KESE info

Il-prijoritajiet tal-presidenza tal-Kroazja tal-UE, l-ewwel waħda minn meta ssieħbet fl-Unjoni fl-2013, ġew ippreżentati lill-KESE mill-Ministru għall-Affarijiet Barranin u Ewropej tal-pajjiż, Gordan Grlić Radman, fis-sessjoni plenarja tat-22 ta’ Jannar.

Il-KESE qabel mal-prijoritajiet tal-presidenza Kroata l-ġdida tal-Kunsill tal-UE, filwaqt li nnota li jaqblu ħafna mal-aġenda tal-Kumitat stess li tippromovi Ewropa b’saħħitha u prospera bbażata fuq valuri komuni.

Is-Sur Grlić Radman spjega li l-presidenza Kroata għażlet bħala l-motto tagħha “Ewropa b’saħħitha f’dinja ta’ sfidi” sabiex tirrifletti l-viżjoni ta’ UE li taġixxi għall-benefiċċju tal-Istati Membri u taċ-ċittadini kollha tagħha.  Il-politika tal-Kroazja lejn l-UE fis-sitt xhur li ġejjin għandha tkun ibbażata fuq erba’ pilastri: Ewropa li tiżviluppa, Ewropa li tipproteġi, Ewropa li tgħaqqad u Ewropa influwenti.

Il-president tal-KESE, Luca Jahier, approva dan l-approċċ, u qal: “Naqblu bla riżervi ma’ dawn il-prijoritajiet.” Huwa żied jgħid li l-KESE b’mod partikolari laqa’ l-enfasi tal-Kroazja fuq Ewropa li tiżviluppa billi tiżgura kundizzjonijiet u prospetti aħjar għaċ-ċittadini Ewropej kollha, permezz ta’ tkabbir bilanċjat u sostenibbli.

"Aħna konvinti li l-aġenda għall-iżvilupp sostenibbli għandha tkun il-prijorità ewlenija tal-UE għall-għaxar snin li ġejjin, peress li jibbilanċja perfettament il-prosperità ekonomika, il-kwistjonijiet ambjentali u l-inklużività soċjali," sostna s-Sur Jahier.

Il-Ministru Kroat qal li pajjiżu għandu jkompli jappoġġja politika ta’ tkabbir tal-UE kredibbli u meritokratika. Il-KESE huwa lest li jappoġġja l-isforzi tal-Kroazja f’dan ir-rigward, stqarr is-Sur Jahier fil-konklużjonijiet tiegħu. (ll)

Il-Kumitat Ekonomiku u Soċjali Ewropew (KESE) għadda l-kelma lill-Inizjattiva taċ-Ċittadini Ewropej “End the Cage Age” fil-plenarja tiegħu, li saret fi Brussell. B’hekk provdielha pjattaforma fil-livell Ewropew biex tesprimi l-għanijiet u t-tħassib tagħha dwar il-benesseri tal-annimali tal-irziezet.

Compassion in world farming, l-organizzazzjoni wara l-kampanja tal-Inizjattiva taċ-Ċittadini Ewropej, ġiet stabbilita fl-1865 minn Peter Roberts, produttur tal-ħalib Brittaniku li kien imħasseb dwar il-metodi ta’ biedja moderni. L-annimali jistgħu jsofru u jweġġgħu, u jieħdu gost bil-kumpanija ta’ annimali oħra u għandhom sentimenti ta’ ferħ u sentimenti negattivi wkoll; dan kollu juri li huma esseri sensibbli, qalet is-Sinjura Kikou, hi u tenfesizza li t-Trattat ta’ Lisbona jirrikonnoxxi l-annimali bħala tali.

"Irridu niżguraw li l-istituzzjonijiet Ewropej jaġixxu fir-rigward tal-aspettattivi taċ-ċittadini”, qalet is-Sinjura Kikou. “Qed naħdmu flimkien mal-bdiewa biex ngħallmuhom biedja sostenibbli. M’aħniex kontrihom, ma rridux nipprojbixxu l-laħam, però m’għandniex naraw gaġeġ fis-seklu 21."

Christophe Lefevre, President tal-Grupp tal-Inizjattiva taċ-Ċittadini Ewropej fil-KESE, ħa l-opportunità biex jafferma mill-ġdid l-impenn kontinwu tal-KESE biex itejjeb l-istrumenti tal-Inizjattiva taċ-Ċittadini Ewropej – li ħareġ fid-dieher b’mod prattiku ħafna fil-Jum annwali tal-Inizjattiva taċ-Ċittadini Ewropej L-għan kien li din issir aktar faċli għall-utenti u jiġi żgurat li jkollha impatt ġenwin.

Il-membri tal-KESE kkummentaw li, fl-interessi kemm tal-konsumaturi kif ukoll tal-bdiewa u tal-biedja sostenibbli, jeħtieġ li jiġu eżaminati bir-reqqa l-aspetti kollha – bħall-importazzjonijiet tal-laħam u l-impatt finanzjarju fuq is-suq uniku –qabel ma tittieħed kwalunkwe azzjoni ulterjuri.(ks)

Il-ġlieda kontra t-tibdil fil-klima kienet fuq quddiem nett fl-aġenda tas-sessjoni plenarja ta’ Jannar tal-KESE, li ospitat dibattitu dwar il-COP25 u l-Patt Ekoloġiku Ewropew u bagħtet messaġġ ċar: jeħtieġ li jittieħdu miżuri urġenti biex il-protezzjoni tal-klima u l-iżvilupp sostenibbli jsiru realtà, u l-Unjoni Ewropea għandha tkun minn ta’ quddiem.

Il-President tal-KESE Luca Jahier kien ċar daqs il-kristall bi kliemu: “Ninsabu f’mument kritiku. Sfortunatament, id-dinja mhijiex fit-triq it-tajba biex tilħaq l-għanijiet tal-Ftehim ta’ Pariġi dwar it-tibdil fil-klima jew il-miri tal-SDGs u dan jista’ jkollu implikazzjonijiet devastanti għalina lkoll. Fil-KESE ninsabu konvinti li l-implimentazzjoni tal-Aġenda 2030 għandha tkun il-prijorità ewlenija tal-UE għall-għaxar snin li ġejjin. L-Ewropa trid tkun quddiem nett – il-mexxejja globali dwar il-klima!”

Is-Sur Jahier ikkundanna n-nuqqas ta’ rieda politika fost il-pajjiżi li attendew il-COP25 f’Madrid fir-rigward taż-żieda fl-isforzi relatati mal-klima; dan wassal għal riżultat medjokri fis-summit internazzjonali dwar il-klima. Madankollu, huwa faħħar il- Komunikazzjoni dwar il-Patt Ekoloġiku Ewropew tal-President tal-Kummissjoni Ewropea Ursula von der Leyen u l-impenn sod tagħha għan-newtralità tal-klima sal-2050.

F’dan ir-rigward, Virginijus Sinkevičius , il-Kummissarju għall-Ambjent, l-Oċeani u s-Sajd, indika li l-Pakkett Ekoloġiku ma kienx biss mod kif tiġi indirizzata l-problema tat-tibdil fil-klima, iżda wkoll l-espressjoni ta’ ambizzjoni biex jiġu żgurati t-tkabbir ekonomiku u l-ġustizzja soċjali. “Huwa dwar in-nies u s-soċjetà, huwa Pakkett Ekoloġiku li ma jħalli lil ħadd barra”, huwa ddikjara, filwaqt li enfasizza li l-Istrateġija dwar il-Bijodiversità, il-Pjan ta’ Azzjoni għal Ekonomija Ċirkolari u soluzzjonijiet sistematiċi oħra biex jintlaħqu l-għanijiet tat-tibdil fil-klima jkunu jindirizzaw kemm lin-nies kif ukoll lill-pjaneta, billi jiġbru flimkien lis-setturi u ’l-atturi kollha. (mp)

L-UE tinsab taħt pressjoni biex tirrispondi għal sfidi b’diversi aspetti li jirriżultaw minn deċennju ta’ tfixkil ekonomiku, mill-kriżi tal-migrazzjoni, mill-iskuntentizza soċjali u mid-degradazzjoni ambjentali. Kif il-KESE jiddikjara f’Opinjoni adottata f’Jannar, l-UE għandha bżonn terġa’ tivvinta lilha nnifisha malajr għall-benefiċċju tal-poplu tagħha.

Din l-Opinjoni tal-KESE tipprova tiddefinixxi kif għandha tkun l-ekonomija sostenibbli li neħtieġu, waqt li tesplora viżjoni ġdida ta’ prosperità għall-poplu u l-pjanetà li tlaqqa’ flimkien id-dimensjonijiet soċjali, ambjentali u soċjali. Tappella wkoll għal mudelli ekonomiċi ġodda, deċiżjonijiet ta’ investiment biex jiġu sfruttati l-avvanzi teknoloġiċi u indikaturi ġodda għall-ekonomija tal-benesseri.

Bl-implimentazzjoni tal-Aġenda 2030 u bil-Patt Ekoloġiku Ewropew, fl-aħħar l-UE għamlet dawn il-kwistjonijiet l-ogħla prijoritajiet tagħha. Madankollu, dan il-Patt Ekoloġiku jeħtieġ li jsir Patt Ekoloġiku u Soċjali ġenwin

“Biex niżguraw tranżizzjoni ġusta u ekoloġika u l-implimentazzjoni tal-Għanijiet ta’ Żvilupp Sostenibbli, irridu nerġgħu nikkunsidraw l-ekonomija tagħna tal-UE. Irridu nerġgħu nibdew is-sistema, iżda neħtieġu softwer ġdid, mhux biss aġġornament!” qal ir-relatur Peter Schmidt .

In-nazzjonijiet tad-dinja impenjaw ruħhom għal Aġenda għall-2030 li hija radikali, ġusta u li tista’ tinkiseb. L-UE adottat ukoll il-Pakkett Ekoloġiku u hija impenjata li tagħmel progress lejn l-Għanijiet ta’ Żvilupp Sostenibbli. Dan joffri opportunità unika sabiex l-UE taġġorna l-viżjoni tagħha dwar il-progress soċjali, tqajjem mill-ġdid l-ekonomija tagħha u ssaħħaħ it-tmexxija tagħha fid-dinja billi tagħti eżempju tajjeb.

Il-membri tal-Kumitat ta’ Segwitu UE-Ġappun tal-KESE żaru l-Ġappun bejn is-27 u l-31 ta’ Jannar biex tiġi diskussa l-implimentazzjoni tal-Ftehim ta’ Sħubija Ekonomika (FSE), fis-seħħ minn Frar 2019, u biex tissaħħaħ il-kooperazzjoni mal-kontropartijiet Ġappuniżi. Iż-żjara kienet tinkludi wkoll l-ewwel Djalogu Konġunt mas-Soċjetà Ċivili, bi skambju ta’ fehmiet dwar kwistjonijiet ta’ kummerċ u żvilupp sostenibbli. 

L-iskop ewlieni tal-missjoni kien li tibni fuq il-kooperazzjoni pożittiva mal-organizzazzjonijiet tas-soċjetà ċivili u l-istituzzjonijiet Ġappuniżi minn mindu ġie stabbilit il-FSE. Il-membri tal-KESE spjegaw il-ħtieġa għal riformi legali fil-Ġappun sabiex jiġu applikati l-konvenzjonijiet fundamentali tal-ILO. Huma ppruvaw ukoll jissensibilizzaw dwar it-tibdil fil-klima fost il-kontropartijiet lokali tagħhom, peress li dan is-suġġett ma tantx huwa diskuss fil-Ġappun. (dgf)