KESE info

Jekk tixtieq tqarreb lill-poplu Ewropew lejn l-idea ta’ Ewropa magħquda u ta’ paċi, jeħtieġ tinvolvi lil persuni ordinarji, tgħid Eva Hrabal mill-organizzazzjoni rebbieħa.

KESE Info: X’ifisser dan il-premju għalik u għall-organizzazzjoni tiegħek?

Togħmiet mid-Danubju: Il-premju huwa rikonoxximent kbir għall-isforzi li għamilna biex inlaqqgħu flimkien lil persuni minn kull età u minn kull sfond etniku u soċjali fil-pajjiżi kollha tad-Danubju, biex ngħaqqduhom madwar is-suġġett tal-ħobż, u nagħmluhom konxji dwar l-għeruq kulturali komuni tagħna fiż-żona tad-Danubju u fl-Ewropa. Huwa unur u apprezzament kbir għall-ħafna organizzazzjonijiet u persuni involuti f’dan il-proġett, speċjalment il-voluntiera. Ser jipprovdi impetu qawwi biex tiġi estiża l-kooperazzjoni Ewropea u biex tinbena “rotta tal-ħobż” kulturali madwar l-Ewropa. Il-premju ser isaħħaħ il-ħbiberija interkulturali tagħna tul id-Danubju, iħeġġeġ lil oħrajn biex jingħaqdu fl-attivitajiet tagħna u jgħinna inxerrdu l-idea fir-reġjun tad-Danubju u madwar l-Ewropa kollha, biex b’hekk jiġu konnessi saħansitra aktar nies.

X’parir tagħti lil organizzazzjonijiet oħrajn biex jiksbu riżultati f’tali attivitajiet u programmi?

Jekk għandek viżjoni li tlaqqa’ lil persuni Ewropej eqreb lejn l-idea ta’ Ewropa magħquda u ta’ paċi, jeħtieġ tinvolvi nies ordinarji, u fuq kollox, għandek temmen fil-viżjoni tiegħek.  Fittex imsieħba li jikkondividu din il-viżjoni, kif ukoll organizzazzjonijiet u msieħba li jipprovdu appoġġ finanzjarju. Fittex idea li tgħin biex jingħelbu l-ostakli tal-lingwa permezz ta’ attività komuni. Involvi lill-voluntiera mill-bidu fuq bażi ugwali. Uża l-opportunitajiet li l-midja diġitali toffri għall-komunikazzjoni u l-kooperazzjoni. Ibda fiċ-ċokon u agħti prova tiegħek, u dan imbagħad ikollu effett li kulma jmur dejjem jikber.

Kif se tuża dan il-finanzjament speċifiku biex tipprovdi aktar għajnuna fil-komunità?

Se tkun taħlita ta’ finanzjament strutturali u appoġġ għal avvenimenti sabiex jiġu inklużi aktar imsieħba fir-“rotta tal-ħobż” kulturali. Nittamaw li l-premju se jgħinna nsibu aktar sponsors - peress li l-proġetti kbar jirrikjedu finanzjament kbir.

Fil-fehma tiegħek, x’inhu l-aħjar mod biex jiġi żgurat li kull pajjiż jippreserva u jkun kburi bil-wirt kulturali tiegħu, filwaqt li fl-istess ħin jisfrutta d-diversità kulturali li għandha x’toffri l-Ewropa?

Agħmel mezz biex id-diversità tat-tradizzjonijiet kulturali u tal-lingwi tkun viżibbli u titqies bħala valur li jarrikkixxi Dar l-Ewropa kondiviża tagħna. Ġiegħel lin-nies jirrealizzaw li aħna lkoll għandna ħafna affarijiet komuni fil-ħajja ta’ kuljum tagħna - fl-istorja u l-kultura tagħna. Ippromovi l-komunikazzjoni u l-kooperazzjoni bejn il-persuni f’pajjiżi tal-Punent, tal-Lvant u tax-Xlokk permezz ta’ attivitajiet kondiviżi, sabiex jitnaqqas l-preġudizzju u jitrawwem l-għarfien Ewropew. Uri l-valuri Ewropej fil-prattika permezz ta’ ħidma flimkien b’metodi innovattivi. Oħloq baġit għal proġetti u opportunitajiet kulturali transnazzjonali fuq skala żgħira u sabiex jitlaqqgħu flimkien organizzazzjonijiet tas-soċjetà ċivili żgħar iżda attivi. Ġiegħel in-nies iħossuhom f’darhom fl-Ewropa!

L-organizzazzjoni li tgħin lin-nisa żvantaġġati ta’ talent ikollhom aċċess għal edukazzjoni ta’ kwalità għolja biex itejbu l-possibilitajiet tagħhom li jkollhom karriera sodisfaċenti se tuża l-flus tal-premju biex tilħaq aktar nisa li potenzjalment jistgħu jirnexxu bil-kbir, qalet Martha Dudzinski minn SWANS.

KESE Info: Xi jfisser il-premju għalik u għall-organizzazzjoni tiegħek?

SWANS:  Li l-ħidma tagħna tiġi rikonoxxuta permezz ta’ premju tant prestiġġjuż bħall-Premju tas-Soċjetà Ċivili tal-KESE huwa sinjal ta’ valur kbir lin-nisa kollha minn familji ta’ immigranti, iżda partikolarment dawk li jieħdu sehem fis-seminars tagħna, u b’dan il-mod iħossu li huma sostnuti u li għandhom valur kif ukoll imħeġġa biex isegwu t-triq li jagħżlu.

X’parir tagħti lil organizzazzjonijiet oħrajn f’termini tar-riżultati li jistgħu jinkisbu b’dawn l-attivitajiet u programmi?

Meta nitkellmu dwar il-kontribut lejn is-soċjetà ċivili, passjoni u motivazzjoni huma l-fatturi l-iktar kruċjali għas-suċċess. Trid tkun iddedikata għall-kawża tiegħek, peress li – bil-kontra tas-settur privat, ngħidu aħna – ma hemmx fatturi oħrajn bħal flus li jistgħu jimmotivawk. L-awtentiċità li tiġi bit-twemmin li għandek fil-kawża xxerred l-entużjażmu tiegħek u tgħinek issegwi b’suċċess l-għanijiet tiegħek.

Kif se tuża dan il-finanzjament speċifiku biex tipprovdi iktar għajnuna fil-komunità?

Il-flus tal-premju ser jippermettilna norganizzaw seminars addizzjonali u forsi saħansitra avveniment ta’ netwerking ikbar għan-nisa żgħażagħ fil-komunità tagħna biex jaqsmu l-ideat u l-esperjenzi u joħolqu rabtiet u linji ta’ komunikazzjoni.

Bħala organizzazzjoni li taħdem lejn l-integrazzjoni tal-migranti, li kieku kellek l-opportunità li tadotta dispożizzjoni legali speċifika waħda fil-livell Ewropew, liema tkun?

Bosta studji xjentifiċi juru biċ-ċar li s-swieq tax-xogħol attwali jiddiskriminaw b’mod pożittiv favur irġiel bojod għad-detriment tan-nisa, nies ta’ kulur u minoranzi oħrajn. Sabiex din is-sitwazzjoni tiġi rimedjata u jinħolqu kundizzjonijiet indaqs, miżuri legali jistgħu jipprovdu appoġġ temporanju għal dan il-proċess. Proċessi ta’ applikazzjoni għamja u kwoti jistgħu jġiegħlu lil-impjegaturi jagħmlu sforz biex isibu dak il-kandidat li huwa ġenwinament bl-aħjar kwalifiki; huma ser jitgħallmu kif għandhom jattiraw u jikkonvinċu impjegati minn sfondi differenti li tant ilhom jiġu injorati. Madankollu, dawn il-miżuri, flimkien mad-diskriminazzjoni pożittiva, dejjem jiffaċċjaw kwistjoni ta’ leġittimazzjoni: ħadd ma jrid li l-kwalifiki tiegħu jew tagħha jiġu miċħuda u li tissejjaħ “mara/migranti/eċċ. bil-kwota”. Iżda nistgħu negħlbu din l-attitudni ta’ akkuża li l-minoranzi mhumiex kwalifikati biss jekk nibdew billu nammettu li s-suq tax-xogħol attwali mhuwiex ibbażat primarjament ibbażata fuq il-kwalifiki, iżda fuq ir-riproduzzjoni ta’ strutturi eżistenti dominati minn irġiel bojod. Aktar ma l-impjegaturi jiddeċiedu malajr biex jegħlbu l-preġudizzji subkonxji tagħhom, aktar ma n-nies ikunu jistgħu jemmnu li x-xogħol iebes u l-kwalifiki tagħhom jistgħu jħallu l-frott.

Permezz tal-proġett tagħha tal-Ecomuseo, il-kooperattiva Aria Nuova tgħin lin-nies b’diżabilitajiet mentali biex jesperjenzaw il-wirt kulturali, filwaqt li tasserixxi li d-dritt għall-kultura huwa universali. Billi tagħtihom l-aċċess għas-siti ta’ patrimonju u aktar tard biex jesprimu l-esperjenzi estetiċi tagħhom f’laboratorji parteċipattiva, l-inizjattiva tnaqqas is-sens ta’ iżolament tagħhom. Il-premju jibgħat messaġġ sinifikanti ta’ inklużjoni u solidarjetà, kemm għas-soċjetà ċivili inġenerali u għad-dinja ta’ diżabilità b’mod partikolari, jgħid Vincenzo Griffo ta’ Aria Nuova.

EESC Info: X’ifisser dan il-premju għalik u għall-organizzazzjoni tiegħek?

Aria Nuova: Dan il-premju jirrappreżenta l-quċċata ta’ proċess li kellna fiduċja kbira fih, proġett li ippermettilna nippruvaw forom innovattivi ta’ riabilitazzjoni għall-utenti ta’ servizzi psikjatriċi, filwaqt li jiżgura li dawn ikollhom aċċess għal u jistgħu jieħdu sehem f’attivitajiet kulturali u estetiċi, li huma esperjenzi vitali għall-iżvilupp personali ta’ kull individwu.

X’parir kieku taghti lil organizzazzjonijiet oħrajn f’termini tal-ksib ta’ riżultati b’attivitajiet u programmi bħal dawn?

Il-parir tiegħi lil organizzazzjonijiet oħrajn ikun li jinkoraġġixxu kwalunkwe tip ta’ proġett li jfittex li jqajjem kuxjenza pubblika sabiex kulħadd ikun jista’ japprezza l-valur ta’ wirt kulturali li huwa kompletament inklużiv.

Kif se tuża dan il-finanzjament speċifiku biex tingħata aktar għajnuna fil-komunità?

Aħna kburin mir-rikonoxximent li ngħatalna u se nużaw il-finanzjament biex inżidu n-numru ta’ proġetti u inizjattivi marbutin mal-proġett Ecomuseo. Għandna l-ħsieb li ninvolvu aktar ċentri ta’ riabilitazzjoni psikjatrika, l-għan aħħari hu li jiġi żgurat li l-pubbliku kollu jkun konxju tal-importanza li l-wirt kulturali jsir aktar aċċessibbli.

Fl-Italja, il-protezzjoni soċjali għall-persuni b’diżabilità tnaqqset b’EUR 10 miljun fuq medda ta’ sentejn (2018–2019) u l-liġi “Dawk li jiġu warajna” (“Dopo di noi”), li tippermetti li l-protezzjoni soċjali tintervjeni ladarba l-familja ma tkunx għadha preżenti biex tieħu ħsiebhom, tidher li hi operattiva f’erba’ reġjuni biss. F’dan l-isfond dan il-premju xi jfisser għalik?

Ir-rikonoxximent li rċevejna permezz tal-premju tal-KESE jerġa’ jieħu iktar importanza jekk inħarsu lejn il-qafas legali Taljan, li għadu mhuwiex suffiċjentement attent għall-bżonnijiet tal-persuni b’diżabbiltà u mhuwiex sodisfaċenti meta jiġi biex jipproteġihom. “Vakwu regolatorju” ta’ dan it-tip huwa aktar u aktar inaċċettabbli minħabba s-sitwazzjoni soċjali attwali - partikolarment f’dawn l-aħħar snin - li hi għatxana għall-attenzjoni aktar mill-qrib mill-istituzzjonijiet għal ħtiġijiet li jistgħu jiġu definiti b’mod ċar bħala drittijiet fundamentali tal-bniedem, kif minquxa fil-kostituzzjoni Taljana u enfasizzati fil-leġislazzjoni Ewropea.

Il-fatt li dan il-premju huwa daqstant prestiġjuż huwa indikazzjoni ta’ sensibbiltà dejjem akbar ta’ qasam – dak ta’ diffikultajiet ta’ saħħa mentali – li għadu stigmatizzat bil-qawwi, u jibgħat sinjal sinifikanti tal-inklużjoni u s-solidarjetà, kemm lis-soċjetà ċivili inġenerali u lid-dinja ta’ diżabilità b’mod partikolari. Billi jaġixxi bħala katalist għalina biex nipperseveru b’attivitajiet pijuniera immirati lejn l-inklużjoni ta’ forom oħra ta’ assistenza, il-premju jipprojetta immaġni ta’ pajjiż li jappoġġja s-solidarjetà u l-inklużjoni u hija approvazzjoni ċara tal-valuri tal-Unjoni. < /p >

Billi jgħaqqad liż-żgħażagħ minn madwar il-Balkani biex jaqsmu l-kultura tagħhom permezz tal-festival tal-films tiegħu, il-Balkans Beyond Borders qed ifittex li jegħleb l-imgħoddi mqanqal tar-reġjun. Għaliex jekk għandha tinbidel xi ħaġa, din se tinbidel miż-żgħażagħ u għall-benefiċċju tagħhom, tistqarr Veroniki Krikoni tal-BBB.

KESE Info: Xi jfisser għalik u għall-organizzazzjoni tiegħek il-fatt li rċevejtu dan il-premju?

BBB:Balkans Beyond Borders jiċċelebra l-10 anniversarju tiegħu fl-2019 u dan il-premju, apparti milli jtina spinta sostanzjali f’ħidmietna, se jkollu wkoll valur simboliku. Li konna fost ir-rebbieħa tal-premju tal-KESE huwa rikonoxximent għall-għaxar snin ta’ ħidma tagħna. Il-premju se jagħti lill-festival l-ispinta meħtieġa sabiex iwessa’ l-ħidma u l-missjoni tiegħu u jtejjeb il-viżibbiltà, sabiex ikun jista’ jilħaq aktar udjenzi f’aktar postijiet fl-Ewropa, kemm fiżikament, permezz ta’ avvenimenti kulturali, u kemm elettronikament, permezz tal-pjattaforma onlajn tagħna, filwaqt li jagħti lok għad-djalogu permezz tal-arti. Barra minn hekk, dan se jippermettilna nintegraw il-komunità BBB, noffru masterclasses speċjali dwar temi u tekniki innovattivi, u nipprovdu pjattaforma tanġibbli li tista’ tikkontribwixxi għall-ħolqien ta’ spazju pubbliku Ewropew li jikkondividi l-patrimonju, il-valuri u l-identitajiet Ewropej komuni.

X’parir tista’ tagħti lil organizzazzjonijiet oħrajn f’dak li jirrigwarda l-kisba ta’ riżultati b’dawn l-attivitajiet u programmi?

Il-parir tagħna huwa doppju: minn naħa waħda ppersistu, insistu u aħdmu b’mod metodiku, u min-naħa l-oħra l-ingredjent ewlieni huwa li għandna nibqgħu miftuħin. Flimkien aktar b’saħħitna. Ippruvaw sibu msieħba xierqa li jkunu adatti għall-viżjoni u l-missjoni tagħkom, u li jistgħu joffru ħiliet komplementari u jgħinukom tipperfezzjonaw is-sengħa tagħkom.

Kif se tużaw dan il-finanzjament speċifiku biex tipprovdu għajnuna ulterjuri fil-komunità?

L-organizzazzjoni tagħna tiffoka fuq l-idea tal-kondiviżjoni, bħat-tema tal-festival ta’ din is-sena. Il-kondiviżjoni ta’ ideat, il-kondiviżjoni ta’ kulturi, il-kondiviżjoni tar-riżorsi tagħna ma’ kull min jinsab fil-bżonn. Għalhekk dan il-finanzjament se jippermettilna nkunu aktar effettivi biex nikkondividu l-ħolma tagħna ma’ aktar nies għal Ewropa aħjar, filwaqt li niffokaw saħansitra aktar fuq il-ġenerazzjonijiet żgħażagħ. Għaliex ejja ma ninsewx, li jekk għandha tinbidel xi ħaġa, din se tinbidel miż-żgħażagħ (u għall-benefiċċju tagħhom).

Il-fokus ta’ Balkans Beyond Borders jirrigwarda ż-żgħażagħ, iżda x’hemm fir-rigward tal-ġenerazzjonijiet akbar fl-età fejn il-ġrieħi tal-gwerra ħallew feriti aktar profondi? Taħseb li dan l-approċċ se jiffunzjona magħhom? 

Din hija sfida li għandna naċċettaw. Iż-żgħażagħ huma l-futur tal-Ewropa, iżda l-ġenerazzjonijiet akbar fl-età sofrew il-ġrieħi tal-gwerra. Madankollu, l-għoti ta’ spazju lill-ġenerazzjonijiet żgħażagħ biex isemmgħu leħinhom, biex iħossuhom liberi li joħolqu u jerġgħu jifformaw kunċetti fir-rigward tal-passat tagħhom, hija xi ħaġa li tista’ tkun ta’ valur miżjud ukoll għall-ġenerazzjonijiet akbar fl-età. Il-motto tas-Sena Ewropea tal-Wirt Kulturali huwa “fejn il-passat jiltaqa’ mal-futur”: dan huwa eżattament dak li qed nippruvaw nagħmlu billi nnaqqsu d-distakk bejn epoki differenti billi nindirizzaw il-ġenerazzjonijiet akbar fl-età permezz tas-setgħa taż-żgħażagħ. 

L-organizzazzjoni Brittanika li qed tissielet biex toffri rotot sikuri u legali għar-refuġjati tfal lejn ir-Renju Unit se tuża l-flus tal-premju biex tgħin biex tilħaq l-objettiv tagħha li 10 000 tifel u tifla jibdew ħajja mill-ġdid fuq medda ta’ 10 snin, tispjega Charlotte Morris, il-kap tal-komunikazzjoni u l-iżvilupp tal-organizzazzjoni, lill-KESE Info.

KESE Info: Xi jfisser dal-premju għalik u għall-organizzazzjoni tiegħek?

Safe Passage: Il-premju jirrappreżenta d-determinazzjoni qawwija tagħna li npoġġu d-dinjità umana u d-drittijiet tal-bniedem fil-qalba tal-ħidma tagħna. Dawn huma valuri li nafu li huma maqsuma minn nies madwar l-Ewropa u, minkejja l-inċertezzi tal-futur, dawn il-valuri se jibqgħu kostanti.

Liema parir tagħti lil organizzazzjonijiet oħra f'termini ta’ kisba ta' riżultati b'dawn l-attivitajiet u l-programmi?

Aħna ta’ Safe Passage determinati li niftħu rotot sikuri u legali għar-refuġjati. It-tim u l-imsieħba tagħna għandna l-attitudni ta’ "aqbad u agħmilha"; li l-organizzazzjoni hija żgħira jgħin ukoll ma’ dan.

Kif se tużaw dan il-finanzjament speċifiku biex tipprovdu aktar għajnuna fil-komunità?

Dan il-premju se jgħinna nkomplu bil-kampanja tagħna biex nagħtu aċċess għal passaġġ bla periklu lil aktar refuġjati tfal, b'mod partikolari:

L-EWWEL, biex niddefendu d-dritt tat-tfal refuġjati fl-Ewropa għar-riunifikazzjoni tal-familja fir-Renju Unit issa u wara Brexit.

IT-TIENI, biex inkomplu l-kampanja tagħna biex nassiguraw impenn mill-gvern tar-Renju Unit biex 10 000 refuġjati tfal jerġgħu jibdew ħajja mill-ġdid matul l-10 snin li ġejjin.

u t-TIELET, biex nippromovu kampanja biex tinħoloq bidla pożittiva fl-attitudnijiet tal-pubbliku lejn il-Gran Brittanja li toffri protezzjoni lir-refuġjati, u attitudnijiet b'mod usa’ madwar l-Ewropa.

Brexit kif se jaffettwa x-xogħol tagħkom?

Għandna pjanijiet fis-seħħ biex niżguraw li dan ma jaffettwax il-ħidmiet tagħna. Għandna żgurata emenda għall-Abbozz ta’ Rtirar ta' Brexit biex ir-refuġjati tfal ikunu jistgħu jkomplu jingħaqdu mal-familji tagħhom fil-Gran Brittanja wara Brexit. Se nkomplu ngħaqdu wkoll lir-refuġjati mal-familji tagħhom madwar l-Ewropa.