KESE info

Il-KESE jħeġġeġ lill-UE u lill-Istati Membri tagħha biex jadottaw mudell taċ-ċibersigurtà fuq livell Ewropew, biex isaħħu l-mandat tal-aġenzija għaċ-ċibersigurtà Ewropea u, fl-aħħar nett, biex tiġi stabbilita skema ta’ ċertifikazzjoni Ewropea effettiva għas-servizzi u l-prodotti onlajn.

Dawn huma l-konklużjonijiet ewlenin tas-smigħ pubbliku dwar l-Att dwar iċ-Ċibersigurtà li sar fi Brussell fid-9 ta’ Jannar 2018 li ser jikkontribwixxi għall-Opinjoni tal-KESE li qed tiġi abbozzata minn Alberto Mazzola u Antonio Longo tas-Sezzjoni Speċjalizzata għat-Trasport, l-Enerġija, l-Infrastruttura u s-Soċjetà tal-Informazzjoni (TEN).

Il-KESE jappoġġja b’mod wiesa’ l-pakkett dwar iċ-ċibersigurtà li jinsab fil-proposta tal-Kummissjoni Ewropea li ntbagħtet lill-Kunsill f’Settembru tal-2017 u tenfasizza l-miżuri li ġejjin.

• Mudell Ewropew taċ-Ċibersigurtà

Il-kunċett taċ-ċibersigurtà tfaċċa mad-dinja kollha. Huwa sfida globali peress li l-attakki jistgħu jseħħu fi kwalunkwe post u jkollhom fil-mira individwi, organizzazzjonijiet tas-soċjetà ċivili, sistemi soċjali u s-setturi ekonomiċi fi kwalunkwe Stat Membru. Din hija r-raġuni għalfejn il-KESE qed iħeġġeġ lill-UE biex tieħu l-passi neċessarji u taqbel dwar mudell ta’ reżiljenza kontra tali attakki fil-livell Ewropew.

• Aġenzija tal-UE għaċ-ċibersigurtà aktar b’saħħitha

L-Aġenzija tal-Unjoni Ewropea dwar is-Sigurtà tan-Netwerks u l-Informazzjoni (ENISA) huwa ċentru ta’ għarfien espert għaċ-ċibersigurtà fl-Ewropa u huwa attwalment ibbażat fil-Greċja. Il-KESE jemmen li din għandha tiġi żviluppata, issir permanenti u mogħnija b’aktar riżorsi. Għandha tiffoka fuq il-gvern elettroniku u s-servizzi universali (is-saħħa elettronika) u kif ukoll il-prevenzjoni u l-ġlieda kontra s-serq tal-identità u l-frodi onlajn.

• Ċertifikazzjoni taċ-ċibersigurtà Ewropea

Sabiex ikun garantit livell għoli ta’ sigurtà, il-KESE jirrakkomanda li jiġi stabbilit qafas ta’ ċertifikazzjoni taċ-ċibersigurtà fl-UE, ibbażat fuq standards taċ-ċibersigurtà u tal-ICT definiti b’mod komuni fil-livell Ewropew. Is-servizzi u l-prodotti onlajn jistgħu mbagħad jiġu ċċertifikati b’sistema ta’ tikkettar xieraq, bil-ħsieb li tittejjeb il-fiduċja tal-konsumatur. (mp)

 

Il-Kummissjoni għandha tistabbilixxi aktar karatteristiċi preċiżi għall-obbligi ta' rapportar proposti dwar l-arranġamenti fiskali u t-tranżazzjonijiet transkonfinali, sabiex tiġi evitata interpretazzjoni suġġettiva mill-kontribwenti u mill-awtoritajiet tat-taxxa, li tista' twassal għal rapportar żejjed u piżijiet amministrattivi, il-KESE jħeġġeġ fl-opinjoni tiegħu dwar id-diżinċentivi għall-evitar u l-evażjoni tat-taxxa.

Id-direttiva l-ġdida tal-Kummissjoni tressaq obbligu għall-intermedjarji – l-entitajiet, il-kumpaniji jew il-professjonisti li jagħtu pariri lill-kontribwenti dwar l-ippjanar tat-taxxa – u f'xi każijiet għall-kontribwenti nfushom, li jirrapportaw lill-awtoritajiet tagħhom skemi tat-taxxa li jaqgħu taħt erba' tipi standard ta' attivitajiet rapportabbli. L-informazzjoni se tiġi skambjata awtomatikament bejn l-awtoritajiet nazzjonali tat-taxxa.

"L-iskop tal-karatteristiċi proposti huwa wiesa' wisq", qal ir-relatur Victor Alistar (Interessi Varji, RO). Huwa żied jgħid li "meta tirrevedi l-kriterji, il-Kummissjoni għandha ssib bilanċ bejn iċ-ċertezza legali u l-flessibbiltà, sabiex tiżgura l-effettività tad-deterrent u l-fattibbiltà tal-obbligu."

Il-KESE jitlob ukoll lill-Kummissjoni telabora fuq kif id-direttiva tapplika għall-ekonomija diġitali u tiżgura l-proporzjonalità tad-direttiva billi żżomm l-ispejjeż amministrattivi baxxi għan-negozji kollha.

Il-Kumitat japprova l-appoġġ loġistiku u tekniku propost għall-implimentazzjoni tal-għodod rispettivi fl-Istati Membri, kif ukoll l-għan li tiżdied it-trasparenza tal-attivitajiet tal-intermedjarji permezz tal-miżuri proposti.

"L-obbligu ta' rapportar se jiskoraġġixxi lill-intermedjarji milli joffru skemi aggressivi ta' ppjanar tat-taxxa. Il-mekkaniżmu se joħloq ġustizzja fiskali u se jikkontribwixxi għal kompetizzjoni ġusta u dħul mit-taxxa stabbli għall-Istati Membri", qal il-korelatur Petru Sorin Dandea (Ħaddiema, RO). (jk)

F'Jannar, il-Kumitat Ekonomiku u Soċjali Ewropew (KESE) u l-Kummissjoni Ewropea organizzaw b'mod konġunt it-tnedija tas-sett ta' għodod ġdid tal-Kummissjoni biex jgħin lill-Istati Membri jsaħħu l-integrazzjoni tal-persuni bi sfondi ta' migrazzjoni billi jagħmlu użu aktar effiċjenti u koordinat tal-istrumenti ta' finanzjament tal-UE disponibbli.

Is-sett ta' għodod jinkludi rakkomandazzjonijiet għall-awtoritajiet ta' finanzjament nazzjonali u reġjonali dwar kif għandhom jagħżlu u jikkombinaw bl-aħjar mod id-diversi fondi tal-UE aċċessibbli fil-perjodu baġitarju attwali 2014-2020.

L-għan huwa li titrawwem l-inklużjoni ta' aktar minn 20 miljun ċittadin ta' pajjiżi terzi li qed jgħixu fl-UE b'mod legali, iżda li għadhom jaffaċċjaw għadd kbir ta' sfidi u diskriminazzjoni.

Kif ġie enfasizzat fl-avveniment ta' tnedija, madwar 40% minnhom jinsabu f'riskju ta' faqar, filwaqt li 18% huma qiegħda u 19 % jitilqu kmieni mill-iskola, li huwa kważi d-doppju tal-medja tal-UE.

"L-UE trid turi umaniżmu u solidarjetà. Il-migranti m'għandhomx jitqiesu bħala piż. Jekk dawn jiġu integrati b'mod xieraq, dawn se jkunu vantaġġ kbir, mhux biss għall-ekonomiji tagħna iżda anke għas-soċjetà tagħna kollha kemm hi," qal il-President tal-KESE Georges Dassis. (ll)

Fir-ritratt: Corina Crețu, Kummissarju Ewropew għall-Politika Reġjonali, Cristian Pîrvulescu, membru tal-KESE, u Georges Dassis, il-President tal-KESE

Dan kien il-messaġġ prinċipali tas-smigħ pubbliku dwar il-koeżjoni ekonomika u soċjali u l-integrazzjoni Ewropea tal-Balkani tal-Punent, li sar mill-Kumitat Ekonomiku u Soċjali Ewropew fi Brussell.

"Ninsabu kuntenti ħafna li l-Presidenza Bulgara tal-Kunsill tal-UE għażlet il-Balkani tal-Punent biex ikunu waħda mill-prijoritajiet tagħhom u talbet lill-KESE jfassal opinjoni dwar is-suġġett", qal Ionut Sibian, president tal-grupp ta’ studju tal-KESE dwar il-koeżjoni ekonomika u soċjali u l-integrazzjoni Ewropea tal-Balkani tal-Punent. Andrej Zorko Relatur għall-Opinjoni tal-KESE, irrimarka li r-reġjun kien estremament kumpless u li kien hemm ħtieġa għal kooperazzjoni reġjonali akbar u aktar involviment serju tas-soċjetà ċivili fil-proċess ta’ integrazzjoni Ewropea.  "Il-Balkani tal-Punent għandhom ikunu waħda mill-prijoritajiet tal-UE matul is-snin li ġejjin biex tiżgura l-istabilità politika fir-reġjun", insista Dimitris Dimitriadis, korelatur.

Ir-rappreżentanti tal-organizzazzjonijiet tas-soċjetà ċivili, il-gruppi ta’ riflessjoni, l-istituzzjonijiet tal-UE u s-settur akkademiku qablu li l-konverġenza ekonomika tal-Balkani tal-Punent se tkun proċess fit-tul u ddeskriva l-livelli għoljin ta’ qgħad, produttività baxxa, in-nuqqas ta’ ħiliet u kompetittività dgħajfa bħala xi wħud mill-problemi li kienu qed iħabbtu wiċċhom magħhom il-pajjiżi tar-reġjun. “ Il-klijenteliżmu għadu komuni wisq “, qal Peter Sanfey Viċi Direttur tal-Bank Ewropew għar-Rikostruzzjoni u l-Iżvilupp. Il-parteċipanti qablu li diġà kien hemm diversi strumenti u programmi fir-reġjun li kienu jindirizzaw xi wħud minn dawn il-problemi, iżda li tiġi offruta perspettiva Ewropea ċara lill-pajjiżi sservi bħala katalizzatur biex taċċellera r-riformi . Huma enfasizzaw ukoll l-importanza kruċjali tal-involviment tal-imsieħba soċjali u tal-organizzazzjonijiet tas-soċjetà ċivili mir-reġjun fil-proċess ta’ integrazzjoni Ewropea b’mod aktar formali. (sg)

Filwaqt li l-protezzjoniżmu mhuwiex alternattiva għall-Ewropa, l-UE lanqas ma tista’ tippermetti li s-suq intern tagħha tiġi mgħarrqa bi prodotti li qed imorru kontra l-istandards soċjali u ambjentali tagħha u li jipperikolaw l-industrija tagħha, wissa l-Kumitat Ekonomiku u Soċjali Ewropew (KESE) f’rapport dwar politika industrijali komprensiva għall-UE adottat fis-sessjoni plenarja ta’ Jannar.

L-Ewropa trid tmexxi bl-eżempju, b’industrija tal-manifattura li tipproteġi d-drittijiet tal-ħaddiema, tħares l-ambjent u tinvesti fl-innovazzjoni. Madankollu, dan kollu jfisser spejjeż sinifikanti, li huma riflessi fil-prezz tal-prodotti tagħha. Sabiex l-industrija tagħha tiġi garantita kundizzjonijiet ta’ kummerċ ġust, l-UE trid tiżgura li prodotti globali li jidħlu fis-suq tagħha jobdu l-istess regoli. Dan kien il-messaġġ ewlieni tal-opinjoni tal-KESE dwar Approċċ Komprensiv għall-politika industrijali.

“L-Ewropa ma tistax [...] ma tistax tkun inġenwa. Kapaċità żejda, għajnuna statali illegali u forom oħra ta’ kompetizzjoni inġusta għandhom jiġu indirizzati permezz ta’ regolazzjoni Ewropea, filwaqt li jiġu rispettati r-regoli tad-WTO”, qal ir-relatur Gonçalo Lobo Xavier (Min Iħaddem, PT).

L-għodod biex jiġu miġġielda dawn il-prattiki għandhom ikunu fuq l-aġenda tal-UE. Il-miżuri antidumping tal-UE jridu jkunu iżjed rapidi, monitorjati aħjar u aktar flessibbli.

Meta mqabbla ma’ atturi globali bħaċ-Ċina, l-Indja u l-Korea, li qed ikunu attivi ħafna fl-iżvilupp tal-politika industrijali tagħhom, l-Ewropa għad m’għandhiex perspettiva koerenti fit-tul għall-industrija tagħha, enfasizza l-KESE.

Huwa meħtieġ pjan ta’ azzjoni industrijali konsistenti, b’miri, skedi u strumenti vinkolanti sabiex jiġu indirizzati l-erba’ sfidi ewlenin tal-għaxar snin li ġejjin: id-diġitalizzazzjoni, it-tibdil fil-klima, il-globalizzazzjoni u l-bidla demografika.

Ir-ripatrijazzjoni ta’ mill-inqas uħud mis-setturi tal-industrija Ewropea hija ħtieġa ewlenija wkoll.

L-opinjoni tfasslet fuq talba tal-Presidenza Bulgara tal-UE. (dm)

Il-KESE jappoġġja l-Proposta tal-Kummissjoni Ewropea dwar ir-reviżjoni tant mistennija tar-Regolament dwar is-salvagwardja tal-kompetizzjoni fit-trasport bl-ajru. F’Opinjoni adottata fis-sessjoni plenarja ta’ Jannar tal-KESE, il-Kumitat iħeġġeġ lill-Parlament Ewropew u lill-Kunsill biex minnufih japprovaw ir-Regolament rivedut sabiex id-distorsjonijiet fil-kompetizzjoni internazzjonali jiġu indirizzati b’mod effettiv.

Il-KESE jappoġġja l-approċċ doppju tal-Kummissjoni għas-salvagwardja ta’ kompetizzjoni internazzjonali ġusta, u adotta l-pożizzjoni tiegħu fis-17 ta’ Jannar 2018 permezz ta’ opinjoni abbozz Jacek Krawczyk . Minn naħa, il-Proposta tippermetti l-implimentazzjoni tal-leġislazzjoni eżistenti u tipprovdi lill-Kummissjoni b’għodda effiċjenti biex tiġġieled u tilqa’ kontra d-distorsjonijiet ta’ kompetizzjoni ġusta fl-avjazzjoni. Min-naħa l-oħra, il-ftehimiet tal-avjazzjoni tal-UE iservu ta’ inċentiv għal pajjiżi terzi biex jikkonformaw mal-leġislazzjoni tal-UE b’kumpens għall-aċċess għas-suq tal-UE.

“Din il-Proposta hija pass ieħor importanti fl-implimentazzjoni tal-Istrateġija tal-Avjazzjoni tal-UE, imħabbra aktar minn sentejn ilu. Is-suċċess futur tal-avjazzjoni tal-UE jiddependi fuq kemm l-istrateġija tiġi implimentata b’mod effettiv” qal is-Sur Krawczyk . Żied jgħid li "meta titqies l-importanza tal-avjazzjoni għall-ekonomija tal-UE, il-partijiet interessati għandhom ilkoll ikunu saħansitra aktar involuti fl-implimentazzjoni tal-istrateġija”

Ir-reviżjoni tar-Regolament dwar is-salvagwardja tal-kompetizzjoni fit-trasport bl-ajru (Regolament 868/2004) hija parti minn pakkett usa’ intitolat "L-Avjazzjoni: Ewropa Miftuħa u Konnessa", li jinkludi wkoll linji gwida fl-oqsma li ġejjin: is-Sjieda u l-Kontroll ta’ trasportaturi tal-ajru tal-UE, l-Obbligu ta' Servizz Pubbliku (OSP) u l-kontinwità fil-Ġestjoni tat-Traffiku tal-Ajru (ATM).(mp)

“Is-suċċess tal-Presidenza ma jiddependix mid-daqs tal-pajjiż – huwa xprunat mir-rieda politika għal sforz favur politiki li huma kruċjali għall-futur ta’ l-Ewropa,” qal il-President tal-KESE Georges Dassis fid-diskors ta’ merħba tiegħu lill-Viċi Ministru Bulgara għax-Xogħol u l-Politika Soċjali, Zornitsa Roussinova fis-sessjoni plenarja tal-KESE ta’ Jannar.

Is-Sinjura Roussinova ppreżentat l-erba’ prijoritajiet għall-Presidenza Bulgara lill-membri tal-KESE:

• il-futur tal-Ewropa u ż-żgħażagħ;
• il-perspettiva Ewropea u l-konnettività tal-Balkani tal-Punent;
• is-sigurtà u l-istabbiltà f’Ewropa b’saħħitha u magħquda;
• l-ekonomija diġitali u l-ħiliet diġitali għall-ġejjieni.

Hija ddeskriviet ukoll fil-qosor it-temi ewlenin li ser tiffoka fuqhom il-Presidenza Bulgara matul is-sitt xhur li ġejjin fil-qasam tal-politika soċjali u l-impjiegi:

• il-futur tax-xogħol;
• it-tisħiħ tad-dimensjoni soċjali tal-Ewropa;
• il-politiki dwar l-iżvilupp bikri tat-tfal;
• drittijiet ugwali għall-persuni b’diżabilità.

“Ninsabu tassew ħerqana biex naqraw l-opinjonijiet esploratorji li l-KESE ser jipprovdi b’rispons għat-talbiet tagħna,” qalet is-Sinjura Roussinova . (sg)

Fir-ritratt: Zornitsa Roussinova, Viċi Ministru Bulgara għax-Xogħol u l-Politika Soċjali, u Georges Dassis, President tal-KESE

 

 

 

 

 

It-titjib tal-kooperazzjoni legali bejn l-Istati Membri fil-ġlieda kontra l-frodi ċibernetika huwa pass fid-direzzjoni t-tajba, qal il-KESE f’opinjoni riċenti li tivvaluta l-abbozz ta' direttiva tal-Kummissjoni dwar il-Ġlieda kontra l-frodi u l-falsifikazzjoni ta’ mezzi ta’ pagament mhux bi flus kontanti. Madankollu, il-KESE jitlob li jkun hemm aktar salvagwardji biex jipproteġu lill-utenti ta’ mezzi ta’ pagament diġitali u miżuri ta’ prevenzjoni obbligatorji biex iwissuhom dwar il-modi ta’ kif joperaw il-kriminali ċibernetiċi.

Filwaqt li jilqa’ l-proposta tal-Kummissjoni, ir-relatur tal-opinjoni Victor Alistar jiġbed l-attenzjoni dwar il-ħtieġa li wieħed imur lil hinn minn kooperazzjoni investigattiva u ġudizzjarja bejn l-awtoritajiet tal-infurzar tal-liġi nazzjonali.

ll-KESE jissuġġerixxi li l-Istati Membri jkunu meħtieġa li jintroduċu assigurazzjoni finanzjarja biex tikkumpensa lil vittmi ta’ frodi ċibernatika li tinvolvi kards ta’ pagament. Din l-assigurazzjoni finanzjarja għandha tkopri kemm individwi kif ukoll SMEs.

Barra minn hekk, sabiex il-ġlieda kontra l-frodi ċibernetika tkun effettiva, l-operaturi ekonomiċi għandhom ikunu meħtieġa legalment li jirrappurtaw inċidenti ta’ frodi ċibernetika.

Frodi ċibernetika li tinvolvi mezzi ta’ pagament diġitali maħruġa fiż-żona tal-euro hija kwistjoni serja. Skont rapport tal-BĊE, din ammontat għal EUR 1.4 biljun fl-UE fl-2013. Sa minn dakinhar, din kompliet tiżdied.

Wieħed mill-aktar oqsma vulnerabbli huwa l-pagament tal-ispejjeż tal-ivvjaġġar – biljetti tal-ferrovija u tal-ajruplan, akkomodazzjoni u tranżazzjonijiet relatati oħra. Fost in-nies involuti f’dan it-tip ta’ frodi ċibernetika jew li qed japprofittaw minnha hemm individwi u organizzazzjonijiet involuti f’attivitajiet terroristiċi.

Il-prevenzjoni għandha wkoll ikollha rwol fil-ġlieda kontra ċ-ċiberkriminalità, fil-fehma tal-KESE. Il-pubbliku għandu jiġi mwissi dwar il-modi li bihom joperaw il-kriminali ċibernetiċi permezz tal-falsifikazzjoni tal-mezzi ta’ pagament diġitali, billi l-awtoritajiet tal-infurzar tal-liġi fl-Istati Membri jipprovdu kampanji ta’ sensibilizzazzjoni u ta’ informazzjoni li jispjegaw il-kawżi, ir-riskji u l-modi ta’ kif l-individwi jipproteġu lilhom infushom mill-frodi ċibernetika.(dm)

Il-KESE ma jaqbilx mal-proposta tal-Kummissjoni għal pożizzjoni fiskali ġeneralment newtrali, u, minflok, jippromovi pożizzjoni fiskali pożittiva moderata ta’ madwar 0,5 % tal-PDG. Fl-opinjoni tiegħu dwar Il-politika ekonomika taż-żona tal-euro 2018, Il-Kumitat jiddikjara li l-isforz baġitarju għandu jitħallas prinċipalment minn pajjiżi b’bilanċi favorevoli u spazju fiskali.

Fid-dawl tal-irkupru ekonomiku fraġli, mhux komplut u atipiku li għad baqa’ fiż-żona tal-euro u l-bidliet tal-politika monetarja tal-BĊE li tħabbru, il-KESE jappella għal politiki fiskali li jappoġġjaw politiki monetarji. Ir-rakkomandazzjonijiet tal-KESE iqisu wkoll livelli ta’ investiment baxxi, bilanċ pożittiv tal-kont kurrenti estern u tnaqqis sinifikanti fis-suq tax-xogħol, fost affarijiet oħra.

”Stimolu fiskali li jiffoka fuq l-investiment pubbliku irendi kemm domanda aktar b’saħħitha fuq medda qasira ta’ żmien kif ukoll iżid il-potenzjal tat-tkabbir fit-tul, u b’hekk jindirizza l-kwistjoni tas-sostenibbiltà tad-dejn pubbliku”, qal ir-relatur, Javier Doz Orrit (Grupp tal-Ħaddiema, ES).

L-investiment pubbliku jeħtieġ li jiffoka mhux biss fuq l-infrastruttura iżda wkoll fuq l-investiment soċjali, u l-konsum domestiku għandu jiġi promoss primarjament permezz ta’ żidiet fil-pagi.

”Fir-rigward tal-applikazzjoni ta’ regoli fiskali, nirrakkomandaw li n-nefqa pubblika fuq l-investiment tiġi eskluża mill-kalkoli. Dan jikkontribwixxi għal aktar tkabbir inklużiv u konverġenza", qal Mr Doz Orrit.

Il-KESE jilqa’ b’sodisfazzjon l-għanijiet tal-politika tal-Kummissjoni – it-tkabbir sostenibbli u inklużiv, ir-reżiljenza u l-konverġenza – kif ukoll il-prijoritajiet tagħha għal riformi strutturali, u jemmen li r-riformi jridu jtejbu l-produttività u jappoġġjaw il-ħolqien ta’ impjiegi ta’ kwalità għolja u t-tnaqqis tal-inugwaljanzi. Huwa jappella għall-implimentazzjoni ta’ miżuri effettivi għall-ġlieda kontra l-erożjoni ta’ ħsara tal-baġits pubbliċi u jappoġġja l-passi meħtieġa biex tiġi approfondita l-UEM. (jk)

mill-Grupp tal-Ħaddiema tal-KESE

Matul is-sessjoni plenarja ta’ Jannar ġiet adottata Opinjoni dwar ir-rwol importanti tat-trasport bħala settur ewlieni għall-ekonomija tal-UE, fejn jiġu indirizzati kwistjonijiet ewlenin bħalma huma l-perjodi ta’ mistrieħ u l-istazzjonar tal-ħaddiema. Il-Kumitat jindika li l-bidliet proposti għal-leġislazzjoni fil-qafas tal-pakkett dwar il-mobilità ma jindirizzawx b’mod effettiv il-problemi identifikati f’diversi stadji u, fil-fehma tal-Grupp tal-Ħaddiema, ma jiggarantixxux s-suċċess tal-ġlieda kontra d-dumping soċjali fis-settur tat-trasport bit-triq. Bl-istess mod, bil-għan li tiġi żgurata sorveljanza aħjar tal-infurzar transkonfinali tar-regoli, il-KESE jitlob li titwaqqaf aġenzija Ewropea tat-trasport bit-triq.

“Minħabba r-rwol determinanti tat-tariffi fis-settur tat-trasport, irridu nistabbilixxu regoli biex effettivament jiżguraw kundizzjonijiet indaqs tal-kompetizzjoni għat-trasportaturi kollha tat-triq, irrispettivament mid-daqs tagħhom, u għall-ħaddiema mobbli kollha, mingħajr ma jinħolqu ostakli ġodda għas-suq intern jew tintlaqat il-liġi soċjali”, saħqet ir-relatur Tanja Buzek. Hija żiedet li s-suq intern għandu jiffunzjona għall-partijiet interessati kollha u fl-Istati Membri kollha, kemm qodma kif ukoll ġodda.

L-applikazzjoni tar-regoli dwar l-istazzjonar fis-settur tat-trasport bit-triq madwar l-UE hija ta’ importanza kbira biex jiġu żgurati kundizzjonijiet indaqs ta’ kompetizzjoni għall-ħaddiema u għall-intrapriżi, u kontroll effettiv tal-applikazzjoni tagħhom hija essenzjali. F’dan ir-rigward, nikkondividu t-tħassib tal-KESE li l-kopertura ta’ perjodu massimu ta’ sitt xhur u grupp ta’ sewwieqa jistgħu jnaqqsu kemm ikun effiċjenti l-kontroll tal-applikazzjoni tar-regoli ta’ stazzjonar. (mg)

Mill-Grupp ta’ Min Iħaddem tal-KESE

Il-Grupp ta' Min Iħaddem ma appoġġjax l-Opinjoni tal-KESE dwar il-perjodi ta' ħin ta' sewqan u ta' mistrieħ, il-ħin tax-xogħol u l-istazzjonar tal-ħaddiema. Għall-Grupp, l-opinjoni ma rriflettietx biżżejjed id-differenzi fil-fehmiet fil-Kumitat li jikkonċernaw il-proposta tal-Kummissjoni dwar l-istazzjonar tal-ħaddiema

"L-applikazzjoni ta' regoli ta' stazzjonar għat-trasport internazzjonali bit-triq tirrigwarda l-protezzjoniżmu u l-limitazzjoni tal-libertà tal-moviment. Sfortunatament, id-dokument li l-KESE adotta ma jirriflettix dawn il-konsegwenzi negattivi. Is-suq uniku tal-UE qed jiġi serjament kompromess u eluf ta' SMEs li joperaw fis-settur tat-trasport madwar l-Ewropa se jsofru" qal Jacek P. Krawczyk, president tal-Grupp ta' Min Iħaddem.

Matul id-dibattitu, xi membri tal-Grupp ta' Min Iħaddem enfasizzaw id-diversi inkonsistenzi fil-proposta tal-Kummissjoni dwar l-istazzjonar tas-sewwieqa. Mingħajr infrastruttura xierqa, regoli aktar stretti jkunu kontroproduttivi u ma jtejbux il-kundizzjonijiet tax-xogħol.

Il-membri enfasizzaw li r-regoli proposti se joħolqu inċertezza u burokrazija addizzjonali kemm għas-sewwieqa kif ukoll għall-kumpaniji. Huma ġibdu l-attenzjoni lejn definizzjonijiet impreċiżi fil-leġislazzjoni, li jistgħu jwasslu għal sitwazzjonijiet assurdi.

Il-grupp ressaq numru ta' emendi għall-opinjoni, iżda dawn ma kisbux l-appoġġ tar-relatur u ta' maġġoranza tal-Membri tal-KESE. L-opinjoni ġiet adottata fit-18 ta'Jannar 2018, matul is-sessjoni plenarja tal-KESE, b'193 vot favur, 89 kontra u 17-il astensjoni.(lj)

Mill-Grupp ta’ Interessi Varji tal-KESE

Wara t-tieni ġurnata tas-sessjoni plenarja ta’ Frar, il-Grupp III ser jospita l-laqgħa straordinarja tiegħu dwar "Is-soċjetà ċivili fl-UE: xenarji futuri għall-2030" fil-KESE (JDE62).

L-għan ta’ din il-laqgħa huwa li tippreżenta l-istudju intitolat "L-evoluzzjoni futura tas-soċjetà ċivili fl-Unjoni Ewropea sal-2030", li qed jingħata promozzjoni bil-kooperazzjoni tal-Grupp ta’ Kuntatt. L-istudju minn CNVOS (Ċentru għas-Servizz ta’ Informazzjoni, il-Kooperazzjoni u l-Iżvilupp tal-NGOs (is-Slovenja)) u ENNA (Netwerk Ewropew tal-Assoċjazzjonijiet Nazzjonali tas-Soċjetà Ċivili), kien ikkummissjonat mill-KESE.

Fuq il-bażi ta’ riċerka bbażata biss fuq id-dokumentazzjoni dwar analiżijiet u studji, u intervisti u stħarriġiet reċenti, l-istudju jixħet dawl fuq is-sitwazzjoni attwali tal-organizzazzjonijiet tas-soċjetà ċivili fil-livell nazzjonali u dak Ewropew. L-għan tiegħu huwa li janalizza l-isfidi ewlenin għall-organizzazzjonijiet tas-soċjetà ċivili u kif dawn għandhom jiġu indirizzati. Dan jiżviluppa ħames xenarji skont fatturi ewlenin ta’ bidla u fih għadd ta’ rakkomandazzjonijiet speċifiċi u konklużjonijiet.

Għall-avveniment se jattendu membri tal-KESE u rappreżentanti tal-organizzazzjonijiet tas-soċjetà ċivili Ewropej, u se jkun immoderat minn Daniela Vincenti, Kap Editur ta’ EURACTIV. Il-kelliema ser jinkludu lil Ramón Luis Valcárcel Siso, Viċi President tal-Parlament Ewropew inkarigat mir-relazzjonijiet mal-KESE u l-KtR, Paweł Świeboda, Viċi Kap taċ-Ċentru Ewropew ta’ Strateġija Politika fi ħdan il-Kummissjoni Ewropea, il-presidenti tal-gruppi tal-KESE, u rappreżentanti eminenti mid-dinja akkademika. (ih)