KESE info

Il-KESE jirrakkomanda t-twaqqif bla dewmien tal-Unjoni tas-Swieq Kapitali, filwaqt li jappoġġja l-proposti tal-Kummissjoni għar-riforma tal-korpi tas-Sistema Ewropea ta’ Superviżjoni Finanzjarja billi jissaħħu l-kompetenzi tagħhom u jittejbu l-governanza u l-finanzjament tagħhom.

“Ir-riformi proposti huma pass importanti fit-triq lejn aktar integrazzjoni u konverġenza,” qal Daniel Mareels (Min Iħaddem, BE), relatur għall-Opinjoni dwar is-SESF – Riformi. “Ir-riformi jipprovdu elementi fundamentali ġodda għall-ikkompletar tal-Unjoni tas-Swieq Kapitali u jiżguraw li s-swieq finanzjarji jiġu regolati kif imiss, u li jkunu b’saħħithom u stabbli”.

Fil-fehma tal-Kumitat, Unjoni tas-Swieq Kapitali li taħdem mingħajr xkiel CMU b’superviżjoni integrata tikkontribwixxi għal iżjed tranżazzjonijiet transkonfinali tas-suq, u l-kondiviżjoni privata u transkonfinali tar-riskji tagħmel lill-Istati Membri aktar reżiljenti għax-xokkijiet asimmetriċi u tikkontribwixxi għall-irkupru ekonomiku fiż-żona tal-euro.

Il-KESE huwa tal-fehma li r-riformi tas-SESF għandhom jikkontribwixxu għall-ksib ta’ superviżur uniku tas-swieq kapitali Ewropej, iżda li aktar passi favur l-integrazzjoni jitolbu djalogu u konsultazzjoni mal-partijiet interessati rilevanti kollha.

Rigward l-istabbiliment tal-kompetenzi tal-awtoritajiet superviżorji nazzjonali u Ewropej, huwa jħeġġeġ li jiġu applikati l-prinċipji tas-sussidjarjetà u tal-proporzjonalità fejn possibbli, u li jiġu żgurati ċ-ċarezza u ċ-ċertezza legali. Barra minn hekk, għandhom jiġu indirizzati n-nuqqasijiet fis-superviżjoni li jimpedixxu t-twettiq tal-Unjoni tas-Swieq Kapitali.

B’ħarsa lejn il-futur, il-KESE huwa tal-fehma li l-iżviluppi u t-teknoloġiji ġodda – pereżempju FinTech – kif ukoll finanzjament iżjed sostenibbli għandhom jiġu riflessi fis-sistema tas-superviżjoni. Fl-aħħar nett, il-Kumitat jitlob li tiġi żgurata t-trasparenza ta’ kull tibdil fid-distribuzzjoni tal-ispejjeż u l-kontroll adatt tar-riżorsi globali. (jk)

Fl-Opinjoni reċenti tiegħu dwar l-Istħarriġ Annwali dwar it-Tkabbir (SAT) għall-2018 tal-Kummissjoni, il-Kumitat Ekonomiku u Soċjali Ewropew (KESE) ġibed l-attenzjoni lejn l-importanza strateġika tas-Semestru Ewropew, iżda qal li huwa favur l-estensjoni tiegħu bi skop, sabiex tiġi żgurata mhux biss is-sostenibilità ekonomika u soċjali, iżda wkoll dik ambjentali fil-politiki makroekonomiċi tal-UE.

Il-Kumitat faħħar l-inklużjoni ta’ indikaturi soċjali – it-Tabella ta’ Valutazzjoni Soċjali – fis-SAT 2018, u jsostni li din saħħet id-dimensjoni soċjali tas-Semestru Ewropew.

“Il-KESE jaqbel li s-Semestru jappoġġja l-Pilastru Soċjali tas-Semestru Ewropew sabiex isir għodda għal kondizzjonijiet tal-ħajja u tax-xogħol aħjar għaċ-ċittadini Ewropej. Nixtiequ naraw l-objettivi tal-Pilastru inklużi fil-politiki u d-deċiżjonijiet meħuda,” qal ir-relatur għall-Opinjoni, Dimitris Dimitriadis.

Il-Kumitat wiegħed li se jkompli jikkontribwixxi għas-Semestru, iżda semma wkoll il-ħtieġa li jiżdied l-involviment tas-soċjetà ċivili u jitħeġġeġ l-investiment pubbliku.

L-investiment pubbliku għandu jinkludi spinta lill-investiment soċjali f’miżuri li jrawmu l-edukazzjoni u t-taħriġ u jtejbu s-servizzi pubbliċi, l-infrastruttura tal-kura u l-koeżjoni soċjali madwar l-UE, bil-għan li tingħata spinta lill-iżvilupp tal-kapital uman u l-iżgurar ta’ forza tax-xogħol b’ħiliet speċjalizzati kif ukoll dimensjoni soċjali qawwija.

Barra minn hekk, il-KESE qal li kien qed jenfasizza l-bżonn ta’ approċċ mhux sistematiku għal riformi strutturali, li għandhom jitwettqu biss meta jkun meħtieġ. (ll)

Fir-ritratt: Dimitris Dimitriadis, relatur tal-KESE

L-istituzzjonijiet Ewropej għandhom ikunu minn ta’ quddiem nett fl-ottimizzazzjoni tal-industrija tat-teknoloġija medika fl-Ewropa, peress li l-prestazzjoni tagħha bħalissa qed tbati minn frammentazzjoni eċċessiva u kompetizzjoni dejjem tikber, il-Kumitat Ekonomiku u Soċjali Ewropew (KESE) qal fis-sessjoni plenarja tiegħu fl-14 ta’ Frar.

Fl-opinjoni tiegħu dwar” Tibdil industrijali fis-settur tas-saħħa”, il-KESE wissa li l-kompetituri diġà qed iħabbtu mal-bieb tal-Ewropa. In-negozjati kummerċjali għalhekk iridu jiżguraw produzzjoni Ewropea aġġornata fil-provvista ta’ kura tas-saħħa universali. 

“Hija r-responsabbiltà tal-UE li tintegra s-settur tat-teknoloġija medika, tgħaqqad inizjattivi fil-pajjiżi u r-reġjuni u tassigura li huwa kapaċi jopera fid-dinja globali. Il-gvernijiet Ewropej, il-kumpaniji tal-assigurazzjoni, ir-regolaturi, ir-rappreżentanti tal-pazjenti u tal-istaff mediku, u l-industrija jridu jaħdmu flimkien biex jikkooperaw u jiżviluppaw strateġija komuni,” qal ir-relatur Joost van Iersel.

“Barra minn hekk, il-fattur uman huwa ta’ importanza kbira”, żied jgħid il-korelatur Enrico Gibellieri. “ It-tranżizzjoni lejn settur ġdid tas-saħħa u tal-kura tas-saħħa teħtieġ moħħ miftuħ, forom ġodda ta’ professjonaliżmu u tfassil mill-ġdid tax-xogħol relatat mas-saħħa u l-kura tas-saħħa. Id-djalogu soċjali Ewropew fis-settur tas-saħħa u s-servizzi soċjali għandu jissaħħaħ, b’enfasi fuq l-edukazzjoni u programmi ta’ taħriġ u l-kwalità tal-kundizzjonijiet tax-xogħol.”

Filwaqt li s-settur tat-teknoloġija medika huwa settur dinamiku u għadu f’pożizzjoni ta’ tmexxija, l-isfidi li l-industrija qed tiffaċċja bħalissa – inklużi prattiki kummerċjali inġusti u frammentazzjoni għolja – għandhom jiġu indirizzati issa sabiex nadattaw malajr għal ambjent li dejjem qed jinbidel. (sma)

Fl-Opinjoni tiegħu dwar It-tisħiħ ta’ azzjonijiet dwar il-klima minn atturi mhux statali, il-Kumitat Ekonomiku u Soċjali Ewropew (KESE) jipproponi li jkun hemm Djalogu Ewropew, li l-għan ewlieni tiegħu jkun li jagħmel l-impenn lejn it-tibdil fil-klima aktar attraenti għad-diversi partijiet ikkonċernati mhux statali sabiex dan isir l-istandard il-ġdid.

"Diġà għandna ħafna proġetti żgħar fl-enerġija, it-trasport, l-agrikoltura, il-forestrija, eċċ. u jeħtieġ li jkunu iktar viżibbli u li nagħtuhom appoġġ akbar, kemm permezz ta’ regolazzjoni aħjar kif ukoll b’aċċess iktar faċli għal fondi. Huwa importanti li jintbagħat messaġġ qawwi u pożittiv lin-negozji ż-żgħar u s-soċjetà ċivili", qal ir-relatur Mindaugas Maciulevičius.

Skont l-istħarriġ tal-KESE fost atturi mhux statali, l-aktar ħtiġijiet urġenti tagħhom huma:

• politika ta’ appoġġ/l-ambjent leġisattiv;
• l-aċċess għall-fondi pubbliċi u inċentivi fiskali;
• l-iskambju tal-għarfien u l-aħjar prattiki/eżempji li għandhom jiġu segwiti, il-bini tal-kapaċità;
• titjib fil-kooperazzjoni bejn id-diversi atturi fl-isferi privati u pubbliċi.

“Minkejja it-tmexxija globali tagħha, l-UE m’għandhiex qafas intern li joħloq ambjent favorevoli għal azzjonijiet klimatiċi mhux statali”, żied jgħid il-korelatur Josep Puxeu Rocamora, “u huwa l-kompitu tagħna li nfakkru lill-Kummissjoni tar-responsabilità tagħha”.

Id-Djalogu Ewropew għandu jwieġeb għall-ħtiġijiet ta’ atturi mhux statali, jagħti prijorità lir-rabta strateġika ta’ prorammi, inizjattivi u istituzzjonijiet eżistenti, u jipprovdi ħarsa ġenerali lejn l-azzjonijiet dwar il-klima. L-ewwel pass lejn Djalogu Ewropew għandu jkun avveniment fl-2018 li jlaqqa’ flimkien in-netwerks tal-partijiet interessati, ir-rappreżentanti mill-istituzzjonijiet tal-UE u l-Istati Membri. (sma)

tal-Kummissjoni Ewropea imissha ilha li waslet, u nieqsa mill-ambizzjoni, mill-konsistenza, u minn mekkaniżmi konvinċenti għall-implimentazzjoni effettiva tagħha.

Fl-Opinjoni tiegħu dwar il-moviment liberu ta’ data mhux personali fl-UE, abbozzata minn Jorge Pegado Liz u adottata fis-sessjoni plenarja ta’ Frar, il-KESE jieħu pożizzjoni kontra l-approċċ adottat mill-Kummissjoni Ewropea.

Il-Kumitat jirrimarka li inizjattiva leġislattiva fil-qasam tal-moviment liberu ta’ data mhux personali hija essenzjali sabiex jintlaħqu l-objettivi tal-Aġenda Diġitali u jitlesta s-Suq Uniku Diġitali.

Madankollu, il-KESE huwa tal-fehma li l-Kummissjoni ma tindirizzax verament l-aktar tliet għanijiet importanti, u għalhekk ma jistax japprova t-test attwali. “Din il-proposta mhux ser tikkontribwixxi lejn il-kisba tal-għanijiet bażiċi”, Is-Sur Pegado Liz. “Trid tkun parti minn approċċ aktar globali; għandha tkun l-ewwel pass fl-iżvilupp futur ta’ mod aktar ambizzjuż biex ikun assigurat moviment liberu ta’ data mhux personali fis-suq diġitali fl-Unjoni Ewropea”

• Ir-rekwiżiti tal-lokalizzazzjoni tad-data

Għan 1: Titjib tal-mobbiltà transkonfinali ta’ data mhux personali fis-suq uniku.

• Disponibbiltà tad-data għall-awtoritajiet kompetenti

Għan 2: L-iżgurar li s-setgħat tal-awtoritajiet kompetenti biex jitolbu u jingħataw aċċess għal data għal finijiet ta’ kontroll regolatorju, bħal pereżempju għall-ispezzjoni u għall-awditjar, jibqgħu mhux affettwati.

• Trasferiment tad-data għal utenti professjonali

Għan 3: It-tħaffif tal-proċess għall-utenti professjonali tal-ħżin tad-data jew servizzi oħra tal-ipproċessar biex jaqilbu minn fornitur tas-servizzi għal ieħor u biex jittrasferixxu d-data. (mp)

Fir-ritratt: Jorge Pegado Liz, Relatur tal-KESE tal-Opinjoni dwar il-moviment liberu ta’ data mhux personali fl-UE

Waqt il-ftuħ tal-Konferenza tal-Partijiet Interessati tal-Ekonomija Ċirkolari tal-Kummissjoni Ewropea fl-20 ta’ Frar, il-President tal-KESE, Georges Dassis, qal: “it-tranżizzjoni lejn ekonomija ċirkolari hija opportunità importanti għas-soċjetà ċivili. Diġà qed isseħħ fuq il-post…. Madankollu, jeħtieġ li niżguraw li tiġi aċċettata b’mod wiesa’. Li ħadd ma jitħalla lura huwa wieħed mill-objettivi tal-Pjattaforma tal-Partijiet Interessati tal-Ekonomija Ċirkolari, spazju kruċjali fejn għandha tissawwar din ix-xorta ta’ viżjoni kondiviża tat-tranżizzjoni lejn ekonomija Ewropea ċirkolari u sostenibbli”.

It-tieni ġurnata tal-konferenza, li kienet ospitata mill-KESE, iffokat fuq l-ideat u l-azzjonijiet li qed jiġu introdotti madwar l-Ewropa, fejn l-SMEs, l-intrapriżi tal-ekonomija soċjali, il-ħaddiema, il-bdiewa, il-manifatturi u l-konsumaturi qed jimplimentaw l-ekonomija ċirkolari fuq il-post.

Il-KESE laqa’ ’l fuq minn 300 parteċipant biex jieħdu sehem f’16-il sessjoni ta’ ħidma paralleli fejn b’mod attiv setgħu jaqsmu l-għarfien u l-aħjar prattiki u jindividwaw l-ostakli għall-iżvilupp tal-ekonomija ċirkolari.

Is-suġġetti għad-diskussjoni inkludewil-possibilità ta' tiswija u l-ekodisinn, ir-rwol tal- iskart, ir-responsabbiltà estiża tal-produttur, l-approċċ ċirkolari fis-settur agroalimentari u tal-forestrija, l-ekonomija ċirkolari fuq livell globali, id-dimensjoni tal-impjiegi tagħha, il-finanzjament ekoloġiku, il-ħolqien ta’ komunità għas-soluzzjoni tal-problemi u l- SMEs fir-rigward tal-ekonomija ċirkolari.

Dak li ħareġ mid-diskussjonijiet kien li l-ħin kien qiegħed jagħfas u li l-atturi kollha kellhom ikunu involuti. Il-komunità tal-ekonomija ċirkolari kellha l-ħtieġa li tkun inklużiva kemm jista’ jkun u li l-esperjenzi prattiċi jkunu kondiviżi sal-massimu biex joħolqu effett multiplikatur.

Iż-żieda fir-ritmu u l-mobilizzazzjoni kemm jista’ jkun wiesgħa tal-forzi huma l-kompiti ewlenin li għandhom jinkisbu mill-KESE, permezz tal-ġestjoni tas-sit web u l-iżvilupp ta’ komunità ta’ partijiet interessati li tkun tassew impenjata u kooperattiva.

Rapport sħiħ bis-sejbiet ewlenin tal-Konferenza ser jittella’ dalwaqt fuq is-sit web tal- Pjattaforma Ewropea tal-Partijiet Interessati tal-Ekonomija Ċirkolari. (dm)

L-Istati Membri għandhom jaħdmu b'mod urġenti fuq UEM aktar stabbli, prospera u aktar reżiljenti. Għaldaqstant, hemm bżonn ta’ aktar miżuri fuq livell nazzjonali u dak tal-UE: din hija waħda mill-konklużjonijiet ewlenin ta’ dibattitu pubbliku dwar it-tlestija tal-UEM, ospitat reċentement mill-KESE.

Esperti ekonomiċi u istituzzjonali u rappreżentanti tas-soċjetà ċivili qablu li l-isfidi attwali u t-tagħlimiet meħuda minn kriżijiet tal-passat urew b’mod ċar ħtieġa li tiġi riformata u li titlesta l-UEM, filwaqt li l-irkupru ekonomiku attwali fl-UE kollha u ż-żieda tal-appoġġ ċiviku għall-euro pprovdew opportunità eċċellenti biex isir dan.

Il-parteċipanti fid-dibattitu raw ħtieġa partikolari għat-tlestija rapida tal-Unjoni Bankarja u l-Unjoni tas-Swieq Kapitali sabiex nersqu lejn it-tlestija tal-UEM. Huma ħeġġew lill-Istati Membri u lill-Kummissjoni biex jiżguraw is-sostenibbiltà tal-finanzi futuri u jsibu l-aħjar bilanċ bejn ir-responsabbiltà u s-solidarjetà fid-deċiżjonijiet futuri dwar l-UEM.

Ġew ippreżentati erba’ aċċelleraturi li jistgħu jintużaw fil-livell tal-UE sabiex jimmassimizzaw l-effetti tar-riformi strutturali domestiċi: strateġija makroekonomika komuni taż-żona tal-euro biex tindirizza xokkijiet asimmetriċi, approċċ konġunt għall-finanzjament tal-investiment u innovazzjoni fil-livell mikroekonomiku, baġit taż-żona tal-euro biex jiffinanzja ċerti beni pubbliċi Ewropej, u qafas istituzzjonali aktar effettiv u responsabbli li, pereżempju, jagħti liż-żona tal-euro, ministru tal-finanzi

Ir-relaturi tal-KESE, Mihai Ivaşcu (Interessi Varji) u Stefano Palmieri (Ħaddiema), ser jinkludu r-riżultati tad-dibattitu f’ Opinjoni dwar il-pakkett tal-EMU tal-Kummissjoni, li ser jitressaq għall-votazzjoni f’April li ġej. (jk)

“L-isfidi għall-industrija tal-Ewropa huma straordinarji, u l-ebda Stat Membru ma jista’ jiffaċċjahom waħdu. Iżda l-opportunitajiet huma enormi. Irridu naħtfuhom biex inżommu t-tmexxija tagħna f’bosta oqsma fejn diġà għandna u nirkuprawha fejn kważi ntilfet lill-kompetituri”.

Din it-triq, madankollu, tista’ tkun ta’ suċċess biss jekk it-28 Stat Membru jaġixxu flimkien, mhux individwalment. Għalhekk nistieden lill-Kummissjoni u ’l-Istati Membri biex jikkombinaw il-bosta politiki eżistenti fi strateġija unika aktar fit-tul u biex il-pajjiżi tagħna jieħdu impenn favur azzjoni koerenti li tappoġġja lir-raggruppamenti industrijali minn naħa għall-oħra tal-fruntieri nazzjonali", qal Gonçalo Lobo Xavier, President tal-KESE, fil-Jum tal-Industrija Ewropea.

Fl-Opinjoni tiegħu dwar "Investiment fi tkabbir intelliġenti, innovattiv u sostenibbli," adottata fil-15 ta’ Frar, il-KESE appella għall-ikkompletar tas-suq uniku, inkluż is-suq tal-kapital. Huwa partikolarment meħtieġ li jissaħħu l-istandardizzazzjoni u l-awtoregolamentazzjoni.

“L-ekonomija b'livell baxx ta' emissjonijiet ta' karbonju u ċirkolari toffri ħafna opportunitajiet ta’ negozju. Sabiex naħtfuhom, għandna bżonn qafas komuni u strateġija fit-tul, kif ukoll l-impenn tal-Istati Membri favur azzjoni koerenti. Barra minn hekk, l-intrapriżi tagħna jeħtieġu kondizzjonijiet ekwivalenti ta' kompetizzjoni. Għalhekk il-Kummissjoni għandha b’mod attiv tindirizza l-prattiki kummerċjali inġusti” qal ir-relatur tal-Opinjoni Bojidar Danev.

Peress li l-istruttura tas-suq tax-xogħol se tinbidel drammatikament, il-KESE jrid li jkun hemm valutazzjonijiet adatti sabiex jiġi evitat kwalunkwe impatt negattiv fuq l-impjegati. Is-soluzzjonijiet ta’ tagħlim ibbażati fuq ix-xogħol jeħtieġ jiġu applikati b’mod aktar wiesa’ sabiex jippermettu lill-ħaddiema kollha itejbu l-ħiliet u l-kapaċitajiet diġitali tagħhom .

“In-nies iridu jkunu fil-qalba tal-bidla”, saħqet il-korelatur tal-Opinjoni Monica Sitarová Hrušecká. “L-opportunitajiet offruti minn teknoloġiji ġodda mhux biss għandhom jiġu sfruttati biex jinħolqu prodotti ġodda, iżda anke biex itejbu l-kundizzjonijiet tax-xogħol għall-persunal”. (sma)

Fir-ritratt: Gonçalo Lobo Xavier, Viċi President tal-KESE