KESE info

Is-sessjoni plenarja ta’ Settembru tal-KESE laqgħet lill-Ombudsman Ewropea, Emily O’Reilly, li tat rendikont tal-ħidma li saret matul it-terminu tagħha u tat ħarsa lejn l-isfidi li qed tiffaċċja l-amministrazzjoni pubblika Ewropea u kif dawn għandhom jiġu indirizzati.  Il-President tal-KESE, Luca Jahier, enfasizza l-ħtieġa għal istituzzjonijiet tal-UE orjentati lejn il-persuni.

Is-Sinjura O’Reilly irrimarkat li meta l-istituzzjonijiet tal-UE jiffaċċjaw kwistjoni sensittiva, il-kooperazzjoni bejniethom hija kruċjali għall-bidla. Qalet li “Meta jkun hemm kwistjoni diffiċli u sensittiva, il-bidla dejjem issir permezz tal-kollaborazzjoni u l-koalizzjoni tal-forzi mill-atturi kollha involuti, mill-istituzzjonijiet sal-Istati Membri”. “Huwa biss meta jintlaħaq ċertu livell ta’ pressjoni li nistgħu naraw bidla, minħabba li mbagħad il-kwistjoni tkun aktar prominenti fl-aġenda tal-istituzzjonijiet."

Is-Sur Jahier enfasizza l-fatt li l-Kumitat huwa istituzzjoni tal-UE mmirata lejn iċ-ċittadini Ewropej, u faħħar ir-rwol u l-ħidma tal-Ombudsman Ewropew f’dan ir-rigward.

Innota wkoll li "Għandna nżommu f’moħħna li l-KESE huwa magħmul minn 350 membru li huma f’kuntatt kostanti man-nies fuq il-post”. “Għandna bżonn governanza ċċentrata fuq il-persuni u nemmnu li l-Ombudsman Ewropew għandu rwol kruċjali x’jaqdi biex l-istituzzjonijiet tal-UE jiġu megħjuna jadattaw għal din il-bidla. Inti adottajt għadd ta’ miżuri f’din id-direzzjoni, u l-Kumitat qed isegwi b’mod rigoruż ir-rakkomandazzjonijiet tiegħek u se jkompli jagħmel dan fil-futur." (mp)

”L-UE hija int, l-UE għalik”. Ir-rwol tas-soċjetà ċivili fil-komunikazzjoni dwar l-Unjoni Ewropea.

Is-seminar tal-uffiċjali tal-istampa tas-soċjetà ċivili, li sar f’Málaga fl-10-11 ta’ Ottubru 2019, ġabar flimkien kważi 130 parteċipant. Organizzat mill-KESE fi sħubija mal-Università ta’ Málaga, dan is-seminar stimolar skambji intensi ta’ fehmiet dwar il-ħtieġa ta’ komunikazzjoni affidabbli, rilevanti, kostruttiva u kreattiva dwar l-Unjoni Ewropea.

Id-dibattiti laqgħu flimkien riċerkaturi, xjenzati, iżda wkoll dawk inkarigati mill-istampa u mill-komunikazzjoni ta’ organizzazzjonijiet tas-soċjetà ċivili, studenti tal-università ta’ Málaga, ġurnalisti, rappreżentanti ta’ diversi KES nazzjonali u membri tat-tliet gruppi tal-KESE.

L-għan ta’ din il-laqgħa, definit minn Isabel Caño Aguilar, Viċi President tal-KESE għall-komunikazzjoni, kien li tkun avveniment fejn jiltaqgħu n-nies biex jisimgħu, jiddibattu u jaqsmu esperjenzi dwar l-UE, li hija proġett komuni. Dan il-proġett Ewropew twieled mill-idea li jerġa’ jingħaqad kontinent maqsum, sabiex tiġi żgurata l-istabilità politika u l-koeżistenza paċifika u li tinħoloq unjoni għanja mil-lat ekonomiku.

Matul id-diskussjonijiet organizzati madwar tliet round tables, il-parteċipanti u l-mistiedna enfasizzaw ir-rwol ta’ viġilanza tal-mezzi tax-xandir, kif ukoll ir-rwol essenzjali tal-komunikazzjoni għall-edukazzjoni, it-taħriġ u biex iċ-ċittadini jkunu infurmati.

L-ewwel round table, intitolat “L-Ewropa hija t-tama”, kien immexxi mill-ġurnalista Maroun Labaki, bil-parteċipazzjoni ta’ Maria Freitas, konsulenta politika ewlenija tal-Fundazzjoni Ewropea tal-Istudji Progessivi, li tinsab fi Brussell, Nicolas Gros-Verheyde, korrespondent fi Brussell tal-gazzetta Franċiża Sud-Ouest u editur prinċipali tal-blogg B2-Bruxelles, Cristina Marconi, ġurnalista freelance u kittieba, u Kiran Klaus Patel, Professur tal-Istroja Ewropea fl-Università Ludwig-Maximilians f’Munich.

Il-ġurnalist ta’ Euractiv Jorge Valero mexxa t-tieni round table dwar is-suġġett “Flimkien għall-Ewropa”, li laqqa’ flimkien Álvaro Gallego Peris, membru tal-uffiċċju tal-kummissarju għoli Spanjol għall-Aġenda 2030, Marie-Isabelle Heiss, avukat u kandidat għall-Parlament Ewropew għall-moviment favur l-Ewropa Volt Europa, Silviu Mihai, ġurnalist freelance, riċerkatur u produttur, u Helena Seibicke, riċerkatur prinċipali fi ħdan ARENA Centre for European Studies f’Oslo.

It-tielet round table dwar “Id-demokrazija tgħaqqadna” tmexxa minn José Manuel Sanz Mingote, ġurnalist tal-aġenzija EFE, bil-parteċipazzjoni ta’ Pauline Adès-Mével (Reporters sans frontières), Maciej Zakrocki, ġurnalist tar-radju u tat-televiżjoni Pollakka, Tina Bettels-Schwabbauer (Osservatorju Ewropej tal-ġurnaliżmu), Mar Cabra (Consortium international des journalistes d’investigation) u Elina Makri (Oikomedia.com).

Għal Jacek Krawczyk, President tal-Grupp ta’ Min Iħaddem, “L-Ewropa hija dwar in-nies, l-Ewropa hija għan-nies u man-nies! Ejjew nagħtu l-Ewropa lil dawk li jagħmlu parti minnha, liċ-ċittadini tagħha.”

Oliver Röpke, President tal-Grupp tal-Ħaddiema, sejjaħ biex issir ħidma sabiex il-pilastru Ewropew tad-drittijiet soċjali jkun aċċessibbli għaċ-ċittadini. Fil-fehma tiegħu, meta jiġi proklamat pilastru soċjali, wieħed għandu jimplimentah permezz ta’ ħidma flimkien, peress li l-Ewropa hija sforz komuni.

Għal Jane Morrice, li tkellmet f’isem il-Grupp Diversity Europe, id-demokrazija tista’ tlaqqa’ flimkien, iżda mingħajr taħriġ, komunikazzjoni u informazzjoni xierqa, tista’ wkoll tissepara u tifred. Jekk id-demokrazija se tirnexxi, trid tieħu ħsieb iċ-ċittadini, tittrattahom b’empatija, b’umoriżmu.

Fi tmiem l-interventi kollha kemm tal-membri tal-panel kif ukoll tal-parteċipanti, jidher li l-objettivi kienu ntlaħqu fil-parti l-kbira tagħhom. Il-konklużjonijiet iffokaw fuq il-ħtieġa assoluta għal aktar trasparenza fl-eżerċizzju tad-demokrazija, fuq il-viġilanza fl-użu tal-komunikazzjoni u fuq ir-rwol kruċjali tal-ġurnalisti u l-midja fl-investigazzjoni u bħala difensuri tal-libertà tal-istampa u tal-valuri tad-demokrazija.(ehp)

Il-President tal-KESE, Luca Jahier, u l-Viċi President tal-Parlament Ewropew, Klára Dobrev, kellhom skambju ta’ fehmiet dwar il-futur tal-Ewropa matul dibattitu produttiv fis-sessjoni plenarja tal-KESE f’Settembru.

Is-Sur Jahier enfasizza l-importanza li l-Unjoni tkun eqreb iċ-ċittadini Ewropej, li tissaħħaħ id-demokrazija u li tiżdied il-parteċipazzjoni taċ-ċittadini fit-tfassil tal-politika tal-UE, filwaqt li fl-istess ħin l-Ewropa turi li hija impenjata li tikseb riżultati.

“Il-KESE minn dejjem kellu pożizzjoni ċara dwar il-proġett Ewropew: irridu aktar Ewropa u Ewropa aħjar, aħna se nappoġġjaw kwalkunkwe azzjoni biex jinkiseb dan, madankollu, irridu nuru liċ-ċittadini Ewropej li l-Ewropa tassew twettaq!”, huwa qal. “Iċ-ċittadini għandhom ikunu fil-qalba tal-istituzzjonijiet u mingħajr is-soċjetà ċivili, id-demokrazija tibqa’ fraġli”.

Is-Sinjura Dobrev, li ppreżentat it-temi li fuqhom il-Parlament se jiffoka matul il-leġislatura 2019-2024, innotat bi pjaċir li l-KESE u l-Parlament Ewropew huma tal-istess fehma. “Irridu nifhmu li l-mandat politiku fuq terminu qasir tagħna se jiddependi fuq l-impenn politiku fit-tul tagħna. Jeħtieġ li nisimgħu liċ-ċittadini Ewropej u dan huwa kompitu komuni tal-istituzzjonijiet kollha. Jeħtieġ li nisimgħu leħinhom: huma qegħdin jitolbu għal aktar sigurtà u għal kundizzjonijiet ta’ għajxien aħjar,” hija qalet. “Il-prijoritajiet tagħna ser ikunu l-approfondiment tal-unjoni ekonomika u monetarja, l-indirizzar tal-qgħad u l-indirizzar tal-impatt soċjali tat-tibdil fil-klima”, hija kkonkludiet. (mp)

l-KESE appoġġja l-proposta tal-Kummissjoni li t-teħid tad-deċiżjonijiet tal-UE dwar l-enerġija u l-klima jsir aktar demokratiku, speċifikament biex issir bidla mill-unanimità għall-votazzjoni b’maġġoranza kwalifikata fir-rigward ta’ kwistjonijiet ta’ taxxa fuq l-enerġija.

Fl-Opinjoni tiegħu adottata fis-sessjoni plenarja ta’ Settembru, minn Baiba Miltoviča u Dumitru Fornea, il-KESE enfasizza li t-tassazzjoni fuq l-enerġija, b’mod partikolari, hija qasam fejn hemm bżonn ta’ sistema ta’ votazzjoni rapida u aktar demokratika fil-livell tal-UE, fejn il-Parlament Ewropew jiddeċiedi fuq l-istess livell mal-Kunsill tal-Unjoni Ewropea.

Din il-bidla hija essenzjali biex tiġi emendata d-Direttiva Qafas dwar it-Tassazzjoni fuq l-Enerġija tal-2003, u biex b’hekk titlesta t-tranżizzjoni tal-enerġija u jinkisbu l-miri tal-enerġija u l-klima stabbiliti għall-2030.

“Il-konsumaturi ftit li xejn ibbenefikaw mil-liberalizzazzjoni tas-suq tal-enerġija; u mhux igwadu s-sehem ġust tagħhom mill-isforzi tal-UE fil-qasam tal-enerġija” enasizzat is-sinjura Miltoviča . “Barra minn hekk, it-tariffi tal-UE għall-utenti tal-enerġija huma diġà għoljin ħafna. Madwar 40 % tal-prezz finali tal-elettriku mħallas mill-konsumaturi Ewropej huwa magħmul minn taxxi u imposti,” żiedet tgħid.

Il-bidla mill-unanimità għall-votazzjoni b’maġġoranza kwalifikata hija diffiċli f’dan il-każ, peress li jimplika trasferiment ta’ sovranità fil-qasam sensittiv tat-tassazzjoni. Għal din ir-raġuni, is-Sur Fornea nnota li “it-trasferiment tas-sovranità għandu jimxi id f’id mal-iżvilupp ta’ Unjoni tal-Enerġija ġenwina. L-ekwità soċjali hija l-prijorità tagħna. Irridu nkunu konxji li kwalunkwe tassazzjoni fuq fjuwils li jniġġsu aktar tista’ tolqot ħażin direttament lill-partijiet dgħajfa tas-soċjetà u titqies bħala piż addizzjonali,” temm jgħid. (mp)

Kooperazzjoni u sħubija bejn il-gvernijiet u s-soċjetà ċivili se tkun kruċjali għat-twettiq ta’ riformi ambizzjużi meħtieġa għall-approfondiment tal-Unjoni Ekonomika u Monetarja (EMU), panel ta’ livell għoli ta’ uffiċjali għolja tal-UE u espertiikkonkluda fis-sessjoni plenarja tal-Kumitat Ekonomiku u Soċjali Ewropew.

Fid-dibattitu, immexxi mill-President tal-KESELuca Jahier, ipparteċipaw il-Viċi President tal-Kummissjoni Ewropea Valdis Dombrovskis, eks Ministru Grieg għall-Ekonomija Louka Katseli, Christian Ebeke mill-Fond Monetarju Internazzjonali u Tuomas Saarenheimo mill-Ministeru Finlandiż għall-Finanzi.

Il-kelliema qablu li huwa daqstant importanti li jitqiesu l-aspetti ekonomiċi, soċjali u ambjentali għat-tisħiħ tar-rwol soċjali tas-semestru Ewropew.

Is-Sur Dombrovskisħabbar li l-approfondiment tal-Unjoni Ekonomika u Monetarja se jingħata prijorità fl-aġenda li jmiss tal-Kummissjoni. Filwaqt li faħħar ir-rwol tas-soċjetà ċivili u l-kontribut importanti tagħha sabiex l-isfidi attwali jinbidlu f’opportunitajiet, is-Sur Dombrovskisfaħħar il-ħidma tal-KESE fil-qasam tad-drittijiet soċjali tal-ħaddiema kif ukoll fid-diskussjonijiet li għaddejjin dwar il-ġejjieni tal-Unjoni Ekonomika u Monetarja.

Il-President tal-KESE għalaq id-dibattitu billi qal, “Aħna nappoġġjaw Unjoni Ekonomika u Monetarja imsaħħa, għaliex ngħarfu li fl-ekonomija globalizzata, ferm kompetittiva u li tinbidel malajr tal-lum, l-ebda Stat tal-UE ma jista’ jirnexxi waħdu”. (ks/ll)

Il-Kumitat Ekonomiku u Soċjali Ewropew (KESE) laqa’ bi pjaċir il-fatt li l-Kummissjoni qed tikkunsidra li testendi l-votazzjoni b’maġġoranza kwalifikata - li tirrikjedi li l-Kunsill jadotta proposti b’kodeċiżjoni mal-Parlament Ewropew - f’aktar oqsma ta’ politika soċjali.

F’dan il-qasam, l-involviment tal-Parlament fil-proċess leġislattiv tal-UE fuq livell ugwali mal-Kunsill huwa ta’ importanza partikolari, peress li l-kwistjonijiet soċjali jinvolvu direttament liċ-ċittadini ordinarji u jaffettwaw il-koeżjoni soċjali, li huma kruċjali għas-sopravivenza tal-UE, qal il-KESE f’Opinjoni adottata fis-sessjoni plenarja tiegħu f’Settembru.

F’ċerti oqsma tal-politika soċjali, id-deċiżjonijiet għadhom jirrikjedu vot unanimu fil-Kunsill.

"Il-Parlament Ewropew għandu jsir sieħeb veru u indaqs fit-teħid tad-deċiżjonijiet tal-UE fil-qasam tal-politika soċjali. Dawn huma kundizzjonijiet importanti għal aktar ġustizzja soċjali u għal demokrazija akbar. ™Jekk Trattat jipprovdi l-mezz għal dan, x’qegħdin nistennew biex napplikawh? qal ir-relatur għall-OpinjoniChristian Bäumler.

Il-KESE insista li bl-użu tal-votazzjoni b’maġġoranza kwalifikata, l-UE tibqa’ impenjata lejn il-prinċipju tas-sussidjarjetà.

Qal li kien favur li ssir bidla sħiħa għall-votazzjoni b’maġġoranza kwalifikata fil-qasam tan-nondiskriminazzjoni, għal rakkomandazzjonijiet dwar is-sigurtà soċjali u l-protezzjoni tal-ħaddiema, kif ukoll għal deċiżjonijiet li jirregolaw il-kundizzjonijiet tal-impjieg għal ċittadini ta’ pajjiżi terzi li jirrisjedu legalment fl-UE. (ll)

Fis-26 ta’ Settembru, il-Kumitat Ekonomiku u Soċjali Ewropew (KESE) approva Opinjoni fuq inizjattiva proprja biex jitfakkar l-10 anniversarju tas-Sħubija tal-Lvant (SL).

F’din l-Opinjoni, il-KESE jirrikonoxxi l-kisbiet importanti ta’ din l-inizjattiva, iżda jappella wkoll għal aktar riformi fl-oqsma tad-demokratizzazzjoni u l-libertajiet fundamentali. L-Opinjoni tenfasizza l-ħtieġa li jissaħħaħ ir-rwol tas-soċjetà ċivili u li l-pajjiżi tas-SL jingħataw prospettiva kredibbli ta’ sħubija fl-UE biex b’hekk titnieda era ġdida ta’ kooperazzjoni.

Indrė Vareikytė, relatur tal-Opinjoni, qal li: "Ma nistgħux inkomplu naċċettaw l-approċċ ta’ universalità; il-pajjiżi li huma fuq quddiem nett u għandhom aktar ambizzjoni għandhom imexxu l-proċess. Għaxar snin għandhom ikunu biżżejjed biex jittrażmettu l-valuri tal-UE u issa s-Sħubija tal-Lvant għandha ssir politika ta’ sħubija reali, mhux politika ta’ riċevituri."

L-isfida pendenti ewlenija għall-biċċa l-kbira tal-pajjiżi tas-SL hija r-riforma demokratika. Kif jingħad fl-Opinjoni, “Il-KESE jemmen li l-UE hija l-ewwel u qabel kollox unjoni ta’ valuri, għalhekk, ir-relazzjonijiet tagħha mal-ġirien tagħha għandhom ikunu bbażati wkoll fuq l-istess valuri u jkunu kondizzjonali”. Il-pajjiżi tas-Sħubija tal-Lvant għandhom jaħdmu biex jiżguraw li d-drittijiet tal-bniedem, il-libertà ċivili, il-libertà tal-midja u l-istat tad-dritt jiġu rispettati u għandhom isaħħu l-ġlieda kontra l-korruzzjoni. (dgf)

“Jekk irridu niksbu l-Għanijiet ta’ Żvilupp Sostenibbli tan-Nazzjonijiet Uniti sal-2030, irridu naġixxu issa”, ħeġġeġ il-Kumitat Ekonomiku u Soċjali Ewropew (KESE) fl-Opinjoni tiegħu dwar id-Dokument ta’ Riflessjoni tal-Kummissjoni “Lejn Ewropa Sostenibbli sal-2030”.

L-urġenza li jiġu indirizzati l-isfidi tal-lum mhijiex riflessa fl-azzjoni politika, wissa l-KESE fl-Opinjoni. “Ix-xjenza hija ċara dwar il-konsegwenzi f’każ li ma titteħidx azzjoni”, issottolinja r-relatur Cillian Lohan, “it-tnedija ta’ Patt Ekoloġiku u Soċjali Ewropew se jkun importanti fit-trasformazzjoni tal-ekonomiji Ewropej lejn direzzjoni aktar sostenibbli”.

Dan ġie diskuss ulterjorment fil-konferenza tal-KESE dwar dan is-suġġett, li ġiet koorganizzata mill-Presidenza Finlandiża tal-UE u l-Kumitat Ewropew tar-Reġjuni.

“L-iżviluppi reċenti fil-livell tal-UE huma promettenti. L-intenzjoni tal-President elett von der Leyen hija li tħaffef it-tranżizzjoni lejn is-sostenibbiltà permezz ta’ Patt Ekoloġiku Ewropew b’Viċi President dedikat għal dan”, qal il-President tal-KESE Luca Jahier. Ir-rappreżentant Finlandiż, Sami Pirkkala, enfasizza l-opportunità għal qabża ta’ sostenibbiltà tal-UE u Daniel Calleja Crespo, id-Direttur Ġenerali ta’ DĠ ENV, enfasizza li l-impenn tal-President elett tal-Kummissjoni li tfassal Liġi Ewropa dwar il-Klima u twettaq Pjan ta’ Azzjoni ġdid għal Ekonomija Ċirkolari.

“Jeħtiġilna nitbiegħdu mid-dipendenza fuq it-tkabbir tal-PDG u nużaw indikaturi oħra tal-prosperità”, wissa’ l-korelatur tal-Opinjoni Peter Schmidt. “Jeħtiġilna nura lid-dinja li ekonomija sostenibbli reali tavvanza l-iżvilupp, tiżgura benessri ekoloġiku, u tipprovdi għall-koeżjoni soċjali li ma tħalli lil ħadd jaqa’ lura.”  (sma)

Peress li l-popolazzjoni Ewropea fl-età tax-xogħol qed tonqos b’mod kostanti, l-Unjoni Ewropea u l-Istati Membri tagħha għandhom bżonn joħolqu strateġiji komprensivi għat-tfassil ta’ politiki nazzjonali li jindirizzaw b’mod effettiv il-kwistjoni tat-tixjiħ attiv, qal il-Kumitat Ekonomiku u Soċjali Ewropew (KESE) f’Opinjoni adottata reċentement.

Fil-fehma tal-KESE, il-miżuri li ttieħdu s’issa kemm fil-livell tal-UE kif ukoll f’dak nazzjonali jidhru li huma frammentati u jidher li naqsu milli jindirizzaw id-diskriminazzjoni kontra ħaddiema akbar fl-età fis-swieq tax-xogħol tal-Ewropa. Dan spiss jaġixxi bħala deterrent qawwi għal ħafna persuni akbar fl-età biex saħansitra jfittxu xogħol, jew iwassalhom biex iħallu s-suq tax-xogħol qabel iż-żmien.

Barra minn hekk, l-impatt tal-miżuri li ġew implimentati ma ġiex evalwat sew, u dan jimpedixxi lill-Istati Membri milli jkollhom stampa ċara ta’ x’jaħdem u liema huma l-aħjar prattiki li għandhom jinxterdu aktar.

"F’dinja tax-xogħol li qed tinbidel, il-bidliet demografiċi u l-isfidi tal-impjiegi jistgħu jiġu indirizzati biss b’mod olistiku! Jeħtieġ li nsaħħu d-djalogu soċjali u ninvolvu lill-partijiet interessati kollha fl-iżvilupp ta’ strateġiji għal tixjiħ attiv,” qal ir-relatur tal-Opinjoni Irinel Eduard Floria.

Fl-Opinjoni, il-KESE jipproponi xi rakkomandazzjonijiet speċifiċi biex tiġi indirizzata l-isfida tat-tixjiħ, inkluż it-titjib tal-ħiliet permezz tat-tagħlim tul il-ħajja, il-ġlieda kontra l-isterjotipi u d-diskriminazzjoni abbażi tal-età fuq is-swieq tax-xogħol, u l-promozzjoni tas-solidarjetà bejn il-ġenerazzjonijiet. (ll)