enfasizza l-ħtieġa li tiġi promossa l-fiduċja billi jingħataw pariri lill-konsumaturi dwar id-drittijiet tagħhom u billi jiġi pprovdut aċċess faċli għar-rimedju, u żvela li 74 % mit-48 000 talba għall-assistenza trattati mill-ECC-Net kellhom x’jaqsmu mal-kummerċ elettroniku.

Il-kelliema ħadu nota tal-fatt li FinTech ġġib magħha opportunitajiet għal kompetizzjoni akbar u spejjeż aktar baxxi għall-konsumaturi, iżda tqajjem tħassib fir-rigward ta’ pariri awtomatizzati, l-użu tal-intelliġenza artifiċjali u l-big data, u l-operat ta’ pjattaformi finanzjarji.

Il-panel enfasizza li l-proposta tal-Kummissjoni tista’ toħloq suq sekondarju għas-self improduttiv b’perikli kbar għall-konsumaturi, li kienu diġà ħallsu prezz qares għall-kriżi finanzjarja. Il-pariri finanzjarji taw it-tama lill-konsumaturi li jkunu jistgħu jagħżlu l-prodotti finanzjarji adatti, iżda d-data wriet li s-servizzi finanzjarji kklassifikaw fl-aħħar postijiet fost is-setturi kollha f’termini ta’ fiduċja u sodisfazzjon tal-konsumaturi.

It-tieni panel ġibed l-attenzjoni li l-finanzi sostenibbli huma fundamentali għal ekonomija sostenibbli, bi studji li juru li 70 % tal-investituri jimpurtahom mill-ambjent. Ġie enfasizzat li l-aġenziji ta’ klassifikazzjoni li jivvalutaw il-kwalità ta’ prodotti finanzjarji għandhom jipprovdu wkoll tagħrif ċar dwar kif intużaw l-investimenti.

Waħda mir-rakkomandazzjonijiet kienet li jiġi definit it-terminu "prodotti ewlenin” sempliċi, komparabbli u trasparenti għall-konsumaturi madwar l-UE permezz ta’ diversi sistemi ta’ distribuzzjoni diġitali, sabiex il-konsumaturi jiġu mħeġġa jafdaw dawn il-prodotti.

Id-differenzi legali u lingwistiċi, it-tariffi ogħla u n-nuqqas ta’ aċċess għal ċerti servizzi u prodotti finanzjarji għal dawk mhux residenti, id-differenzi fit-taxxa, ir-riskji tar-rata tal-kambju, eċċ. huma ostakli li għandhom jitneħħew. Ġiet enfasizzata l-ħtieġa għal mezzi tax-xandir diġitali li japplikaw il-prinċipji tan-newtralità teknoloġika, il-proporzjonalità u l-integrità, minħabba l-fatt li bejn 60 u 70 % tal-konsumaturi huma kontra l-iżvelar tad-data tagħhom lill-partijiet terzi. (dm)

Fir-ritratt, mil-lemin għax-xellug:  Membri tal-KESE Carlos Trias Pinto, Ariane Rodert u Michael Ikrath, l-MEP Othmar KARAS u Fiona Murray mill-ERFF