KESE info

Għad fadal żmien għall-organizzazzjonijiet u l-individwi involuti fil-promozzjoni tal-kultura u l-wirt Ewropew biex japplikaw għall-Premju tal-2018 tal-KESE għas-Soċjetà Ċivili fi sforz kemm biex iżidu l-viżibbiltà tagħhom u jingħataw injezzjoni finanzjarja biex jiffinanzjaw il-proġetti futuri tagħhom.

Il-kandidati potenzjali jistgħu japplikaw sas-7 ta’ Settembru. Il-premju huwa maħsub għall-organizzazzjonijiet tas-soċjetà ċivili u l-individwi li kienu attivi fi:

• is-sensibilizzazzjoni tad-diversi saffi u r-rikkezza tal-identitajiet Ewropej;
• l-użu tal-potenzjal sħiħ tal-ġid kulturali Ewropew;
• l-iffaċilitar tal-aċċess għall-wirt kulturali Ewropew; u
• l-promozzjoni tal-valuri Ewropej bħar-rispett għad-dinjità tal-bniedem u d-drittijiet tal-bniedem, il-libertà, id-demokrazija, l-ugwaljanza u l-istat tad-dritt.

Total ta’ EUR 50 000 se jingħata lil massimu ta’ ħames rebbieħa.

Il-premju huwa miftuħ għall-organizzazzjonijiet tas-soċjetà ċivili kollha li huma uffiċjalment irreġistrati fl-Unjoni Ewropea kif ukoll individwi li jaġixxu fil-livell lokali, nazzjonali, reġjonali jew Ewropew.

Il-Premju għas-Soċjetà Ċivili, li issa wasal fl-għaxar sena tiegħu, tnieda mill-Kumitat Ekonomiku u Soċjali Ewropew biex jippremja u jħeġġeġ inizjattivi u kisbiet tanġibbli minn organizzazzjonijiet tas-soċjetà ċivili u/jew individwi li taw kontribut sinifikanti għall-promozzjoni tal-valuri komuni li jsaħħu l-koeżjoni u l-integrazzjoni Ewropea. Fl-2017 il-premju ffoka fuq impjiegi u intraprenditorija ta’ kwalità.

Il-lista sħiħa ta’ rekwiżiti u l-formula ta’ applikazzjoni online huma disponibbli minn hawnhekk. (dm)

It-tranżizzjoni tal-enerġija tista’ tkun ta’ benefiċċju għall-ekonomiji reġjonali tal-Ewropa. It-tranżizzjoni għal forom deċentralizzati, rinnovabbli u diġitalizzati tal-provvista tal-enerġija jkollha benefiċċji ekonomiċi għar-reġjuni tal-Unjoni Ewropea, flimkien ma’ benefiċċji ambjentali. F’rapport ta’ Lutz Ribbe, il-KESE jgħid li hemm tal-anqas erba’ raġunijiet għaliex il-produzzjoni ta’ enerġija intelliġenti tista’ tgħin lill-ekonomiji reġjonali u jitlob lill-Kummissjoni Ewropea biex b’mod sistematiku torbot il-politika ta’ koeżjoni reġjonali u soċjali futura mal-inizjattiva tal-Unjoni tal-Enerġija.

Għalkemm id-dibattitu pubbliku u politiku fil-livell Ewropew għandu t-tendenza li jiffoka fuq il-benefiċċji ambjentali tat-tranżizzjoni deċentralizzata jew ir-riskji assoċjati magħha, il-Kumitat jagħmel punt differenti u jgħid li l-iżvilupp ta’ enerġija rinnovabbli jista’ jġib benefiċċji ekonomiċi għar-reġjuni tal-UE. It-tranżizzjoni tal-enerġija tirrappreżenta opportunità kbira għall-ekonomiji lokali, l-iżjed għar-reġjuni Ewropej rurali u dawk dgħajfa mil-lat strutturali. L-opinjoni tal-KESE, adottata fis-sessjoni plenarja fil-11 ta’ Lulju 2018, tenfasizza li l-produzzjoni mingħajr karbonju tista’ tkun ta’ benefiċċju għar-reġjuni billi:

• tnaqqas il-ħtieġa għal importazzjonijiet tal-karbonju;
• tiġġenera valur ekonomiku fi ħdan ir-reġjun ikkonċernat, fuq kollox jekk is-sjieda tibqa’ lokali;
• toħloq impjiegi sostenibbli u ta’ kwalità għolja permezz tal-installazzjoni, it-tħaddim u ż-żamma ta’ produzzjoni tal-enerġija rinnovabbli;
• u, fl-aħħar nett,
• iżżid id-dħul reġjonali mit-taxxa.

F’dibattitu dwar it-tranżizzjoni tal-enerġija fis-sessjoni plenarja tal-KESE ta’ Lulju, Maroš Šefčovič, Viċi President tal-Kummissjoni responsabbli għall-Unjoni tal-Enerġija, enfasizza kemm kien importanti li l-inizjattivi tal-UE fil-qasam tal-enerġija jintrabtu mal-politika u l-iżvilupp reġjonali u li tissaħħaħ il-kooperazzjoni bejn il-korpi tal-UE u s-soċjetà ċivili.

“Huwa fi-livell lokali li l-pjani u l-impenji politiċi jinbidlu fi proġetti konkreti. L-Unjoni tal-Enerġija ma tistax tinbena hawnhekk fi Brussell, iżda fil-bliet u l-irħula tagħna. Jeħtieġ li jkun sforz kollettiv, li jwassal biex insibu soluzzjonijiet kreattivi,” qal is-Sur Šefčovič.

Is-Sur Šefčovič afferma mill-ġdid l-impenn tal-Kummissjoni għal azzjoni futura li jkollha l-għan li tneħħi l-ostakli attwali li jimpedixxu lin-nies milli jipparteċipaw b’mod attiv u sħiħ bħala “prosumaturi” fit-tranżizzjoni tal-enerġija, kif ukoll biex tinbena fiduċja fost l-investituri tal-enerġija ekoloġika.

Il-President tal-KESE Luca Jahier ikkonkluda billi enfasizza l-viżjoni tal-KESE u r-rwol tiegħu biex jiżgura li jitwassal il-leħen ta’ kulħadd: “Il-KESE jipprova jiżgura li billi jinġabar flimkien l-għarfien espert tas-soċjetà ċivili organizzata minn madwar l-Ewropa, ħadd ma jitħalla jaqa’ lura fil-modernizzazzjoni tal-ekonomija tal-Ewropa, kemm mil-lat ta’ ambjent u impjiegi kif ukoll ta’ opportunitajiet biex jinħoloq valur ekonomiku, jew bħala konsumatur”. (mp)

Il-Kumitat Ekonomiku u Soċjali Ewropew (KESE) talab lill-istituzzjonijiet tal-UE u lill-Istati Membri jagħmlu sforz akbar biex jipproteġu n-nisa u lbniet b’diżabbiltà, li għadhom jiffaċċjaw diversi forom ta’ diskriminazzjoni fis-soċjetà tal-UE minħabba sew is-sess u sew id-diżabbiltà tagħhom, li ta# spiss iwassal għall-esklużjoni soċjali tagħhom.

Minkejja li jirrappreżenta 16% tal-popolazzjoni femminili totali fl-Ewropa, dan il-grupp ta’ 40 miljun mara huwa wieħed mill-iżjed vulnerabbli u marġinalizzat fis-soċjetà Ewropea.

Fl-opinjoni adottata f’Lulju, il-KESE qal li l-UE u l-Istati Membri tagħha ma kellhomx qafas legali b’saħħtu li jipproteġi u jissalvagwardja d-drittijiet tal-bniedem tan-nisa u l-bniet b’diżabbiltà kollha.

“In-nisa b’diżabbiltà jeħtieġu appoġġ speċjali, iżda minkejja dan ma hemm l-ebda fokus adatt fuqhom fi kwalunkwe waħda mill-istrateġiji tal-UE, la f’dik dwar in-nisa u lanqas f’dik dwar il-peruni b’diżabbiltà. Qishom għosfru, daqslikieku huma ta’ valur inqas mill-bqija tal-popolazzjoni,” qalet Gunta Anča, ir-relatur għall-opinjoni.

Il-KESE ħeġġeġ lill-UE u lill-Istati Membri tagħha jimplimentaw il-Konvenzjoni tan-NU dwar id-Drittijiet tal-Persuni b’Diżabbiltà, b’mod partikolari l-Artikolu 6, li jirrigwarda n-nisa b’diżabbiltà.

Huwa enfasizza l-bżonn li l-pajjiżi tal-UE jissieħbu fil-Konvenzjoni ta’ Istanbul dwar il-ġlieda kontra l-vjolenza fuq in-nisa u l-vjolenza domestika, li n-nisa b’diżabbiltà għandhom minn tliet sa ħames darbiet aktar ċans li jisfaw vittmi tagħhom milli n-nisa sħabhom mingħajr diżabbiltà.

L-opinjoni ser tikkontribwixxi għar-rapport li l-Parlament Ewropew ser iħejji dwar l-istess suġġett fil-ħarifa. (ll)

Kwalunkwe soluzzjoni għat-tassazzjoni tal-mudelli kummerċjali diġitali proposti għal-livell tal-UE għandha tkun f'konformità mal-prattika u l-ftehimiet tat-tassazzjoni korporattiva internazzjonali komuni, jgħid il-KESE f'rapport adottat riċentement. Minflok, il-pakkett leġislattiv tal-Kummissjoni Ewropea għandu l-għan li jintaxxa l-fatturat tan-negozji aktar milli l-profitti, u li jimponi taxxi fejn isir il-bejgħ minflok fejn jinħoloq il-valur.

Fl-opinjoni tal-KESE, dan l-approċċ jista' jipperikola l-integrità tas-suq uniku tal-UE u jwassal għal tassazzjoni doppja. Il-kumplessità tas-sistemi tat-taxxa internazzjonali u għalhekk l-inċertezza għall-investituri tista' tiżdied. Fid-dawl ta' dan it-tħassib, il-KESE qiegħed jistieden lill-Kummissjoni biex twettaq valutazzjoni tal-impatt komplementari tal-miżuri proposti.

Huwa importanti ħafna li jiġu żviluppati prinċipji dwar kif għandhom jiġu attribwiti l-profitti korporattivi għall-attivitajiet diġitali għal pajjiż tal-UE u dwar kif dawn għandhom jiġu ntaxxati, jgħid il-KESE fir-rapport tiegħu. Il-kumpaniji diġitali għandhom jikkontribwixxu għall-finanzi pubbliċi bl-istess mod bħan-negozji tradizzjonali u jaqsmu l-piż tat-taxxa meħtieġ biex jiġu ffinanzjati s-servizzi pubbliċi, iżda kwalunkwe soluzzjoni għandha tkun ġusta u bbażata fuq kunsens u toħloq kundizzjonijiet ekwi għall-ekonomiji kollha tal-UE.

Madankollu, minkejja t-tħassib tiegħu, il-KESE jara l-inizjattivi tat-taxxa diġitali tal-Kummisjsoni bħala pass fid-direzzjoni t-tajba u jilqa' l-ambizzjoni tagħha li ssib soluzzjoni globali. Il-Kummissjoni nediet dibattitu internazzjonali u issa huwa tal-akbar importanza li l-Istati Membri jaslu għal pożizzjoni komuni u jmexxu 'l quddiem id-diskussjonijiet li għaddejjin, biex b'hekk tintlaħaq is-soluzzjoni globali meħtieġa fil-livell tal-OECD. (jk)

Il-miżuri proposti mill-Kummissjoni Ewropea dwar l-iżvilupp tat-teknoloġija għas-settur finanzjarju (FinTech) fl-Ewropa għandhom jiġu aġġustati b'tali mod li jibbilanċjaw l-istimulazzjoni tas-suq u s-sigurtà u l-istabbiltà tas-sistema finanzjarja u ekonomika. Fil-fehma tal-KESE, il-Pjan ta' Azzjoni propost huwa bażi tajba iżda huma meħtieġa miżuri addizzjonali biex jiġi sfruttat il-potenzjal kollu tal-FinTech u jiġu żgurati ċ-ċertezza, il-protezzjoni u l-kundizzjoni ugwali tas-suq għall-parteċipanti kollha fis-suq.

Il-KESE jemmen li l-atturi tal-FinTech għandhom ikunu soġġetti għall-istess regoli bħas-settur finanzjarju, b'mod partikolari fir-rigward tar-reżiljenza, iċ-ċibersigurtà u s-superviżjoni, u li huma meħtieġa regoli biex jiġi żgurat żvilupp uniformi tal-FinTech fl-UE. Il-Kummissjoni għandha tiċċara r-responsabbiltà tal-kumpaniji li joffru servizzi ta' cloud fir-rigward tal-protezzjoni tad-data li jospitaw, u jidentifikaw regoli possibbli.

Madankollu, il-KESE jappoġġja l-Pjan ta' Azzjoni tal-Kummissjoni, peress li jista' jikkontribwixxi għall-ikkompletar tal-Unjoni tas-Swieq Kapitali, l-UEM u s-Suq Uniku Diġitali. Il-KESE laqa' wkoll bi pjaċir il-proposti tal-Kummissjoni għal qafas ta' abilitazzjoni għall-finanzjament kollettiv bħala li jipprovdu opportunitajiet ġodda u aktar ċertezza u protezzjoni għall-parteċipanti kollha fis-suq. Iżda tal-inqas fl-istadji inizjali, għandu jkun hemm saħanistra fokus aktar b'saħħtu fuq l-aspetti tar-riskju assoċjati mal-operazzjonijiet u s-swieq ta' finanzjament kollettiv sabiex jiġu identifikati aħjar jew immitigati fejn dan ikun possibbli, u biex jiġu żgurati ċ-ċertezza u l-protezzjoni għall-partijiet ikkonċernati kollha.

Barra minn hekk, il-kwistjonijiet tal-ħasil tal-flus, il-finanzjament tat-terroriżmu u t-tassazzjoni relatati mal-finanzjament kollettiv jeħtieġ li jiġu indirizzati aħjar u għandhom jiġu introdotti dispożizzjonijiet biex jiġi mmonitorjat u vvalutat ir-reġim propost tal-UE. (jk)

Il-KESE jilqa' l-proposti dwar self improduttiv (NPLs) magħmula mill-Kummissjoni Ewropea. Għalkemm il-Kumitat jissuġġerixxi valutazzjoni tal-impatt għar-regolament propost, huwa jemmen li l-proposti se jikkontribwixxu għat-tisħiħ tal-UEM u għall-mixja lejn l-ikkompletar tal-unjoni bankarja.

Huma meħtieġa miżuri addizzjonali fil-livell tal-UE biex jitnaqqas il-volum ta' NPLs u tiġi evitata l-akkumulazzjoni ta' tali self improduttiv. Huwa vitali wkoll li d-dejn indebolit jitneħħa mill-karti tal-bilanċ tal-istituzzjonijiet finanzjarji sabiex jiġu evitati konsegwenzi ta' dejn eċċessiv fil-futur u biex il-banek ikunu jistgħu jiffukaw fuq is-self lin-negozji u liċ-ċittadini. Fil-futur, l-istituzzjonijiet ta' kreditu għandhom jiżguraw li jkun hemm self responsabbli.

L-opinjoni tal-KESE dwar il-proposti tal-Kummissjoni tqajjem dubji dwar l-approċċ "wieħed tajjeb għal kulħadd" u l-kalendarju għall-provvediment ta' NPLs ġodda taħt il-garanziji ta' kontinġenza prudenzjali statutorji proposti. L-applikazzjoni tal-garanziji ta' kontiġenza għandha tikkunsidra d-differenzi bejn il-liġijiet ċivili nazzjonali u t-tul tal-proċeduri fil-Qrati Ċivili. Il-kalendarju propost jista' jġiegħel lill-banek ibigħu NPLs ġodda malajr – żvantaġġ għall-kumpaniji kkonċernati.

Għaldaqstant hija rrakkomandata ħafna valutazzjoni tal-impatt potenzjali tar-regolament propost fuq il-banek, fuq it-trażmissjoni tal-kreditu lill-unitajiet domestiċi, fuq l-SMEs u t-tkabbir tal-PGD sabiex wieħed jara jekk ir-regolament propost huwiex xieraq u effettiv.

Il-proposti tal-Kummissjoni jħeġġu l-iżvilupp ta' swieq sekondarji għall-NPLs. Il-KESE jemmen li r-regolaturi ma għandhomx jinkoraġġixxu l-bejgħ ta' NPLs, minħabba r-riskju li l-NPLs qed jinbiegħu għal prezz aktar baxx fis-swieq finanzjarji mill-valur li jistgħu jilħqu permezz ta' rkupru fi ħdan il-banek. (jk)

Il-KESE jemmen li Direttiva aġġornata dwar l-Ilma tax-Xorb - li ssegwi l-inizjattiva taċ-ċittadini Right2Water - għandha tkun ibbażata fuq il-linji gwida tad-WHO. Din għandha tħaddan id-dritt tal-bniedem għall-aċċess għall-ilma. L-opinjoni tal-KESE Id-Direttiva dwar l-Ilma tax-Xorb titlob li titwaqqaf il-privatizzazzjoni tal-ilma u trid tara miżuri li jimmotivaw lin-nies jagħmlu użu għaqli ta' din ir-riżorsa limitata. Il-Kumitat irid ukoll li l-problemi potenzjali fl-industrija tal-ilma minerali jiġu antiċipati.

Il-KESE jiddispjaċih għall-fatt li l-proposta tal-Kummissjoni ma tirrikonoxxix b'mod ċar id-dritt tal-aċċess universali għall-ilma tax-xorb u s-sanitazzjoni mitluba mill-inizjattiva ECI u l-Għanijiet ta' Żvilupp Sostenibbli. Il-mudell tad-WHO, ibbażat fuq kwantitajiet minimi ta' ilma għal kull persuna kuljum, jista' jkun għażla vijabbli.

"L-ilma tax-xorb huwa prodott bażiku li huwa essenzjali għas-saħħa, il-benesseri u d-dinjità ta' kull bniedem kif ukoll huwa kruċjali għall-attività ekonomika u produttivà, u ma għandux jibqa' jiġi privatizzat" qal Gerardo Larghi, rapporteur għal opinjoni

Għandhom jiġu implimentati miżuri xierqa li jimmiraw kemm l-individwi u l-industrija kif ukoll l-agrikoltura biex jiskoraġġixxu l-użu sproporzjonat tal-ilma.

Miżuri antiċipattivi li jinkludu r-ristrutturar tal-industrija u t-taħriġ mill-ġdid tal-ħaddiema tagħha għandhom jgħinu biex itaffu r-riperkussjonijiet mistennija fuq il-produtturi tal-ilma minerali. (sma)

Il-migrazzjoni kienet fost wieħed mis-suġġetti ewlenin meta Gernot Blümel, Ministru Awstrijak għall-UE, L-Arti, il-Kultura u l-Midja, ressaq il-programm tal-Awstrija għall-Presidenza tal-UE fis-sessjoni plenarja tal-KESE tal-11 ta’ Lulju.

“L-UE tista’ tfalli l-missjoni tagħha f’dak li jirrigwarda l-kwistjoni tal-migrazzjoni, Schengen u d-difiża tal-valuri fundamentali. Iżjed milli Ewropa li tipproteġi, għandna niddefendu Ewropa li tipprotġi, tippromovi u tikkondividi,” qal il-President tal-KESE, Luca Jahier.

Gabriele Bischoff, President tal-Grupp tal-Ħaddiema, qalet li l-ħaddiema jappoġġjaw kunċett differenti ta’ Ewropa li tipproteġi. “Speċjalment f’dan il-perjodu, meta qed tgħib il-fiduċja fl-Ewropa, jeħtieġ li ċ-ċittadini jkunu jafu li l-Ewropa tista’ tiżgura d-drittijiet u l-libertajiet tagħhom”, qalet.

Arno Metzler, President tal-Grupp Diversità Ewropa, qal: “Nittama li l-Presidenza tal-Awstrija tiddefendi l-umanità u tiżgura li naħdmu lkoll flimkien. Il-migrazzjoni hija aspett wieħed biss, iżda jeħtieġ li naħdmu flimkien dwar kwistjonijiet oħra wkoll, bħalma huma l-kummerċ diġitali, il-kummerċ ħieles, il-parteċipazzjoni taċ-ċittadini u l-QFP.”

Jacek Krawczyk, President tal-Grupp ta’ Min Iħaddem, enfasizza li l-Ewropa hija wkoll il-valuri tagħha, li mhumiex negozjabbli. Huwa qal: “L-Ewropa għadha f’salib it-toroq. Jeħtieġ inkunu ċari dwar id-direzzjoni li nixtiequ nieħdu. Jekk Schengen tiddgħajjef, dan ikollu konsegwenzi devastanti għan-negozji u ċ-ċittadini”.

Il-Ministru Blümel iddefenda ċ-ċentri ta’ migrazzjoni ppjanati barra mill-Ewropa. “Sakemm jibqa’ possibbli li tirkeb dgħajsa li tista’ tieħdok l-Ewropa, in-nies ser ikomplu jmutu fil-Mediterran”, huwa qal. (sma)

It-trasport għandu rwol ta’ faċilitatur ewlieni biex jagħmel l-iżvilupp sostenibbli realtà. Jikkontribwixxi għall-ekonomija, il-kummerċ u l-impjiegi, iżda jqajjem ukoll kwistjonijiet fir-rigward tal-ambjent, it-traffiku u s-sigurtà. F’rapport minn Tellervo Kylä-Harakka-Ruonala, il-KESE jeżamina l-Għanijiet ta’ Żvilupp Sostenibbli (SDGs) tan-NU u, billi jipprovdi approċċ trasversali fejn l-aspetti ekonomiċi, soċjali u ambjentali jingħaqdu flimkien, iħeġġeġ lill-Kummissjoni biex tħejji qafas ġdid u integrat għall-politika tat-trasport futura tal-UE.

"It-trasport huwa politika fundamentali tal-Unjoni Ewropea iżda, sfortunatament, it-tfassil tal-politika tiegħu għadu kkaratterizzat minn nuqqas ta’ kondiviżjoni tal-informazzjoni, li jwassal għal approċċi u inizjattivi pjuttost frammentati. Pereżempju, il-kwistjonijiet tas-suq huma parti mill-politika tat-trasport filwaqt li l-kwistjonijiet klimatiċi u relatati mal-enerġija jaqgħu taħt l-Unjoni tal-Enerġija," tgħid is-Sa Kylä-Harakka-Ruonala.

L-opportunitajiet u l-isfidi li jġibu d-diġitalizzazzjoni u r-robotizzazzjoni wkoll għandhom jiġu ġestiti kif xieraq. "It-trasport għandu jkun aċċessibbli, affordabbli, bla xkiel u effettiv, kif ukoll sikur, biex jippermetti l-mobbiltà tal-persuni u l-oġġetti. Għal dan il-għan, u f’konformità mal-SDGs, iridu investimenti sinifikanti f’infrastruttura xierqa, fl-innovazzjoni, u f’sistemi tat-trasport effiċjenti, inkluż it-trasport pubbliku," ikkonkludiet is-Sa Kylä-Harakka-Ruonala.

L-opinjoni tenfasizza wkoll li huwa essenzjali li tiġi involuta s-soċjetà ċivili fit-tħejjija u l-implimentazzjoni tal-politika tat-trasport. Is-settur pubbliku għandu jkollu rwol ċentrali iżda għandhom jiġu ffaċilitati wkoll l-inizjattivi minn isfel għal fuq u l-isħubiji. (mp)

It-tranżizzjoni diġitali fl-UE għandha tkun sostnuta mir-rispett għall-valuri Ewropej u appoġġjata b'politiki soċjali aktar robusti biex b'hekk jiġi żgurat li ħadd ma jitħalla jaqa' lura. Fil-plenerja ta' Lulju tiegħu, il-Kumitat Ekonomiku u Soċjali Ewropew (KESE) sostna li s-soċjetà Ewropea kollha kemm hi – il-ħaddiema, il-kumpaniji u l-pubbliku ġenerali bl-istess mod – għandhom minflok ikunu jistgħu jibbenefikaw mill-potenzjal enormi offrut mit-teknoloġiji l-ġodda.

Fl-opinjoni tiegħu dwar il-kunċetti tal-UE għall-ġestjoni tat-tranżizzjoni f'dinja diġitalizzata ta' xogħol, mitluba mill-Presidenza Awstrijaka tal-UE, il-Kumitat elenka għadd ta' prijoritajiet għall-UE li għandhom jiżguraw li jinkisbu l-benefiċċji tad-diġitalizzazzjoni. Dawn jinkludu t-titjib fil-ħiliet tal-ħaddiema Ewropej, it-tisħiħ tas-sistemi tas-sigurtà soċjali u l-iżgurar tad-diversità fuq il-post tax-xogħol biex b'hekk, pereżempju, l-impjiegi fis-setturi diġitali ma jibqgħux iddominati mill-irġiel.

Madankollu, il-KESE wissa li l-investiment fil-politiki soċjali kien jirrappreżenta biss 0.3% tan-nefqa pubblika totali fl-UE, u sostna li dan għandu jissaħħaħ.

Filwaqt li tenna l-appoġġ tiegħu għal approċċ "fejn il-bniedem ikun fil-kmand" għad-diġitalizzazzjoni, il-KESE sostna li jħeġġeġ l-iżvilupp ta' intelliġenza artifiċjali soċjalment responsabbli li sservi l-ġid komuni.

“In-nuqqas ta' ċarezza li hemm b'rabta ma' kif jaħdmu l-algoritmi u kif dawn jagħmlu l-għażliet li jmorru lil hinn mill-kontroll tal-bniedem joħloq sfidi kbar ħafna għall-UE u mistoqsijiet fundamentali dwar is-soċjetà li rridu ngħixu fiha,” ikkonkluda l-KESE. (ll)

Il-Membri tal- Kumitat Ekonomiku u Soċjali Ewropew (KESE) u r-rappreżentanti tas-soċjetà ċivili tal-Montenegro ltaqgħu f'Podgorica fis-17 ta' Lulju biex jiddiskuta l-qagħda u l-ħidma li għandha ssir fin-negozjati ta' adeżjoni mal-UE tal-Montenegro u adottaw dikjarazzjoni konġunta.

Il-Kumitat Konsultattiv Konġunt (JCC) tal-UE-Montenegro sejjaħ għal sforzi akbar mill-Gvern Montenegrin biex jissodisfa l-parametri referenzjarji biex jingħalqu l-kapitoli tan-negozjati, speċjalment il-parametri referenzjarji interim dwar l-istat tad-dritt.

Fir-rigward tal-politika soċjali u l-impjiegi, il-JCC enfasizza l-importanza tal-liġi tax-xogħol bħala bażi għar-riforma strutturali tas-suq tax-xogħol, li tkun ta' benefiċċju għas-sitwazzjoni ekonomika u soċjali globali tal-pajjiż. Sabiex iħejju għall-moviment liberu tal-ħaddiema, il-JCC stieden lill-awtoritajiet Montenegrini jibdew iħejju fi żmien raġonevoli biex jipparteċipaw fil-koordinzzjoni tas-sistemi tas-sigurtà soċjali u n-netwerk tas-servizzi tax-xogħol tal-EURES, kif ukoll għall-użu tal-Karta tal-Assikurazzjoni tas-Saħħa tal-Unjoni Ewropea. Fir-rigward tas-sitwazzjoni tal-midja u tal-organizzazzjonijiet tas-soċjetà ċivili fil-pajjiż, il-JCC esprima tħassib dwar il-libertà tal-istampa, b'mod speċifiku fir-rigward tax-xandar pubbliku nazzjonali RTCG.

Il-laqgħa li jmiss tal-JCC – it-tnax-il waħda tiegħu, se ssir fi Brussell fit-tieni nofs tal-2018. Il-JCC huwa magħmul minn tnax-il membru, sitta minn kull naħa, li jirrappreżentaw il-KESE u s-soċjetà ċivili Montenegrina.(ks)