KESE info

Il-proġett Ġermaniż Discovering hands, li jħarreġ lil nisa għomja jew b’diżabilità viżwali biex jużaw is-sens tal-mess superjuri tagħhom biex itejbu d-detezzjoni bikrija tal-kanċer tas-sider, ġie ppremjat EUR 14 000. L-erba’ inizjattivi l-oħra mill-Greċja, il-Belġju, l-Italja u Spanja ngħataw EUR 9 000 kull waħda.

L-inizjattiva REvive Greece tgħin lir-refuġjati, il-persuni li jfittxu asil u l-migranti biex jintegraw f’pajjiżi ospitanti billi tgħallimhom l-ipprogrammar tal-kompjuters u ddaħħalhom f’kuntatt ma’ intraprendituri żgħażagħ Ewropej. DUO for a JOB mill-Belġju huwa programm ta’ mentoring interġenerazzjonali u interkulturali li joffri servizz individwali bla ħlas ta’ sitt xhur għal migranti żgħażagħ li qed ifittxu xogħol, ipprovdut minn persuni ’il fuq minn 50 sena li għandhom esperjenza professjonali f’qasam simili għal tagħhom. Il-proġett Taljan Progetto Quid immexxi minn Cooperativa Sociale Quid huwa ditta tal-moda etika li tgħin lil gruppi vulnerabbli u żvantaġġati, bħal persuni li qed ifittxu asil u vittmi tal-iskjavitù, il-prostituzzjonali u l-vjolenza domestika, biex jidħlu fis-suq tax-xogħol. Il-proġett Spanjol Laundry ID tal-Institute of Robotics for Dependency (IRD) għandu l-għan li joħloq impjiegi għal persuni b’diżabilitajiet f’servizz tal-ħasil tal-ħwejjeġ li ngħata disinn teknoloġiku ġdid u ġie adattat għall-ħtiġijiet tagħhom.

”Huwa bi pjaċir kbir u ta’ privileġġ li qed nagħti dan il-Premju lir-rebbieħa. Nixtieq nieħu din l-opportunità biex nawguralhom u biex nagħti rikonoxximent mistħoqq ferm lill-individwi u l-organizzazzjonijiet tas-soċjetà ċivili li xogħolhom u l-impenn tagħhom biex ħajjet in-nies isiru aħjar huwa ta’ eżempju għal kulħadd,” qal il-President tal-KESE, Georges Dassis.

Il-ħames inizjattivi rebbieħa juru x’qed isir minn diversi organizzazzjonijiet mhux governattivi madwar l-Ewropa biex jgħinu lil xi wħud mill-aktar gruppi vulnerabbli u żvantaġġati fis-soċjetà jidħlu fis-suq tax-xogħol. 

Il-Premju għas-Soċjetà Ċivili, li issa jinsab fid-disa’ edizzjoni tiegħu, jingħata għal “eċċellenza f’inizjattivi tas-soċjetà ċivili”.

Minkejja għadd ta’ inizjattivi ta’ kwalità għolja, mhux qed isir biżżejjed biex jipprevjenu liż-żgħażagħ milli iċedu għall-attrazzjoni tal-estremiżmu vjolenti, jgħid il-KESE

Fil-ġlieda kontra r-radikalizzazzjoni taż-żgħażagħ, l-Istati Membri u l-UE jeħtieġ li jinvoluvu lill-organizzazzjonijiet tas-soċjetà ċivili b’mod aktar effettiv bħala msieħba li jistgħu jagħtu kontribut importanti lir-reżiljenza fuq bażi soċjali u ta’ valuri kontra l-ideat estremisti, qal il-KESE waqt il-plenarja ta’ Diċembru.

Minflok ma jiffokaw fuq politiki ta’ sigurtà u punittivi fuq perjodu qasir immexxija minn avvenimenti ta’ “kriżi”, il-politiki tal-UE għandhom jinvestu aktar fi sforzi ta’ prevenzjoni f’waqthom iżda fit-tul u koordinati, il-KESE stqarr fl-opinjoni tiegħu dwar Kooperazzjoni mas-soċjetà ċivili għall-prevenzjoni tar-radikalizzazzjoni taż-żgħażagħ,.

Ir-relatur is-Sur Christian MOOS (Interessi Varji, DE) saħħaq li ż-żgħażagħ huma partikolarment vulnerabbli għal propaganda estremista, peress li dawn ma jkollhomx sens qawwi ta’ identità u ħafna drabi jħossuhom esklużi mis-soċjetà.

Il-prevenzjoni teħtieġ approċċ li jinvolvi diversi aġenziji li jinvolvu lil dawk li jfasslu l-politika, il-pulizija u l-ħabsijiet, ħaddiema soċjali, l-iskejjel, il-midja, in-negozji u l-organizzazzjonijiet tas-soċjetà ċivili, fil-fehma tal-KESE.

Is-Sur Moos faħħar il-ħidma tal-Kummissjoni Ewropea f’dan il-qasam. In- netwerk ta’ Sensibilizzazzjoni tagħha dwar ir-Radikalizzazzjoni (RAN) jiġbor l-aktar prattikanti esposti u lokali u jippromovi l-iskambju tal-aħjar prattika u esperjenzi fuq il-post, filwaqt li l-Grupp ta’ Esperti ta’ Livell Għoli dwar ir-Radikalizzazzjoni tagħha għandu jagħti pariri dwar l-iżvilupp ulterjuri tal-politiki tal-UE u kooperazzjoni aktar strutturata bejn il-partijiet interessati u bejn l-Istati Membri.

Madankollu, il-KESE jgħid li dawn l-inizjattivi mhumiex biżżejjed.

Il-KESE jagħmel enfasi speċjali fuq l-edukazzjoni formali u mhux formali għal parteċipazzjoni attiva f’soċjetà diversa u għat-tagħlim tal-ħsieb kritiku u l-litteriżmu medjatiku.

Il-ġlieda kontra tendenzi ksenofobiċi u populisti permezz ta’ għarfien aktar interkulturali u wkoll permezz ta’ fehim sod tal-valuri tal-UE hija wkoll meqjusa bħala utli.

L-organizzazzjonijiet taż-żgħażagħ ġew identifikati bħala li jipprovdu opportunitajiet alternattivi siewja għall-iżvilupp ta’ sens tajjeb tal-identità personali. Il-KESE saħaq ukoll ir-rwol tat-trejdjunjins u l-komunitajiet reliġjużi, kif ukoll dak tas-servizzi u n-netwerks ta’ appoġġ li jistgħu jgħinu lill-iskejjel u l-familji jidentifikaw l-ewwel sinjali tar-radikalizzazzjoni.

Il-ġlieda kontra l-qgħad u l-faqar fost iż-żgħażagħ għandha tkun ukoll prijorità fuq l-aġenda, irrakkomanda l-KESE. (ll)

Il-qafas attwali tal-UE mhuwiex biżżejjed għal tranżizzjoni għal sistemi alimentari aktar sostenibbli. Politika alimentari komprensiva hija meħtieġa b’mod urġenti sabiex tittejjeb il-koerenza bejn l-oqsma ta’ politika relatati mal-ikel, jiġi restawrat il-valur tal-ikel u tiġi żgurata l-implimentazzjoni effettiva tal-Għanijiet ta’ Żvilupp Sostenibbli tan-NU.

Fl-opinjoni fuq inizjattiva proprja tiegħu, il-KESE jitlob għal politika alimentari Ewropea komprensiva, bl-għan li dieti tajbin għas-saħħa jkunu pprovduti minn sistemi alimentari sostenibbli u sabiex l-agrikoltura tkun marbuta man-nutrizzjoni u s-servizzi tal-ekosistema.

"Għandna bżonn inġibu aktar ġustizzja fis-suq u jeħtieġ li n-nies jifhmu l-valur tal-ikel" qal ir-relatur Peter Schmidt (Ħaddiema, DE).

Politika alimentari komprensiva u moderna trid tkun komplementari għal, iżda mhux tissostitwixxi, PAK imfassla mill-ġdid. Għandha wkoll tissodisfa diversi kriterji, bħall-kwalità tal-ikel, is-saħħa, l-ambjent, ekonomija soda u governanza tajba. “L-Ewropa trid tistabbilixxi l-istandards”, saħaq is-Sur Schmidt.

Il-KESE jirrakkomanda passi kbar fil-livell tal-UE, bħal:

• Sistema tat-tikkettar tal-ikel sostenibbli;
• Rabtiet iktar mill-qrib bejn il-produtturi u l-konsumaturi;
• l-iżgurar ta’ prezzijiet ġusti għall-produtturi;

• L-iżvilupp ta’ Pjan ta’ Azzjoni dwar is-Sostenibbilità tal-Ikel;
• Direttorat Ġenerali tal-Ikel, responsabbli għall-politiki relatati mal-ikel u s-sors ta’ regolamentazzjoni, leġislazzjoni u infurzar. (sma)

Il-KESE jinkoraġġixxi kooperazzjoni akbar bejn l-Istati Membri tal-UE f’dak li jirrigwarda d-difiża u jappoġġja t-tnedija tal-Programm Ewropew għall-Iżvilupp fl-Industrija tad-Difiża (EDIDP) u l-Fond Ewropew għad-Difiża (EDF) bħala xprunaturi importanti mhux biss tal-ekonomija, iżda wkoll tal-integrazzjoni Ewropea.

"L-Ewropa jeħtieġ li tagħmel evalwazzjoni mill-ġdid u tadatta l-kapaċitajiet tagħha għall-industrija tad-difiża tagħha stess u tiżviluppa kultura ta’ difiża u sigurtà fl-Ewropa kollha biex tagħti sinifikat sħiħ liċ-ċittadinanza Ewropea", qal ir-relatur tal-EDIDP Antonello Pezzini (Min Iħaddem, IT).

"Is-settur tad-difiża huwa settur ekonomiku importanti b’teknoloġija avvanzata. Jeħtieġ li ninkoraġġixxu r-riċerka u l-iżvilupp fl-industrija tad-difiża għax ser ikollha wkoll impatt pożittiv fuq industriji prinċipali oħrajn", żied jgħid ir-relatur tal-EDF Mihai Ivaşcu (Interessi Varji, RO).

Il-produtturi Ewropej – inklużi l-SMEs – u l-utenti, li jinvolvu minn tal-anqas tliet Stati Membri, jeħtieġ li jkunu integrati b’mod effettiv meta jiġu biex jiffinanzjaw proġetti u jakkwistaw beni u servizzi.

Kull euro investit fl-industrija tad-difiża jiġġenera redditu ta’ EUR 1,6. Għaldaqstant l-Istati Membri u l-Kummissjoni Ewropea għandhom jagħmlu użu mill-EDF biex iżommu l-kapaċitajiet industrjali ewlenin fl-Ewropa stess u jiżguraw li l-flus Ewropej jintefqu fuq R&Ż Ewropej u għax-xiri ta’ sistemi Ewropej ta’ armi.

"L-Ewropa jeħtieġ li tibni kapaċitajiet ewlenin b’saħħithom li jappoġġjaw l-interessi Ewropej u li japplikaw standards soċjali u ambjentali għoljin. Għandha bżonn li tieħu responsabbiltà akbar dwar id-difiża u trid tkun lesta u kapaċi tiskoraġġixxi kwalunkwe theddid estern għaċ-ċittadini u l-istil ta’ ħajja tagħha", ikkonkludew ir-relaturi. (sma)

Il-miżuri proposti mill-Kummissjoni Ewropea biex tiġi indirizzata d-distribuzzjoni inugwali tar-responsabbiltajiet tal-kura fil-familji u titreġġa’ lura l-preżenza aktar baxxa tan-nisa fis-suq tax-xogħol li dan iwassal għalih jirrappreżentaw pass fid-direzzjoni t-tajba, iżda dawn jeħtieġu aktar studju u titjib, qal il-KESE fl-Opinjoni tiegħu dwar Il-bilanċ bejn ix-xogħol u l-ħajja għall-ġenituri u l-persuni li jindukraw .

Il-Proposta tal-Kummissjoni għal Direttiva dwar il-bilanċ bejn ix-xogħol u l-ħajja privata għall-ġenituri u għall-persuni li jindukraw fiha l-ewwel miżura leġislattiva tal-Pilastru Ewropew tad-Drittijiet Soċjali. Tinkludi liv tal-paternità ta’ mill-inqas għaxart ijiem tax-xogħol qrib it-twelid tat-tarbija, liv tal-ġenituri mhux trasferibbli ta’ erba’ xhur u liv tal-persuni li jindukraw ta’ ħamest ijiem fis-sena għall-ħaddiema li jieħdu ħsieb qraba morda jew dipendenti.

Dawn il-forom kollha tal-liv għandhom jiġu kkumpensati fil-livell tal-liv għall-mard. L-età tal-wild sa fejn il-ġenituri jistgħu jieħdu l-liv jew jitolbu arranġamenti flessibbli tax-xogħol għandha tiżdied minn tmienja għal tnax-il sena.

Il-KESE qal li l-proposti għandhom iqisu wkoll il-ħtiġijiet tal-intrapriżi u l-iżjed tal-intrapriżi ż-żgħar u ta’ daqs medju. (ll)

Id-diġitalizzazzjoni rriżultat f’bidliet sinifikanti fis-suq tax-xogħol, u l-ħaddiema impjegati f’forom ġodda ta’ impjieg ta’ spiss huma esklużi mis-sigurtà soċjali. F’opinjoni adottata fis-Sessjoni Plenarja ta’ Diċembru, il-KESE jħeġġeġ lill-Istati Membri biex jirregolaw il-forom ġodda ta’ xogħol u jiżguraw li dawn il-“ħaddiema ġodda” jkun jista’ jkollhom aċċess għal pensjonijiet, kura tas-saħħa u sistemi kontra il-qgħad.

“Issa wasal iż-żmien għall-Kummissjoni Ewropea biex tiżviluppa l-qafas xieraq biex jintuża mill-Istati Membri tagħha”, qal ir-relatur Petru Sorin Dandea (Ħaddiema, RO). “Fir-rigward ta’ kontribuzzjonijiet tas-sigurtà soċjali, l-intervent fil-livell tal-UE huwa assolutament meħtieġ. Għandna bżonn leġislazzjoni biex tiżgura li n-nies li għadhom mhumiex rikonoxxuti bħala ħaddiema jkunu koperti minn sistemi tas-sigurtà soċjali”.

Il-KESE jappella lill-UE u lill-Istati Membri tagħha biex:

• jirregolaw dawn il-forom ġodda ta’ impjieg u jagħtu l-istatus ta’ “ħaddiem” lil kull persuna impenjata f’“forma ġdida ta’ xogħol”.
• jagħmlu l-pagamenti ta’ kontribuzzjonijiet tal-pensjoni, tal-kura tas-saħħa u għall-qgħad obbligatorji għal kull dħul professjonali rreġistrat.
• jikkollegaw il-bażijiet ta’ data elettronika tas-sigurtà soċjali u tat-taxxa tagħhom, biex in-nies li jkollhom dħul professjonali, iżda li l-istatus ta’ “ħaddiem” tagħhom ma jkunx ġie rikonoxxut, ikunu jistgħu jiġu identifikati.
• jesploraw modi ġodda ta’ ffinanzjar tas-sistemi tas-sigurtà soċjali. Pereżempju, parti mid-dividend diġitali jista’ jintuża biex jiggarantixxi l-aċċess għas-sigurtà soċjali għall-persuni involuti f’forom ġodda ta’ xogħol. (mp)

Il-KESE jaġixxi fil-livel lokali biex jikseb għarfien dirett dwar is-settur tal-ħaddiema tal-kura tas-saħħa li jgħixu fl-unità domestika fejn jaħdmu fl-Ewropa

Il-Kumitat Ekonomiku u Soċjali Ewropew (EESC) organizza l-ewwel laqgħa fis-sensiela tal-laqgħat tiegħu “going local” dwar il-futur tal-ħaddiema tal-kura tas-saħħa fl-Ewropa li jgħixu fl-unità domestika fejn jaħdmu li saret f’Londra fid-29 ta’ Novembru, fi sforz biex jagħmel riċerka dwar il-kundizzjonijiet tax-xogħol prekarji ta’ dawn il-ħaddiema.

Apparti r- Renju Unit, il-KESE se jorganizza wkoll laqgħat fil-Ġermanja, l-Iżvezja, l-Italja u l-Polonja – xi wħud mill-pajjiżi ta’ oriġini u ta’ destinazzjoni tal-ħaddiema tal-kura tas-saħħa li jgħixu fl-unità domestika fejn jaħdmu.

Iż-żjarat huma segwitu tal-Opinjoni fuq inizjattiva proprja tal-KESE adottata fl-2016, li kienet l-ewwel dokument ta’ politika fil-livell tal-UE li jittratta l-ħaddiema tal-kura tas-saħħa li jgħixu fl-unità domestika fejn jaħdmu fl-Ewropa.

Mhuwiex magħruf l-għadd preċiż tal-ħaddiema tal-kura tas-saħħa li jgħixu fl-unità domestika fejn jaħdmu, l-istess bħall-kontribut tagħhom għall-ekonomiji tal-Istati Membri tal-UE.

Skont l-Organizzazzjoni Internazzjonali tax-Xogħol, ix-xogħol domestiku kien jgħodd għal 5-9% tal-impjieg kollu fil-pajjiżi industrijalizzati fl-2012. F’Ewropa li qed tixjieħ mifnija minn nuqqas ta’ xogħol fis-settur tal-kura u minn nuqqas ta’ infrastruttura adegwata għall-provvista ta’ kura fit-tul, huwa mistenni li jiżdied l-għadd ta’ ħaddiema tal-kura tas-saħħa li jgħixu fl-unità domestika fejn jaħdmu.

Il-ħaddiema tal-kura tas-saħħa li jgħixu fl-unità domestika fejn jaħdmu huma fost l-iżjed forza tax-xogħol mobbli fl-UE, u l-Ewropa Ċentrali għadha qed tipprovdi ħafna minn dawn il-ħaddiema.

Madankollu, l-istatus ta’ impjieg tagħhom ta’ spiss ma jkunx irregolat, ix-xogħol tagħhom ma jiġix iddikjarat u ta’ spiss isir f’kundizzjonijiet diffiċli ħafna.

Fost affarijiet oħra, il-KESE qed jipproponi li tiġi rikonoxxuta l-eżistenza tal-ħaddiema tal-kura tas-saħħa li jgħixu fl-unità domestika fejn jaħdmu billi tiġi pprovduta definizzjoni komuni tal-professjoni tagħhom kif ukoll l-inklużjoni tagħhom fis-sistema tal-kura fit-tul, bid-drittijiet kollha marbuta mar-regolamenti rilevanti tal-UE u l-Istati Membri fil-qasam tal-impjieg.

Barra minn hekk, jeħtieġ li l-Istati Membri jipprovdu appoġġ finanzjarju u organizzativ għal dawk li jirċievu l-kura, li ta’ spiss ma jkunux konxji li meta jikru ħaddiem tal-kura tas-saħħa li jgħix fl-unità domestika huma jsiru impjegaturi ġenwini, bir-reponsabbiltajiet li dan iġib miegħu.

B’referenza għar-Renju Unit, ir-relatur Adam Rogalewski (Ħaddiema, PL) qal: “Indunajna li s-settur tal-kura soċjali ntlaqgħet ħażin ħafna mit-tnaqqis fil-finanzjament ta’ GBP 6 miljun mill-2010 ’l hawn. Minħabba f’hekk, id-disponibbiltà u l-kwalità tal-kura marru għall-agħar ferm. In-nuqqas ta’ ħaddiema minħabba pagi baxxi u kundizzjonijiet ħżiena fis-settur wasslu għal żieda f’daqqa f’arranġamenti informali ta’ kura. Is-soċjetà ċivili fl-Ewropa u b’mod partikolari fir-Renju Unit qed titlob li tintemm din il-loġika ta’ awsterità. Hemm ħtieġa urġenti li jsir investiment akbar fis-settur tal-kura.”

Ir-riżultati taż-żjarat tal-KESE fil-pajjiżi ser jiġu ppreżentati f’rapport li għandu jiġi ppubblikat aktar tard fl-2018.(ll)

Il-Kumitat Ekonomiku u Soċjali Ewropew adotta l-Opinjoni tiegħu dwar Ir-rwol ewlieni tal-kummerċ u l-investiment għat-tilħiq u l-implimentazzjoni tal-Għanijiet ta’ Żvilupp Sostenibbli (SDGs) fis-sessjoni plenarja tiegħu f’Diċembru (relatur: Jonathan Peel (Min Iħaddem, UK); korelatur: Christophe Quarez (Ħaddiema, Fr)).

“Aħna nemmnu li l-SDGs, flimkien mal-Ftehim ta’ Pariġi, ser jibdlu fundamentalment l-aġenda kummerċjali dinjija. Il-ħtieġa li jiġu implimentati dawn il-ftehimiet profondi għandha tkun fil-qalba tan-negozjati futuri kollha tal-UE”, qal Jonathan Peel.

Il-KESE jemmen li hemm għadd ta’ oqsma ewlenin ta’ politika fejn l-UE għandha bżonn tħabrek biex tallinja l-ftehimiet kummerċjali tal-ġejjieni mal-SDGs, l-iżjed fil-każ tal-ftehimiet kummerċjali mal-pajjiżi fil-fażi tal-iżvilupp. Il-Kumitat iħeġġeġ lill-UE sabiex tippromovi l-implimentazzjoni tal-SDGs fir-relazzjonijiet bilaterali tagħha wkoll.

“Tinħtieġ konċentrazzjoni akbar fuq id-dimensjonijiet soċjali u ambjentali tas-sostenibbiltà fil-ftehimiet kummerċjali tal-UE sabiex jiġi żgurat li dawn jikkontribwixxu għall-SDGs”, qal Christophe Quarez. L-inklużjoni ta’ kapitoli dwar il-Kummerċ u l-Iżvilupp Sostenibbli b’mekkaniżmi għall-monitoraġġ tas-soċjetà ċivili fi ftehimiet ta’ sħubija ekonomika u kummerċjali fil-livell tal-UE hija ta’ importanza kbira. Dawn il-mekkaniżmi għandhom potenzjal kbir biex jippromovu l-valuri tal-UE, inklużi l-istandards soċjali u ambjentali, u jistgħu wkoll jagħtu riżultati tanġibbli.  (sg)

Aktar minn 100 rappreżentant tas-soċjetà ċivili minn pajjiżi membri tal-Unjoni għall-Mediterran iltaqgħu fit-13 u l-14 ta’ Diċembru f’Madrid biex jiddiskutu l-isfidi li qed jiffaċċja r-reġjun. Is-Summit tal-Euromed tal-2017 tal-Kunsilli Ekonomiċi u Soċjali u ta’ Istituzzjonijiet simili ffoka fuq id-drittijiet ekonomiċi, soċjali u kulturali, il-protezzjoni soċjali u ġenerazzjoni ġdida ta’ drittijiet tan-nisa fir-reġjun tal-Mediterran.

Il-parteċipanti adottaw b’mod unanimu dikjarazzjoni finali li tikkundanna l-forom kollha ta’ vjolenza, terroriżmu u ksur tad-drittijiet fundamentali fir-reġjun tal-Mediterran. Huwa jħeġġeġ ukoll lill-istituzzjonijiet tal-UE biex ifasslu mekkaniżmu effiċjenti u flessibbli biex jiżgura l-wasla legali u sikura ta’ refuġjati, li ta’ kuljum qed jinkisrulhom id-drittijiet tal-bniedem.

Il-parteċipanti enfasizzaw l-importanza ewlenija dwar id-drittijiet tax-xogħol, ekonomiċi u soċjali għall-iżvilupp ekonomiku u ta’ governanza demokratika fir-reġjun. Huma enfasizzaw ukollil-ħtieġa għal edukazzjoni affordabbli u ta’ kwalità tajba biex jitjieb l-iżvilupp soċjoekonomiku fil-Mediterran.

Is-soċjetà ċivili organizzata tħeġġeġ lill-pajjiżi Mediterranji kollhabiex jinkludu d-drittijiet tan-nisa u l-ugwaljanza bejn is-sessi fil-kostituzzjoni tagħhomu biex jiżviluppaw l-istituzzjonijiet meħtieġa biex jipproteġu n-nisa minn vjolenza bbażata fuq il-ġeneru u d-diskriminazzjoni.

Is-soċjetà ċivili ħeġġet lill-ministri tax-xogħol tal-Euromed biex ipoġġu t-tema dwar il-livelli bażiċi ta’ protezzjoni soċjalifuq l-aġenda li jmiss tal-Konferenza Ministerjali dwar l-Impjiegi. (sg)

Il-Bulgarija qed tieħu r-riedni tal-Presidenza tal-UE f’idejha għall-ewwel darba f’mument diffiċli għall-Ewropa. Dan il-kompitu se jkun test importanti tal-kapaċità politika, amministrattiva u diplomatika tagħha. Il-Bulgarija qed tieħu approċċ responsabbli ħafna għall-ewwel presidenza tagħha u hija konxja mill-fatt li d-deċiżjonijiet tagħha se jkunu kritiċi għall-futur tal-Ewropa. Hija ser tfittex li tilħaq il-bilanċ it-tajjeb u tinkoraġġixxi kunsens ġenerali dwar kwistjonijiet ta’ prijorità. Il-Bulgarija qed tieħu approċċ realistiku u prammatiku għall-Presidenza tagħha. L-għan tagħha huwa li tiżviluppa pjan ta’ azzjoni ma’ kull pajjiż li jistabbilixxi passi tanġibbli iżda ma joħloqx aspettattivi mhux realistiċi.

Il-Bulgari jafu li huma magħrufa prinċipalment bħala wieħed mill-Istati Membri l-ġodda tal-UE, bl-agħar indikaturi ekonomiċi u soċjali, iżda din il-presidenza ser tiżvela xi fatti ftit li xejn magħrufa dwar pajjiżna u se tiffoka l-attenzjoni tal-Ewropa fuq il-wirt kulturali uniku tal-Bulgarija. Bħala l-eqdem stat fuq il-kontinent, il-Bulgarija żammet l-isem u l-post attwali tagħha fil-peniżola tal-Balkani għal aktar minn 1 300 sena. Wara l-adeżjoni tagħha mal-UE fl-2007, l-alfabett Bulgaru sar it-tielet alfabett Ewropew – wara l-alfabett Latin u dak Grieg. Il-pajjiż qatt ma fittex il-fama, iżda jidher li dan qed jinbidel f’vantaġġ għalih illum il-ġurnata. Il-Bulgarija taf dak li hu meħtieġ biex tippreżerva l-identità u l-ispirtu nazzjonali tagħha u qed tipprova tiżviluppa sens qawwi ta’ kburija nazzjonali. Hija konxja tal-valur tagħha iżda għadha kemxejn mistħija: faċli li wieħed isir iħobb dan it-teżor moħbi.

Il-Presidenza Bulgara se tiffoka fuq tliet kunċetti fundamentali: kunsens, kompetittività u koeżjoni:

• kunsens dwar suġġetti ewlenin bħas-sigurtà, il-migrazzjoni, il-Balkani tal-Punent – li jipprovdu perspettiva Ewropea ċara għal dan ir-reġjun – u l-kooperazzjoni b’rabta mal-Baħar l-Iswed;
• kompetittività fir-rigward tal-unjoni ekonomika u monetarja u t-tisħiħ tad-dimensjoni soċjali, bi tħejjija għall-politika tal-Unjoni wara l-2020;
• koeżjoni peress li l-futur tal-Ewropa jintrabat b’mod inseparabbli mal-politika ta’ koeżjoni tagħha, li tipprovdi valur miżjud liċ-ċittadini tal-UE u hija strument li ta prova tal-effettività tiegħu biex jitnaqqsu d-disparitajiet u jiġi żgurat li l-mudell Ewropew jagħmel suċċess.

Is-Saħħa fl-Għaqda se jkun il-motto tal-Presidenza Bulgara.

Il-Bulgari huma fiduċjużi li l-presidenza tagħna se tagħmel suċċess. L-ambizzjoni tagħna hija li nissodisfaw il-prijoritajiet stabbiliti fl-Aġenda tal-Kummissjoni għal unjoni iktar magħquda, aktar b’saħħitha u aktar demokratika. Nimpenjaw ruħna biċ-ċar li nkunu newtrali, ibbilanċjati u sodi fejn meħtieġ f’isem l-unità u s-solidarjetà.

Il-President tal-KESE Georges Dassis u l-Kummissarju Ewropew għat-Trasport, Violeta Bulc, nedew uffiċjalment il-Pjattaforma tal-UE għall-Bidla waqt konferenza ta’ importanza fil-KESE fi Brussell fis-27 ta’ Novembru. Il-Pjattaforma għandha l-għan li żżid l-impjieg u l-oppotunitajiet indaqs tan-nisa fis-settur tat-trasport.

“Li wieħed jipprova jtejjeb l-ugwaljanza bejn l-irġiel u n-nisa fis-settur tat-trasport mhix biss kwistjoni ta’ ugwaljanza bejn is-sessi: hija ħtieġa ekonomika u soċjali li għandha x’taqsam mal-impjieg, l-innovazzjoni, is-sostenibbiltà u t-tkabbir fl-UE,” qal is-Sur Dassis.