KESE info

Is-sessjoni plenarja tat-18 ta’ Lulju tal-Kumitat Ekonomiku u Soċjali Ewropew (KESE) ospitat lill-Ministru Finlandiż għall-Affarijiet Soċjali u s-Saħħa, Aino-Kaisa Pekonen, li ppreżentat il-programm tal-Presidenza Finlandiża tal-UE. Dan jinkludi enfasi speċjali fuq is-sostenibbiltà u l-benesseri taċ-ċittadini. Is-Sinjura Pekonen enfasizzat ukoll it-tisħiħ tal-istat tad-dritt u l-valuri tal-UE fost il-prijoritajiet l-oħra tal-Presidenza. 

B’introduzzjoni għad-diskors ta’ Aino-Kaisa Pekonen, il-President tal-KESE Luca Jahier tkellem dwar l-isfidi ewlenin li se jkollha tindirizza l-Presidenza Finlandiża tal-UE. “L-implimentazzjoni tal-Aġenda 2030”, qal is-Sur Jahier, “se teħtieġ approċċ olistiku li jirrekjedi li l-isfidi ekonomiċi u soċjali jiġu indirizzati flimkien.” B'kunsiderazzjoni ta' dan, is-Sinjura Pekonen ħabbret li: “Il-Finlandja trid li jkollha impatt fuq il-futur tal-UE u dan il-futur għandu jkun soċjalment, ekonomikament u ekoloġikament sostenibbli.”

It-tmexxija globali tal-UE fl-azzjoni klimatika hija għalhekk prijorità ewlenija għall-Presidenza Finlandiża. Għal dan il-għan, hija tipprevedi li jintlaħaq qbil dwar l-elementi ewlenin tal-pjan fit-tul li jimpenja lill-UE għan-newtralità klimatika sa tmiem l-2019, kif mitlub mill-Kunsill Ewropew.

Il-Presidenza Finlandiża se ssaħħaħ ukoll id-djalogu mhux biss mal-atturi globali oħrajn, iżda wkoll fi ħdan l-UE ma’ istituzzjonijiet u msieħba oħrajn. “Djalogu mal-imsieħba soċjali huwa wieħed mill-prijoritajiet tal-Presidenza Finlandiża”, ikkonkludiet is-Sinjura Pekonen. “Il-KESE għandu rwol ewlieni u ninsabu sodisfatti li huwa qiegħed jabbozza opinjonijiet ewlenin li huma konformi mal-proposti tagħna.” (dgf)

Fis-sessjoni plenarja tiegħu tat-18 ta’ Lulju, il-Kumitat Ekonomiku u Soċjali Ewropew (KESE) ospita dibattitu ma’ Conny Reuter, kopresident tal-Grupp ta’ Kuntatt tal-KESE mal-organizzazzjonijiet tas-soċjetà ċivili u n-netwerks Ewropej.

Is-Sur Reuter ippreżenta l-konklużjonijiet u r-rakkomandazzjonijiet tal-Ġranet tas-Soċjetà Ċivili 2019, li saru f’nofs Ġunju fi Brussell dwar it-tema ta’ demokrazija sostenibbli. Huwa tkellem ukoll dwar ir-rwol tal-Grupp ta’ Kuntatt, stabbilit fl-2004 bħala korp uniku fi ħdan l-UE, li nħoloq biex jiżgura djalogu permanenti bejn l-istituzzjonijiet tal-UE u n-netwerk Ewropew tal-organizzazzjonijiet tas-soċjetà ċivili fil-livell Ewropew.

“Aħna qegħdin hawn biex nippromovu d-djalogu ċivili ta’ Ewropa progressiva u inklużiva” qal Is-Sur Reuter lill-plenarja, filwaqt li enfasizza r-rwol importanti tal-Grupp li joffri perspettiva tal-UE dwar suġġetti u politiki importanti, li jmorru lil hinn mill-interessi nazzjonali.

Il-President tal-KESE Luca Jahier faħħar il-ħidma tajba tal-Grupp ta’ Kuntatt tal-KESE: “Aħna qed nippruvaw nibnu l-pontijiet u mhux nagħlqu l-bibien. Ninsabu hawnhekk biex naħdmu flimkien għal Ewropa aħjar,” enfasizza.

Bħala simbolu tal-kooperazzjoni mill-qrib, kull sena l-Grupp ta’ Kuntatt u l-KESE jorganizzaw il-Ġranet tas-Soċjetà Ċivili sabiex jenfasizzaw il-kontribut tal-organizzazzjonijiet tas-soċjetà ċivili għall-bini ta’ Unjoni Ewropea li tifhem aktar l-aspirazzjonijiet taċ-ċittadini. Dan l-avveniment għadu kemm għalaq l-10 anniversarju tiegħu. Is-Sur Jahier qal li l-Ġranet tas-Soċjetà Ċivili saru wieħed mill-avvenimenti ewlenin tal-Kumitat. F’Ġunju attendew ’il fuq minn 250 parteċipant għal dan l-avveniment. (ll)

Il-KESE jappoġġja l-pjan ta’ azzjoni tal-UE dwar il-batteriji żviluppat mill-Kummissjoni Ewropea iżda josserva li jeħtieġ li jissaħħaħ u li jiġi implimentat mill-iżjed fis.

Hemm riskju ġenwin li partijiet kbar ħafna tal-industrija awtomobilistika Ewropea se jirrilokaw il-produzzjoni tagħhom f’reġjuni qrib l-unitajiet li jipproduċu ċ-ċelloli tal-batteriji, prinċipalment fl-Asja. Fl-Opinjoni abbozzata minn Colin Lustenhouwer u adottata fis-sessjoni plenarja ta’ Lulju, il-KESE jappoġġja l-Pjan ta’ Azzjoni Strateġika tal-Kummissjoni Ewropea dwar il-Batteriji iżda jwissi li dan jeħtieġ li jissaħħaħ u jiġi implimentat mill-iżjed fis biex tiġi evitata l-possibbiltà li l-fabbriki tal-karozzi Ewropej jiċċaqilqu ’l barra mill-UE.

“Ir-riskji huma kbar ħafna. Qed nitħaddtu dwar l-impjiegi ta’ madwar 13-il miljun ħaddiem Ewropew fis-settur,” qal is-Sur Lustenhouwer. “Huwa ċar li hemm sens ta’ urġenza f’livell wiesa’ fost dawk li jfasslu l-politika, ix-xjenzjati u n-negozji. Dawn jirrealizzaw li huwa tard, saħansitra tard wisq. Neħtieġu batteriji effettivi, sikuri u li ma jagħmlux ħsara lill-ambjent.”

Il-batteriji saru indispensabbli fil-ħajja tagħna ta’ kuljum. Bħalissa, l-UE għadha lura ferm, kemm mil-lat tal-iżvilupp kif ukoll tal-produzzjoni u tiddependi mill-pajjiżi li ma jagħmlux parti mill-UE, b’mod partikolari l-Asja. L-ewwel rapport ta’ progress tal-Kummissjoni Ewropea fl-1 ta’ April 2019 dwar l-implimentazzjoni tal-Pjan ta’ Azzjoni Strateġika dwar il-Batteriji juri li tnediet firxa ta’ azzjonijiet biex tiġi żviluppata industrija sinifikanti tal-batteriji fl-UE. Madankollu, biex jiġi żviluppat is-settur jeħtieġ li jsir ferm iżjed fl-UE fis-snin li ġejjin, u l-enfasi għandha tkun fuq l-investimenti u l-innovazzjoni. (mp)

S’issa, l-azzjonijiet biex tingħata spinta lill-iżvilupp tal-ekonomija ċirkolari fl-Ewropa ffukaw fuq il-produzzjoni u biex l-industriji jintroduċu mudelli ta’ negozju ċirkolari u jintroduċu opzjonijiet ċirkolari fis-suq. Issa wasal iż-żmien biex il-konsumaturi jiġu involuti, u biex dawn jingħataw is-setgħa jagħmlu għażliet ta’ xiri sostenibbli fil-ħajja tagħhom ta’ kuljum, jgħid ir-rapport tal-KESE adottat f’Lulju.

Fir-rapport, intitolatIl-konsumaturi fl-ekonomija ċirkolari, il-Kumitat Ekonomiku u Soċjali Ewropew jappella biex isseħħ it-tranżizzjoni strateġika sabiex il-konsumaturi jitpoġġew fil-qalba tal-politika pubblika dwar l-ekonomija ċirkolari fil-livelli kollha tal-gvern fl-Ewropa.

Fl-ewwel stadju tal-ekonomija ċirkolari, il-konsumaturi kellhom biss ir-rwol ta’ aġenti urbani li jirriċiklaw l-iskart domestiku filwaqt li l-enfasi kienet fuq in-negozju. Il-KESE jirrimarka li l-inizjattivi tal-Kummissjoni Ewropea għandhom regolazzjoni u produzzjoni speċifiċi, li jagħtu spinta lil-livelli ta’ riċiklaġġ u jintroduċu l-kunċett tal-ekodisinn.

"Issa wasal iż-żmien li l-Ekonomija Ċirkolari 2.0 tindirizza n-naħa tal-konsumatur", jgħid ir-relatur tal-KESE Carlos Trias Pintó, filwaqt li jħeġġeġ lill-Kummissjoni Ewropea biex tkun fuq quddiem biex tmexxi t-tranżizzjoni fl-inizjattivi li jmiss tagħha.

Huwa jenfasizza li din it-tieni fażi, se tkun qed isserraħ fuq l-informazzjoni tal-konsumatur. L-informazzjoni u l-edukazzjoni, huma fatturi ewlenin biex jiggwidaw lill-konsumaturi lejn xejriet ta’ mġiba ċirkolari. L-edukazzjoni u t-tagħlim tul il-ħajja għandhom għalhekk jiddaħħlu fis-seħħ u l-konsumaturi jingħataw l-aktar informazzjoni oġġettiva possibbli.

Il-KESE jargumenta favur l-ittikkettar volontarju bħala pass lejn l-ittikkettar obbligatorju, filwaqt li jiġu indikati l-impronta soċjali u dik ambjentali tal-prodott – it-tnaqqis fl-emissjonijiet, il-konservazzjoni tal-bijodiversità, l-effiċjenza fir-riżorsi jew l-evitar ta’ komponenti b’impatt ambjentali għoli, it-tul ta’ ħajja stmat, il-possibbiltà li jinkisbu spare parts u l-alternattiva ta’ tiswija.

Madankollu, minkejja li l-informazzjoni u l-edukazzjoni jistgħu jikkontribwixxu ħafna biex jagħtu direzzjoni lill-konsumaturi lejn prodotti ekoloġiċi, li jistgħu jissewwew u li jservu fit-tul, ħafna nies mhux se jkunu jistgħu jaffordjawhom. Bħala inċentiv, il-KESE jissuġġerixxi li l-Istati Membri jistgħu jadottaw approċċ ibbażat fuq il-premji u li l-amministrazzjonijiet lokali jistgħu jużaw l-akkwist pubbliku biex jappoġġjaw fornituri sostenibbli. (dm)

L-UE jeħtieġ li tpoġġi aktar enfasi fuq il-ktajjen tal-provvista qosra u l-agroekoloġija fil-biedja sabiex tippreserva l-agrikoltura tagħha u tagħmilha aktar reżiljenti għal sfidi ġodda bħat-tibdil fil-klima. L-agroekoloġija hija wkoll mod kif niggarantixxu il-provvista tal-ikel tagħna u kif nagħmlul-ikel tagħna aktar tajjeb għas-saħħa, b’hekk jiżdied il-valur tiegħu. Ktajjen tal-provvista qossra se jgħinu lill-azjendi agrikoli iżgħar iżidu d-dħul tagħhom u jagħtu l-ħajja liż-żoni rurali.

“Inizjattivi ta’ ktajjen tal-provvista qosra għandhom il-potenzjali li joħolqu l-impjiegi u t-tkabbir, u konsegwentement, il-ġid, b’mod partikolari fiż-żoni rurali. Għalhekk, l-isfida hija li tingħata s-setgħa lill-operaturi biex joħolqu sistemi tal-ikel lokali bbażati fuq governanza lokali. Id-diġitalizzazzjoni għandha - kif ukoll se jkollha fil-futur - rwol ewlieni, kemm fil-produzzjoni u l-ipproċessar kif ukoll fil-bejgħ u x-xiri,” tispjega Geneviève Savigny ir-relatur tal-Opinjoni dwar Il-promozzjoni ta’ ktajjen tal-provvista tal-ikel qosra u alternattivi fl-UE: ir-rwol tal-agroekoloġija.

Il-KESE jipproponi li l-proġett agoekoloġiku madwar l-Ewropa għandu jiġi introdott permezz ta’ pjan ta’ azzjoni strutturat u multidimensjonali, li jinvolvi lil-livelli reġjonali, nazzjonali u tal-UE. Il-programmi eżistenti għandhom ukoll jiġu diretti lejn miżuri ta’ appoġġ għall-agroekoloġija u ktajjen tal-provvista qosra.

Politika komprensiva dwar l-ikel, li l-KESE ilu s-snin jippromoviha, u li jista’ jkun il-faċilitatur tagħha, tista’ tifforma l-qafas għall-pjan ta’ azzjoni. (sma)

Skont il-KESE, is-sistema Ewropea tal-manifattura tista’ biss tagħmel tranżizzjoni effettiva u kompetittiva għal ekonomija diġitali mill-aktar avvanzata u li ma tagħmilx ħsara lill-ambjent, meta tkun lesta għal investiment sinifikanti fl-innovazzjoni. Il-passi ppjanati mill-Kummissjoni Ewropea biex tiffaċilita l-iżvilupp aħjar tas-sistema tal-manifattura għandhom għalhekk ikunu bbażati fuq għarfien reali tal-ħtiġijiet tal-kumpaniji – speċjalment l-SMEs. 

Il-manifattura tammonta għal 17,3 % tal-PDG tal-Ewropa u tirrappreżenta 80 % tal-esportazzjonijiet. “Fid-dawl ta’ dawn iċ-ċifri impressjonanti, huwa essenzjali li l-Ewropa tgħaqqad il-forzi tagħha biex iżżomm u saħansitra ssaħħaħ dan is-settur”, qal Antonello Pezzini, relatur għar-rapport ta’ informazzjoni tal-KESE dwar aktar innovazzjoni f’żoni fejn hemm rata għolja ta’ manifattura.

Il-KESE jistieden lill-Ewropa u lill-Istati Membri tagħha jistabbilixxu strateġiji edukattivi xierqa, li huma kruċjali għall-kisba ta’ ħiliet ġodda u għall-iżvilupp ta’ perkorsi ġodda ta’ karriera. 

Ir-rivoluzzjoni industrijali attwali tuża mudelli diġitali bħall-cloud computing u l-big data, u qiegħda timxi lejn il-prospettiva ta’ internet tal-oġġetti u oġġetti “intelliġenti”. L-intelliġenza artifiċjali hija ta’ importanza partikolari f’dan il-proċess, peress li għandha l-potenzjal li tirdoppja r-rati ta’ tkabbir annwali fi żmien 20 sena.

“L-Ewropa jeħtiġilha tieħu passi deċiżivi fir-rigward tat-teknoloġija diġitali u tiffaċilita l-aċċess tal-SMEs għal teknoloġija avvanzata. Il-KESE għalhekk jappella għal miżuri u politiki speċjali li jippermettu lill-SMEs iżidu n-netwerking ma’ kumpaniji akbar u jintroduċu wkoll inċentivi li jwasslu għal kooperazzjoni fl-innovazzjoni bejn kumpaniji żgħar u kbar”, temm jgħid is-Sur Pezzini. (sma)

L-UE għandha ġġedded is-sistemi tagħha ta’ koordindazzjoni tal-politika ekonomika u ta’ governanza abbażi ta’ strateġija ġdida tal-UE, għal wara l-2020, għall-iżvilupp sostenibbli, sabiex iżżid l-effiċjenza tal-azzjonijiet u s-sostenibbiltà tar-riżultati, jgħid il-KESE.

F'dan il-kuntest, f’Opinjoni adottata reċentement, il-KESE jilqa’ l-proposta tal-Kummissjoni li jinbnew rabtiet aktar b’saħħithom bejn is-Semestru Ewropew u l-finanzjament ta’ koeżjoni taħt il-QFP li jmiss. Huwa jemmen li dawn ir-rabtiet għandhom potenzjal kbir li jtejbu l-koordinazzjoni u l-governanza tal-politika ekonomika tal-UE.

Barra minn hekk, il-KESE jipproponi li sistema mġedda ta’ governanza tal-UE għandha tiddependi aktar fuq il-fehim tagħha tas-soċjetà ċivili, kif ukoll il-kooperazzjoni magħhom, u ssaħħaħ l-amministrazzjoni pubblika f’diversi livelli. F’dan il-kuntest, huwa jipproponi li jiġi stabbilit ċentru ta’ informazzjoni tal-KESE għall-partijiet interessati.

Opinjoni oħra tal-KESE tappella għal rabtiet aktar mill-qrib bejn il-FEIS, is-suċċessur tiegħu – il-programm InvestEU – u l-programmi ta’ investiment oħrajn Ewropej jew nazzjonali. Hija tirrakkomanda li jiġu stabbiliti miri ta’ investiment ċari, simplifikazzjoni regolatorja u gwida ulterjuri sabiex jinkiseb bilanċ ġeografiku u settorjali akbar fil-qafas tal-Pjan ta’ Investiment għall-Ewropa.

Jekk l-UE tuża s-Semestru Ewropew bħala l-aktar element importanti tal-koordinazzjoni tal-politika ekonomika, huwa jkun jista’ jikkontribwixxi għall-implimentazzjoni ta’ dawn ir-rakkomandazzjonijiet. (jk)

F’Lulju, il-KESE ppreżenta proposti għall-aġenda ekonomika tal-perjodu leġislattiv li jmiss u rrakkomanda li dawn għandhom jiffurmaw il-bażi ta’ strateġija ekonomika ġdida tal-UE.

Il-politika ekonomika u l-governanza futuri għandhom, skont il-KESE, iqisu l-isfidi ġeopolitiċi u soċjetali, bħat-tnaqqis fir-ritmu ekonomiku globali, it-tilwim kummerċjali mhux solvut, il-Brexit, it-tibdil fil-klima u t-tibdil demografiku, l-inugwaljanzi li qed jikbru u r-raba’ rivoluzzjoni industrijali, u jikkontribwixxu biex isaħħu r-reżiljenza għall-kriżijiet u għas-sostenibbiltà tal-mudell ekonomiku. Dawn l-isfidi jeħtieġu strateġija ekonomika estensiva b’objettivi ta’ politika ċari u qafas ta’ governanza ekonomika aktar koerenti.

L-erba’ pilastri tal-UEM – dak monetarju u finanzjarju, dak ekonomiku, dak soċjali u dak politiku – għandhom jissaħħu b’mod bilanċjat u hija meħtieġa narrattiva pożittiva għall-iżvilupp futur tal-ekonomija tal-UE. Il-KESE jappella, fost affarijiet oħra, biex tinħoloq kapaċità fiskali fil-livell taż-żona tal-euro, l-ibbilanċjar tal-miżuri min-naħa tal-provvista u tad-domanda, u l-involviment imsaħħaħ tal-Parlament Ewropew, tal-imsieħba soċjali u tal-organizzazzjonijiet tas-soċjetà ċivili f’deċiżjonijiet ta’ politika soċjali u ekonomika ewlenin.

Rigward il-konverġenza ’l fuq, il-KESE jemmen li jeħtieġ li jiġu promossi l-edukazzjoni u t-taħriġ, ir-riċerka u l-iżvilupp u l-innovazzjoni. Dawn il-miżuri jistgħu jsaħħu l-kompetittività tal-ekonomija tal-UE abbażi tal-kapaċità li għandha biex ittejjeb il-produttività tagħha u l-istandards tal-għajxien b’mod sostenibbli filwaqt li fl-istess ħin issir newtrali għall-klima.

Aktar informazzjoni: ECO/492 & ECO/493 (jk)

Il-Kumitat Ekonomiku u Soċjali Ewropew (KESE) jistieden lill-Kummissjoni tirrifletti f’aktar dettall dwar l-alternattivi ta’ politika li jgħinu kemm biex inaqqsu l-gassijiet serra, u b’hekk fil-ġlieda kontra t-tibdil fil-klima, kif ukoll biex iżommu l-kompetittività. L-għan għandu jkun li jiġu protetti u promossi aħjar l-industriji tal-UE li jużaw ħafna riżorsi u enerġija (REII), inkella l-Ewropa tkun fir-riskju li titlef l-impjiegi f’ekonomiji inqas nodfa u ma tilħaqx l-għan tagħha li tnaqqas l-emissjonijiet ta’ gass b’effett ta’ serra (GHG).

”Is-sistema attwali għall-iskambju ta’ kwoti tal-emissjonijiet (ETS) li għandha l-għan li tħeġġeġ l-investiment mhix biżżejjed, peress li għalissa l-applikazzjoni tagħha madwar id-dinja mhijiex disponibbli. Jekk tkun applikata biss fl-Ewropa, se ġġib magħha r-riskju ta’ rilokazzjoni tal-emissjonijiet tal-karbonju u konsegwentement ta’ rilokazzjoni tal-investiment", wissa Aurel Laurenit Plosceanu, relatur għall-Opinjoni tal-KESE dwar Il-perspettiva industrijali settorjali ta’ rikonċiljazzjoni tal-politiki dwar il-klima u l-enerġija, li ġiet adottata fl-17 ta’ Lulju. “L-investiment futur mill-UE u l-Istati Membri għandu jkun ikkonċentrat fuq ir-riċerka, l-iżvilupp u l-innovazzjoni u fuq it-tnedija ta’ teknoloġiji b’livell ta’ karbonju baxx jew żero kemm għall-REIIs kif ukoll għall-ġenerazzjoni tal-enerġija elettrika meħtieġa. Trid issir enfasi wkoll fuq l-edukazzjoni u t-taħriġ tal-forza tax-xogħol tagħhom", żied jgħid il-korelatur Enrico Gibellieri.

Peress li l-ispejjeż tal-enerġija, pereżempju, għall-industriji tal-azzar, l-aluminju u l-ħġieġ jirrappreżentaw madwar 25% tal-ispejjeż totali, l-ispejjeż tal-emissjonijiet tal-gassijiet serra (GHG) huma għoljin ukoll. Bl-ETS fis-seħħ, il-prodotti Ewropej se jkunu jiswew aktar u se jkun hemm riskju li jiġu sostitwiti minn prodotti orħos fis-suq internazzjonali. (sma)

L-Opinjoni annwali tal-KESE dwar l-Istat tal-Unjoni tal-Enerġija tqis il-progress li sar s’issa u tistieden lill-Kummissjoni Ewropea tiffoka aktar fuq l-aspetti soċjali.

"L-Unjoni tal-Enerġija għad mhijiex realtà. Tista’ tkun realtà f’dak li għandu x’jaqsam mad-deċiżjonijiet ta’ politika tal-UE, iżda għad mhijiex realtà fil-ħajja ta’ kuljum taċ-ċittadini Ewropej." Din kienet il-fehma qawwija ta’ Christophe Quarez fis-sessjoni plenarja ta’ Lulju, filwaqt li tenna l-argument tiegħu fl-Opinjoni – adottata mill-assemblea – li t-tranżizzjoni tal-enerġija għadha ma seħħitx fil-prattika. Qal ukoll li: “Issa li dawk li jfasslu l-politika tal-UE stabbilew il-pedamenti tal-Unjoni tal-Enerġija, għad fadal ħafna xi jsir fis-snin li ġejjin."

Il-bidla tal-format fil-proċess ta’ teħid ta’ deċiżjonijiet għall-politika tal-enerġija, kemm fil-livell tal-UE kif ukoll f’dak nazzjonali, hija essenzjali, qal is-Sur Quarez. Kellna bżonn nimxu minn “deċiżjonijiet minn ftit persuni” għal “azzjoni minn kulħadd”. “Qatt daqs illum ma seta’ jinkiseb daqshekk,” żied jgħid, “minħabba ż-żieda fis-sensibilizzazzjoni dwar il-klima fost iċ-ċittadini tal-UE, speċjalment iż-żgħażagħ tal-Ewropa."

Filwaqt li laqa’ bi pjaċir ir-raba’ Rapport dwar l-Istat tal-Unjoni tal-Enerġija maħruġ mill-Kummissjoni Ewropea f’April 2019, il-Kumitat esprima għal darb’oħra l-appoġġ tiegħu għall-objettivi tal-Unjoni tal-Enerġija u enfasizza l-importanza tal-impenn u l-mobilizzazzjoni tas-soċjetà Ewropea fl-intier tagħha biex tassumi sjieda sħiħa.

Iċ-ċittadini għandhom jixprunaw it-tranżizzjoni tal-enerġija u ħadd ma għandu jitħalla l-art. L-implikazzjonijiet soċjali ta’ dawn il-bidliet għandhom jiġu kkunsidrati, b’patt soċjali ġdid bejn il-partijiet kollha involuti. Iċ-ċittadini għandhom ikunu jistgħu jikkontribwixxu wkoll għad-deċiżjonijiet politiċi ewlenin kollha relatati mat-tibdil fil-klima, speċjalment fil-livell tal-UE, permezz ta’ djalogu taċ-ċittadini permanenti. (mp)

Oriġinarjament assoċjati mal-kriptovaluti, il-blockchain u t-teknoloġija tar-reġistru distribwit (DLT) huma fil-fatt tassew versatili u jistgħu jiġu applikati b’mod utli għall-ekonomija soċjali. Madankollu, huwa importanti li dawn jiġu rregolati b’mod xieraq u jiġu ggwidati lejn il-kisba ta’ benefiċċji għal kulħadd, u jippermettu li kulħadd jipparteċipa, jgħid il-KESE f’rapport maħruġ fis-sessjoni plenarja tiegħu ta’ Lulju.

Il-KESE fassal lista twila ta’ applikazzjonijiet possibbli għall-blockchain u t-Teknoloġija tar-Reġistru Distribwit li tista’ tkun ta’ interess kbir għall-intrapriżi tal-ekonomija soċjali. Dawn jinkludu t-traċċar ta’ donazzjonijiet u l-ġbir ta’ fondi, it-titjib tal-governanza tal-organizzazzjonijiet tal-ekonomija soċjali, l-awtentikazzjoni ta’ attivitajiet, iċ-ċertifikazzjoni tal-ħiliet, li d-drittijiet tal-proprjetà intellettwali u d-drittijiet tal-awtur isiru aktar ċari u aktar ċerti, il-forniment ta’ telemediċina u sistemi ta’ kura elettronika siguri u li l-prodotti agrikoli jsiru kompletament traċċabbli u identifikabbli.

Madankollu, il-potenzjal enormi tat-teknoloġiji diġitali l-ġodda, flimkien mal-investiment konsiderevoli meħtieġ, jesponi wkoll it-teknoloġija blockchain għar-riskju ta’ konċentrazzjoni ta' data u netwerks teknoloġiċi li jkunu soġġetti għal spekulazzjoni, iwissi l-KESE.

Huwa importanti li jkun hemm miżuri pubbliċi li jappoġġjaw l-iżvilupp ta’ dawn it-teknoloġiji b’mod parteċipattiv u aċċessibbli, u l-involviment tas-soċjetà ċivili huwa imperattiv.

Ir-Regolament tal-UE jagħmel sens minħabba li din it-teknoloġija tuża katini li jistgħu jinħolqu irrispettivament mill-fruntieri nazzjonali. L-investimenti kbar meħtieġa jitolbu azzjoni Ewropea koordinata u strutturata.

Aqra l-opinjoni tal-KESE intitolata Il-blockchain u t-teknoloġija tar-reġistru distribwit bħala infrastruttura ideali għall-ekonomija soċjali (dm)

mill-Grupp ta’ Min Iħaddem tal-KESE

Il-Grupp ta’ Min Iħaddem tal-KESE se jospita żewġ konferenzi fil-pajjiż tal-Presidenza attwali tal-Kunsill Ewropew – il-Finlandja. L-ewwel avveniment se jsir fl-aħħar ta’ Awwissu u se jiffoka fuq Ewropa intelliġenti.

Il-konferenza se ssir f’Turku fit-30 ta’ Awwissu, bit-titolu “Ewropa Intelliġenti – Kif se naslu hemm”. Din se tiffoka fuq l-opportunitajiet u l-isfidi ppreżentati mid-diġitalizzazzjoni u l-IA għan-negozji, fuq il-faċilitaturi tas-suċċess f’dan il-qasam u fuq l-aspettattivi konsegwenti għall-politiki tal-UE. Għandha l-għan li teżamina, fost affarijiet oħrajn, kif l-Ewropa tista’ tkun minn ta’ quddiem fl-innovazzjoni, liema ħiliet u kompetenzi huma meħtieġa u kif jista’ jiġi attivat il-finanzjament.

Membri tal-Grupp ta’ Min Iħaddem se jkollhom skambju ta’ fehmiet dwar dawn il-kwistjonijiet ma’ kelliema ta’ livell għoli bħas-sindku ta’ Turku, Minna Arve, l-MEPMiapetra Kumpula-Natri u l-President ta’ “One Sea”, Sauli Eloranta. Is-seminar se jkun parti tal-Forum ta’ Turku dwar l-Ewropa, fejn iċ-ċittadini u dawk li jieħdu d-deċiżjonijiet se jiddiskutu l-futur tal-Ewropa u tal-Finlandja.

"Ewropa miftuħa – Kif se tkun ta’ benefiċċju għal kulħadd?” se tkun it-tema tat-tieni konferenza Finlandiża, li se sseħħ f’Helsinki fid-9 ta’ Ottubru. Din għandha l-għan li tiżviluppa r-rwol ta’ ekonomija u soċjetà miftuħa fil-bini ta’ UE b’saħħitha u li tiffavorixxi n-negozji. Iż-żmien tal-konferenza, li jikkoinċidi mal-bidu tal-mandat il-ġdid tal-Kummissjoni Ewropea u l-Parlament Ewropew, jagħmilha possibbli li jitwassal messaġġ qawwi ta’ negozju lil dawk li jfasslu l-politika kemm fil-livell tal-UE kif ukoll f’dak nazzjonali.

Iż-żewġ avvenimenti huma organizzati b’mod konġunt mill-Grupp ta’ Min Iħaddem u l-Konfederazzjoni tal-Industriji Finlandiżi (ek)

mill-Grupp tal-Ħaddiema tal-KESE

Fid-dawl tas-sitwazzjoni umanitarja ddisprata fil-Mediterran, ikkaratterizzata minn nuqqas ta’ rispett għall-prinċipji u l-valuri tal-UE u li marret għall-agħar f’dawn l-aħħar ġimgħat, il-Grupp tal-Ħaddiema jsostni li:

• s-solidarjetà MHIX u qatt mhi se tkun reat
• is-salvataġġ tal-ħajjiet hija l-iktar obbligu importanti tal-bniedem kemm moralment kif ukoll fir-rigward tal-liġi internazzjonali
• l-azzjoni umanitarja u l-attività altruistika tas-soċjetà ċivili qatt m’għandhom jiġu kriminalizzati
• li l-immigrazzjoni m’għandhiex tintuża bħala strument politiku.

Il-Grupp tal-Ħaddiema jafferma mill-ġdid l-appoġġ sħiħ tiegħu għal – u s-solidarjetà ma’ – dawk l-organizzazzjonijiet, l-irġiel u n-nisa kollha li jaġixxu biex isalvaw il-ħajjiet. (prp)

mill-Grupp Diversità Ewropa

Fis-16 u s-17 ta’ Settembru, il-Grupp Diversità Ewropa se jospita laqgħa straordinarja f’Helsinki. F’konformità mal-prijoritajiet tal-Finlandja għall-Presidenza tagħha tal-Kunsill tal-UE, “Ewropa Sostenibbli – Futur Sostenibbli”, il-grupp tagħna għażel li jikkonċentra fuq it-tliet pilastri li jiffaċilitaw it-tkabbir sostenibbli u b’hekk jagħti spinta lill-kompetittività tal-UE: il-bijoekeonomija u Ewropa b'impatt newtrali fuq il-klima, id-diġitalizzazzjoni, u l-infrastruttura.

L-ewwel jum tal-laqgħa se jsir fl-Anness tal-Bini tal-Parlament u se jkun iddedikat għal konferenza dwar is-suġġett “Nagħtu spinta lill-kompetittività tal-UE – tliet pilastri għat-tkabbir sostenibbli”. L-għan ewlieni ta’ din il-konferenza huwa li jiġu eżaminati u diskussi l-isfidi, l-opportunitajiet, il-konsegwenzi, l-aħjar prattiki u l-modi biex tiżdied il-kompetittività tal-UE. Is-sessjoni se tiftaħ b’diskorsi ewlenin minn uffiċjali, rappreżentanti tal-gvern u l-Parlament Finlandiż, u rappreżentanti tal-organizzazzjonijiet li magħhom huma affiljati l-membri Finlandiżi tagħna tal-Grupp III.

Fit-tieni jum se ssir żjara ta’ studju f’postijiet rurali qrib Helsinki, b’rabta mal-ġestjoni sostenibbli tal-foresti u l-loġistika fis-settur tal-forestrija. (ih)