EESC info

Coiscfear ar 800 000 saoránach de chuid an Aontais, a bhfuil meabhairghalar orthu nó atá faoi mhíchumas intleachtúil, a vóta a chaitheamh de thoradh rialacha náisiúnta atá i bhfeidhm i 16 Bhallstát. Ina theannta sin, léirigh CESE i dtuarascáil dá chuid go gcuirfí na milliúin daoine atá faoi mhíchumas óna vóta a chaitheamh de thoradh bacainní teicniúla ag na stáisiúin vótála, óir ní dhéanann siad freastal cóir ar riachtanais speisialta na ndaoine sin.

Léiríodh sa tuarascáil faisnéise ó CESE dar teideal Fíorchearta vótála daoine faoi mhíchumas sna toghcháin do Pharlaimint na hEorpa, a eisíodh i mí an Mhárta, nár éirigh le hoiread agus aon Bhallstát amháin a chinntiú go mbeadh rochtain ag cách ar na toghcháin sin in ainneoin roinnt mhaith ionstraimí ceangailteacha dlí a bheith ann lena gcosnaítear cearta na ndaoine seo san Aontas.

"Cuirtear síos dúinn sa tuarascáil seo ar ghné den Eoraip nach inmholta, rud nach rabhamar ag súil leis ná baol air," arsa Krzysztof Pater, údar na tuarascála, a chuir sé i dtoll a chéile ar bhonn suirbhéanna a rinneadh in imeacht dhá bhliain i mBallstáit uile an Aontais, ach amháin an Ríocht Aontaithe.

I naoi gcinn de Bhallstáit, cailleann daoine a bhfuil meabhairghalar orthu a gcearta vótála go huathoibríoch nuair a cheaptar caomhnóir ina gcomhair. Faoin dlí náisiúnta i seacht gcinn de Bhallstáit, is iad na cúirteanna nó na boird leighis a dhéanann measúnú duine ar dhuine ar chumas daoine a bhfuil meabhairghalar orthu chun vóta a chaitheamh.

I gcás suas le 18 mBallstát, níl aon chaoi ag vótálaithe dalla chun a vóta a chaitheamh go neamhspleách. In ocht gcinn de Bhallstáit, ní féidir le haon duine nach bhfuil ar a chumas go fisiciúil teacht go dtí an stáisiún vótála a vóta a chaitheamh.

Mar sin féin, tá údar dóchais sa tuarascáil óir liostaítear inti 200 sampla de dhea-chleachtais agus réitigh dhearfacha a bailíodh ó na Ballstáit uile. (ll)

Rinne EESC Info agallamh le Krzysztof Pater, comhalta de Choiste Eacnamaíoch agus Sóisialta na hEorpa faoina thuarascáil "Fíorchearta vótála daoine faoi mhíchumas sna toghcháin do Pharlaimint na hEorpa"

EESC Info: Cad a spreag tú chun dul i mbun oibre ar an tuarascáil seo?

Krzysztof Pater: Ina gcuid doiciméad clársceidealaithe, dearbhuithe polaitiúla agus tionscnamh reachtach, is minic a chuireann na hinstitiúidí Eorpacha in iúl gurb ábhar imní dóibh cearta bunúsacha na ngrúpaí sóisialta éagsúla san Aontas Eorpach. Táimid den tuairim gur féidir leis na réitigh dhlíthiúla atá ann cheana san Aontas Eorpach a bheith ina samhail le haghaidh réigiúin eile ar fud an domhain. Tá roinnt mhaith polaiteoirí bogásach faoin gceist seo agus creideann siad go bhfuil ár gcóras daonlathais beagnach foirfe.

Ní aontaím leis an dearcadh seo. I mo thuairim, tá roinnt mhaith oibre le déanamh fós sa réimse seo. Ar cheann de na chéad chéimeanna, ba cheart a chinntiú go mbeadh fíorchearta vótála gníomhacha agus deis vótála ag gach duine atá faoi mhíchumas. Táim suite de nach n-éireoidh le sochaí a ghlacann le staid nach féidir le duine faoi mhíchumas vótáil inti i ngeall ar na rialacháin atá i bhfeidhm, nach n-éireoidh léi riamh glacadh go hiomlán le cearta grúpaí eile a ndéantar idirdhealú orthu. Agus an tuarascáil seo á hullmhú agam, theastaigh uaim, thar gach rud eile, aird an phobail a dhíriú ar na bacainní atá ann maidir leis an gceart vótála agus aird a dhíriú ar scála na mbacainní sin. Ag an am céanna, áfach, theastaigh uaim samplaí dearfacha a thabhairt ó roinnt tíortha lena dtaispeánfaí an cur chuige atá acu maidir le cearta vótála daoine faoi mhíchumas.

Cad leis a bhfuil tú ag súil tríd an tuarascáil seo a ullmhú? An bhfuil aon aiseolas faighte agat?

Tá fírinne shearbh an scéil léirithe sa tuarascáil seo. Tá roinnt mhaith daoine a mheasann gur deimhniú í an tuarascáil ar cheist a bhí i mbéal an phobail le blianta beaga anuas. Ag an am céanna, áfach, tá bailiúchán ollmhór de shamplaí dearfacha inti. I gcás eagraíochtaí a oibríonn sna Ballstáit ar son chearta na ndaoine faoi mhíchumas nó, ar leibhéal níos leithne, ar son cearta daonna, is lámhleabhar treoracha uathúil í ina dtaispeántar an treo ina bhféadfadh forbairtí dul i mBallstáit shonracha. Is sampla eile de shárú constaicí atá ann cheana é an cinneadh ó Chúirt Bhunreachtúil na Gearmáine lena gcumasaítear daoine faoi mhíchumais intleachtúla vótáil sna Toghcháin do Pharlaimint na hEorpa in 2019, cinneadh a rinneadh mí tar éis glacadh thuarascáil an Choiste.

Seoladh an tuarascáil chuig roinnt mhaith institiúidí atá freagrach as reáchtáil toghchán sna Ballstáit. A bhuí léi ba cheart dóibh a bheith ábalta, a oiread is atá socruithe oiriúnaithe do riachtanais daoine faoi mhíchumas, a chur i gcomparáid le socruithe atá déanta i dtíortha eile agus tabhairt faoi thionscnaimh reachtacha fíor-riachtanacha dá thoradh sin.

An bhfágann sé sin go mbeidh tromlach an lucht vótála faoi mhíchumas in ann vótáil sna chéad toghcháin eile do Pharlaimint na hEorpa?

Tá dhá shlí ann chun na coinníollacha atá ann cheana a athrú. An chéad slí ná na rialacha lena rialaítear na toghcháin do Pharlaimint na hEorpa a athrú. Ós rud é go gceanglaíonn an tAontas Eorpach go bhfuil ceart vótála sna toghcháin Eorpacha ag saoránaigh a chónaíonn i mBallstát eile, is féidir freisin, reachtaíocht a ghlacadh le ceart vótála a ráthú do gach duine faoi mhíchumas, ag tosú le toghcháin 2024. Má ghlactar na bearta sin, is féidir linn a bheith ag súil le hathruithe comhchosúla i dtoghcháin náisiúnta agus áitiúla, athruithe a chuirfidh na Ballstáit chun feidhme go neamhspleách. Is é an dara slí, atá níos moille, ná, athruithe reachtacha a dhéanamh ar leibhéal Ballstáit. Ar an gcaoi seo, is féidir freisin feabhas suntasach a chur ar fheidhmiú na gceart vótála ag daoine faoi mhíchumas ag na chéad toghcháin eile do Parlaimint na hEorpa.

Déanfaidh an tUachtarán Jahier cur síos ar an Treoirphlean in Sibiu an 9 Bealtaine

Caithfidh an tAontas Eorpach a bheith níos gaire dá shaoránaigh agus a bheith ar thús cadhnaíochta ó thaobh forbairt inbhuanaithe, sin a d’áitigh Coiste Eacnamaíoch agus Sóisialta na hEorpa i dtuairim dhúshlánach maidir le todhchaí an Aontais Eorpaigh. D’iarr an Coiste straitéis AE nua a leagan amach ina nglacfaí cur chuige iomlánaíoch agus trasearnála, a bheadh dírithe ar riachtanais mhuintir na hEorpa agus ar an inbuanaitheacht, agus thíolaic sé moltaí beartais a chuimsíonn aon tosaíocht déag sa tuairim sin. Ní foláir buiséad AE uaillmhianach a bheith mar chúltaca le haghaidh straitéis uileghabhálach nua chun Clár Oibre 2030 a chur chun feidhme.

Baineann moltaí beartais CESE le haon tosaíocht déag, lena n-áirítear tosaíocht rialachais. Faoin tosaíocht seo, tá sé molta ag CESE go mbeadh gach beartas inmheánach agus seachtrach de chuid an Aontais comhleanúnach agus i gcomhréir leis na Spriocanna Forbartha Inbhuanaithe, agus prionsabail na héifeachtúlachta agus na comhréireachta á gcur san áireamh.

Faoin tosaíocht "Eoraip an phobail", mhol CESE díriú ar bhearta chun rannpháirtíocht shibhialta i gceapadh beartas an Aontais a fheabhsú tuilleadh, le gurbh fhéidir tacaíocht na ndaoine do lánpháirtiú na hEorpa a chothú an athuair agus le go mbeadh muinín acu as an bpróiseas.

Ba cheart cumarsáid fheabhsaithe maidir le beartais an Aontais a bheith i measc thosaíochtaí na straitéise nua. Dá scaipfí faisnéis shubstaintiúil, inchreidte agus bhríomhar, d’fheádfadh sé cuidiú, as measc rudaí eile, le múscailt feasachta faoina bhfuil bainte amach ag an Aontas Eorpach agus faoi bhuntáiste na comhghníomhaíochta.

De réir na moltaí beartais faoi thosaíocht na forbartha inbhuanaithe, ba cheart gealltanais idirnáisiúnta an Aontais maidir leis an aeráid, bithéagsúlacht agus uisce a chomhlíonadh leis an straitéis nua. Ciallaíonn sé sin nach mór a chinntiú ar a laghad leis an straitéis go gcuirfear Comhaontú Pháras chun feidhme go hiomlán agus láithreach bonn agus go gcuirfí dlús faoin aistriú cothrom inbhuanaithe go soláthar fuinnimh inbhuanaithe d’ardleibhéal.

Ní foláir gné shóisialta láidir a áireamh i measc an aon tosaíocht déag, rud a chuirfeadh le cóineasú laistigh den Aontas, cuir i gcás tríd an infheistíocht i gcórais oideachais a fheabhsú agus a mhéadú ar fud na hearnála. Tá gá le cuspóir eile, mar atá, cur chuige coiteann, cuimsitheach agus cothromaithe a fhorbairt i dtaca le beartas imirce.

Ar deireadh, ní mór d’earnáil ghnó na hEorpa a bheith ina gníomhaí domhanda inbhuanaithe níos láidre. Bheadh gnólachtaí inbhuanaithe ábalta déileáil go maith leis an gclaochlú digiteach agus leanfaidís de bheith mar spreagadh don nuálaíocht agus don chruthaitheacht. Baineann geilleagar inbhuanaithe le saorthrádáil chothrom, rialacha sonracha maidir le hearraí agus seirbhísí poiblí agus cánachas cothrom.

Le linn na comhdhála Todhchaí na hEorpa, déanfaidh Uachtarán CESE, Luca Jahier, cur síos ar threoirphlean CESE maidir le Todhchaí na hEorpa. Tuiscintí ar Fhorbairtí Comhaimseartha a thionólfar in Sibiu an tráth céanna agus an cruinniú mullaigh maidir le Todhchaí na hEorpa an 9 Bealtaine.

Tá achoimre ar threoirphlean CESE maidir le Todhchaí na hEorpa le feiceáil ag: europa.eu/!wY47tn. (jk)

Chuir Coiste Eacnamaíoch agus Sóisialta na hEorpa (CESE) fáilte roimh Sebastian Reimer agus Michael Laubsch, beirt de na tionscnóirí a chuir tús le "Stop Extremism", Tionscnamh Eorpach ó na Saoránaigh, trína mbailíodh tuairim is 1.6 milliún síniú, atá le bailíochtú ag na Ballstáit.

Ina mbarúlacha tosaigh, d’athdheimhnigh Uachtarán CESE, Luca Jahier gealltanas leanúnach CESE – rud a tháinig chun cinn ar bealach an-phraiticiúil ag lá bliantúil ECI (féach an t-alt thíos) – maidir le feabhas a chur ar ionstraim an Tionscnaimh Eorpaigh ó na Saoránaigh, rud a fhágfaidh go mbeidh sé níos éasca le húsáid agus a chinnteoidh go mbeidh fíorthionchar aici. Bhí toradh ar na hiarrachtaí seo ar deireadh.

Dúirt an tUasal Laubsch gur theastaigh ó thionscnóirí an Tionscnaimh ó na Saoránaigh Stop Extremism, daoine a mhúscailt as a "dtuirse den Aontas Eorpach” agus polaitíocht an Aontais, institiúidí an Aontais agus muintir na hEorpa a thabhairt le chéile chun an comhrac in aghaidh an antoisceachais a phlé. "Tá an tsochaí á cur de dhroim seoil leis an bhfuath le tamall beag anuas. Tá gá le tacaíocht as an nua dár gcearta bunúsacha, go háirithe ón bpobal."

"Ní leor cur in aghaidh an antoisceachais, ní mór dúinn é a chosc. Is sna scoileanna a chuirtear tús leis an mbeart sin, trí dhaoine óga a chumasú chun bheith athléimneach nuair a bhíonn orthu dul i ngleic le dioscúrsa antoisceach, go háirithe ar na hardáin shóisialta ar líne. Ní mór dúinn aghaidh a thabhairt freisin ar na fadhbanna shocheacnamaíocha as a n-eascraíonn an t-eisiaimh agus an coimhthíos", arsa Oliver Röpke, Uachtarán Ghrúpa na nOibrithe i gCoiste Eacnamaíoch agus Sóisialta na hEorpa.

Ghlac Gonçalo Lobo Xavier (Grúpa na bhFostóirí) seasamh comhchosúil: "Ní mór dúinn an tsamhail Eorpach a chosaint. Is ceart doshannta í an tsaoirse, ceart a nglacaimid go fonnmhar leis. Ní hé amháin forfheidhmiú dlíthe atá i gceist, ní mór dúinn freisin roghanna agus saoirse gach duine a urramú laistigh de chreat ár gceart bunúsach agus ár luachanna".

Ar deireadh, dúirt Cillian Lohan (Grúpa Éagsúlacht Eoraip) "Is den tábhacht é féachaint ar na cúiseanna atá taobh thiar den antoisceachas agus de theacht chun cinn an phobalachais san Aontas Eorpach. Ní hionann ar chor ar bith fírinne an tsaoil mar a théann sí i bhfeidhm ar dhaoine, agus dearcadh an dream atá i gcumhacht, rud a fhágann go mothaíonn na saoránaigh scoite amach uathusan atá i gcumhacht, agus ó rialtais. (sma)

Ina sheisiún iomlánach i mí an Mhárta, ghlac CESE tuairim inar leagadh amach straitéis dhomhanda um chothú na síochána faoi thionchar an Aontais Eorpaigh lena n-áirítear Slí an Choilm Bháin, conair shíochána ó Thuaisceart Éireann go dtí an Niocóis, chun an t-idirphlé, an t-athmhuintearas agus cosc coinbhleachtaí a chur chun cinn.

Is mithid anois don Aontas Eorpach, an tionscadal síochána is mó sa nua-stair, a bheith i gceannas ar chothú na síochána san Eoraip agus ar fud an domhain. Seo príomhtheachtaireacht na tuairime féintionscnaimh Slí an Choilm Bháin – Togra le haghaidh straitéis um chothú na síochána faoi thionchar an Aontais a ghlac CESE. Mar a dhearbhaigh Jane Morrice, rapóirtéir na tuairime, "tá sé d’oibleagáid mhorálta ar an Aontas Eorpach, thar aon leasanna geopholaitiúla nó eacnamaíocha, bealaí a aimsiú chun beatha íospartach neamhurchóideach atá sáinnithe i gcoinbhleachtaí a chosaint, go háirithe leanaí"

D’áitigh CESE ar an Aontas Eorpach Straitéis nua um Chothú na Síochána a chruthú agus a mhaoiniú ina n-áireofaí Slí an Choilm Bháin mar phríomhghné den tionscadal, conair shíochána a shíneodh thar 5 000 míle trasna na hEorpa, ó Thuaisceart Éireann go dtí an Niocóis, príomhchathair na Cipire. Leanfadh an bealach seo lorg coise Cholumbáin, an t-oilithreach Éireannach ón séú haois a thaistil ó Éirinn go dtí an Iodáil agus a ndearna duine de bhunaitheoirí an Aontais, Robert Schuman, cur síos air mar "naomhphátrún gach duine a fhéachann le hEoraip aontaithe a thógáil".

Áirítear leis an tionscnamh freisin Ionaid Eorpacha um Shíocháin agus Athmhuintearas a bhunú i dTuaisceart Éireann agus sa Niocóis, agus moil foghlama a nascfaidh láithreáin straitéiseacha feadh Shlí an Choilm Bháin, chomh maith le haitheantas ón Aontas Eorpach do chomhartha an Choilm Bháin mar "thrádmharc" do thionscadail síochána uile an Aontais. (dgf)

Ag a sheisiún iomlánach i mí an Mhárta, ghlac Coiste Eacnamaíoch agus Sóisialta na hEorpa (CESE) tuairim maidir leis an Teachtaireacht Chomhpháirteach An Eoraip agus an Áise a nascadh – Bunchlocha le haghaidh Straitéis AE, arna heisiúint ag an gCoimisiún Eorpach agus Ardionadaí an Aontais i Meán Fómhair 2018. Measann CESE gur cailleadh deis iontach leis an teachtaireacht sin, go raibh mórán bearnaí suntasacha straitéise inti, gur bheag uaillmhian a bhí inti agus nár léiríodh aon léargas grinn i dtaca le forbairt caidrimh agus nascachta idir an tAontas agus an Áise  

Creideann CESE nár pléadh príomhcheisteanna eacnamaíocha agus geopholaitiúla inti agus nár tugadh mórán aitheantais d’éagsúlacht leathan nó castacht na hÁise. Thug sé dá aire agus "is ábhar mór imní dó é" 17 réimse ar a laghad nach ndearnadh aon tagairt nó díreach miontagairt dóibh, réimsí ina ndearnadh forbairtí ríthábhachtacha a dhéanann difear don Aontas Eorpach agus don Áise araon.

Ar na bearnaí sin, tugtar dá aire sa tuairim nach bhfuil tagairt dá laghad don tionscnamh Síneach "Crios Amháin agus Bóthar Amháin" (BRI), straitéis forbartha a ghlac rialtas na Síne, rud a fheictear mar chomhartha soiléir gur mhian leis an tSín ról níos mó a imirt ar leibhéal domhanda agus a thionchar a mhéadú. Tá CESE den tuairim nach mór don Aontas Eorpach freagairt fhoirmiúil a thabhairt do thionscnamh BRI.

Is oth le CESE freisin nach bhfuil aon tagairt d’aon idirphlé leis an tsochaí shibhialta atá ann cheana idir an tAontas agus an Áise sa Teachtaireacht, go háirithe comhlachtaí monatóireachta suaitheantais na sochaí sibhialta a cuireadh ar bun faoi na comhaontuithe trádála suntasacha seo. Mar a dúirt Jonathan Peel, an rapóirtéir ar an tuairim, ní dhéanann an toise céanna gach duine, agus ní féidir leis an Áise a bheith ina macasamhail den Eoraip riamh. Deir an rapóirtéir freisin, áfach, "nach mór don Aontas Eorpach níos mó a dhéanamh chun dul i gcionn ar mhuintir na hÁise" agus gur cúis díomá dó gur bheag a bhí le rá faoi chearta daonna, an smacht reachta, dea-rialachas agus daonlathú sa Teachtaireacht. (dgf) 

Is éard is suaiteoirí inchríneacha ann substaintí ar ábhar imní ar leith iad, agus dá bhrí sin tá gá le reachtaíocht AE atá comhleanúnach agus comhchuibhithe chun dul i ngleic leis na bealaí ina n-úsáidtear iad. .D’éiligh CESE straitéis chomhsheasmhach agus iomlánaíoch, a bheadh bunaithe ar eolas eolaíoch agus plean gníomhaíochta a mbeadh spriocanna agus spriocdhátaí soiléire san áireamh ann.

Measann CESE go bhfuil sé ríthábhachtach seiceáil oiriúnachta iomlán a dhéanamh ar an reachtaíocht reatha, lena n-áirítear an tionchar sóisialta agus eacnamaíoch atá aici, d’fhonn an staid reatha iarbhír a shuíomh.

"Tá an reachtaíocht ilroinnte agus uaireanta bíonn sí neamhleanúnach i ngeall ar easpa comhordúcháin. Ní mór dúinn creat reachtach a chruthú lenar féidir linn déileáil le húsáid suaiteoirí inchríneacha ar bhealach comhleanúnach, comhsheasmhach agus eolaíoch. Ní mór úsáid suaiteoirí inchríneacha a bheith bunaithe ar phrionsabal an réamhchúraim agus ar an gcaoi sin a bheith i gcomhréir le forálacha éifeachtacha maidir le bithicídí agus lotnaicídí, a glacadh cheana, arsa Brian Curtis, rapóirtéir ar an tuairim ó CESE I dtreo creat cuimsitheach Aontais maidir le suaiteoirí inchríneacha a glacadh i mí an Mhárta. Ina theannta sin, ba cheart straitéis fhadtéarmach a threisiú le plean gníomhaíochta réalaíoch d’fhonn spriocanna agus spriocdhátaí a shocrú.

Mhol an Coiste sásra airgeadais a bhunú chun tacú leis na fiontair agus na hoibrithe araon le linn na hidirthréimhse.

D’fhéadfadh an tsochaí shibhialta ról ríthábhachtach a imirt i bhforbairt feachtas múscailte feasachta náisiúnta nó tacú leo trí faisnéis a scaipeadh faoi bhearta an Aontais chun sláinte mhuintir na hEorpa a chosaint, mar aon le dreasachtaí oideachais agus oiliúna. (sma)

Thacaigh CESE leis an bplean gníomhaíochta maidir le bréagaisnéis a chuir an Coimisiún agus Ardionadaí an Aontais Eorpaigh i láthair. I dtuairim ó Ulrich Samm agus Giulia Barbucci a glacadh ag an seisiún iomlánach i mí an Mhárta, léirigh CESE gur féidir bréagaisnéis a shainmhíniú mar fhaisnéis a léirítear ar bhonn infhíoraithe a bheith bréagach nó míthreorach agus a cheaptar, a chuirtear i láthair agus a scaiptear le haghaidh gnóthachan eacnamaíoch nó chun dallamullóg a chur d’aon ghnó ar an bpobal, rud a dhéanfaidh dochar dá réir sin don phobal agus a chuirfidh an daonlathas i mbaol.

"Is cuid de chogadh hibrideach a bhfuil aidhm shoiléir pholaitiúil aige anois é scaipeadh na bréagaisnéise," arsa . "Sa bhreis ar an mbréagaisnéis, tá bagairtí eile ann do shaoirsí na ndaoine, do chearta bunúsacha agus do chearta mionlach, mar shampla faisnéis ró-roghnaitheach, clúmhilleadh, reacaireacht uafáis agus gríosú chun fuatha."

I gcás na bréagaisnéise is éifeachtaí bíonn ruainne den fhírinne inti i gcónaí agus dá bhrí sin is fíordheacair cur ina coinne go héifeachtach. "Is éard atá uainn mar sin ná go ndéanfadh na geallsealbhóirí go léir iliomad cineálacha gníomhaíochta chun faisnéis ardchaighdeáin a sholáthar agus feasacht a mhúscailt. Is ar an ábhar sin atáimid ag tacú leis an tionscnamh a bhfuil mar aidhm aige gníomhaíocht chomhordaithe a spreagadh d’fhonn an tAontas Eorpach, a chuid institiúidí agus a chuid saoránach a chosaint ar an mbréagaisnéis," a dúirt Giulia Barbucci, Uasal. "Is gá dúinn gníomhú anois toisc nach fada uainn mí na Bealtaine tráth a reáchtálfar na toghcháin Eorpaigh."

Tá rannpháirtíocht ghníomhach eagraíochtaí na sochaí sibhialta ríthábhachtach má táthar chun freagairt chuimsitheach ar an mbréagaisnéis a chur ar fáil. Tá CESE i mbun tacaíocht a thabhairt go réamhghníomhach d’iarrachtaí comhpháirteacha chun dul i ngleic leis an mbréagaisnéis agus déanann sé a chion féin trí na tuairimí a eisíonn sé agus trí éisteachtaí, imeachtaí áitiúla agus roinnt gníomhaíochtaí eile a eagrú. (mp)

Tá straitéis nua, uaillmhianach agus soiléir maidir le todhchaí an Aontais Eorpaigh ag teastáil go práinneach ón Aontas, straitéis a bheadh i gcomhréir le Clár Oibre 2030 na Náisiún Aontaithe, leis na Spriocanna Forbartha Inbhuanaithe agus le gealltanais idirnáisiúnta eile. Ní mór beartas comhtháthaithe a bheith ina dhlúthchuid di. Thabharfadh an straitéis nua seo fís le haghaidh an bheartais comhtháthaithe féin amach anseo. Sna forálacha nua maidir le beartas comhtháthaithe tar éis 2020 ní mór foráil a dhéanamh maidir le hacmhainní leordhóthanacha, agus a ráthú go mbeidh feabhas ar éifeachtúlacht agus infheictheacht beartas, sin a d’áitigh CESE i dtústuairim maidir le todhchaí an bheartais comhtháthaithe.

Cé go moltar sa tuairim ó CESE nach ligfear i ndearmad na dúshláin reatha shonracha, leagtar béim ar a thábhachtaí atá sé beartas comhtháthaithe a fhorbairt don tréimhse 2021-2027. Ba cheart beartas a sheasfadh an aimsir a bheith oscailte do gach réigiún agus na huirlisí a sholáthar chun déileáil le dúshláin amach anseo amhail glacadh le teicneolaíochtaí nua, leibhéil arda iomaíochais a bhaint amach agus an t-aistriú go forbairt inbhuanaithe a bhainistiú agus poist mhaithe á gcruthú ag an am céanna.

Ní ghlacfaidh CESE le gearradh buiséid mar atá molta ag an gCoimisiún, toisc gurb é an beartas comhtháthaithe ceann de na clocha coirnéil chun an tAontas a thabhairt níos gaire dá shaoránaigh agus chun difríochtaí idir réigiúin an Aontais agus éagothromaíochtaí ar fud na sochaí a laghdú. I bhfianaise an mhéid sin agus na ndúshlán nua atá ag teacht chun cinn, ba cheart an buiséad a choimeád ar a laghad ar leibhéal na tréimhse roimh ré.

Leagtar béim sa tuairim freisin ar a thábhachtaí is atá sé tionchar an bheartais comhtháthaithe a chur in iúl ar bhealach níos éifeachtaí. Dá réir sin ní mór uasghrádú suntasach a dhéanamh ar na hoibleagáidí poiblíochta reatha le haghaidh tionscadail mhaoinithe ionas go mbeidh breisluach lánpháirtiú na hEorpa i gcoitinne, agus an beartas comhtháthaithe go háirithe, níos infheicthe don phobal.

Má bhíonn cur chuige críochach láidir ann, níos mó comhleanúnachais idir an tAontas agus straitéisí náisiúnta, simpliú méadaithe agus rannpháirtíocht mhéadaithe na sochaí sibhialta, is é dearcadh CESE, go gcuideoidh siad uile le héifeachtúlacht beartais a fheabhsú. (jk)

Le linn an dara lá de Chomhdháil Gheallsealbhóirí an Gheilleagair Chiorclaigh, a d’eagraigh Coiste Eacnamaíoch agus Sóisialta na hEorpa an 7 Márta 2019, labhair breis agus 350 geallsealbhóir ón ngeilleagar ciorclach fud fad na hEorpa faoina gcuid scéalta ratha agus faoi na dúshláin a bhí rompu.

D’iarr Cillian Lohan, comhalta de chuid CESE, ar na rannpháirtithe a machnamh a dhéanamh faoi cheist ríthábhachtach d’fhorbairt an gheilleagair chiorclaigh, mar atá: Cé a bhrúfaidh an t-athrú ar aghaidh? Ar cheart do na tomhaltóirí, do lucht an ghnó nó do lucht ceaptha beartas é a bhrú ar aghaidh? Cé acu díobh sin ba cheart tabhairt faoi ar dtús?

"Is é mo thuairim nach ceart é a fhágáil faoin tomhaltóir an chéad chéim a thabhairt," arsa Lohan, agus chuir sé i dtábhacht freisin "go dtiocfadh ann do thimpeallacht ina mbeadh roghanna inacmhainne inrochtana ag tomhaltóirí a ligfeadh dóibh roghanna ciorclacha inbhuanaithe a dhéanamh dá ndéanfaí athruithe ar chleachtais ghnó agus ar bheartais agus dá gcuirfí bonneagar ar fáil."

D’iarr Ladeja Godina Košir, cathaoirleach Ardán Eorpach Gheallsealbhóirí an Gheilleagair Chiorclaigh, ar na rannpháirtithe a mhór a dhéanamh den Ardán mar líonra tacaíochta chun na fadhbanna a bhíonn acu lena dtionscadail maidir leis an ngeilleagar ciorclach a réiteach. Bhí a teachtaireacht soiléir: "Is éard atá uainn ná feidhmiú mar ."

Leag Joanna Drake, Leas-Ardstiúrthóir Ginearálta, Ard-Stiúrthóireacht an Chomhshaoil, béim ar an ról ríthábhachtach a bhí ag geallsealbhóirí i dtionscnaimh an Choimisiúin Eorpaigh maidir leis an ngeilleagar ciorclach. Seo mar a labhair sí: "éiríonn leis na tionscnaimh sin go pointe áirithe toisc go mbaintear feidhm as cur chuige ón mbun aníos trína iarraidh ar gheallsealbhóirí tacaíocht a thabhairt agus a bheith rannpháirteach iontu bíodh sin i bhfoirm comhair, ardán, malartuithe dea-chleachtas nó cineálacha cur chuige atá dírithe ar ghnólachtaí deonacha."

Rinneadh an plé go léir le linn ocht gcinn de cheardlanna idirghníomhacha a bhí dírithe ar na hábhair seo a leanas:

• Straitéisí ciorclacha san Eoraip a mhapú
• Léargas ó thomhaltóirí maidir leis an ngeilleagar ciorclach
• Gné shóisialta an gheilleagair chiorclaigh
• Cathracha ciorclacha atá tiomanta don mhaolú ar an athrú aeráide
• Soláthar poiblí ciorclach
• Uirlisí chun an t-aistriú ciorclach a thomhas
• Nuálaíocht chruthaitheach le haghaidh geilleagar ciorclach
• Sráidbhailte bithchiorclacha atá tiomanta d’fhorbairt na tuaithe

Cuireadh clabhsúr ar an lá le seoladh an taispeántais Kindred Spirits.

Ina theannta sin ba spreagadh do rannpháirtithe an chaint neamhghnách a thug Rieta Aliredjo, cathaoirleach na Fondúireachta Stars Are Circular, inar luaigh sí moltaí faoin gcaoi is fearr chun déileáil lena bhfuil amach romhainn i dtaca leis an ngeilleagar ciorclach. Cén teachtaireacht a bhí aici? Bí fiosrach, eolach, flaithiúil agus spraíúil!

Gheofar tuarascálacha ina bhfuil torthaí gach ceardlainne anseo. (dm)

An bhfuil beartas tomhaltóirí an Aontais dírithe ar an aos óg? Conas is féidir linn tacú leo roghanna inbhuanaithe a dhéanamh? Conas is féidir beartais tomhaltóirí a cheapadh atá bunaithe ar threochtaí nua? Díríodh ar na ceisteanna sin Ie linn díospóireacht bhríomhar a tionóladh sa Bhruiséil an 27 Márta. Bhí lán seomra de dhaltaí agus ionadaithe ó chomhlachais tomhaltóirí, ó earnáil an ghnó agus ó earnáil na teicneolaíochta faisnéise i láthair chun aghaidh a thabhairt ar shaincheisteanna amhail an tsoghluaisteacht a fheabhsú, an dramhaíl bia a sheachaint, an mearfhaisean a dhéanamh inbhuanaithe agus tuiscint a fháil ar ról na dteicneolaíochtaí faisnéise agus cumarsáide chun athruithe a spreagadh.

Ba é príomhchuspóir na hócáide aghaidh a thabhairt ar na dúshláin nua a bhaineann le hinbhuanaitheacht agus teicneolaíochtaí faisnéise agus cumarsáide (TFCanna), arb iad seo na tionchair is mó ar dhaoine óga sa lá atá inniu ann.

Ba í Isabel Caño, Leas-Uachtarán de chuid CESE, a chuir tús le Lá Eorpach na dTomhaltóirí (an 21ú ceann). Mhol sí an t-aos óg a shlógadh go fada fairsing ar son na haeráide agus leag sí béim ar an dlúthnasc atá idir an tomhaltas agus an comhshaol agus ar an tábhacht atá le beartas tomhaltóirí an Aontais a bheith ag teacht le huaillmhianta aeráide an aosa óig.

"Caithfidh sibh a chinntiú go méadófar ar an tionchar a imríonn sibh ar chúrsaí polaitíochta. Ba cheart ról lárnach a bheith ag an aos óg i ndréachtú bheartas reatha an Aontais agus i ndréachtú a bheartais amach anseo. Is éard is aidhm dúinn ar Lá Eorpach na dTomhaltóirí ná a chur in iúl go bhfuil sé ríthábhachtach go gcloisfear bhur nguth sa Bhruiséil," arsa an Leas-Uachtarán.

Mar leanas a labhair Youna Marette, bean óg seacht mbliana déag d'aois agus duine de chinn feadhna na n-agóidí sa Bheilg ar son na haeráide, agus í ag caint ar a glúin féin: "Is tomhaltóirí iad na daoine óga. Tá siad eolach ar na saincheisteanna móra atá i dtreis. Is minic a deirtear nach amhlaidh atá ach ní fíor sin," ar sise. "An córas as ar fáisceadh mé, is córas é atá bunaithe ar an bhfás eacnamaíoch síoraí agus ar an mbrabús. Cén chaoi ar féidir linn an córas seo a fhágáil inár ndiaidh gan sinn féin a fhágáil in áit na leathphingine? Dar liom go bhfuil freagra díreach ar an gceist sin: ní foláir an córas a athrú ó bhonn agus tá an próiseas sin tosaithe cheana féin."

Téama a tháinig i gceist i gcaitheamh an lae ar fad ná na difríochtaí idir patrúin tomhaltais na n-óg agus na nglún atá níos sine. Léiríodh i staidéir maidir le hiompraíocht tomhaltóirí a rinne an Coimisiún agus CRÉDOC le déanaí na treochtaí agus dúshláin nua atá romhainn. Cé go bhfuil glúin na mílaoise níos eolaí ar shaincheisteanna a bhaineann leis an aeráid ná mar atá na glúine níos sine, a bhféachann cuid mhaith díobh sin ar an inbhuanaitheacht mar a bheadh rud nach mbaineann leo, tugann glúin na mílaoise tosaíocht fós féin don phraghas agus don éascaíocht seachas don inbhuanaitheacht. Is cosúil, áfach, gurb í an chumhacht theoranta ceannaigh atá acu is cúis leis sin.

Léiríodh i staidéar eile a rinne CEPS go gcaitheann glúin na mílaoise a gcuid ioncaim ar dhóigh dhifriúil. Is mír mhór chaiteachais í an chumarsáid don aos óg agus féachann siad uirthi mar a bheadh bunriachtanas faoi mar is bunriachtanas acu an bia agus an tithíocht. Tá fón cliste ag 100% den aos óg, nach mór, rud a fhágann a rian ar a nósanna tomhaltais, agus, ina theannta sin, is ar líne a fhaigheann siad cuid mhór dá gceannacháin.

Chun tuiscint níos fearr a fháil ar na dúshláin nua atá romhainn i dtaca le beartais tomhaltóirí, rinneadh scrúdú i dtrí cheardlann chomhthreomhara ar thrí cinn de na tionscail is tábhachtaí: bia, soghluaisteacht agus éadaí.

Le linn díospóireacht faoi thionchar na meán sóisialta, d’aontaigh na cainteoirí go raibh ról larnach ag na meáin shóisialta i saol an aosa óig agus gur dócha gur mar sin a bheadh feasta. Dar leo go raibh sé ríthábhachtach, dá bharr sin, a thuiscint cé acu ba cheart nó nár cheart rialáil a dhéanamh ar na meáin shóisialta agus conas an rialáil sin a dhéanamh. Tá buntáistí agus míbhuntáistí ag roinnt le teicneolaíochtaí faisnéise agus cumarsáide: ar thaobh amháin, uirlis chumhachtach ar son an daonlathais atá iontu ar féidir leo na milliúin daoine a thabhairt le chéile ach ar an taobh eile is bealach iad chun sonraí príobháideacha a fháil agus chun daoine a spreagadh le breis tomhaltais a dhéanamh trí fhógraíocht spriocdhírithe.

Tá tuarascáil ina leagtar amach príomhthorthaí an lae le fáil anseo. (dm/ss)

Ar na réamhriachtanais chun acmhainneacht an euro a fhorbairt go hiomlán, tá beartais mhaicreacnamaíocha fhónta san Aontas, doimhniú an Aontais Eacnamaíoch agus Airgeadaíochta agus comhlánú an Aontais Baincéireachta agus Aontas na Margaí Caipitil (CMU). Is éard atá de dhíth, thar gach rud eile, áfach, ná muinín fhrithpháirteach idir na Ballstáit mar aon le comhfhís maidir le todhchaí gheilleagar an Aontais Eorpaigh. Seo iad na príomhchonclúidí ó éisteacht maidir le Ról idirnáisiúnta an euro a neartú, a reáchtáil Coiste Eacnamaíoch agus Sóisialta na hEorpa le déanaí.

Dá mbeadh euro níos láidre ann, bheadh na costais idirbhirt agus na rioscaí d’earnáil na tionsclaíochta agus do thomhaltóirí na hEorpa níos ísle. Bheadh tionchar níos mó ag an Eoraip ar an domhan agus chuirfeadh sí borradh faoina ceannasacht. I dtuairim na gcainteoirí ag an éisteacht sin, tá cúis eile le ról idirnáisiúnta an euro a threisiú tuilleadh, mar atá, go bhfuil príomhairgeadra an domhain faoi láthair, dollar na Stát Aontaithe, tagtha chun bheith ina uirlis pholaitiúil le blianta beaga anuas. I bhfianaise an méid sin, d’fhéadfadh an euro cuidiú le córas airgeadais idirnáisiúnta, a bheadh ilpholach agus níos athléimní, a thógáil.

Ba dhíol sásaimh do na cainteoirí ar an mórgóir tionscnamh an Choimisiúin chun an euro a neartú, ach bhí siad cáinteach faoi raon féideartha an tionscnaimh. Bheadh dollar na Stát Aontaithe láidir agus d’fhanfadh sé láidir, i ngeall ar dhoimhneacht agus leachtacht an mhargaidh. Ar leibhéal an Aontais, bheadh sé d’acmhainn ag Aontas na Margaí Caipitil an margadh a fhorbairt agus a chomhtháthú, rud a bheadh tábhachtach le haghaidh ról idirnáisiúnta an euro.

Mheas na cainteoirí go mbeadh na coinníollacha seo a leanas ríthábhachtach le haghaidh euro láidir: cóineasú eacnamaíoch aníos; comhtháthú sóisialta; taidhleoireacht Eorpach a bheadh níos gníomhaí ar ardáin idirnáisiúnta agus comhfhís Eorpach maidir le saincheisteanna straitéiseacha áirithe; mar aon le freagairt éifeachtúil don athrú aeráide agus don athrú tionsclaíoch ón gcóras airgeadais Eorpach.

A bhuí leis an éisteacht tá ionchur luachmhar curtha ar fáil d’obair CESE ar a thuairim a bhaineann leis an teachtaireacht ón gCoimisiún Eorpach Towards a stronger international role of the euro (I dtreo ról idirnáisiúnta níos láidre don euro). (jk)

I mbliana, an 3 agus an 4 Aibreán, thionóil an Coiste Eacnamaíoch agus Sóisialta an Fóram Eorpach um Imirce (EMF) a rinne iniúchadh ar ról na sochaí sibhialta agus na n-údarás áitiúil maidir le himirce a bhainistiú agus bealaí sábháilte agus rialta a chinntiú chuig an Aontas Eorpach.

Chuir Fóram 2019 - a eagraíodh don chúigiú bliain as a chéile - deich moladh ar fáil a bhí mar thoradh ar phlé idir 250 gairmí ó eagraíochtaí sochaí sibhialta an Aontais agus ionadaithe ó údaráis áitiúla, réigiúnacha agus náisiúnta, institiúidí Eorpacha agus eagraíochtaí idirnáisiúnta.

D'oscail an Coimisinéir um Imirce, Dimitris Avramopoulos, agus Uachtarán CESE, Luca Jahier, an ócáid, agus chuir an bheirt acu béim ar an ngá atá le beartas AE cliste agus dea-rialaithe ar imirce dhleathach, rud a d'fhéadfadh cuidiú leis an Aontas leas a bhaint as an imirce, comhtháthú sóisialta a chur chun cinn agus na daoine is leochailí i measc na n-imirceach a chosaint.

Chuir an Fóram in iúl go raibh cumhacht ag leibhéal an phobail ó thaobh feabhas a chur ar bhainistiú rathúil na himirce agus leag sé béim ar an ngéarghá atá le tuairimí na n-imirceach a chur san áireamh agus beartais lánpháirtíochta á bhforbairt.

Dhírigh moltaí eile a bhí ar bharr liosta mholtaí an Fhóraim ar rannpháirtíocht na sochaithe óstacha i dtionscadail um chuimsiú imirceach, riachtanais speisialta grúpaí leochaileacha, dreasachtaí chun imircigh a lánpháirtiú arís ina dtíortha tionscnaimh tar éis tréimhse a chaitheamh san Aontas le haghaidh oibre nó staidéir agus ar shainceisteanna eile. (ll)

le Grúpa na bhFostóirí in CESE

Gan ach dhá mhí fágtha go dtí toghcháin na hEorpa, tá Eoraip oscailte aontaithe láidir á achainí ag Grúpa na bhFostóirí. Tá ionadaithe gnó tiomanta dul i mbun oibre ar son AE láidir saibhir. Is é a tharraingtí atá an tAontas an buntáiste is mó atá aige. Chun buntáiste breise a bhaint as “Modh maireachtála na nEorpach”, beidh gá le timpeallacht ghnó iomaíoch. Sin roinnt de na príomhtheachtaireachtaí a tháinig as an Dearbhú Polaitiúil a ghlac Grúpa na bhFostóirí le deireanas.

An 9 Aibreán, thug Uachtarán Ghrúpa na bhFostóirí, Jacek Krawczyk, an dearbhú ar láimh do Leas-Uachtarán an Choimisiúin, Jyrki Katainen. Seo mar a labhair an tUachtarán Krawczyk: “D’eisíomar an dearbhú seo chun aird a tharraingt ar an tacaíocht a thugann fostóirí don Aontas Eorpach. Is léir don uile duine sa phobal gnó go bhfuil buntáistí le baint as an Aontas Eorpach, ach is rómhinic a dhéanaimid dearmad orthu inár gcuid oibre ó lá go lá. Tá fostóirí ag iarraidh sin a athrú,” arsa an tUachtarán Krawczyk.

Iarrtar geilleagar oscailte sa dearbhú, geilleagar ina mbeidh margaí oscailte agus iomaíocht chóir. Ní mór sochaí oscailte, a bhraitheann ar idirphlé agus ar dhea-rialachas, a bheith ag gabháil le geilleagar oscailte. Ní mór don Eoraip beartais, lena spreagfar an chruthaitheacht, an nuálaíocht agus meon na fiontraíochta, a ghlacadh agus a chur chun cinn.

Tá na fostóirí muiníneach go gcuireann an oscailteacht leis an gcobhsaíocht agus leis an tslándáil, sa gheilleagar agus sa tsochaí araon. Tá geilleagar agus sochaí oscailte tairbheach do chách. Seo bealach chun cinn le cur leis an muinín atá ag an bpobal as an Aontas Eorpach.

Tá an dearbhú le léamh in 23 theanga oifigiúla an Aontais ag an nasc seo a leanas: bit.ly/2X6Swgu (lj)

le Grúpa na nOibrithe in CESE

D’eagraigh Grúpa na nOibrithe in CESE cur i láthair leis an Ollamh Roberto Pedersini as Ollscoil Milano. Rinne an tOllamh cur síos ar an staidéar dá chuid maidir leis an Údarás Eorpach Saothair a cheapadh i gcaoi is go mbeidh sé in acmhainn déileáil ar shlí níos éifeachtaí leis an bpádhumpáil agus an dumpáil shóisialta. Leag Oliver Röpke, Uachtarán Ghrúpa na nOibrithe, béim ar an ról tábhachtach atá ag na comhpháirtithe sóisialta, go háirithe na ceardchumainn, lena chinntiú go gcuirtear an reachtaíocht saothair chun feidhme.

Tá méadú faoi dhó, le deich mbliana anuas, ar líon na ndaoine atá ina gcónaí agus ag obair i mBallstát eile seachas ina mBallstát baile, agus bhí 17 milliún duine i gceist in 2017. Faoi chuimsiú Cholún Eorpach na gCeart Sóisialta, d’fhógair an Coimisiún go gcruthófaí Údarás Eorpach Saothair, agus go rachadh an tÚdarás sin i mbun gnó in 2019. Mhínigh an tOllamh Pedersini gurbh é ab aidhm don Údarás sin an úsáid chalaoiseach a bhaintear as oibrithe a laghdú agus lántairbhe a bhaint, ag an am céanna, as soghluaisteacht an lucht saothair. Is ról cumasaithe, den chuid is mó, a bheidh ag an Údarás. Tabharfaidh sé tacaíocht do na húdaráis náisiúnta saothair chun imscrúduithe trasteorann a dhéanamh agus an comhar eatarthu a chur chun cinn.

Luaigh Carlos Trinidade, comhalta de Ghrúpa na nOibrithe agus rapóirtéir na tuairime ar an Údarás Eorpach Saothair, an méid a dúirt Jean-Claude Juncker, Uachtarán an Choimisiúin: “Is ait an rud é Údarás Baincéireachta a bheith ann chun súil a choinneáil ar na caighdeáin bhaincéireachta, agus gan aon Údarás Saothair amháin a bheith ann don Mhargadh Aonair.” Chuir sé i dtábhacht freisin fás na seineafóibe agus an náisiúnachais de thoradh na mblianta fada de dhumpáil shóisialta agus d’éagothroime, agus d’iarr sé ar na comhpháirtithe sóisialta ról níos gníomhaí a bheith acu i gcóras rialachais an Údaráis Eorpaigh Saothair. (jh)

leis an nGrúpa “Éagsúlacht Eoraip”

Ar an 7 Bealtaine, i mBúcairist, beidh a chéad Chruinniú Urghnách eile ag an nGrúpa “Éagsúlacht Eoraip”. Reáchtálfar an chomhdháil ardleibhéil seo in Aitriam na Leabharlainne Náisiúnta agus is é an t-ábhar a bheidh á phlé ná Eoraip na gComhluachanna agus na Sochaí Sibhialta.

Dhá lá roimh Chruinniú Mullaigh AE in Sibiu ar Thodhchaí an Aontais Eorpaigh, tabharfaidh an chomhdháil aghaidh ar thrí ghné bhunúsacha ó thaobh shochaí shibhialta na hEorpa:

• Luachanna Eorpacha agus cearta bunúsacha a ráthú
• Ról athraitheach shochaí shibhialta na hEorpa
• Todhchaí an Aontais Eorpaigh

Táthar ag súil le thart ar 140 rannpháirtí, lena n-áirítear comhaltaí CESE ó Bhallstáit uile an Aontais, chomh maith le heagraíochtaí sochaí sibhialta na Rómáine, ionadaithe ón saol acadúil, agus ionadaithe Uachtaránacht na Rómáine ar Chomhairle an Aontais Eorpaigh.

Tá 'Eoraip na luachanna coiteanna’ aitheanta mar thosaíocht ag Uachtaránacht na Rómáine ar Chomhairle AE. Tacaíonn an Grúpa “Éagsúlacht Eoraip” go hiomlán leis an gcuspóir seo a chuireann leis an obair mhór a rinne an Grúpa agus CESE ar an ábhar seo cheana féin.

Tá sé i gcroílár ár gcuid gníomhaíochtaí plé a dhéanamh ar an gcaoi leis an daonlathas agus a luachanna a chosaint, na buntáistí a bhaineann le ballraíocht san Aontas a chur in iúl agus a mhíniú, agus ar an gcaoi is féidir leis an tsochaí shibhialta todhchaí na hEorpa a mhúnlú. (ih)

Is é an 9 Bealtaine Lá na hEorpa agus, de réir traidisiún seanbhunaithe, osclóidh institiúidí an Aontais a ndoirse don phobal ar an gcéad Satharn den mhí, ar an 4 Bealtaine i mbliana. Is é an téama a bheidh ann ná Toghcháin Eorpacha an 23-26 Bealtaine, lena n-iarrfar ar shaoránaigh Eorpacha dul chun vótáil lena n-ionadaithe a roghnú le haghaidh cúig bliana ríthábhachtacha.

Mar chuid de thionscnamh Pharlaimint na hEorpa, anuairseobeidhméagvótáil.eu, tá Coiste Eacnamaíoch agus Sóisialta na hEorpa (CESE) i mbun feachtais chun an ráta vótála a mhéadú, rud a d’fhágfadh go mbeadh próiseas daonlathach an Aontais Eorpaigh níos láidre agus níos dlisteanaí.

Reáchtálfar an lá seo de réir trí phríomhthéama – Eoraip Inbhuanaithe, Eoraip Chuimsitheach agus Eoraip Oscailte. Bainfidh cur i láthair CESE le hearnálacha an-éagsúil óna chéile, mar atá, forbairt inbhuanaithe, athrú aeráide, dífheidhmeacht phleanáilte, fostaíocht, míchumais, caidreamh idir an tAontas Eorpach agus an chuid eile den domhan.

Cuirfidh comhaltaí agus baill foirne den Choiste fáilte roimh chuairteoirí agus pléifidh siad leo na toghcháin atá ag teacht agus todhchaí na hEorpa agus míneoidh siad dóibh freisin ról CESE i bpróiseas cinnteoireachta an Aontais Eorpaigh. A bhuí le cluichí idirghníomhacha agus gníomhaíochtaí spraoi mar aon le ceol beo, beidh an Eoraip níos sothuigthe don phobal i gcoitinne.

Lá Oscailte an AE 2019 – CESE - Foirgneamh Jacques Delors, Rue Belliard 99, 1040 An Bhruiséil. (mp)

Beidh an taispeántas grianghrafadóireachta Romania landscapes of my heart le saothar an ghrianghrafadóra cháiliúil as an Rómáin, Sorin Onisor, ar taispeáint in CESE.

I gcomhar le hUachtaránacht na Rómáine ar Chomhairle an Aontais Eorpaigh a chuirfear an saothar grianghrafadóireachta ar taispeáint in CESE idir an 23 Aibreán agus an 26 Bealtaine 2019.

Osclófar an taispeántas go hoifigiúil an 15 Bealtaine le linn oíche Rómánach, an tráth céanna a bheidh an seisiún iomlánach ar siúl. Tuilleadh eolais: https://www.eesc.europa.eu/en/agenda/our-events/events/romanian-landscapes-my-heart