KESE info

Waqt il-plenarja tal-KESE f’Ġunju kien hemm dibattitu mal-Kummissarju Maroš Šefčovič dwar il-futur tal-Unjoni tal-Enerġija tal-Ewropa fejn ġiet stipulata l-pożizzjoni tal-Kumitat dwar l-istrateġija proposta tal-UE għat-tnaqqis fit-tul tal-emissjonijiet tal-gassijiet b’effett ta’ serra.

Il-KESE jaqbel mal-fatt li tranżizzjoni lejn Ewropa dekarbonizzata għandha tkun soċjalment ġusta u effiċjenti, fejn l-atturi kollha jingħaqdu u jagħtu l-kontribut tagħhom, u jenfasizza l-ħtieġa għal azzjoni wara l-2030. “Fl-Ewropa kollha huwa magħruf li hemm bżonn urġenti ta’ azzjoni dwar il-klima,” qal is-Sur Šefčovič,, fejn żied jgħid li l-klima saret wieħed mis-suġġetti elettorali ċentrali fl-UE u li “Fl-Ewropa fl-aħħar qed inħarsu lejn it-tibdil fil-klima bħala opportunità biex nerġgħu nikkonċentraw u nerġgħu norganizzaw l-ekonomija tagħna.”

Is-Sur Jahier kellu l-istess ħsieb. Huwa sostna li l-għan tan-newtralità klimatika sal-2050 kien kruċjali għall-futur tal-Ewropa u staqsa jekk, minkejja li sar ħafna progress fil-ġlieda kontra t-tibdil fil-klima, ikunx għad hemm politiki u riżorsi ambizzjużi biżżejjed biex isostnu l-ambizzjoni fit-tul li jinkisbu emissjonijiet netti żero sal-2050.

Il-KESE approva l-istrateġija proposta tal-UE għat-tnaqqis tal-emissjonijiet tal-gassijiet serra fit-tul u l-objettiv tagħha li l-Unjoni Ewropea ssir ekonomija newtrali għall-klima sal-2050. F’Opinjoni mfassla minn Pierre Jean Coulon u Stefan Back , il-Kumitat jappella għal djalogu permanenti maċ-ċittadini u tranżizzjoni soċjalment ġusta. Barra minn hekk isostni li għandu jiġi konkluż patt soċjali ġdid.

“Din it-tranżizzjoni hija possibbli u ta’ benefiċċju għall-Ewropa, iżda kulħadd għandu jkun involut – ilkoll neħtieġu naħdmu flimkien biex niksbu dan l-għan komuni. Is-Sur Coulon qal li “ma nistgħux nisseparaw liċ-ċittadini minn dawk li jieħdu d-deċiżjonijiet”.

Il-mobilita hija kruċjali: hija waħda mill-oqsma fejn huwa meħtieġ u jista’ jsir l-aktar progress “Jeħtieġ li nsibu soluzzjonijiet biex innaqqsu l-impronta tas-CO2 tal-UE mingħajr ma jkun hemm impatt negattiv fuq l-ekonomija u s-soċjetà kollha tagħha,” saħaq is-Sur Back. Huwa kkonkluda li “nistgħu nfasslu, nadottaw u nimplimentaw sistema li tistabbilixxi l-prezz tal-karbonju li tqis l-effetti tiegħu fuq in-negozji u ċ-ċittadini u li hija kompletament aċċettata minnhom”. (mp)

F’Opinjoni adottata reċentement, il-KESE talab lill-mexxejja tal-UE biex iżidu l-isforzi biex isaħħu r-rwol internazzjonali tal-ewro.Fil-fehma tal-KESE, munita tal-euro b’saħħitha tikkontribwixxi għall-benesseri taċ-ċittadini u n-negozji tal-UE, tħares il-valuri komuni u tippromovi l-interessi komuni.

Jisħaq ukoll li aktar miżuri biex jiżdiedu t-tkabbir u r-reżiljenza ekonomiċi u l-kapaċitajiet ta’ aġġustament tal-ekonomiji taż-żona tal-euro eventwalment iwasslu għal rwol internazzjonali aktar b'saħħtu għall-euro. L-Opinjoni tal-KESE tressaq rakkomandazzjonijiet li jmorru lil hinn mill-proposti tal-Kummissjoni Ewropea.

Koezjoni soċjali b’saħħitha, konverġenza ekonomika, il-kompetittività u l-innovazzjoni għandhom ikunu ikunu l-bażi għal ekonomija taż-żona tal-euro aktar b'saħħitha li tappoġġja l-munita komuni . Id-diverġenzi fost u fi ħdan l-Istati Membri jridu jitnaqqsu, peress li dawn jillimitaw il-prestazzjoni ekonomika tal-UE.

Il-KESE jappella wkoll għal approċċ aktar unifikat fid-diplomazija internazzjonali u pożizzjoni aktar proattiva biex jiġu promossi l-interessi komuni. Dan jista’ jwassal għal aktar opportunitajiet kummerċjali.

It-tlestija tal-Unjoni Ekonomika u Monetarja u tal-Unjoni Bankarja hija prijorità ċara oħra għall-KESE. F’dan ir-rigward, il-Kumitat jirrakkomanda li jiġu investigati l-għażliet biex jinħolqu assi aktar likwidi u aktar sikuri tal-euro. Dawn jistgħu jiġġieldu kontra l-frammentazzjoni attwali tas-suq tal-bonds sovrani taż-żona tal-euro, li tagħmel ħsara lill-fiduċja tas-suq fil-munita unika.

Kun af aktar dwar ir-rakkomandazzjonijiet tal-KESE biex jissaħħaħ l-użu internazzjonali tal-euro u l-għadd kbir ta’ benefiċċji li dan jista’ jġib liċ-ċittadini u lin-negozji tal-UE. (jk)

Il-KESE jappella sabiex jittejbu l-istrateġji makroreġjonali u jippreżenta sett ta’ proposti ta’ politika f’Opinjoni esploratorja biex jiġi sfruttat il-potenzjal sħiħ tagħhom.

Il-proposti, li kienu ppreżentati f’Ġunju, huma bbażati fuq analiżi fil-fond tal-istrateġji makroreġjonali eżistenti. Din l-analiżi wriet li dawn servew bħala għodda utli għall-politika ta’ koeżjoni u s’issa saħħu l-integrazzjoni u l-kooperazzjoni, iżda naqsu milli jilħqu l-aspettattivi f’termini ta’ għajnuna biex jitnaqqsu d-disparitajiet soċjali u territorjali u biex tingħata spinta lis-sostenibbiltà ambjentali.

Biex jitjieb l-impatt tal-istrateġiji fuq it-tnaqqis tad-disparitajiet, il-Kumitat jirrakkomanda li jittejbu, fuq kollox, il-komunikazzjoni u l-konnettività bejn l-imsieħba tal-kooperazzjoni, u jiġi mħeġġeġ involviment aktar mill-qrib tal-organizzazzjonijiet tas-soċjetà ċivili fl-implimentazzjoni u l-monitoraġġ tal-istrateġiji.

Dawk li jfasslu l-politika għalhekk għandhom isaħħu l-interventi tal-politika, jagħtu spinta lill-impenn attiv lejn l-istrateġiji makroreġjonali u jnaqqsu l-burokrazija. Aspett importanti ieħor huwa n-netwerking, l-interkonnessjoni u l-ġestjoni tal-bażjiet ta’ data, li kollha kemm huma jridu jiffunzjonaw.

Il-KESE jemmen li l-komunikazzjoni dwar l-istrateġiji makroreġjonali għandha tittejjeb sabiex tissaħħaħ il-viżibbiltà ta’ dawn l-istrateġiji u jitħeġġu n-netwerking u l-parteċipazzjoni.

In-netwerking u r-raggruppament tal-imsieħba soċjali, l-atturi soċjoekonomiċi lokali u l-organizzazzjonijiet tas-soċjetà ċivili għandhom jingħataw prijorità kemm mil-lat ġeografiku kif ukoll mil-lat settorjali. L-involviment tagħhom fil-proċess tat-teħid tad-deċiżjonijiet, fl-ippjanar u fl-evalwazzjoni tal-politiki huwa estremament utli għall-implimentazzjoni tal-istrateġiji makroreġjonali, u jista’ wkoll jagħti spinta lill-koeżjoni u lis-sostenibbiltà soċjali u ambjentali.

Fl-aħħar, il-KESE jipproponi netwerks effiċjenti għall-attivitajiet edukattivi. Dawn jistgħu jgħinu wkoll biex itejbu l-prestazzjoni fir-rigward tas-sostenibbiltà ambjentali. (jk)

Fl-okkażjoni tal-Grand Départ tat-Tour de France, il-KESE organizza il-preżentazzjoni tal-ktieb dwar iċ-ċampjin Taljan taċ-ċikliżmu u eroj ta’ żmien il-gwerra Gino Bartali mal-awtur u ġurnalist Alberto Toscano fit-3 ta’ Lulju. L-avveniment kien jinkludi wkoll dibattitu dwar il-mobbiltà nadifa.

“Inti għandek tagħmel is-sewwa, iżda m’għandekx titkellem dwaru” kien jgħid Gino Bartali, iċ-ċampjin taċ-ċikliżmu Taljan, li rebaħ il-Giro d’Italia tliet darbiet u darbtejn it-Tour de France. L-istorja tiegħu tinsab irrakkuntata fil-ktieb ta’ Alberto Toscano A Bike against Nazi Barbarism, the incredible destiny of the champion Gino Bartali, li ġie ppreżentat fil-KESE fit-3 ta’ Lulju 2019.

Avversarju tar-reġim ta’ Mussolini, Gino Bartali salva l-ħajjiet ta’ mijiet ta’ Lhud fl-Italja matul l-Olokawst billi għamilha ta’ messaġġier ta’ dokumenti kunfidenzjali, li kien iġorrhom fuq ir-rota tiegħu tul eluf ta’ kilometri, filwaqt li b’mod uffiċjali kien ikun jitħarreġ fuq rotot twal, li kien magħruf għalihom. Kien eroj diskret li qatt ma tkellem dwar l-attivitajiet tiegħu ta’ żmien il-gwerra, saħansitra lanqas wara li ġiet fi tmiemha t-Tieni Gwerra Dinjija.

L-avveniment fil-KESE kien jinkludi wkoll dibattitu dwar il-mobbiltà nadifa ma’, fost l-oħrajn, Luca Jahier, il-President tal-KESE, Pierre Jean Coulon, il-President tas-Sezzjoni TEN tal-KESE u Philippe Close, is-Sindku tal-Belt ta’ Brussell. L-għan ma kienx biss li jingħata ġieħ lill-isport u l-mezzi ekoloġiċi tat-trasport, iżda wkoll lill-valuri umani. (mp)

Il-midja Ewropea, li sikwit tpinġi stampa b’dimensjoni waħda jew patetika tal-persuni b’diżabbiltà, mifnija bi stejjer mingħajr bażi u ideat żbaljati, u b’offerta ta’ programmi ta’ informazzjoni u ta’ divertiment li b’mod konsistenti ma tissodisfax biżżejjed il-kriterju ta’ aċċessibbiltà sħiħa, għad għandha ħafna x’taqdef biex tkun f’pożizzjoni li tikkomunika dwar id-diżabbiltà b’mod preċiż u inklużiv.

Ir-rwol ċentrali li għandha l-midja fis-sensibilizzazzjoni dwar id-drittijiet tal-persuni b’diżabbiltà u fil-ġlieda kontra l-istigma u l-preġudizzju lejn dawn il-persuni, li għadhom jeżistu fin-nisġa kollha tas-soċjetà Ewropea, kien is-suġġett ewlieni fuq l-aġenda fis-seduta ta’ smigħ dwar Nikkomunikaw id-Drittijiet tal-Persuni b’Diżabbiltà, organizzata mill-Kumitat Ekonomiku u Soċjali Ewropew (KESE) fit-28 ta’ Ġunju fi Brussell.

"Il-komunikazzjoni dwar id-drittijiet tal-persuni b’diżabbiltà għandha tkun ikkunsidrata bħala parti importanti minn kwistjoni usa’ ta’ kif nuru d-diversità tas-soċjetà tagħna fl-intier tagħha. Din hija l-epiċentru tal-valuri demokratiċi tagħna. Din se tkun waħda mill-aktar-kwistjonijiet importanti fis-snin li ġejjin,” qal il-membru tal-KESE Ioannis Vardakastanis, huwa u jiftaħ l-avveniment.

Is-seduta ta’ smigħ laqqgħet lil membri tal-KESE u rappreżentanti minn organizzazzjonijiet mhux governattivi differenti li jappoġġjaw lill-persuni b’diżabbiltà. L-Unjoni Ewropea tax-Xandir (EBU) u l-Media Diversity Institute (l-Istitut tad-Diversità tal-Midja) (MDI), għassies tal-midja li jinkoraġġixxi l-kopertura responsabbli tad-diversità fil-midja, kienu rappreżentati wkoll. (ll)

L-implimentazzjoni aħjar tal-Pilastru Ewropew tad-Drittijiet Soċjali, b’enfasi fuq il-promozzjoni tas-servizzi essenzjali, kienet waħda mit-temi tas-sessjoni plenarja ta’ Ġunju, fejn il-membri adottaw opinjoni fuq inizjattiva proprja dwar dan is-suġġett minn Raymond Hencks u Krzysztof Balon.

Il-KESE jenfasizza li kulħadd għandu jkun intitolat jaċċessa servizzi essenzjali bħall-ilma, l-enerġija u t-trasport, u rrimarka li dawn huma kruċjali għall-ġustizzja soċjali.

Xi wħud minn dawn is-servizzi mhumiex regolati u implimentati biżżejjed fl-Istati Membri, enfasizza s-Sur Hencks. “Qed nitolbu servizzi essenzjali li jkunu disponibbli għal kulħadd”, qal, iżda żied jgħid li dan ma jkunx biżżejjed. “Il-kunċett ta’ servizzi essenzjali għandu jiġi ċċarat ukoll u għandhom jittieħdu miżuri konkreti biex jindirizzaw il-fallimenti eżistenti u jiggarantixxu l-funzjonament tajjeb ta’ dawn is-servizzi, skont il-ħtiġijiet tal-utenti."

Il-KESE għalhekk jilqa’ l-fatt li l-prinċipju 20 tal-Pilastru Soċjali jafferma mill-ġdid id-dritt tal-aċċess għal servizzi essenzjali. “Dawn huma komponent essenzjali tal-ġustizzja soċjali u huma msejsa fuq il-prinċipju ta’ trattament ugwali tal-utenti, bil-projbizzjoni ta’ kwalunkwe tip ta’ diskriminazzjoni jew esklużjoni, u fuq il-prinċipju tal-aċċess universali għal servizzi ta’ livell għoli affordabbli u ta’ kwalità,” tenna s-Sur Balon. (mp)

Il-Kunsilli Ekonomiċi u Soċjali nazzjonali u l-Kumitat Ekonomiku u Soċjali Ewropew bagħtu messaġġ lill-mexxejja tal-UE minn Ruma, fejn iltaqgħu fit-13-14 ta’ Ġunju biex jiddiskutu dwar ir-rwol tagħhom fl-iżvilupp sostenibbli tal-Ewropa u dwar il-Pilastru Ewropew tad-Drittijiet Soċjali.

Id-dibattitu kien parti mil-Laqgħa Annwali tal-Presidenti u s-Segretarji Ġenerali tal-KESE u tal-Kunsilli Ekonomiċi u Soċjali tal-Istati Membri tal-UE, koorganizzata mill-KESE u mill-Kunsill Ekonomiku u Soċjali tal-Italja (CNEL).

Kelliema ewlenin fis-sessjoni tal-ftuħ, li attenda għaliha il-president Taljan, Sergio Mattarella, kienu jinkludu lill-Ministru tal-Affarijiet Barranin Taljan, Enzo Moavero Milanesi u 'l-president tas-CNEL, Tiziano Treu.

Il-president tal-KESE Luca Jahier talab lill-Parlament Ewropew il-ġdid u lill-Kummissjoni futura biex juru tmexxija politika soda u deċiżiva biex l-Ewropa ssir protagonista ewlenija f’livell dinji għall-iżvilupp sostenibbli.

Il-konklużjonijiet ewlenin tad-dibattitu, li ntbagħtu lill-istituzzjonijiet ewlenin tal-UE, kienu kif ġej:

• l-Aġenda 2030 tan-NU għandha tkun il-prijorità kumplessiva tal-UE għad-deċennju li jmiss biex jiġu indirizzati ħames tranżizzjonijiet fundamentali:
  • it-trasformazzjoni ekonomika,
  • it-trasformazzjoni tal-enerġija u ekoloġika,
  • it-trasformazzjoni soċjali estensiva,
  • it-trasformazzjoni demokratika u parteċipattiva u
  • it-tranżizzjoni ġeopolitika fir-relazzjonijiet internazzjonali.
• L-Aġenda 2030 hija strateġija ta' benefiċċju għal kulħadd:
  • għal min iħaddem, għax il-ġlieda għall-kompetittività se ssir f’livell dinji fis-setturi marbutin mal-Aġenda tal-Iżvilupp Sostenibbli;
  • għall-ħaddiema, peress li diversi SDGs huma marbutin mad-dimensjoni soċjali tal-Ewropa;
  • għas-soċjetà ċivili, li, jekk tkun involuta bis-sħiħ fil-governanza, jaf tkun deċiżiva fil-monitoraġġ adatt tal-implimentazzjoni tal-SDGs.
• Jeħtieġ jitfassal pjan direzzjonali biex l-implimentazzjoni tal-Pilastru Ewropew tad-Drittijiet Soċjali tingħata spinta, peress li partijiet sinifikanti minnu għadhom fil-biċċa l-kbira mhux indirizzati.
• Il-proċess tas-Semestru Ewropew jeħtieġ ukoll jiġi adattat għall-Aġenda 2030.
• 40% tal-baġit ġenerali tal-UE għall-2021-2027 jeħtieġ jiġi allokat għall-iżvilupp sostenibbli.
• Il-Kummissjoni li jmiss għandha tinkludi viċi president li jkun responsabbli biex l-SDGs isiru parti mill-politiki kollha tal-UE.
• Dan huwa proġett ta’ tama u reżiljenza li għandu l-potenzjal li jikkonsolida l-għaqda u s-solidarjetà ġewwa l-UE, u b’mod partikolari jimmobilizza s-soċjetà ċivili u ż-żgħażagħ.
• Il-Kunsilli Ekonomiċi u Soċjali jistgħu jaġixxu bħala kunsillli għall-parteċipazzjoni ċivika, filwaqt li jkunu fdati bl-organizzazzjoni tal-konsultazzjonijiet pubbliċi rigward il-mudelli ġodda tal-iżvilupp sostenibbli.
• Bħala l-akbar ekonomija fid-dinja, l-UE jeħtieġ li, permezz tal-politika kummerċjali tagħha, taqdi rwol fundamentali fil-promozzjoni tal-aġenda tal-iżvilupp sostenibbli f’livell dinji.

Il-konklużjonijiet kollha tal-laqgħa huma disponibbli minn here. (dm)

Il-Kumitat Ekonomiku u Soċjali Ewropew sejjaħ lill-UE biex tadotta approċċ aktar proattiv biex tiġi indirizzata ż-żieda fil-ksur tal-istat tad-dritt madwar l-UE, fost tħassib li dawn jistgħu jeskalaw f’sitwazzjoni ta’ kriżi sħiħa fid-demokrazija u d-drittijiet u l-libertajiet fundamentali.

F’opinjoni adottata fis-sessjoni plenarja tiegħu f’Ġunju, il-KESE talab li l-organizzazzjonijiet tas-soċjetà ċivili jiġu involuti b’mod aktar effettiv u direttament fit-tfassil u l-implimentazzjoni ta’ salvagwardji kontra ż-żarmar tal-istat tad-dritt fl-UE. Ħafna minn dawn l-organizzazzjonijiet iqajmu kuxjenza u jaġixxu ta’ għassiesa jew promoturi, u bħala tali spiss huma l-ewwel li jbatu taħt gvernijiet awtoritarji.

Filwaqt li enfasizza li għandu rwol speċjali u dmir li jieħu azzjoni meta l-attivitajiet tal-membri tiegħu stess u tas-soċjetà ċivili inġenerali huma f’riskju fi ħdan l-UE, il-KESE talab għal protezzjoni aħjar għall-organizzazzjonijiet tas-soċjetà ċivili, flimkien ma’ għassiesa pubbliċi ewlenin oħra bħal ġurnalisti, informaturi u difensuri tad-drittijiet tal-bniedem.

L-opinjoni hija l-kontribut tal-KESE għall-proċess ta’ riflessjoni dwar aktar tisħiħ tal-istat tad-dritt fl-UE, propost mill-Kummissjoni Ewropea f’komunikazzjoni riċenti li fiha stieden lill-partijiet interessati kollha biex jikkontribwixxu għad-dibattitu.

Il-KESE qal li laqa’ l-isforzi tal-Kummissjoni biex tuża l-mezzi disponibbli biex jissaħħaħ l-istat tad-dritt fl-Istati Membri, għalkemm innota n-nuqqasijiet tagħhom fil-prevenzjoni jew il-korrezzjoni ta’ attakki miftiehma fuq id-drittijiet u l-libertajiet fundamentali.(ll)

L-għan ewlieni tal-Presidenza Finlandiża tal-UE, li bdiet fl-1 ta’ Lulju, huwa li l-Unjoni timpenja ruħha favur tnaqqis sinifikanti tal-emissjonijiet sabiex tikseb newtralità klimatika sal-2050. Il-KESE se joffri l-appoġġ tiegħu għall-azzjoni klimatika tal-Presidenza u se jkompli bil-ħidma tiegħu dwar il-ħolqien ta’ qafas ta’ abilitazzjoni tal-UE għall-inizjattivi klimatiċi mmexxija miċ-ċittadini u mill-komunità.

Il-prijoritajiet l-oħrajn tal-Presidenza Finlandiża jinkludu t-tisħiħ tal-valuri komuni u tal-istat tad-dritt, li l-UE ssir aktar kompetittiva u soċjalment inklużiva, it-tisħiħ tal-pożizzjoni tal-UE bħala mexxejja globali dwar l-azzjoni klimatika u l-protezzjoni bis-sħiħ tas-sigurtà taċ-ċittadini.

Matul il-mandat tagħha, il-Finlandja se tiffaċċja sfidi kbar, li jinkludu s-sorveljanza tal-proċess ta’ Brexit u n-negozjati bejn l-Istati Membri dwar il-qafas finanzjarju pluriennali (QFP) li jmiss tal-UE.  Abbażi tar-rakkomandazzjonijiet ta’ politika tiegħu dwar il-QFP ta’ wara l-2020, u b’mod partikolari, l-proposti leġislattivi settorjali dwar il-programmi ta’ nfiq, il-KESE se jagħmel l-almu tiegħu biex jinfluwenza n-negozjati b’mod pożittiv, bil-għan li jiġu konklużi fi żmien xieraq.

F’konformità mal-islogan Ewropa Sostenibbli - Futur Sostenibbli, il-Finlandja se tiffoka fuq il-promozzjoni ta’ kultura ta’ laqgħat ekoloġiċi. Ħafna mil-laqgħa se jsiru f’Helsinki, fejn se jsiru sitt laqgħat informali tal-Ministri, u l-parteċipanti se jiġu servuti ilma tal-vit Finlandiż f’buqari tal-ilma u ikel organiku prodott lokalment.

Il-KESE se jkollu wkoll diversi laqgħat fil-pajjiż fit-tmun tal-Presidenza tal-UE. Il-Bureau tal-KESE diġà ltaqa’ f'Helsinki fis-6 ta’ Ġunju, u t-tliet Gruppi tiegħu ppjanaw li jorganizzaw laqgħat fil-Finlandja fix-xhur li ġejjin (Il-Grupp ta’ Min Iħaddem: 8-9 ta’ Ottubru, il-Grupp tal-Ħaddiema: 9 ta’ Ottubru, il-Grupp Diversità Ewropa: 16-17 ta’ Settembru). Din hija t-tielet darba li l-Finlandja għandha f’idejha l-Presidenza b’rotazzjoni minn meta ssieħbet fl-UE fl-1995. Il-mandati preċedenti kienu fl-1999 u fl-2006. Għal aktar informazzjoni dwar l-attivitajiet tal-KESE matul il-Presidenza Finlandiża, jekk jogħġbok ara l-fuljett speċjali: https://bit.ly/2XHm6xb.(ml)

Il-Grupp ta’ Min Iħaddem tal-KESE

It-taxxi korporattivi huma l-aktar forma ta’ tassazzjoni li tagħmel ħsara lit-tkabbir ekonomiku. Għall-kuntrarju tal-perċezzjoni pubblika, ma kien hemm l-ebda tnaqqis fid-dħul mit-taxxa korporattiva fir-rigward tal-PDG f’dawn l-aħħar erbgħin sena. Il-pajjiżi li naqqsu r-rati effettivi tat-taxxa korporattiva tagħhom f’dawn l-aħħar snin raw żidiet fl-investiment fis-snin ta’ wara. Dawn huma wħud mill-konklużjonijiet ta’ studju reċenti kkummissjonat mill-Kumitat Ekonomiku u Soċjali Ewropew fuq talba tal-Grupp ta’ Min Iħaddem.

Rata għolja ta’ taxxa korporattiva tista’ xxekkel l-attività ta’ negozju billi trendi ċerti proġetti ta’ investiment mhux profittabbli, u konsegwentement, titnaqqas il-bażi għat-taxxa u b’hekk il-ġbir ta’ dħul. Bħala medja, żieda ta’ punt perċentwali fir-rata tat-taxxa fuq l-investimenti diretti barranin (IDB) twassal għal tnaqqis fl-IDB ta’ 3.7%.

L-analiżi turi wkoll li tnaqqis fit-taxxa korporattiva mhux neċessarjament iwassal għal nuqqasijiet sinifikanti fil-finanzi pubbliċi, iżda fil-fatt jista’ jkun bejn wieħed u ieħor kwistjoni ta’ awtofinanzjament. Fil-każ ta’ sitt pajjiżi, it-tnaqqis fir-rati tat-taxxa korporattiva wassal għal żieda fid-dħul. Rati aktar baxxi tat-taxxa korporattiva jfissru aktar tkabbir — it-tnaqqis tar-rata tat-taxxa b’10 punti perċentwali jista’ jżid it-tkabbir annwali b’1-2 punti perċentwali.

"L-istudju għandu l-għan li jservi bħala għodda utli u affidabbli għad-diskussjoni dwar it-tassazzjoni. Dan huwa importanti b’mod speċjali fis-sitwazzjoni attwali fl-Unjoni Ewropea, fejn il-perċezzjoni pubblika dwar it-tassazzjoni tal-kumpaniji (speċjalment kumpaniji multinazzjonali kbar) hija distorta u sfruttata mill-populisti”, iddikjara Krister Andersson, il-Viċi President tal-Grupp ta’ Min Iħaddem. L-istudju jipprovdi data u eżempji konkreti biex tiġi miġġielda din in-narrattiva.

Is-600 parteċipant laqgħu b’entużjażmu l-idea ta’ Parlament Ewropew tal-Familja – fuq l-eżempju tal-Parlament Rurali Ewropew stabbilit minn Staffan Nilsson. Il-President tal-UNAF wiegħed li jappoġġja u jiżviluppa dan il-Parlament Ewropew tal-Familja u li jħeġġeġ netwerks Ewropej oħra tal-familji biex jagħmlu l-istess . (jh)

Il-KESE qed jorganizza lejla Finlandiża fis-17 ta’ Lulju biex jimmarka l-bidu tal-presidenza tal-Finlandja tal-Kunsill tal-UE. L-avveniment se jinkludi mużika u żfin tipiku tal-kultura u t-tradizzjonijiet tal-Finlandja.

Iż-żeffiena Meri Pajunpää se tesebixxi lajv bl-użu tat-teknika ta’ improvizzazzjoni strutturata għall-ħoss tal-akkordjan diġitali ta’ Netta Skog. (ck)

Għal aktar informazzjoni jekk jogħġbok ikklikkja żur:

Biex tirreġistra jekk jogħġbok ikklikkja hawn.

Għall-programm sħiħ tas-serata, ikklikkja hawn