KESE info

Il-Kumitat Ekonomiku u Soċjali Ewropew (KESE) iddiskuta r-rwol ewlieni li s-soċjetà ċivili organizzata għandu jkollha għal “rEUnaissance” reali waqt avveniment li sar fil-21 ta’ Frar 2019 li laqqa’ flimkien mexxejja ewlenin tal-istituzzjonijiet tal-UE u l-organizzazzjonijiet tas-soċjetà ċivili minn madwar l-Ewropa ftit aktar minn 90 jum qabel l-elezzjonijiet Ewropej.

B’referenza għall-Ewroxettiċiżmu, il-ksenofobija u r-razziżmu fl-Ewropa kollha, il-President tal-KESE Luca Jahier qal li d-demokrazija kienet mhedda u li l-valuri Ewropej kienu qed jiġu ddubitati. "Dan mhuwiex iż-żmien biex naqtgħu qalbna; huwa ż-żmien biex noħolomu u nazzardaw", huwa qal. Il-KESE għandu rwol ewlieni x’jaqdi: "Aħna nagħtu vuċi lill-elf naħa ta’ “L-Ewropa fuq il-post tax-xogħol'. Irridu niżguraw li dan id-djalogu qatt ma jkun kompromess. L-agħar ħaġa tkun li wieħed jibqa’ sieket. Minflok, għandna niżguraw li leħen “it-tajbin” jinstema’", huwa żied jgħid. "Jiġri x’jiġri se nazzardaw naġixxu favur Ewropa sostenibbli", ikkonkluda s-Sur Jahier.

"“Irridu nipproteġu l-bijosfera, l-arja, l-oċeani, il-ħamrija, il-foresti”, qalet l-attivista Żvediża favur il-klima li għandha 16-il sena, Greta Thunberg, li għamlitha ċara li kien imperattiv li tittieħed azzjoni issa kontra t-tibdil fil-klima. Hija wissiet li l-pjaneta tagħna kienet biss xi 11-il sena ’l bogħod minn katastrofu irriversibbli. "Ma aħniex qed nissieltu għall-futur tal-ġenerazzjonijiet żgħażagħ biss; qed niġġieldu għall-ġejjieni ta’ kulħadd. Issa bdejna nnaddfu din is-sitwazzjoni mħawda u mhux se nieqfu qabel ma naslu", ikkonkludiet.

. Il-President tal-Kummissjoni Ewropea, Jean-Claude Juncker, kien favur il-moviment mibdi mis-Sinjura Thunberg billi: "jista’ jwassal għal bidla; infirex f’ħafna bliet u issa hemm messaġġ komuni fit-toroq tal-Ewropa". Huwa enfasizza wkoll kif il-pjan Juncker ikkontribwixxa ħafna biex jiżdied l-investiment ekoloġiku fl-Ewropa matul il-mandat tiegħu.

Il-President tal-Kumitat Ewropew tar-Reġjuni, Karl-Heinz Lambertz qal li l-avveniment indika "rieda komuni li naħdmu flimkien". "Kollha kemm aħna qed nitkellmu dwar l-istess ħaġa: li nibnu l-Unjoni mill-ġdid", huwa stqarr, u żied jgħid li "m’għandniex ninjoraw dak li diġà sar, iżda rridu nibdew b’azzjoni ġdida. Iċ-ċittadini u r-reġjuni tagħna għadhom il-pajjiżi mhux magħrufa tad-demokraziji tagħna. Jeħtieġ li ninvolvuhom bis-sħiħ fil-bini tal-Ewropa. Jeħtieġ li nirriformaw l-Unjoni minn isfel għal fuq”.

L-avveniment

is-Soċjetà Ċivili għal rEUnaissance ġie organizzat biex is-soċjetà ċivili tiġi mobilizzata biex tappoġġa l-valuri demokratiċi Ewropej kif minquxa fit-Trattati u biex titwitta t-triq għall-futur tal-Ewropa qabel l-elezzjonijiet tal-UE. Id-direttur ġenerali ta’ BusinessEurope Markus J. Beyrer, is-segretarju ġenerali tal-ETUC Luca Visentini u s-segretarju ġenerali ta’ Solidar Conny Reuter ħadu sehem fid-dibattitu flimkien ma’ ħafna kelliema oħrajn, inkluża Madeleina Kay, magħrufa bħala l-'EU Supergirl'. (mp)

Il-Kumitat Ekonomiku u Soċjali Ewropew (KESE) adotta l-Opinjoni dwar “Lejn Direttiva Qafas Ewropea dwar l-introjtu minimu” li fiha talab lill-Kummissjoni Ewropea tintroduċi qafas vinkolanti tal-UE li jistabbilixxi introjtu minimu adegwat fl-Ewropa, adattat għall-istandard tal-għajxien f’kull Stat Membru. 

Tali qafas, fil-forma ta’ direttiva, jinħtieġ biex tiġi indirizzata b’mod effettiv il-problema serja u persistenti tal-faqar fl-Ewropa u biex tintradd lura l-kredibbiltà tal-UE, peress li fallew l-impenji tal-UE li jfittxu li jnaqqsu n-numru ta’ ċittadini tal-UE li jinsabu f’riskju ta’ faqar b’20 miljun ruħ, qal il-KESE.

“Il-kwistjoni ta’ introjtu minimu hija politika ferm. Din hija deċiżjoni li trid tittieħed fil-livell tal-UE, u l-Kummissjoni ma tistax tinħeba wara l-prinċipju tas-sussidjarjetà – użat ħażin f’dan il-każ – biex tiddeċiedi li ma tista’ tagħmel xejn dwar problema tant importanti li taffettwa d-dinjità u d-drittijiet tal-bniedem”, qal Georges Dassis, relatur tal-Opinjoni.

“Huwa importanti li l-UE tagħmel xi ħaġa konkreta għan-nies li m’għandhom xejn. Jekk inti indifferenti fil-konfront tal-miżerja tagħhom issa, għada jista’ tkun tard wisq”, is-Sur Dassis qal.

Il-Grupp ta’ Min Iħaddem tal-KESE, li jopponi l-użu propost ta’ strument vinkolanti, ressaq kontropinjoni li fiha l-membri tiegħu argumentaw li l-introjtu minimu għandu jiġi indirizzat fil-livell nazzjonali.

Il-kontropinjoni nċaħdet u l-opinjoni tas-Sur Dassis ġiet adottata b’158 vot favur, 81 vot kontra u 12-il astensjoni. (ll)

Fl-20 ta’ Frar, il-KESE ospita lill-Kummissarju Hogan biex jitkellem dwar il-PAK futura.

Phil Hogan saħaq li kien importanti li l-PAK tevolvi; minbarra l-provvista tal-ikel, jeħtieġ li l-PAK tipprovdi wkoll beni pubbliċi oħra, bi skambju għall-pożizzjoni speċjali tagħha fi ħdan il-baġit tal-UE.

Fir-rigward tal-baġit, il-Kummissarju qal li: “L-Istati Membri, li jaħdmu permezz ta’ kodeċiżjoni mal-Parlament Ewropew, huma f’libertà sħiħa li jżidu l-baġit ġenerali tagħhom bil-ħsieb li l-PAK tinżamm fil-livell attwali.” Huwa ttama li jkun hemm ftehim rapidu dwar il-qafas finanzjarju pluriennali (QFP), peress li l-bdiewa kellhom bżonn taċ-ċertezza u l-istabbiltà rigward il-politika u l-baġit.

Il-Kummissarju semma wkoll il-ftehim politiku dwar regola ġdida li tipprojbixxi ċerti prattiki kummerċjali inġusti fil-katina tal-provvista tal-ikel, li għaliha l-KESE għamel kontribut sostanzjali permezz tal-opinjoni tiegħu u li dwarha se ssir votazzjoni fil-plenarja tal-Parlament Ewropew f’Marzu.

Matul id-dibattitu mal-Kummissarju, il-membru tal-KESE John Bryan qal li l-KESE jappoġġja PAK b’saħħitha b’baġit b’saħħtu, peress li l-PAK kienet importanti għall-paċi u l-koeżjoni.

Maurizio Reale, President tas-Sezzjoni NAT tal-KESE, osserva li PAK futura għandha tiffoka aktar fuq it-tibdil fil-klima u li l-bdiewa kellhom ikunu protetti iżjed fil-ftehimiet ta' kummerċ ħieles.

Peter Schmidt, President tal-Osservatorju tal-Iżvilupp Sostenibbli tal-KESE, enfasizza li l-prattiki inġusti fil-katina tal-provvista tal-ikel kellhom jiġu indirizzati b’mod aktar effettiv u li l-Għanijiet ta’ Żvilupp Sostenibbli għandhom jiġu inklużi fil-politika alimentari tagħna. L-istess standards għoljin mitluba mill-produtturi tagħna jridu jiġu applikati għall-importazzjonijiet tal-ikel. (sma)

Il-KESE adotta, matul is-sessjoni plenarja tiegħu ta’ Frar, opinjoni li tappoġġja l-kontinwazzjoni tal-Programm Ewropew għall-Paċi u r-Rikonċiljazzjoni (PEACE) fl-Irlanda ta’ Fuq wara l-ħruġ tar-Renju Unit mill-UE. Dan l-appoġġ kontinwu huwa kkunsidrat bħala kruċjali minħabba s-sensittività tad-dibattitu dwar il-fruntiera tar-Renju Unit/l-Irlanda fil-kuntest tan-negozjati tal-Brexit. 

L-opinjoni, abbozzata minn Jane Morrice, tgħid li "l-urġenza tas-sitwazzjoni, maħluqa mill-proċess tal-Brexit u l-ħruġ eventwali tar-Renju Unit, teħtieġ rispons mill-UE għas-salvagwardja tal-proċess ta’ paċi li taqbel mal-ħtiġijiet ġodda tar-reġjun fil-kuntest ta’ wara l-Brexit". Huwa jirrakkomanda li ma jinżammx biss il-programm PEACE kif propost, iżda wkoll li jiġi estiż it-tul ta’ ħajja tiegħu, peress li r-riżoluzzjoni tal-kunflitti se tieħu ż-żmien u teħtieġ impenn aktar fit-tul miċ-ċikli ta’ finanzjament attwali.

Il-KESE jgħid li għandha titqies il-possibilità li ssir enfasi akbar fuq l-attivitajiet ta’ komunikazzjoni biex jiġi żgurat li ċ-ċittadini jkunu kompletament konxji tar-rwol pożittiv tal-UE. Jissuġġerixxi wkoll l-użu tal-marka “WhiteDove” biex jissimbolizza proġetti ffinanzjati mill-PEACE, filwaqt li tiġi stabbilita rabta ma’ opinjoni li għandha tiġi ppreżentata minn Jane Morrice fis-sessjoni plenarja tal-KESE f’Marzu bit-titlu The White Dove Way – Proposta għal strateġija mmexxija mill-UE għall-bini tal-paċi globali. Din l-opinjoni tipproponi l-istabbiliment ta’ triq Ewropea ta’ paċi mill-Irlanda ta’ Fuq għal Nikosija, f’Ċipru, li tissejjaħ il- “WhiteDoveWay”, li għandha ssegwi t-triq tal-pellegrin Irlandiż Columbanus li torbot flimkien rotot oħrajn bħall-Western Front Way u tgħaddi mill-Balkani biex tgħaqqad iż-żewġ gżejjer maqsumin fuq iż-żewġ naħat tal-Ewropa. (dgf)

Il-progress ekonomiku u l-istabilità soċjali huma żewġ elementi fil-ġlieda kontra l-Ewroxettiċiżmu, iżda waħedhom mhumiex biżżejjed: is-soċjetà ċivili għandha bżonn tinvolvi ruħha!

Waqt il-preżentazzjoni tal-istudju dwar Societies outside Metropolises: the role of civil society organisations in confronting populism (Soċjetajiet barra l-metropoli: ir-rwol tal-organizzazzjonijiet tas-soċjetà ċivili fil-ġlieda kontra l-populiżmu), li saret fl-20 ta’ Frar 2019 fi Brussell, il-Grupp Diversità Ewropa tal-KESE ta ħarsa ġenerali lejn iż-żieda tal-populiżmu fl-UE, u analizza kif u għalfejn din iż-żieda, u enfasizza r-rwol ewlieni li s-soċjetà ċivili jista’ jkollha fil-ġlieda kontra l-populiżmu.

Filwaqt li l-progress ekonomiku u l-istabilità soċjali għandhom rwol essenzjali fl-indirizzar tat-tħassib li jwassal għall-Ewroxettiċiżmu, dawn il-fatturi waħedhom mhumiex biżżejjed. L-organizzazzjonijiet tas-soċjetà ċivili jridu jieħdu azzjoni biex jikkomunikaw messaġġ pożittiv dwar il-valur u l-importanza tal-Ewropa u biex iqarrbu l-Ewropa maċ-ċittadini tagħha. “Il-preservazzjoni tad-demokrazija liberali timplika lil kulħadd,” qal il-President tal-Grupp Diversità Ewropa, Arno Metzler. "Nemmen li l-uniku mod biex jiġi miġġieled il-populiżmu huwa permezz tas-sistema demokratika tagħna, is-sistema nnifisha li qed tipprova timmina: l-UE mhux biss trid titkellem man-nies, iżda trid tisma’ u tiddjaloga b’mod attiv. Is-soċjetà ċivili Ewropea għandha tgħin lill-Unjoni tilħaq liċ-ċittadini, u b’hekk tipprevjeni u tillimita l-attraenza tal-partiti populisti," huwa żied jgħid.

Ir-riċerka turi li t-tnaqqis ekonomiku, l-instabilità soċjali u l-livelli limitati tal-edukazzjoni huma wħud mill-fatturi l-aktar sinifikanti li wasslu għal aktar appoġġ għall-populisti fl-UE kollha. Madankollu, hemm bżonn li jitqiesu wkoll kwistjonijiet oħra aktar kumplessi u interdipendenti, bħalma huma x-xewqa li jinżamm l-istatus quo u l-ħtieġa li jiġu protetti l-valuri tradizzjonali, il-monokulturi jew identitajiet partikolari. (mp)

L-ikel għandu rwol ċentrali fil-ħajja tan-nies u ma għandux jitqies biss mil-lat nutrittiv jew tas-saħħa, iżda wkoll mil-lat ambjentali u soċjali. Sabiex tiġi ffaċilitata tali sistema komprensiva u sostenibbli tal-ikel, il-KESE jipproponi l-introduzzjoni ta’ Linji Gwida ġodda dwar Dieti Sostenibbli.

"Dak li nieklu jaffetwa lil saħħitna u lill-pjaneta tagħna. Neħtieġu politiki biex nippromovu dieti aktar tajbin għas-saħħa u aktar sostenibbli, u jeħtieġ jiġu żviluppati Linji Gwida dwar Dieti Sostenibbli. Dan huwa essenzjali biex jintlaħqu l-Għanijiet ta’ Żvilupp Sostenibbli tan-NU u l-Ftehim ta’ Pariġi dwar it-tibdil fil-klima" jgħid Peter Schmidt, relatur għall-opinjoni fuq inizjattiva proprja opinion.

"Il-promozzjoni ta’ dieti tajbin għas-saħħa u sostenibbli hija importanti fil-kuntest ta’ politika komprensiva tal-UE dwar l-ikel. Il-Linji Gwida dwar Dieti u skemi ta’ tikkettar ċari, inkluż it-tikkettar dwar l-oriġini, li jqisu d-differenzi kulturali u ġeografiċi bejn u fi ħdan l-Istati Membri jkunu ta’ għajnuna biex tingħata direzzjoni aktar ċara lill-azjendi agrikoli, lill-proċessuri, lill-bejjiegħa bl-imnut u lis-servizzi tal-ikel. Is-sistema agroalimentari tkun tibbenefika wkoll minn qafas ġdid u aktar trasparenti biex isiru produzzjoni, proċessar, distribuzzjoni u bejgħ ta’ ikel aktar tajjeb għas-saħħa u aktar sostenibbli bi prezzijiet aktar ġusti," jgħidMaurizio Reale, il-President tas-Sezzjoni Speċjalizzata għall-Agrikoltura, l-Iżvilupp Rurali u l-Ambjent (NAT).

Sabiex jiġu stabbiliti dawn il-linji gwida għall-Ewropa kollha, il-KESE jipproponi l-ħolqien ta’ Grupp ta’ esperti, li jikkonsisti minn professjonisti u xjentisti rilevanti mid-dinja tan-nutrizzjoni, is-saħħa pubblika, l-ikel, u x-xjenzi ambjentali u soċjali. Dan il-grupp ta’ esperti għandu jfassal linji gwida bbażati fuq l-evidenza fi żmien sentejn. (sma)

Fi tliet opinjonijiet adottati fi Frar, il-KESE japprova l-proposta tal-Kummissjoni li testendi temporanjament l-applikazzjoni tal-leġislazzjoni tal-UE biex tindirizza problemi speċifiċi li jistgħu jaffettwaw it-trasport tal-merkanzija bl-ajru u bit-triq f’każ li ma jsirx ftehim dwar il-Brexit. 

• Sikurezza tal-avjazzjoni

Il-KESE jappoġġja l-pjan ta’ azzjoni mfassal mill-Kummissjoni biex ikopri xenarju ta’ l-ebda ftehim milqugħ dwar il-Brexit, b’miżuri speċifiċi biex tiġi żgurata l-validità kontinwa taċ-ċertifikati għall-prodotti, il-partijiet, it-tagħmir u l-kumpaniji ajrunawtiċi. "Ir-regolament tal-UE għandu jidħol fis-seħħ biss biex isolvi l-kwistjonijiet ta’ sikurezza tal-avjazzjoni li altrimenti ma jkunux jistgħu jiġu solvuti. L-għan mhuwiex li jiġi estiż l-istatus quo, iżda li tiġi offruta soluzzjoni temporanja sabiex is-settur ikun jista’ jkompli jaderixxi mal-ogħla standards ta’ sikurezza sakemm ir-Renju Unit ikun stabbilixxa aġenziji nazzjonali u leġislazzjoni nazzjonali biex jassumi r-rwol ta’ aġenzija tas-sikurezza," qal ir-relatur Thomas McDonogh.

• Servizzi tal-ajru

Il-Kumitat jappoġġja wkoll l-enfasi tal-proposta tal-Kummissjoni fuq regolament ta’ kontinġenza li jiżgura servizzi tal-ajru bażiċi u jirrimarka li dan ma jistax jitqies bħala estensjoni tar-regoli attwali, b’mod partikolari r-Regolament (KE) Nru 1008/2008, u lanqas bħala ftehim ta’ ħruġ unilaterali, għaliex id-drittijiet huma limitati fiż-żmien u fil-finijiet tagħhom. L-awtur tal-opinjoni, Jacek Krawczyk, qal: "Ir-Regolament propost huwa soluzzjoni temporanja u jirrappreżenta pjan ta’ kontinġenza biex jitnaqqas l-impatt ta’ Brexit li jseħħ f’daqqa waħda. Huwa l-uniku mod realistiku biex jittaffew il-konsegwenzi negattivi serji mistennija għas-settur tal-avjazzjoni jekk il-ftehim dwar il-ħruġ ma jiġix ratifikat qabel id-29 ta’ Marzu 2019."

• Trasport tal-merkanzija bit-triq

Barra minn hekk, il-KESE jappoġġja l-proposti tal-Kummissjoni li jagħtu lill-operaturi tat-trasport tal-merkanzija bit-triq tar-Renju Unit id-dritt li jiċċaqilqu b’mod liberu fl-UE sal-31 ta’ Diċembru 2019, sakemm it-trasportaturi tal-UE jingħataw ukoll kundizzjonijiet ġusti, ugwali u mhux diskriminatorji tal-kompetizzjoni fir-Renju Unit. "Nittamaw ħafna li, sad-data tal-ħruġ tar-Renju Unit, l-awtoritajiet Brittaniċi jkunu dddċidew dwar sensiela ta’ miżuri temporanji ekwivalenti, bil-għan li jiġi żgurat li t-trasportaturi tal-merkanzija bit-triq tal-UE li jiċċirkolaw fir-Renju Unit ikollhom l-istess drittijiet bħal dawk offruti mill-Kummissjoni, b’mod tranżizzjonali, lil trasportaturi fir-Renju Unit b’liċenzja li tippermettilhom iġorru merkanzija bejn it-territorju tar-Renju Unit u s-27 Stat Membru li jifdal," qal ir-relatur, Raymond Hencks. (mp)

Minħabba r-riżultati mħallta tal-politiki ta’ riforma tal-passat, huwa essenzjali li l-UE u l-Istati Membri jwettqu evalwazzjoni fil-fond. Minkejja t-titjib li sar s’issa, hemm il-ħtieġa għal aktar riformi u miżuri biex tingħata spinta lit-tkabbir u tissaħħaħ il-koeżjoni u d-dimensjoni soċjali tal-politiki, jgħid il-KESE fl-Opinjoni tiegħu dwar l-Istħarriġ Annwali dwar it-Tkabbir tal-2019 (SAT).

Il-KESE jikkritika l-valutazzjoni ġeneralment favorevoli tal-Kummissjoni li hemm fis-SAT fir-rigward tal-progress ekonomiku u soċjali mill-2014 u l-politiki ta’ riforma tal-passat. Ir-ritmu tat-tkabbir ekonomiku fl-UE, b’mod ġenerali, għadu aktar kajman milli kien qabel il-kriżi u jeħtieġ li jitqiesu d-differenzi fi ħdan u bejn ir-reġjuni. Is-SAT bla dubju ma jissuġġerixxix li nistgħu nistrieħu fuq dak li diġà ksibna.

Il-KESE jilqa’ l-impenn tal-Kummissjoni għall-appoġġ tar-riformi. Ir-riformi u l-politiki għandhom jagħmlu l-ekonomija u s-swieq tax-xogħol aktar reżiljenti u b’hekk itejbu t-tkabbir fl-ekonomija u l-produttività. Dawn iridu juru wkoll impenn reali fir-rigward tal-Pilastru Ewropew tad-Drittijiet Soċjali u l-għanijiet internazzjonali dwar il-klima. Sfortunatament, is-SAT jonqos milli jipprovdi proposti adegwati għall-implimentazzjoni u l-finanzjament tagħhom.

Is-SAT jonqsu wkoll il-proposti għall-ġlieda kontra r-riskji esterni għat-tkabbir. Il-politiki ta’ stimolu biex jinżammu l-livelli tat-tkabbir u l-impjiegi għandhom ikunu inkwadrati u bbaġitjati kif xieraq. Investiment ta’ kwalità għolja fl-edukazzjoni u t-taħriġ, kif propost fl-AGS, ikun milqugħ f’dan il-kuntest.

L-imsieħba soċjali u s-soċjetà ċivili jistgħu jgħinu biex jitħaffef ix-xogħol fuq proposti ġodda ta’ politika u jiżguraw li r-riformi huma prattiċi, xierqa u speċifiċi għall-pajjiż.

Fl-aħħar nett, il-KESE jinsab sodisfatt li l-Kummissjoni tagħti prijorità lir-riformi biex jiżdied l-investiment tas-settur privat u dak pubbliku. Ir-regoli fiskali tal-UE għandhom jippermettu finanzjament mill-baġits nazzjonali għal investiment soċjalment u ekonomikament produttiv li ma jipperikolax is-sostenibbiltà baġitarja tal-ġejjieni. (jk)

L-Istati Membri tal-UE jeħtieġ isaħħu l-involviment tal-partijiet interessati fl-isforzi tagħhom biex jirriformaw l-ekonomiji nazzjonali. Flimkien ma’ strateġija ġdida fit-tul tal-UE għall-iżvilupp sostenibbli, dan jista’ jgħin biex jinħoloq semestru Ewropew aktar effiċjenti u inklużiv li jkun lest jindirizza l-isfidi li qed tiffaċċja l-UE.

Dawn huma wħud mis-sejbiet ewlenin ta’ seduta ta’ smigħ pubblika dwar Lejn Semestru Ewropew aktar inklużiv organizzata mill-Grupp tas-Semestru Ewropew tal-KESE fit-28 ta’ Frar.

Huwa u jagħti bidu għall-avveniment, il-president tal-KESE Luca Jahier talab li s-semestru jkun konsolidat u qal li wasal il-ħin għal enfasi fuq l-inklużjoni, biex jinħolqu "ħajjiet deċenti għan-nies u kundizzjonijiet deċenti għan-negozji filwaqt li t-tkabbir jingħata "perspettiva aktar reżiljenti, innovattiva u sostenibbli".

Il-parteċipanti talbu li l-imsieħba soċjali, l-organizzazzjonijiet tas-soċjetà ċivili u l-parlamenti nazzjonali jkunu involuti b’mod sistematiku f’riformi ulterjuri. Huma qalu li l-konsultazzjoni fil-livell lokali hija essenzjali biex jinkiseb l-appoġġ pubbliku u għandha tkun obbligatorja.

Fil-preżent, il-kwalità tal-involviment fir-riformi strutturali u l-iżvilupp tal-programmi nazzjonali ta’ riforma tvarja ħafna madwar l-Ewropa u fost l-oqsma ta’ politika. Barra minn hekk, l-implimentazzjoni tar-rakkomandazzjonijiet speċifiċi għall-pajjiżi mhijiex sodisfaċenti fl-Istati Membri kollha. Waħda mir-raġunijiet ewlenin għal dan hija n-nuqqas ta’ sjieda tar-riformi.