KESE info

Stqarrija ta’ Luca Jahier, President tal-KESE

It-tim #vonderleyen jiġi approvat: Ejjew issa nwasslu Ewropa Sostenibbli fl-interess taċ-ċittadini tagħha!

27.11.2019

Il-vot tal-lum fil-Parlament Ewropew jwitti t-triq għal era ġdida għall-Ewropa. Ninsab konvint li l-President il-ġdid tal-Kummissjoni, Ursula von der Leyen, u t-tim tagħha ta’ Viċi Presidenti Eżekuttivi, Viċi Presidenti u Kummissarji, se jagħtu momentum ġdid għall-kontinent tagħna, wara r-riżultati inkoraġġanti tal-elezzjonijiet Ewropej f’Mejju. Iċ-ċittadini tagħna tawna ħames snin biex nibnu l-Ewropa t’għada u m’għandniex naħlu din l-opportunità.

L-aġenda għall-Ewropa tal-President il-ġdid tal-Kummissjoni, li inkludiet il-Patt Ekoloġiku bħala l-istrateġija l-ġdida tagħna ta’ tkabbir għal Ewropa sostenibbli, l-ugwaljanza bejn is-sessi u d-drittijiet fundamentali, tirrifletti mill-qrib il-prijoritajiet tal-Kumitat Ekonomiku u Soċjali Ewropew (KESE). Id-dar tagħna tas-soċjetà ċivili Ewropea temmen bis-sħiħ li wasal iż-żmien li l-UE tħaddan u timplimenta aġenda sostenibbli ambizzjuża. Dan se jeħtieġ bidla fil-mentalità tagħna.

Fis-sessjoni plenarja tiegħu ta’ Ottubru, il-KESE ppreżenta l-kontribut tiegħu għall-programm ta’ ħidma tal-Kummissjoni Ewropea għall-ħames snin li ġejjin, filwaqt li nnota li l-UE trid tiffoka fuq it-tibdil fil-klima, id-diġitalizzazzjoni, l-istat tad-dritt u l-globalizzazzjoni, u trid tħaddan sistema ġdida ta’ governanza, waħda li tinvolvi aktar mill-qrib l-organizzazzjonijiet tas-soċjetà ċivili.

Il-KESE jirrakkomanda lill-Kummissjoni Ewropea li tistruttura l-pjan ta’ ħidma futur tagħha għall-2020 u lil hinn madwar dan il-pilastru. Il-Kumitat jappella wkoll għal strateġija globali tal-UE għall-2050 għas-sostenibbiltà, sabiex tiġi implimentata l-Aġenda 2030 tan-NU u s-17-il Għan ta’ Żvilupp Sostenibbli (SDGs) tagħha – xi ħaġa li l-Unjoni Ewropea impenjat ruħha li tilħaq sal-2030.

Jeħtieġ li naġixxu fil-livelli kollha fl-istess ħin u noħolqu dinamika ta’ azzjoni biex jiġu indirizzati sfidi ambjentali, ekonomiċi u soċjali urġenti. L-implimentazzjoni tal-Pilastru Soċjali għal tranżizzjoni ġusta hija ta’ importanza ewlenija. Il-Kumitat jenfasizza wkoll li struttura ġdida ta’ governanza tal-UE, kif ukoll regoli u strumenti ġodda għat-tfassil u l-implimentazzjoni tal-politiki tal-UE, hija kruċjali. B’mod partikolari, ir-rwol tal-Parlament Ewropew għandu jissaħħaħ, sabiex tissaħħaħ ir-responsabbiltà demokratika.

L-għan tas-sostenibbiltà fid-dimensjonijiet kollha tagħha jitlob sforz u impenn konsiderevoli mill-partijiet kollha involuti. Għaldaqstant, dibattitu demokratiku miftuħ, ibbażat fuq l-involviment strutturat tas-soċjetà ċivili, huwa essenzjali biex it-tranżizzjoni tkun ġusta u effettiva.

Ninnota wkoll id-deċiżjoni tas-Sinjura von der Leyen li tniedi sforz ġdid għad-demokrazija Ewropea permezz ta’ Konferenza dwar il-Ġejjieni tal-Ewropa. Konferenza bħal din għandha tiġi organizzata bl-involviment sħiħ tal-KESE, bħala l-istituzzjoni tal-UE li hija l-eqreb taċ-ċittadini u r-rappreżentant l-aktar awtentiku tad-demokrazija parteċipattiva. Fl-aħħar nett, ninsab kuntent li nara li l-kultura issa hija rikonoxxuta bħala l-pont bejn il-passat u l-futur tagħna, u inkluż b’isem ġdid fil-portafoll tal-Kummissarju Mariya Gabriel.

Aħna issa, aktar minn qatt qabel, qed nieħdu impenn li nappoġġjaw Unjoni li qed tistinka għal aktar.

Kif qal il-President il-ġdid, ejjew inkomplu naħdmu, FLIMKIEN!

Is-sessjoni plenarja tal-KESE tat-30 ta’ Ottubru inkludiet dibattitu ma’ Michel Barnier, in-negozjatur ewlieni tal-Unjoni Ewropea għall-Brexit. Matul id-dibattitu, is-Sur Barnier talab għal sħubija mill-qrib bejn l-UE u r-Renju Unit wara l-Brexit, filwaqt li fakkar li l-paċi fl-Irlanda għandha tkun prijorità u li “l-integrità tas-suq uniku mhijiex negozjabbli”.

Michel Barnier aġġorna lill-membri tal-KESE dwar il-fehma tiegħu fir-rigward tal-istatus tan-negozjati tal-Brexit u insista li l-Kummissjoni Ewropea determinata tilħaq ftehim dwar Brexit ordnat, peress li “għadu jeżisti r-riskju li l-Brexit iseħħ mingħajr ftehim ratifikat”. Huwa enfasizza wkoll li “l-Brexit huwa biss stadju, mhux destinazzjoni finali” u li l-aktar sfida importanti issa hija li tinbena mill-ġdid sħubija ġdida bejn l-UE u r-Renju Unit, ibbażata fuq żewġ pilastri: l-iskambju ekonomiku u l-kooperazzjoni fil-qasam tas-sigurtà u tad-difiża.

Il-president tal-KESE, Luca Jahier, fetaħ id-dibattitu, filwaqt li enfasizza r-rwol importanti li r-rappreżentanti tas-soċjetà ċivili jista’ jkollhom f’xenarju ta’ wara l-Brexit. “Huwa kruċjali li r-relazzjoni li nbniet matul dawn l-aħħar 44 sena mal-organizzazzjonijiet Brittaniċi tas-soċjetà ċivili ma tkunx biss preservata iżda saħansitra tiġi msaħħa; għad fadal ħafna xi jsir u se jkun xogħol iebes, iżda l-KESE dejjem se jkun fuq in-naħa tagħkom”, qal is-Sur Jahier.

Il-Kumitat Ekonomiku u Soċjali Ewropew għażel ħames finalisti minn fost il-kważi 180 proġett ta’ ispirazzjoni li rċieva għall-Premju tiegħu għas-Soċjetà Ċivili 2019 iddedikat għat-tisħiħ tal-pożizzjoni tan-nisa u għall-ġlieda fir-rigward tal-ugwaljanza bejn is-sessi.

Dawk innominati, elenkati f’ordni alfabetika, huma:

• Proġett dwar il-Ħrejjef, mill-Assoċjazzjoni Bulgara NAIA, li tgħallem l-ugwaljanza bejn is-sessi lit-tfal ta’ taħt l-età skolastika permezz tal-ħrejjef klassiċi;
• #mimmitkoodaa (Kodiċi tan-Nisa), programm mill-Assoċjazzjoni Finlandiża tas-Software u tan-Negozju Elettroniku (Ohjelmisto- ja e-business ry), li tiġġieled l-isterjotip li l-iżviluppaturi kollha tas-softwer huma rġiel b'mod prestabbilit;
• Strajk tan-Nisa Pollakki, li jagħti s-setgħa lill-attivisti nisa fi bliet żgħar u ta’ daqs medju biex jiġġieldu għall-bidla;
• The Brussels Binder mill-Belġju, għas-sostenn ta’ rappreżentanza aħjar tan-nisa fid-dibattiti politiċi Ewropej;
• Toponomastica femminile, proġett Taljan li jaħdem biex iżid l-għadd ta’ postijiet li jissemmew għal nisa importanti, bil-għan li dawn jingħataw ir-rikonoxximent pubbliku li jistħoqqilhom.

Iċ-ċerimonja tal-għoti tal-premjijiet se ssir fit-12 ta’ Diċembru waqt is-sessjoni plenarja tal-KESE fi Brussell, meta se tiġi żvelata l-klassifikazzjoni finali. Ir-rebbieħ tal-ewwel premju se jmur lura d-dar b’EUR 14 000 u l-kumplament tal-finalisti se jirċievu EUR 9 000 kull wieħed.

Il-KESE għażel din it-tema għall-Premju tas-Soċjetà Ċivili 2019 minħabba li xtaq itenni l-impenn qawwi tiegħu għall-ugwaljanza bejn is-sessi, xi ħaġa li għadha mhijiex realtà fl-Ewropa. In-nisa għadhom jaqilgħu inqas mill-irġiel, isofru minn diskriminazzjoni u ta’ spiss jisfaw vittmi ta’ vjolenza sessista. Billi jonora l-proġetti li juru kisbiet tanġibbli fit-trawwim ta’ opportunitajiet indaqs, il-KESE jittama li jenfasizza l-progress li sar lejn soċjetà aktar ugwali għan-nisa u l-irġiel u li jħeġġeġ aktar azzjoni. (ll)

F’dawn l-aħħar snin, wara l-kriżi finanzjarja, bosta Stati Membri tal-UE stabbilixxew skemi ta’ ċittadinanza u residenza b’investiment sabiex jattiraw l-investiment u jżidu d-dħul tagħhom. Skont Opinjoni adottata mill-KESE fis-sessjoni plenarja ta’ Ottubru, din il-prattika toħloq riskji serji u għandha tiġi pprojbita fl-Istati Membri kollha tal-UE.

Għadd kbir ta’ Stati Membri stabbilixxew skemi li jippermettu ċittadini mhux tal-UE jaċċessaw b’mod rapidu ċ-ċittadinanza jew residenza tal-UE bi skambju għal investimenti sinifikanti fl-Istat Membru inkwistjoni – bl-Ingliż imsejħa wkoll bħala “golden passports” jew “golden visas”. Il-KESE jqajjem dubji dwar dawn il-prattiki fl-Opinjoni tiegħu dwar Skemi ta’ Ċittadinanza u ta’ Residenza b’Investiment u jħeġġeġ lill-Istati Membri jeliminaw gradwalment dawn l-iskemi jew jipprovdu argumenti raġonevoli biex ma jagħmlux dan.

L-Opinjoni tal-KESE tapprova rapport reċenti tas-servizz ta’ riċerka tal-Parlament Ewropew, li wkoll appella biex jintemmu minnufih l-iskemi eżistenti kollha. Barra minn hekk, rapport tal-Kummissjoni Ewropea jirrimarka li dawn l-iskemi jippreżentaw riskji relatati mas-sigurtà, il-ħasil ta’ flus, l-evażjoni tat-taxxa u ċ-ċirkomvenzjoni tar-regoli tal-UE.

Jean-Marc Roirant, ir-relatur tal-Opinjoni tal-KESE, issottolinja li "dawn l-iskemi ħafna drabi mhumiex konformi mad-drittijiet fundamentali li fuqhom hija mibnija l-kooperazzjoni Ewropea" u enfasizza l-ħtieġa li dawn l-iskemi jiġu eliminati gradwalment madwar l-UE: "Il-KESE jinsab imħasseb ħafna dwar il-promozzjoni tad-drittijiet tal-UE u ċ-ċittadinanza tal-UE bħala prodott għall-bejgħ". (dgf)

L-iżvilupp sostenibbli jrid ikun fil-qalba tal-futur tal-Ewropa. Fir-riżoluzzjoni abbozzata minn Patricia Círez Miqueleiz, Rudy De Leeuw u Lutz Ribbe u adottata fis-sessjoni plenarja ta’ Ottubru, il-KESE jagħti parir lill-Kummissjoni Ewropea biex tfassal l-istruttura tal-pjan ta’ ħidma futur tagħha għall-2020 u lil hinn madwar dan il-pilastru. Il-Kumitat jitlob għal strateġija globali tal-UE għall-2050 għas-sostenibbiltà sabiex tiġi implimentata l-Aġenda 2030 u s-17-il Għan ta’ Żvilupp Sostenibbli (SDGs) tagħha, li l-Unjoni Ewropea impenjat ruħha li tilħaq sal-2030.

"Aħna ninsabu kuntenti li nagħtu l-kontribut qawwi u bbilanċjat tagħna għall-prijoritajiet politiċi tal-UE għall-ħames snin li ġejjin. Aħna nappoġġjaw il-Ftehim Ekoloġiku sostnut mill-President elett tal-Kummissjoni, Ursula von der Leyen, bħala mutur ewlieni għall-bidla. Irridu naġixxu fil-livelli kollha simultanjament u noħolqu dinamika għall-azzjoni sabiex nindirizzaw sfidi ambjentali, ekonomiċi u soċjali," qal il-president tal-KESE, Luca Jahier.

Il-KESE jenfasizza li l-iskala u l-ħeffa tal-bidla jitolbu li jittieħdu miżuri fil-pront f’erba’ oqsma: it-tibdil fil-klima, id-diġitalizzazzjoni, l-istat tad-dritt u l-globalizzazzjoni. Il-Kumitat jiddikjara wkoll li struttura ġdida ta’ governanza tal-UE hija kruċjali, flimkien ma’ regoli u strumenti ġodda għad-definizzjoni u l-implimentazzjoni tal-politiki tal-UE. B’mod partikolari, ir-rwol tal-Parlament Ewropew għandu jissaħħaħ sabiex tissaħħaħ ir-responsabbiltà demokratika. Il-KESE għandu kontribut attiv biex jagħmel għall-Konferenza dwar il-Futur tal-Ewropa proposta mis-Sinjura von der Leyen għall-2020.

Il-KESE jikkritika d-deċiżjoni tal-Kunsill li ma jiftaħx in-negozjati ta’ adeżjoni mal-Maċedonja ta’ Fuq u mal-Albanija

Il-KESE jinsab iddiżappuntat bil-kbir bid-deċiżjoni tal-mexxejja tal-UE, fil-Kunsill Ewropew tas-17-18 ta’ Ottubru, li jkomplu jipposponu l-ftuħ tan-negozjati ta’ adeżjoni mal-Maċedonja ta’ Fuq u l-Albanija.

Il-President tal-KESE Luca Jahier iqis li din hija “deċiżjoni żbaljata għat-tieni darba, u li l-ksur tal-wegħda titfa’ dubju fuq il-kredibbiltà tal-Ewropa”. Huwa ddeskriva r-Riżoluzzjoni tal-KESE bħala "impenn ta’ solidarjetà sieket”.

Fir-Riżoluzzjoni tiegħu, il-KESE jqis li d-deċiżjoni li ma jinfetħux in-negozjati hija żball ġeostrateġiku u storiku. “L-UE jeħtiġilha ma tinjorax il-fatt li atturi globali oħra qegħdin jiftħu ġwinħajhom u qed isiru aktar attivi fir-reġjun”, issottolinja s-Sur Jahier.

"L-Ewropa hija t-tama għall-Balkani tal-Punent, b’mod partikolari għaż-żgħażagħ”, qalet Dilyana Slavova, President tas-Sezzjoni tal-KESE għar-Relazzjonijiet Esterni, fejn appellat ukoll lill-membri biex jaraw it-tkabbir bħala riunifikazzjoni.

Id-dikjarazzjoni tas-7 Forum tas-Soċjetà Ċivili tal-Balkani tal-Punent tenniet li t-tkabbir ixerred il-valuri demokratiċi u l-istandards legali fil-Balkani tal-Punent. Il-Membri wissew li ma għandux jiġi ssottovalutat is-sinjal li kien se jintbagħat lill-popolazzoni bil-ftuħ tan-negozjati.

“Irridu nżommu l-wegħda tagħna, u rridu nagħtu t-tama lin-nies”, kien il-messaġġ komuni.  (dgf)

Il-plenarja ta’ Ottubru tal-KESE ospitat dibattitu dwar rEUnaissance – Viżjoni kulturali għall-Ewropa.

Meta fetaħ id-dibattitu, il-President tal-KESE Luca Jahier laqa’ l-fatt li Emmanuel Macron aċċetta l-idea tiegħu ta’ Rinaxximent għall-Ewropa. “M’għandniex ninsew li l-kontinent tagħna kien żona kulturali qabel ma kien idea politika, u żona bħal din ma timplikax omoġeneità iżda tirnexxi minħabba l-varjazzjoni u l-moviment.”

Andre Wilkens, Direttur tal-Fondazzjoni Kulturali Ewropea, iddikjara li l-kultura tista’ tintuża ħażin biex tifred il-komunitajiet u tkun ta’ theddida għall-integrazzjoni Ewropea. Pier Luigi Sacco, konsulent speċjali għall-Kummissarju Ewropew Tibor Navracsics qabel li “m’għandniex nissottovalutaw il-poter tal-kultura biex jagħmel differenza”, u spjega kif il-kultura tista’ tkun xprun għall-bidla, li kapaċi twassal biex in-nies jinkwietaw inqas dwar dak li mhuwiex magħruf.

Elke Kaschl Mohni, Direttur tal-Goethe Institute fi Brussell, irreferiet għar-rwol tal-kultura fir-relazzjonijiet esterni u poġġiet l-enfasi fuq il-lealtà u l-iskambji interpersonali. Hija ddikjarat li “l-għan tar-relazzjonijiet kulturali huwa li jissaħħu l-fiduċja u l-fehim”. Fl-aħħar, Airan Berg, Direttur Artistiku tal-Festival tar-Reġjuni, spjega kif il-kultura u l-arti jistgħu joħorġu lin-nies mill-istat ta’ kumdità.

Is-Sur Jahier ikkonkluda li l-kultura għandha tkun prijorità fit-tfassil ta’ politika u ssuġġerixxa li jinħoloq korp ġdid fil-KESE li jindirizza l-kwistjonijiet kulturali. (sma)

Il-potenzjal tal-bijoekonomija blu għadu mhux sfruttat fl-UE. Il-KESE għalhekk jirrakkomanda proġetti pilota pan-Ewropej li jinvolvu l-partijiet interessati lokali u l-komunità xjentifika. 

Fuq it-talba tal-Presidenza Finlandiża, il-KESE fassal opinjoni esploratorja dwarIl-bijoekonomija blu, li tirreferi għal attivitajiet ekonomiċi bbażati fuq l-użu sostenibbli tar-riżorsi akkwatiċi rinnovabbli u l-għarfien espert relatat. L-opinjoni ġiet adottata fis-sessjoni plenarja ta’ Ottubru tal-KESE.

Kif spjega r-relatur Simo Tiainen, “Ir-restawr tal-bijodiversità tal-ibħra, l-għadajjar u x-xmajjar ser tiftaħ opportunitajiet ġodda għan-negozji. Dan jirrikjedi innovazzjoni teknoloġika u appoġġ finanzjarju permezz ta’ strumenti xierqa."

Il-bijoekonomija blu għandha ssir punt fokali għall-programm ta’ kooperazzjoni tal-UE man-Nazzjonijiet Uniti u għandha sservi bħala għodda biex jintlaħqu l-għanijiet tat-tibdil fil-klima fil-Ftehim ta’ Pariġi. "Dan se jirrikjedi sforzi importanti biex tiġi rrestawrata l-bijodiversità fl-ilmijiet tal-baħar u fl-ilmijiet interni kif ukoll biex jiġi sfruttat il-potenzjal tagħhom għall-qbid tas-CO₂. B’dan il-mod nistgħu noħolqu impjiegi ta’ kwalità fiż-żoni rurali, kostali u tal-gżejjer", ikkonkluda l-korelatur Henri Malosse. (mr)