EESC info

Dar le CESE, má tá córas monaraíochta na hEorpa chun aistriú éifeachtach agus iomaíoch a dhéanamh chuig geilleagar digiteach ceannródaíoch, atá neamhdhíobhálach don chomhshaol, ní mór dó a bheith réidh le hinfheistíocht shuntasach a dhéanamh sa nuálaíocht. Ar an ábhar sin, ba cheart na céimeanna atá á bpleanáil ag an gCoimisiún Eorpach, chun gur féidir forbairt níos fearr a dhéanamh ar an gcóras monaraíochta, a bheith bunaithe ar fhíorthuiscint ar riachtanais cuideachtaí – go háirithe FBManna.

Is ionann an mhonaraíocht agus 17.3% d’OTI (olltáirgeacht intíre) na hEorpa arb ionann í agus 80% d’onnmhairithe. "I bhfianaise na bhfigiúirí sin, tá sé fíorthábhachtach go ndéanfaidh an Eoraip a cuid acmhainní a chur i dtoll a chéile chun an earnáil seo a chothabháil agus fiú a neartú," arsa Antonello Pezzini, rapóirtéir ar thuarascáil faisnéise ó CESE faoin nuálaíocht incriminteach i réimsí ardmhonaraíochta.

Tá CESE ag iarraidh ar an Eoraip agus ar a Ballstáit straitéisí oideachais iomchuí a chur ar bun, rud atá fíor-riachtanach má táthar chun scileanna nua a shealbhú agus conairí gairme nua a fhorbairt. 

I réabhlóid thionsclaíoch na linne seo úsáidtear samhlacha digiteacha amhail néalríomhaireacht agus mórshonraí, agus ní fada uainn saol ina mbeidh idirlíon na rudaí nithiúla i réim agus earraí "cliste" in úsáid. Tá an intleacht shaorga ríthábhachtach sa phróiseas seo, toisc go bhféadfaí na rátaí fáis bliantúla a dhúbailt tríthi laistigh de 20 bliain.

"Ní mór don Eoraip céimeanna cinntitheacha a thabhairt i dtaca le teicneolaíocht dhigiteach agus rochtain na FBManna ar ardteicneolaíocht a éascú. Tá CESE ag iarraidh, dá bhrí sin, bearta agus beartais speisialta le gur féidir le FBManna an líonrú a dhéanann siad le cuideachtaí níos mó a mhéadú agus tá sé ag iarraidh dreasachtaí a thabhairt isteach freisin, a spreagfaidh comhar sa nuálaíocht idir cuideachtaí beaga agus cuideachtaí móra", arsa an tUasal Pezzini mar fhocal scoir. (sma)

Tá córas nua um chomhordú agus rialú na mbeartas eacnamaíoch de dhíth ar an Aontas, córas a bheidh bunaithe ar straitéis nua AE le haghaidh forbairt inbhuanaithe tar éis 2020, chun éifeachtúlacht gníomhaíochtaí agus inbhuanaitheacht torthaí a mhéadú, arsa CESE.

Sa chomhthéacs seo, i dtuairim a glacadh le déanaí, thug CESE le fios gur mór aige an togra ón gCoimisiún maidir le naisc níos láidre a chothú idir an Seimeastar Eorpach agus cistí comhtháthaithe faoin gcéad Chreat Airgeadais Ilbhliantúil eile. Tá CESE den tuairim gur féidir comhordú agus rialú bheartais eacnamaíocha an Aontais a fheabhsú go mór a bhuí leis na naisc sin.

Tá CESE ag moladh freisin gur cheart go mbeadh córas rialachais athnuaite AE ag brath níos mó ar an tuiscint atá ag an Aontas ar an tsochaí shibhialta agus ar an gcomhar eatarthu agus go ndéanfaí córas riaracháin phoiblí il-leibhéil a threisiú. Sa chomhthéacs sin, tá sé ag moladh ionad faisnéise do gheallsealbhóirí a bhunú in CESE.

I dtuairim eile ó CESE táthar ag iarraidh go mbeadh naisc níos dlúithe idir CEIS (Ciste Eorpach le haghaidh Infheistíochtaí Straitéiseacha), an clár a lean é – clár InvestEU – agus cláir infheistíochta Eorpacha nó náisiúnta eile. Moltar spriocanna infheistíochta soiléire a leagan amach, simpliú rialála agus tuilleadh treorach d’fhonn cothromaíocht níos mó a bhaint amach ar bhonn geografach agus earnála faoi chuimsiú an Phlean Infheistíochta don Eoraip.

Má leagann an tAontas Eorpach béim ar an seimeastar Eorpach mar an ghné is tábhachtaí i gcomhordú na mbeartas eacnamaíoch, d’fhéadfadh sé cuidiú le cur chun feidhme na moltaí seo. (jk)

I mí Iúil, chuir CESE tograí le haghaidh chlár oibre eacnamaíoch na tréimhse reachtaí nua i láthair agus mhol siad go mbeidís mar bhonn do straitéis eacnamaíoch AE nua.

Tá CESE den tuairim gur cheart a chur san áireamh sa bheartas eacnamaíoch agus sa rialachas eacnamaíoch don todhchaí, dúshláin gheopholaitiúla agus shochaíocha, amhail an moilliú eacnamaíoch ar fud an domhain, díospóidí trádála atá fós gan réiteach, Brexit, an t-athrú aeráide agus an t-athrú deimeagrafach, éagothromaíochtaí atá ag dul i méid agus an ceathrú réabhlóid thionsclaíoch, agus gur cheart go gcuirfidís leis an athléimneacht in aghaidh géarchéimeanna agus le hinbhuanaitheacht na samhla eacnamaíche. Má táthar chun na dúshláin sin a shárú, beidh gá le straitéis eacnamaíoch fhorleathan ina mbeidh cuspóirí beartais shoiléire agus creat rialachais eacnamaíoch níos comhleanúnaí.

Ní mór gach ceann de cheithre cholún AEA – an colún airgeadaíochta agus airgeadais, an colún eacnamaíoch, an colún sóisialta, agus an colún polaitiúil – a threisiú ar bhealach cothromaithe agus tá gá le plean dearfach chun go mbeidh forbairt dhearfach ar gheilleagar an Aontais Eorpaigh amach anseo. Tá CESE ag iarraidh, i measc rudaí eile, go gcruthófar acmhainn fhioscach ar leibhéal an limistéir euro, cothromú na mbeart – ó thaobh soláthair agus éilimh de – agus go mbeidh rannpháirtíocht fheabhsaithe ag Parlaimint na hEorpa, na comhpháirtithe sóisialta agus eagraíochtaí na sochaí sibhialta i gcinntí sóisialta agus eacnamaíocha ríthábhachtacha.

O thaobh cóineasú aníos de, tá CESE den tuairim gur cheart an t-oideachas agus an oiliúint, T&F (taighde agus forbairt) agus an nuálaíocht a chur chun cinn. Is féidir leis na bearta sin iomaíochas gheilleagar an Aontais a neartú, bunaithe ar a chumas a tháirgiúlacht agus a chaighdeáin mhaireachtála a mhéadú ar bhealach inbhuanaithe, agus é ag éirí neodrach ó thaobh na haeráide de ag an am céanna.

Tuilleadh eolais: ECO/492 & ECO/493 (jk)

Tá Coiste Eacnamaíoch agus Sóisialta na hEorpa (CESE) ag iarraidh ar an gCoimisiún machnamh níos doimhne a dhéanamh ar na roghanna beartais a chuideoidh le gáis cheaptha teasa a laghdú, rud a chuirfidh leis an gcomhrac in aghaidh an athraithe aeráide, agus a chuideoidh leis an iomaíochas a choinneáil chomh maith. Mura gcuirfidh an tAontas Eorpach roimhe na tionscail sin dá chuid, atá dian ar acmhainní agus ar fhuinneamh, a chosaint agus a chur chun cinn ar bhealach níos fearr, beidh an baol ann nach san Aontas ach i ngeilleagair nach bhfuil chomh glan céanna leis a bheidh poist na dtionscal sin lonnaithe feasta, agus nach n-éireoidh leis astaíochtaí gás ceaptha teasa a laghdú.

"Cé go bhfuil an Córas Trádála Astaíochtaí atá ann faoi láthair dírithe ar an infheistíocht a spreagadh, níl ag éirí leis mar ba chóir ós rud é nach féidir é a chur i bhfeidhm ar fud an domhain go fóill. I gcás gur san Eoraip amháin a chuirfear i bhfeidhm é, beidh an baol ann go dtarlóidh sceitheadh carbóin agus, dá dheasca sin, sceitheadh infheistíochta", a dúirt Aurel Laurenţiu Plosceanu i bhfoirm foláirimh, arb í rapóirtéir na tuairime ó CESE í ar Dhearcadh earnáil na tionsclaíochta maidir le beartais aeráide agus fuinnimh a thabhairt chun réitigh le chéile, a glacadh an 17 Iúil. "Ba cheart an infheistíocht a dhéanfaidh an tAontas Eorpach agus na Ballstáit amach anseo a dhíriú ar Thaighde, Forbairt agus Nuálaíocht agus ar theicneolaíochtaí ísealcharbóin nó atá saor ó charbón a úsáid sna tionscail sin atá dian ar acmhainní agus ar fhuinneamh agus le haghaidh tháirgeadh na cumhachta leictrí is gá. Ní mór díriú, ina theannta sin, ar oideachas agus oiliúint a chur ar an lucht saothair", arsa Enrico Gibellieri, comhrapóirtéir na tuairime.

Ós rud é gurb ionann na costais fuinnimh a ghabhann, cuir i gcás, le tionscail na cruach, an alúmanaim agus na gloine agus 25% de na costais iomlána, tá na costais a bhaineann le hastaíochtaí gás ceaptha teasa ard dá réir sin freisin. Nuair a bheidh an Córas Trádála Astaíochtaí i bhfeidhm, tiocfaidh táirgí Eorpacha chun bheith níos costasaí agus beidh an baol ann go gcuirfear táirgí níos saoire ar an margadh idirnáisiúnta in ionad táirgí Eorpacha. (sma)

Sa tuairim bhliantúil ó CESE ar Staid an Aontais Fuinnimh déantar an dul chun cinn atá déanta go dtí seo a mheas agus iarrtar ar an gCoimisiún Eorpach díriú níos mó ar ghnéithe sóisialta.

"Ní hann i gceart fós don Aontas Fuinnimh. B'fhéidir gurb ann dó a fhad a bhaineann le cinntí beartais an Aontais Eorpaigh ach is ar éigean atá aon bhaint aige le saol laethúil na saoránach go fóill." B’in é an dearcadh láidir a chuir Christophe Quarez in iúl ag an seisiún iomlánach i mí Iúil, agus é ag treisiú leis an argóint a leag sé amach sa tuairim uaidh – a ghlac an tionól – nár cuireadh an t-aistriú fuinnimh i bhfeidhm go fóill ar an láthair. Lean sé air á rá "go bhfuil cuid mhór fós le déanamh sna blianta amach romhainn d’ainneoin go bhfuil dúshraith an Aontais Fuinnimh leagtha síos ag lucht ceaptha beartas an Aontais anois."

Bhí tábhacht thar na bearta le hathrú a dhéanamh ar an gcaoi a ndéantar cinntí maidir leis an mbeartas fuinnimh ar leibhéal an Aontais agus ar an leibhéal náisiúnta araon, arsa an tUasal Quarez. Níor leor a thuilleadh "cinntí ón mbeagán", is éard a theastaíonn ná "cuidiú ó chách". "Tá an t-ionú ann anois, murab ionann is riamh, chun sin a dhéanamh", ar seisean, "ós rud é gur feasaí atá saoránaigh an Aontais Eorpaigh, go háirithe aos óg na hEorpa, anois faoi shaincheisteanna a bhaineann leis an aeráid."

Ba dhíol sásaimh don Choiste an Ceathrú Tuarascáil maidir le Staid an Aontais Fuinnimh a d’eisigh an Coimisiún Eorpach i mí Aibreáin 2019. Thacaigh an Coiste athuair le cuspóirí an Aontais Fuinnimh agus chuir sé béim ar an tábhacht a bhaineann le rannpháirtíocht shochaí na hEorpa, gach leibhéal di, agus leis an tsochaí a ghríosadh chun gnímh, d’fhonn úinéireacht iomlán a ghlacadh ina leith.

Ba cheart do na saoránaigh an t-aistriú fuinnimh a bhrú chun cinn agus níor cheart aon duine a fhágáil in áit na leathphingine. Ní mór impleachtaí sóisialta na n-athruithe seo a chur san áireamh agus comhshocrú sóisialta nua idir na páirtithe leasmhara uile a mholadh. Ba cheart an deis a bheith ag na saoránaigh tionchar a bheith acu ar na príomhchinntí polaitiúla ar fad a bhaineann leis an athrú aeráide, go háirithe ar leibhéal an Aontais, trí chomhphlé buan leis na saoránaigh. (mp)

Tá an teicneolaíocht blocshlabhra agus an teicneolaíocht mórleabhar dáilte, a bhain le criptea-airgeadraí ar dtús, fíor-ilfheidhmeach i ndáiríre agus is féidir úsáid fhóinteach a bhaint astu sa gheilleagar sóisialta. Os a choinne sin, tá sé tábhachtach iad a rialáil go cuí agus iad a úsáid i gcaoi is go rachaidh siad chun tairbhe do gach duine, ionas gur féidir le gach duine a bheith rannpháirteach, arsa CESE i dtuarascáil a d’eisigh sé ag seisiún iomlánach mhí Iúil.

Tá liosta fada d'fheidhmeanna féideartha tarraingthe suas ag CESE don teicneolaíocht blocshlabhra agus don teicneolaíocht mórleabhar dáilte, a d’fhéadfadh a bheith go mór chun leas fhiontair an gheilleagair shóisialta. Ar na húsáidí sin áirítear rianú a dhéanamh ar thabhartais agus ar thiomsú airgid, rialachas eagraíochtaí an gheilleagair shóisialta a fheabhsú, gníomhaíochtaí a fhíordheimhniú, scileanna a dheimhniú, cearta maoine intleachtúla agus cearta cóipchirt a dhéanamh níos soiléire agus níos daingne, córais shlána teilileighis agus ríomhchúraim a sholáthar agus táirgí talmhaíochta a dhéanamh iomlán inrianaithe agus inaitheanta.

Mar sin féin, fágann deiseanna ollmhóra na dteicneolaíochtaí digiteacha nua, mar aon leis an infheistíocht nach beag a bheidh ag teastáil, go mbeidh an teicneolaíocht blocshlabhra gan chosaint ar riosca comhchruinnithe sonraí agus go bhféadfaí amhantraíocht a dhéanamh ar líonraí teicneolaíocha, a dúirt CESE mar rabhadh.

Tá sé tábhachtach go mbeidh bearta poiblí ann chun tacú le forbairt na dteicneolaíochtaí seo ar bhealach rannpháirteach inrochtana agus is den riachtanas é go nglacfaidh an tsochaí shibhialta páirt inti.

Luíonn sé le ciall go mbeidh rialúchán AE ann toisc go n-úsáidtear slabhraí ar féidir iad a chruthú beag beann ar theorainneacha náisiúnta leis an teicneolaíocht seo. Fágann na hinfheistíochtaí móra atá ag teastáil go mbeidh gá le gníomhaíocht chomhordaithe, struchtúrtha ar an leibhéal Eorpach.

Léigh tuairim ó CESE dar teideal An teicneolaíocht blocshlabhra agus an teicneolaíocht mórleabhar dáilte mar bhonneagar den scoth don gheilleagar sóisialta (dm)