KESE info

Margrethe Vestager, Kummissarju Ewropew għall-Kompetizzjoni, qalet, fis-sessjoni plenarja ta’ Mejju tal-Kumitat Ekonomiku u Soċjali Ewropew, (KESE) li ”l-Kummissjoni kienet qed tinsisti għat-tassazzjoni diġitali minħabba li neħtieġu soluzzjoni globali: huwa inaċċettabbli li xi kumpaniji jħallsu t-taxxi u oħrajn le". Madankollu, il-Kummissarju spjegat li l-ewwel, l-UE jeħtiġilha ssib soluzzjoni Ewropea.

Luca Jahier, President tal-KESE, introduċa lill-Margrethe Vestager bħala l-avukat għall-kompetizzjoni, kwistjoni kruċjali għad-demokrazija ekonomika: ”Jekk inħallu lill-ftit jikkontrollaw id-data, dawn se jikkontrollaw l-ekonomija u d-demokrazija, u hemm se jkollna sfida għall-ġejjieni tagħna”. Il-Kummissarju Vestager qablet, filwaqt li stqarret li “ammonti sostanzjali ta’ informazzjoni jistgħu jagħtu vantaġġ lin-negozji l-kbar, vantaġġ li r-rivali ż-żgħar tagħhom ma jistgħux jilħqu, u b’hekk isibuha diffiċli biex jikkompetu, anke bi prodott aħjar, jekk ma jkollhomx il-massa kritika tad-data jew tal-utenti”. Biex insolvu dan it-tfixkil tas-suq, Vestager qalet li “ħaġa waħda li [l-Kummissjoni Ewropea] jista’ jkollha bżonn tagħmel biex tiftaħ il-kompetizzjoni hija li l-kumpaniji jintalbu jagħtu aċċess għad-data tagħhom sabiex jagħtu possibbiltà ġusta lill-kompetituri”.

Il-Kummissarju saħqet li l-kompetizzjoni għandha tibni wkoll il-fiduċja taċ-ċittadini fid-dinja diġitali: “Xi pjattaformi jiġbru d-data mingħand miljuni jew saħansitra biljuni ta’ utenti, u jafu aktar dwarna mill-qraba u l-ħbieb tagħna, għalhekk irridu nkunu ċerti li nimmansaw il-lati oskuri ta’ din id-dinja diġitali”. Għal dan il-għan, hija qalet li l-Kummissjoni Ewropea se tħares “il-multi-homing” (li jippermetti lill-konsumaturi jużaw aktar minn pjattaforma diġitali waħda), u tkun “viġilanti kontra l-pjattaformi onlajn li tant huma b’saħħithom li jistgħu jagħmluha ta’ arbitru billi jistabbilixxu r-regoli għall-kumpaniji li jridu jingħaqdu magħhom”. (dgf)

Il-KESE stieden lil Raya Kalnova (Kungress Lhudi Ewropew), Michał Bilewicz (Ċentru għar-Riċerka dwar il-Preġudizzji, Università ta’ Varsavja) u Joel Kotek (Università Ħielsa ta’ Brussell – ULB) biex jiddiskutu dwar l-anti-Semitiżmu fl-Ewropa fis-sessjoni plenarja tiegħu ta’ Mejju.

Il-President tal-KESE, Luca Jahier beda billi stqarr: "L-avvenimenti reċenti qed juruna li ma nistgħux inkunu inqas viġilanti u nqisu s-sittin sena ta’ paċi fl-Ewropa bħala fatt. U għalkemm id-drittijiet fundamentali tagħna huma minquxa fl-Artikolu 2 tat-Trattat dwar l-Unjoni Ewropea, jeħtieġ li niddefenduhom kuljum.”

Peress li l-biża’ sar parti kostanti minn ħajjet il-Lhud u 38 % tagħhom qed jikkunsidraw jemigraw, li huwa allarmanti, is-Sinjura Kalnova qalet li l-Kungress Lhudi Dinji qed iħoss sens dejjem akbar ta’ emerġenza. “Biex jiġi miġġieled l-anti-Semitiżmu, huwa importanti li wieħed ikun jaf fil-fatt x’inhu." Id-definizzjoni tal-anti-Semitiżmu tal-Alleanza Internazzjonali għat-Tifkira tal-Olokawstu saret referenza għall-governanza u s-soċjetà ċivili. Diġà ġiet approvata minn ħdax-il Stat Membru tal-UE, kif ukoll mill-Parlament Ewropew u mill-Kunsill tal-Unjoni Ewropea. Jeħtieġ li l-organizzazzjonijiet tas-soċjetà ċivili wkoll japprovaw u japplikaw din id-definizzjoni u jipprovdu tmexxija fl-indirizzar tal-problema. /p>

Is-Sur Bilewicz rrefera għar-riżultati ta’ stħarriġ li sar fl-2017 li żvela li wieħed minn kull erba’ persuni jemmnu li l-Lhud stess għandhom tort għall-anti-Semitiżmu dejjem jikber. Ħafna Ewropej (50 % fil-Polonja, 37 % fl-Awstrija, 32 % fil-Ġermanja) jemmnu wkoll li l-Lhud jisfruttaw l-Olokawst. /p>

“Kontra kull aspettattiva, it-teorija ta’ konfoffa li l-Lhud għandhom wisq setgħa reġgħet feġġet fis-soċjetà tagħna, fil-midja u xi kultant anke fil-parlamenti tagħna,” żied jgħid < strong > is-Sur Kotek . Il-mibegħda kontra l-Lhud hija aktar perċettibbli minn qatt qabel.

Il-membri tal-KESE esprimew l-appoġġ tagħhom għall-komunità Lhudija u l-impenn tagħhom biex jiġġieldu d-diskriminazzjoni kontra l-minoranzi.

“Huwa d-dmir tagħna li niġġieldu kontra kwalunkwe att ta’ anti-Semitiżmu fl-Ewropa,” qal il-President tal-Grupp ta’ Min Iħaddem Jacek Krawczyk . “Huwa l-anti-Semitiżmu li wassal għall-Olokawst. Tmenin sena wara li bdiet it-Tieni Gwerra Dinjija, ikun żball serju li dan jintnesa. Ilkoll kemm aħna għandna naħsbu f’dan aħna u nagħżlu għal min se nivvutaw fl-elezzjonijiet Ewropej."

Arno Metzler, il-President tal-Grupp Diversità Ewropa, enfasizza: " Ilkoll kemm aħnarridu nipprotestaw u nitkellmu b’mod sinċier u ħieles fiċ-ċirkli personali tagħna meta nisimgħu ċajt mhux xieraq dwar il-Lhud u l-passat.  Huwa obbligu pubbliku kif ukoll personali li niddefendu l-valuri Ewropej tagħna.”

Mill-Grupp tal-Ħaddiema, José Antonio Moreno Díaz, il-President tal-Grupp tal-KESE dwar id-drittijiet fundamentali u l-istat tad-dritt, qal: "Huma żminijiet diffiċli meta jkollna nispjegaw dak li huwa evidenti. Il-poplu li ma jiftakarx l-istorja tiegħu huwa kkundannat li jirrepetiha. M’għandniex inħallu lok għal diskriminazzjoni. Jekk l-intolleranza tiġi ttollerata, inkunu qed neqirdu d-demokrazija. Il-forzi politiċi għandhom jingħaqdu flimkien biex il-faxxisti jiġu iżolati u jitkeċċew.” (sma)

Aqra d-diskors tal-President Jahier here

“L-isfida li għandna quddiemna tinvolvi kemm il-ġlieda kontra t-tibdil fil-klima, kif ukoll il-provvista ta’ nutrizzjoni għal pjaneta b’popolazzjoni li delwaqt se tlaħħaq l-10 biljun ruħ. Il-bijoekonomija, li tinkludi l-produzzjoni ta’ riżorsi bijoloġiċi rinnovabbli u l-konverżjoni tagħhom fl-ikel, l-għalf u fil-prodotti b’bażi bijoloġika, jista’ jkollha rwol ewlieni fil-kisba tat-tnejn li huma, " qalu Mindaugas Maciulevičius u Udo Hemmerling, relaturi tal-Opinjoni tal-KESE Naġġornaw l-Istrateġija dwar il-Bijoekonomija, adottata fil-15 ta’ Mejju. 

Il-prinċipji tas-sostenibbiltà huma essenzjali għal bijoekonomija “ġdida” u r-riżorsi naturali jridu jiġu ppreservati biex jibqgħu produttivi.

L-SMEs jaqdu rwol ewlieni fil-bijoekonomija. Sabiex iżidu l-kontribuzzjoni tagħhom, dawn jeħtieġu pariri aħjar u aċċess għall-finanzi. Huwa essenzjali li jiġu stabbiliti servizzi ta’ konsulenza individwali u flessibbli li jgħinu lill-SMEs agroalimentari jniedu proġetti innovattivi fuq perjodu twil. Barra minn hekk, il-kooperazzjoni pubblika-privata jista’ jkollha rwol ewlieni biex issaħħaħ l-effiċjenza u biex tiskatta l-iskambju tal-għarfien, tal-għarfien espert u tal-aħjar prattiki.

Ir-rabtiet bejn żoni differenti – urbani-rurali, rurali-rurali u art-baħar – jistgħu jikkontribwixxu għall-ktajjen ta’ valur u raggruppamenti tal-bijoekonomija sostenibbli, u b’mod partikolari jgħinu lill-pajjiżi tal-Ewropa Ċentrali u tal-Lvant iżidu l-prestazzjoni tagħhom u b’hekk jagħtu spinta lit-tkabbir u l-impjiegi, speċjalment f’żoni rurali. Dan ir-reġjun huwa rikk fil-bijomassa minħabba attivitajiet estensivi fl-oqsma tal-agrikoltura, il-forestrija u s-sajd, b’kapaċità għolja, iżda mhux utilizzata biżżejjed, tal-bijomassa. (sma)

Il-KESE jemmen li t-tixjiħ b’mod dinjituż għandu jsir dritt fundamentali. L-Ewropej qed jgħixu aktar, u din hija aħbar tajba.  Iżda b’rabta mat-tixjiħ qed jitfaċċaw sfidi soċjali, ekonomiċi u relatati mas-saħħa li jaffettwaw kemm lill-anzjani kif ukoll lill-familji u lis-soċjetajiet tagħhom. Dan is-suġġett ġie ttraskurat għal wisq żmien u l-ħtiġijiet dejjem jikbru tal-persuni anzjani mhux qed iġu antiċipati, jgħid il-KESE. F’Opinjoni adottata fil-15 ta’ Mejju, il-KESE jenfasizza l-potenzjal enormi li jirrappreżentaw l-anzjani għall-impjiegi ġodda u l-progress teknoloġiku.

Dawk li jipprovdu servizzi ta' għajnuna fid-djar, l-assistenti personali, l-assistenti tal-kura tas-saħħa u l-infermiera huma fost l-okkupazzjonijiet li se joħolqu l-aktar impjiegi fil-futur. L-għarfien u l-edukazzjoni tagħhom huma marbuta mill-qrib mal-benessri tal-anzjani.

“Aħna nipproponu li jiġi stabbilit programm Ewropew għal -taħriġ/edukazzjoni minimi għall-infermiera fil-ġerontoloġija, dawk li jipprovdu l-kura u l-assistenti tal-kura tas-saħħa, mhux biss fuq livell tekniku iżda wkoll fuq livell soċjali u uman, sabiex jiġu żgurati u jissaħħu kemm il-mobilità tal-ħaddiema kif ukoll is-servizzi għall-anzjani”, jgħid Marian Krzaklewski, ir-relatur ta’ din l-Opinjoni tal-KESE.  It-taħriġ għandu jiġi ffaċilitat permezz tal-għodod tal-ICT. Il-KESE jirrakkomanda wkoll li jiġi stabbilit qafas komuni tal-UE li jinkludi l-aħjar programmi tat-taħriġ eżistenti.

L-anzjani jixtiequ jgħixu kemm jista’ jkun fit-tul fl-ambjent tagħhom. Għall-KESE, huwa essenzjali li l-preferenzi tagħhom jiġu rispettati, fi djalogu mal-familji u l-qraba tagħhom. “Madankollu, l-għażla ma tistax tibqa’ biss bejn il-ħaddiema tal-kura tas-saħħa li jgħixu fl-unità domestika fejn jaħdmu u d-djar residenzjali tal-kura”, enfasizza l-korelatur tal-Opinjoni Jean-Pierre Haber. “Diġà jeżistu faċilitajiet alternattivi, u dawk li għad iridu jinbnew għandhom jiffaċilitaw l-għajxien indipendenti. Għalhekk, id-disinjar tagħhom għandu jkun ibbażat fuq il-profili tan-nies u fuq kwalunkwe kundizzjoni medika partikolari li jista’ jkollhom.”

Il-KESE jappella wkoll għal użu aħjar tal-innovazzjonijiet tat-teknoloġija diġitali: telemediċina, sensuri, karta klinika diġitali u rekords mediċi diġitali, kif ukoll teknoloġiji tal-awtomazzjoni fid-djar, li mhux biss itejbu l-indipendenza tal-anzjani, iżda wkoll jagħmlu l-kura aktar effiċjenti u sigura.  (sma)

Il-Kumitat Ekonomiku u Soċjali Ewropew (KESE) ħeġġeġ lill-Unjoni Ewropea u lill-Istati Membri tagħha jpoġġu l-ugwaljanza bejn il-ġeneri fuq nett tal-aġenda politika tagħhom fost tħassib li l-attakki reċenti fuq id-drittijiet tan-nisa fl-Ewropa jistgħu jikkompromettu l-progress lejn l-ugwaljanza bejn l-irġiel u n-nisa.

"Matul dawn l-aħħar għaxar snin qed naraw rigress evidenti u orkestrat fir-rigward tal-ugwaljanza bejn il-ġeneri u d-drittijiet tal-bniedem. F’bosta oqsma, fosthom il-pagi, il-pensjonijiet u l-opportunitajiet ta’ impjieg, il-progress lejn l-ugwaljanza jew twaqqaf jew treġġa’ lura”, qaletIndrė Vareikytė, ir-relaturgħall-Opinjoni tal-KESE dwar kwistjonijiet dwar l-ugwaljanza bejn il-ġeneri.

"Bir-rata attwali, neħtieġu aktar minn mitt sena biex in-nisa jkunu ugwali għall-irġiel fl-Ewropa, u l-bniet tal-ġenerazzjonijiet futuri se jkollhom inqas drittijiet min-nisa tal-lum,” hija żiedet tgħid.

Il-KESE stieden lill-UE tintensifika l-isforzi tagħha u tagħmel l-ugwaljanza għan awtonomu fl-oqsma finanzjarji futuri, flimkien ma’ strateġija ta’ ħames snin ambizzjuża u vinkolanti biex jiġu indirizzati b’suċċess l-aspetti kollha tal-ugwaljanza bejn il-ġeneri.

Il-KESE stieden lill-Istati Membri kollha li għadhom ma rratifikawx il-Konvenzjoni ta’ Istanbul biex jerġgħu jikkunsidraw il-pożizzjoni tagħhom u appella lill-Kummissjoni biex tinkludi l-fastidju onlajn u l-mobbing fil-konfront tan-nisa fid-definizzjoni ta’ diskors ta’ mibegħda illegali.

Sabiex tiġi żgurata rappreżentanza ugwali fi ħdan il-gradi tiegħu, il-KESE stieden lill-Kunsill jirrieżamina l-linji gwida għall-ħatra tal-membri tal-KESE u rrakkomanda li l-Istati Membri jagħżluhom fuq bażi ta’ parità bejn is-sessi. Bħalissa, il-perċentwal ta' nisa fost il-membri tal-KESE huwa ta' 30 %. (ll)

Il-Kumitat Ekonomiku u Soċjali Ewropew sejjaħ lill-Istati Membri tal-UE biex jistabbilixxu ambjent li jippermetti l-filantropija f’konformità mal-libertajiet u d-drittijiet fundamentali tal-UE, u jirrakkomanda li dawn jirrikonoxxu u jippromovu l-filantropija bħala forma ta’ turija ta’ impenn tas-soċjetà għall-ġid komuni.

Fl-ewwel Opinjoni tiegħu ddedikata kompletament għall-filantropija, il-KESE jirrakkomanda wkoll li l-faċilitazzjoni tal-attivitajiet filantropiċi transfruntiera għandha tkun prijorità kemm għall-UE kif ukoll għall-Istati Membri. Madankollu, il-Kumitat indika li l-filantropija ma tistax tkun sostitut għal stat soċjali u sistemi b’saħħithom ta’ protezzjoni soċjali ibbażati fuq il-ġustizzja fiskali u fuq politiki effettivi dwar l-impjiegi. Minflok, dawn għandhom jissaħħu u jiġu żviluppati aktar, biex b’hekk tittejjeb ukoll il-kapaċità tal-organizzazzjonijiet filantropiċi ħalli “jimlew il-lakuni” u jikkomplementaw il-finanzjament f’oqsma speċjalizzati fejn l-appoġġ pubbliku huwa nieqes. “Aħna nirrikonoxxu bis-sħiħ il-valur miżjud komplementari u innovattiv li l-filantropija tista’ tagħti lill-koeżjoni soċjali billi tagħti spinta lill-valuri komuni u tagħmel lis-soċjetà tagħna aktar reżiljenti,” qal ir-relatur tal-Opinjoni, is-Sur Petru Sorin Dandea. Huwa enfasizza li l-azzjoni filantropika għandha tibqa’ trasparenti u għandha tiġi promossa permezz tal-miżuri tas-sigurtà nazzjonali u tal-UE. Iċ-ċifri juru li l-filantropija kibret malajr fl-Ewropa f’dawn l-aħħar tletin sena, b’kontribuzzjonijiet filantropiċi fl-Ewropa li jammontaw għal mill-inqas EUR 87,5 biljun fis-sena, u din hija biss stima konservattiva. (ll)

Fir-reazzjoni tiegħu għall-valutazzjoni tal-Kummissjoni Ewropea tas-sitwazzjoni attwali tas-suq uniku, il-Kumitat Ekonomiku u Soċjali Ewropew (KESE) jgħid li s-suq uniku ġab miegħu ħafna benefiċċji reali għaċ-ċittadini Ewropej. Vjaġġar bl-ajru affordabbli, it-tmiem tat-tariffi tar-roaming, opportunitajiet aħjar ta’ xogħol f’suq tax-xogħol mifrux mal-kontinent kollu kif ukoll drittijiet tal-konsumatur li joffru livell għoli ta’ protezzjoni bejn il-fruntieri. Din l-istorja ta’ suċċess tista’ tkun antidotu kontra l-populiżmu, in-nazzjonaliżmu u l-protezzjoniżmu, jgħid il-KESE.

Il-plenarja tal-KESE fil-15 ta’ Mejju adottat Opinjoni dwar il-Komunikazzjoni tal-KummissjoniIs-Suq Uniku f’dinja li qiegħda tinbidel:Assi uniku li jeħtieġ impenn politiku mġedded, li tanalizza 25 sena tas-suq uniku u telenka l-isfidi tal-futur.

Is-suq uniku kien kisba tremenda, jgħid il-KESE fl-Opinjoni tiegħu, u l-UE trid tiżgura li ċ-ċittadini jafu li ħafna mill-benefiċċji tassew reali li gawdew minnhom fl-aħħar 25 sena bħala konsumaturi, sidien ta’ negozji jew ħaddiema huma r-riżultat tas-suq uniku – benefiċċji li huma stmati li jammontaw għal 8,5 % tal-PDG tal-UE.

Għall-kumpaniji Ewropej, is-suq uniku fisser opportunitajiet biex iżidu u jespandu l-attivitajiet tagħhom fl-UE kollha. Globalment ta lill-Ewropa l-opportunità li jiġi sfruttat suq ta’ 512-il miljun persuna, kif intwera reċentement mill-isforzi internazzjonali biex ikun hemm konformità mar-Regolament Ġenerali dwar il-Protezzjoni tad-Data.

Din l-istorja ta’ suċċess tista’ tgħin tiġbor l-appoġġ meħtieġ biex is-suq uniku jiġi adatt għall-era diġitali, jgħid il-Kumitat Ekonomiku u Soċjali Ewropew (KESE).

Is-suq uniku jrid jiġi perċeput bħala opportunità biex jerġgħu jiġu difiżi l-valuri u d-drittijiet Ewropej: “il-valuri tal-libertà, it-tkabbir ekonomiku, id-demokrazija, il-paċi, ix-xjenza u l-innovazzjoni, l-istabilità politika kif ukoll id-drittijiet soċjali u tal-konsumatur iridu jkunu dejjem f’moħħ iċ-ċittadini. Dawn huma faċilitaturi tal-progress u l-prosperità għall-Istati Membri u ċ-ċittadini kollha,” skont l-Opinjoni tar-relatur Gonçalo Lobo Xavier.

“Is-suq uniku jaffettwa lil kulħadd, u dan huwa dak li jagħmlu daqstant b’saħħtu”, jgħid il-korelatur tal-Opinjoni Juan Mendoza CastroJeħtieġ li niġġieldu t-theddid populist u nazzjonalist, li qed jiżdied fl-Ewropa, u s-suq uniku huwa wieħed mill-aqwa għodda li għandna biex niġġieldu dawn il-messaġġi”.