EESC info

Ar an 12 Nollaig, bhronn Coiste Eacnamaíoch agus Sóisialta na hEorpa (CESE) duaiseanna ar chúig eagraíocht de chuid na sochaí sibhialta a sheasann ar son comhionannas deiseanna d'fhir agus mná, a tharraingíonn aird ar chumas agus ar éachtaí na mban agus a chuireann lena gcumhachtú i sochaí agus i ngeilleagar na hEorpa. Roinneadh duais EUR 50 000 idir na cúig thionscadal a bhuaigh an comórtas. Is í an eagraíocht Iodálach "Toponomastica femminile" a bhuaigh an chéad duais EUR 14 000. Tugadh EUR 9 000 an ceann do na grúpaí a bhain an dara, an tríú agus an ceathrú háit amach, iad rangaithe anseo de réir na háite a bhain siad amach: Strajk Kobiet (Cumann Stailce na mBan sa Pholainn), an Comhlachas Bulgárach NAIA agus a thionscadal faoi scéalta sí, Comhlachas Bogearraí agus Ríomhghnó na Fionlainne (Ohjelmisto- ja e-business ry) agus a chlár #mimmitkoodaa (Cód na mBan) agus an tionscadal "The Brussels Binder" ón mBeilg.

"Ba mhaith liom buíochas a ghabháil leis na hiarrthóirí ar fad – na buaiteoirí atá anseo inniu agus gach duine a ghlac páirt sa chomórtas – as a gcuid iarratas iontach, a chuir go mór leis. Léiríonn a gcuid tionscadal go bhfuil an Eoraip réidh le seasamh lena ghealltanas sochaí atá comhionann agus cothrom i ndáiríre d'fhir agus mná araon a bhaint amach. A bhuí le tionscadail mar seo, tá dearcadh an phobail ag athrú de réir a chéile. Tá sé ag éirí níos do-ghlactha mná a choinneáil amach as an saol poiblí agus as poist mórthábhachtacha agus meastar go bhfuil steiréitíopaí faoi róil na mban seanfhaiseanta agus as dáta anois," a dúirt Luca Jahier, Uachtarán CESE, ag an searmanas bronnta.

Dúirt Isabel Caño Aguilar, Leas-Uachtarán ar CESE atá freagrach as an gCumarsáid: "Tá lúcháir orm gurb é cumhachtú na mban téama Dhuais na Sochaí Sibhialta i mbliana. Cuidíonn na tionscadail a cuireadh chugainn leis an troid ar son an chumhachtaithe sin. Tosaíonn siad le páistí óga agus leis na dearcthaí a théann i bhfeidhm orainn go hindíreach gach lá agus muid ag siúl síos an tsráid nó ag éisteacht le comhdháil. Cuidíonn siad leis an troid in aghaidh leithscaradh cothrománach sa mhargadh saothair in earnálacha a bhfuil fir go mór chun cinn iontu, ar nós na Teicneolaíochta Faisnéise (TF). Cuidíonn siad leis an troid in aghaidh an neamhionannais trí muid a mhealladh ag leibhéal fo-chomhfhiosach trí ainmneacha na sráideanna, nó déanann siad é os ard, trí iad féin a chur in iúl ar shráideanna a mbailte dúchais.”

Is é an aidhm atá ag buaiteoir na bliana seo, Toponomastica femminile (Associazione Toponomastica femminile), ná aitheantas poiblí a thabhairt do mhná, rud nach dtarlaíonn go rómhinic nó atá ag dul dóibh le fada an lá, trí dhaoine a chur ar an eolas maidir leis an méid atá déanta ag na mná don tsochaí agus a gcuid éachtaí stairiúla. De bharr go gcreideann an eagraíocht gur comhartha maith í an logainmníocht – is é sin an staidéar a dhéantar ar logainmneacha – ar an meas atá ag sochaí ar a baill, tá siad ag iarraidh níos mó ban mór le rá a chur ar léarscáileanna cathracha agus bailte.

Léiríonn an taighde a rinne an eagraíocht le gairid ar ainmneacha na n-áiteanna poiblí i dtuairim is 90% de bhardais na hIodáile, an chaoi nár ainmníodh ach 7.8 sráid i ndiaidh ban in aghaidh gach 100 sráid a ainmníodh i ndiaidh fear, agus pearsana reiligiúnacha ba ea 60% de na hainmneacha ban sin. Is beag áit atá baiste as baneolaithe, banfhiontraithe, banealaíontóirí agus mná spóirt mór le rá agus tá Toponomastica femminile ag iarraidh é sin a athrú.

Glacadh go han-dearfach leis an tionscadal - ghlac go leor bardas páirt ann agus anois tá an eagraíocht ag dul i bpáirt le comhlachais in áiteanna eile cheana féin chun na dea-chleachtais seo a scaipeadh.

Agus í ag glacadh leis an duais, dúirt uachtarán Toponomastica femminile, Maria Pia Ercolini: "Tá dlíthe ag teastáil chun sochaí a athrú ach ní leor iad chun iompar daoine a athrú ar bhealach marthanach mura dtagann athrú ar mheon agus ar dhearcadh daoine chomh maith. Ní mór dúinn troid in éadan steiréitíopaí agus claontachta. Ní troid fheimineach amháin í seo, ach troid ar son sochaí atá bunaithe ar an dlúthpháirtíocht agus ar son na sibhialtachta chomh maith".

Bronnadh an dara duais ar Strajk Kobiet (Cumann Stailce na mBan sa Pholainn),an ghluaiseacht ban is mó sa Pholainn, a bhí go mór sa nuacht de bharr a "Black Monday Strike" in 2016. Trí agóidí agus mórshiúlta a reáchtáil, éilíonn an ghluaiseacht níos mó cearta do mhná agus cáineann sí dianteannadh an rialtais ar luachanna agus ar shaoirsí bunúsacha. Tá sé mar aidhm aici anois gnáthmhná ó chathracha beaga agus meánmhéide sa Pholainn a chumhachtú.

Tháinig Tionscadal Scéalta Sí na Bulgáire, a bhfuil duaiseanna buaite aige, sa tríú háit. Is é an comhlachas NAIA a reáchtálann an tionscadal seo agus baineann sé leas as scéalta sí traidisiúnta chun dul i ngleic le róil inscne steiréitíopacha a chuirtear ina luí ar chailíní agus ar bhuachaillí agus iad an-óg, rud a mhúnlaíonn a n-intinn agus a chuireann srian leis na deiseanna agus na roghanna a bheidh acu amach anseo.

Tháinig #mimmitkoodaa, clár a bhunaigh Comhlachas Bogearraí agus Ríomhghnó na Fionlainne chun an miotas gur cheart go mbeadh gach forbróir bogearraí ina fhear i gcónaí a bhréagnú, sa cheathrú háit. Tugann an clár uchtach do mhná dul sa tóir ar dheiseanna sa tionscal bogearraí agus dul i dtreo poist agus gairmeacha lena ngabhann pá níos fearr amach anseo.

Is é "The Brussels Binder” ón mBeilg, bunachar sonraí de bhanshaineolaithe beartais, an cúigiú buaiteoir. Tá sé á reáchtáil ag grúpa saorálaithe a bhíonn ag obair go mór ar son ionadaíocht níos fearr do mhná i ndíospóireachtaí ar bheartais Eorpacha agus ba cheart go gcinnteodh sé sin go n-éiríonn le dlíthe agus beartais an Aontais riachtanais agus tuairimí na mban a chur san áireamh. Is é an aidhm atá acu ná go mbeadh sé ar an acmhainn is mó tábhacht maidir le feabhas a chur ar chomhionannas inscne ar phainéil agus sna meáin, sa Bhruiséil agus ar fud an Aontais.

Mheall téama na bliana seo, "Tuilleadh ban i sochaí agus i ngeilleagar na hEorpa", 177 n-iarrthóir - an dara líon is airde iontrálacha san 11 bhliain atá ann ó tháinig an duais ar an bhfód, beagáinín níos lú ná mar a mheall téama 2016, an imirce. Tháinig na hiontrálacha isteach ó 27 mBallstát, rud a thugann le fios go bhfuil spéis mhór ag na saoránaigh agus na heagraíochtaí sochaí sibhialta rud éigin a dhéanamh chun dul i ngleic le an neamhionannas inscne, rud atá fós ina cheist mhór san Eoraip.

Bronntar Duais na Sochaí Sibhialta mar chúiteamh ar "barr feabhais i dtionscnaimh na sochaí sibhialta". Gach bliain, díríonn an duais ar ghné dhifriúil d’obair CESE. Ba é ba théama don duais in 2018 luachanna, féiniúlachtaí agus oidhreachtaí chultúrtha Eorpacha mar bhealach le hEorpaigh a thabhairt le chéile.

Tá tuilleadh sonraí faoi Dhuais na Sochaí Sibhialta 2019 ar fáil anseo. Is féidir féachaint ar an bhfíseán ina dtugtar eolas faoi na tionscadail bhuacha anseo.

Tá an eagraíocht Iodálach Toponomastica femminile, buaiteoir na chéad duaise, tiomanta dul i ngleic leis an mbearna idir na hinscní trí áiteanna, go háirithe sráideanna uirbeacha, cearnóga agus páirceanna a shloinneadh ó mhná iomráiteacha. Dar le Maria Pia Ercolini gur mór an cuidiú chun a n-ionad ceart sa tsochaí a chinntiú do mhná an t-aitheantas siomblach seo a thabhairt dóibh agus dá bhfuil bainte amach acu.

CESE info: cén tábhacht atá ag an duais seo duitse agus do d’eagraíocht?

Maria Pia Ercolini: A bhuí leis an aitheantas atá tugtha ag an Aontas Eorpach don obair a dhéanaimid, agus leis an údarás a bhronnann sin orainn, is féidir leis an eagraíocht líonraí idirnáisiúnta a bhunú agus dea-chleachtais a chun chun cinn thar lear.

Cén chomhairle a chuirfeá ar eagraíochtaí eile i dtreo is go mbeadh rath orthu freisin agus iad i mbun gníomhaíochtaí agus cláir den chineál céanna?

Mholfainn dóibh páirt a ghlacadh i ngrúpaí agus i dtionscadail áitiúla, náisiúnta agus idirnáisiúnta, is cuma cén cineál grúpaí nó tionscadal iad, agus béim a leagan i gcónaí ar obair na mban. Méadaíonn sé sin infheictheacht agus éifeachtacht na n-eagraíochtaí atá ann cheana agus ag an am céanna cothaíonn sé bá áirithe ina leith sin i measc na saoránach; rud eile, spreagann sé gach duine a gcion féin a dhéanamh chun an tsochaí a thógáil agus cuidíonn sé le líonraí a chur ar bun.

Cén leas a bhainfidh tú as an maoiniú áirithe seo chun cúnamh breise a chur ar fáil sa phobal?

Tá sé curtha romhainn againn bunachar sonraí a fhorbairt a mbeidh rochtain ag cách air; na beartais logainmníochta réigiúnacha a dhéanamh trédhearcach agus infheicthe; ár ngníomhaíochtaí a chur chun cinn go hidirnáisiúnta trí shuíomh gréasáin ilteangach a thógáil ina mbeidh léarscáileanna agus geoshuíomh do bhóithre atá baiste as mná; cúrsaí taistil fud fad an Aontais atá bunaithe ar na bóithre sin a fhoilsiú; agus comhairle a chur ar fáil do riaracháin agus do chomhlachais leasmhara, agus comhoibriú leo.

Dar leat cad é an bealach is fearr chun steiréitíopaí inscne a chomhrac agus chun claontacht a laghdú? Cad ina thaobh a gceapann tú go bhféadfaí míthuiscintí agus claontacht faoi ról na mban sa tsochaí a athrú ach aghaidh a thabhairt ar steiréitíopaí ar leibhéal níos siombalaí nó níos fo-chomhfhiosaí?

Chun steiréitíopaí agus claontacht a chomhrac, ní mór dúinn oibriú ar leibhéil éagsúla agus ról a thabhairt don uile ghrúpa aoise agus sóisialta agus do gach catagóir ghairmiúil, beag beann ar inscne, ní áirím gan daoine a mbeadh iarracht de dhrogall orthu faoi seo a chur ó dhoras. Is as an réimse siombalach a fháisctear an chlaontacht agus tá sí fréamhaithe in íomhánna agus i samhlacha nach dtugann léiriú ceart ar chastacht daoine aonair agus na n-inscní éagsúla. Má táimid chun freagairtí agus iompar instinneach a athrú, ní mór dúinn breathnú go soiléir ar gach a ndéanann daoine ó lá go lá.

Is éard atá i Stailc Mhná na Polainne (SMP), buaiteoir an dara duais, gluaiseacht pobail a tháinig chun cinn sa Pholainn in 2016 mar fhrithghníomhú in aghaidh iarracht a rinne an rialtas cearta ginmhillte na mban a chaitheamh i dtraipisí. Ó shin i leith, tháinig fás agus forbairt ar an ngluaiseacht ar fud na tíre agus is í a stiúir roinnt gníomhaíochtaí ar ghlac scata ban ó chathracha beaga agus meánmhéide sa Pholainn páirt iontu. Nocht Marta Lempart ó SMP a gcuid tuairimí faoin ríthábhacht atá leis an ngluaiseacht sin sa lá atá inniu ann sa Pholainn.
CESE info: cén tábhacht atá leis an duais seo duitse agus do d’eagraíocht?

Marta Lempart: Braithimid go bhfuilimid le feiceáil. Na mná sin a bhfuil an obair ghníomhaíoch is deacra á déanamh acu, áit nach bhfuil ceamaraí teilifíse, meáin mhóra, grianghraif ealaíonta ná aitheantas ar bith le fáil seachas an cipearfhuath gránna agus fuath gránna de chineálacha eile, na gnáthmhná – múinteoirí, mná díolacháin, máithreacha, banaltraí, cócairí agus tiománaithe a sheasann don athrú is mian leo a fheiceáil – i gcathracha beaga agus meánmhéide sa Pholainn, tá siad le feiceáil faoi dheireadh thiar thall. Ní hamháin sin, tá ómós á léiriú dóibh agus dá gcuid íobairtí, misnigh, smaointe, iarrachtaí agus éachtaí. Tá an t-aitheantas sin i stair idirnáisiúnta na mban agus na bhfear ag dul dóibh siúd nach bhfuil ag iarraidh clú a bhaint amach, ach, a bhfuil sé tuillte acu a bheith le feiceáil, le cloisteáil, agus tacaíocht a fháil d’ainneoin nach as príomhchathair ná cathracha móra tábhachtacha iad.
Fágann sin freisin go bhfuil ré fheimineachas na gcathracha móra faoi thionchar mhná na bunaíochta, nó na mban rachmasach agus acadúil ag teacht chun deiridh agus gurb iad na gnáthmhná atá ar thús cadhnaíochta toisc gur maith mar a thuigeann siad gur troid bháis nó bheatha í. I measc na mban sin, tá gnáthmhná a cuireadh ina dtost, ar tugadh neamhaird orthu agus a raibh drochmheas ag daoine orthu toisc nach raibh siad “sách maith/léannta/deisbhéalach/ullmhaithe/inghlactha” le bheith ina bhfeiminigh agus na mná sin a théann sa bhearna bhaoil lá i ndiaidh lae.
 

Cén chomhairle a chuirfeá ar eagraíochtaí eile i dtreo is go mbeadh rath orthu freisin agus iad i mbun gníomhaíochtaí agus cláir den chineál céanna?
1. Mholfainn do lucht na n-eagraíochtaí sin an ruaig a chur ar an mbord bainistíochta – deasc chabhrach ar chur ar bun chun tionscadail a chomhordú agus a chur ar fáil. Gan tionscadail a chruthú ná a bhrú ar aghaidh ón mbarr anuas – deireadh a chur le cur chuige ón mbarr anuas agus ón mbun aníos agus líonra cumhachtach tacaíochta a chruthú. Má bhíonn duine go huile is go hiomlán freagrach as an toradh, tá sé le tuiscint as sin nach mór an chumhacht chinnteoireachta iomlán a bheith ag an duine sin freisin. Mholfainn do lucht na n-eagraíochtaí sin teacht ar an tuiscint sin. Maoiniú agus tacaíocht a thabhairt ar gach bealach is féidir d'aon rud a thagann le fís na heagraíochta, fiú más de bheagán é – gan smaointe, tuairimí ná gníomhaíochtaí atá ag teacht le chéile go huile is go hiomlán le chéile a lorg ná a bhrú ar aghaidh. Creidiúint sa mhéid a deir daoine, sa dóigh a mothaíonn siad agus sna bearta a dhéanann siad.
2. Béim a chur ar mheas agus spreagadh a thabhairt don ghníomhaíochas áitiúil is cuma cén beart a dhéanann siad. Dul i ngleic le haineolas na meán ar an ngníomhaíochas áitiúil agus le sotal na meán ina thaobh, rud nach mbíonn le feiceáil go hiondúil agus a dtugann soláthraithe na meán náisiúnta neamhaird air de ghnáth. Stopadh de bheith ag eagrú cruinnithe, ceardlann agus comhdhálacha i bpríomhchathair a dtíre féin.
3. Gnáthchaint a dhéanamh.
4. A aithint go bhfuil siad go maith as agus cuimhneamh air sin ar feadh cúig nóiméad gach maidin. Úsáid a bhaint as sin ansin chun tacú le daoine leis an méid a dhéanann siad. Tacaíocht a thabhairt do dhuine amháin ar a laghad gach lá – duine nach n-aontaíonn siad leis nó léi ó thaobh straitéisí, modhanna nó gníomhaíochtaí de. Deimhin a dhéanamh de go n-éistear le glór na mionlach san eagraíocht – glór na ndaoine a bhíonn de shíor ag staonadh. Ní féidir iallach a chur ar dhaoine an chonair is réasúnaí agus is éifeachtaí féin a leanúint – ní mór cead a gcoise a thabhairt dóibh a mbealach féin a réiteach. Is mar sin a éiríonn linn uile.
5. A bheith cineálta. Scaoileadh leis.

Conas a bhainfidh an eagraíocht úsáid as an gcistiú sonrach seo chun tuilleadh cuidithe a thabhairt don phobal?
Úsáidfear an cistiú chun teacht roimh chloíteacht gníomhaithe ar bhealach gníomhach agus chun dul i ngleic leis sin (ciste chun an chloíteacht a throid). Tá an chuid is mó de na mná in SMP faoi bhrú ón stát agus faoi bhrú ón tsochaí (imscrúduithe póilíneachta, ionchúisimh). Tá ciapadh agus cibearbhulaíocht á ndéanamh ar roinnt díobh, tá fadhbanna acu san obair nó tá deacracht acu a gcuid gnólachtaí a choinneáil i mbun gnó agus tá tionchar aige sin ar a gcuid páistí agus teaghlaigh freisin. Déanann an brú agus a gcuid rannpháirtíochta díobháil dá meabhairshláinte agus dá sláinte go ginearálta.
Caithfear cuid den chiste ar bhunaitheoirí SMP freisin. Tá sé beartaithe againn teagmháil a dhéanamh le heagraithe tosaigh na chéad stailce nach bhfuil, ar chúiseanna éagsúla, rannpháirteach in SMP a thuilleadh – mar gheall ar a gcuid dálaí pearsanta, toisc go ndeachaigh siad isteach in eagraíochtaí eile nó toisc deacrachtaí pearsanta a bheith acu. Tá sé i gceist againn teacht le chéile náisiúnta a eagrú cothrom an lae a bunaíodh an stailc ceithre bliana ó shin (an 3 Deireadh Fómhair 2020).

Is fada í stair ghníomhaíochas feimineach na Polainne agus bhí sí ar cheann de na chéad náisiúin san Eoraip a thug cead vótála do na mná. Mar sin féin, tá an Pholainn faoi thionchar barúlacha coimeádacha freisin. Sa chomhthéacs sin, cén tábhacht atá leis an duais seo duitse?
Is mór an tacaíocht í do líne thosaigh na troda agus na frithbheartaíochta i gcoinne phobalachas na heite deise agus fanaicigh chreidimh mar is iad na mná atá ag dul i ngleic leis an mborradh frithbhanda, frithdhaonna a dtugtar cuid mhór urraíochta dó agus atá eagraithe go hidirnáisiúnta agus le fáil ar chlár oibre an "Oird Dhomhanda Nua", rud nach bhfuil tuairim dá laghad ag lucht rialtais ná institiúidí idirnáisiúnta déileáil leis, is cosúil. Páirc thraenála ab ea an Pholainn d'fhanaicigh chreidimh in 2016, agus é mar aidhm leis sin toirmeasc iomlán a chur ar ghinmhilleadh. Chaill sin an troid sin, gan aon agó. Fíorbheagán frithbheartaíochta nó, go deimhin, frithbheartaíocht ar bith, b'in an rud a raibh súil acu leis, ach, tá teacht aniar á dhéanamh ag mná, agus tá an troid sin mar chuid dá saol laethúil.

Le 20 bliain anuas tá an Comhlachas Bulgárach NAIA, buaiteoir an tríú duais, ag comhrac i gcoinne an fhoréigin baile i bpobail bheaga atá faoi mhíbhuntáiste agus ag leanúint dá chlár chun cúnamh sóisialta a thabhairt d’íospartaigh atá i gcruachás. Míníonn Svetla Sivcheva san agallamh seo go ndíríonn an comhlachas ar chosc trí chomhoibriú le leanaí óga d’fhonn bealaí a aimsiú chun fáil réidh le steiréitíopaí sóisialta agus iad a shárú ionas gur féidir leis na leanaí cur lena dtuiscint ar chúrsaí an tsaoil agus barr a gcumas a bhaint amach.

CESE info: cén tábhacht atá ag an duais seo duitse agus do d’eagraíocht?

Svetla Sivcheva: Tá an duais seo an-tábhachtach don eagraíocht, atá ag obair le 20 bliain anuas chun foréigean in aghaidh na mban agus na leanaí a chomhrac, agus chun níos mó daoine a chur ar an eolas gur fadhb mhór shóisialta seachas fadhb phríobháideach é seo, agus gur faoin stát, faoi na hinstitiúidí agus faoi gach duine aonair é an foréigean in aghaidh na mban a chomhrac. Oibríonn an eagraíocht le grúpaí leochaileacha ó bhailte beaga agus ó shráidbhailte a bhfuil go leor dúshláin shóisialta rompu, lena n-áirítear an bhochtaineacht, an dífhostaíocht, luathfhágáil na scoile, agus easpa cúraim sláinte. Is deacair, sa chás seo, cearta na mban a chosaint, iad a chumhachtú, cur leis an muinín atá acu astu féin agus iad a spreagadh chun barr a gcumas a bhaint amach sa saol sóisialta agus eacnamaíoch. In ainneoin na ndúshlán sin, leanamar lenár n-obair agus is aitheantas í an duais seo as ár mbuanseasmhacht agus ár ndiongbháilteacht agus as ár n-iarrachtaí chun a léiriú a thábhachtaí agus a luachmhaire atá sé go gcuirfidh an tsochaí comhdheiseanna ar fáil do mhná agus d’fhir araon.

Cén chomhairle a chuirfeá ar eagraíochtaí eile i dtreo is go mbeadh rath orthu freisin agus iad i mbun gníomhaíochtaí agus cláir den chineál céanna?

Is beag comhairle is féidir a thabhairt dóibh, de bharr go bhfuil cuid mhór oibre déanta cheana ag an tsochaí shibhialta ina leith. Mar sin féin, ní minic a tharraingítear aird ar an obair sin agus ní bhíonn sí ina tosaíocht ag polaiteoirí ach an oiread. Bíonn eagraíochtaí neamhrialtasacha agus saoránaigh aonair ag baint triail i gcónaí as smaointe nua agus ag forbairt dea-chleachtais ar leibhéal an Aontais trí thaithí agus saineolas a roinnt lena chéile. Tá súil againn go ndéanfaidh obair na sochaí sibhialta daoine a spreagadh chun machnamh a dhéanamh ar bheartais stáit a thabhairt isteach atá dáiríre agus éifeachtach agus a léireoidh go soiléir gur cheart tús áite a thabhairt don obair seo agus go bhfuil an toil ann ar an leibhéal is airde chun comhdheiseanna do mhná agus d’fhir a chur chun cinn agus a chinntiú i ngach uile réim den saol sóisialta agus eacnamaíoch. Tá roinnt Ballstát imithe ar gcúl maidir le foréigean inscnebhunaithe a chosc agus comhionannas inscne a bhaint amach, agus is cúis mhór imní é sin. Tá súil againn go mbeidh toil pholaitiúil shoiléir ar leibhéal an Aontais agus ar leibhéal na mBallstát chun seasamh le comhluachanna Eorpacha, lena n-áirítear comhdheiseanna do mhná agus d’fhir.

Cén leas a bhainfidh tú as an maoiniú áirithe seo chun cúnamh breise a chur ar fáil sa phobal?

Bainfidh an eagraíocht leas as an maoiniú seo chun ár gClár um Chomhionannas Inscne a chosaint. Níl acmhainní airgeadais mhóra ar fáil dár n-eagraíocht. Mar sin féin, tugaimid tús áite i gcónaí do sheirbhísí a chur ar fáil d’íospartaigh foréigin teaghlaigh agus ní féidir cur isteach ar na seirbhísí sin. Bíonn deacrachtaí againn gníomhaíochtaí a mhaoiniú a cheaptar chun comhionannas inscne a bhaint amach. Bainfimid leas as an maoiniú chun an foréigean i gcoinne leanaí a chosc ach, anuas air sin, chun oibriú i gcomhar le banfhiontraithe agus tacú le rannpháirtíocht na mban sa pholaitíocht agus sa chinnteoireacht. A bhuí leis na hacmhainní airgeadais sin, beidh an eagraíocht in ann tacú le níos mó ban ó phobail bheaga dhúnta agus iad a chur ar an eolas agus is mór an tairbhe é sin.

Baineann do thionscadal le tuismitheoirí agus leanaí reamhscolaíochta. Cén fáth a bhfuil sé tábhachtach labhairt le leanaí óga faoi chomhionannas inscne? Conas a chuidíonn scéalta sí le leanaí tuiscint a fháil ar an tábhacht a bhaineann le comhionannas idir fir agus mná?

Is é an fhadhb ar a bhfuilimid ag díriú ná steiréitíopaí inscne a bhrúitear orainn ó aois óg ag tuismitheoirí, múinteoirí agus ár gcomhaoisigh. Ó thosach a n-óige, súnn leanaí isteach go leor steiréitíopaí cultúrtha agus siombailí sóisialta a fhanann leo agus iad ina ndaoine fásta agus is iad an norm anois iad. Cuireann sé sin bac ar bhuachaillí agus ar chailíní iad féin a chur in iúl go hoscailte agus fágann sé go mothaíonn siad gur cheart dóibh iad féin a iompar ar bhealach a bhfuil glacadh ag an tsochaí leis. Chun an fáinne fí sin a bhriseadh, ní mór leanaí a spreagadh ó aois óg chun breathnú ar mhná agus ar fhir i róil eile, seachas róil thraidisiúnta. Ba cheart dóibh a bheith in ann a bpoitéinseal agus a gcumas a mheas agus fios a bheith acu go bhfuil meas ag an tsochaí ar an eolas agus na scileanna atá acu agus go bhfuil siad ábhartha don tsochaí.

Is uirlis iontach iad scéalta sí traidisiúnta do leanaí, lenar féidir saincheisteanna éagsúla a phlé le leanaí óga, mar shampla comhionannas idir mná agus fir, i bhfocail atá so-thuigthe agus soiléir dóibh. Bainimid leas as scéalta sí agus na carachtair iontu chun a thaispeáint do chailíní agus do bhuachaillí na deiseanna nua atá ar fáil dóibh ionas go dtuigfidh siad a mbuanna, a spéiseanna agus a bpoitéinseal, rudaí a chabhróidh leo barr a gcumas a bhaint amach i róil neamhsteiréitipiciúla agus a aithint go bhfuil na róil sin chomh tábhachtach agus chomh luachmhar céanna.

Is é príomh-mhisean Chomhlachas Bogearraí agus Ríomhghnó na Fionlainne (Ohjelmisto- ja e-business ry), buaiteoir an ceathrú duais, cur le líon na mban a bhfuil tuiscint acu ar bhogearraí. Cuireann siad ceardlanna praiticiúla saor in aisce ar fáil do mhná, nach bhfuil aon taithí chódúcháin acu, chun cuidiú leo an rath a bheith orthu i dtionscal TF. Labhair Rasmus Roiha agus Milja Köpsi linn faoi fhealsúnacht #mimmitkoodaa agus faoin úsáid atá beartaithe ag an eagraíocht a bhaint as an airgead duaise.

CESE info: cén tábhacht atá ag an duais seo duitse agus do d’eagraíocht?

Rasmus Roiha agus Milja Köpsi: Táimid thar a bheith buíoch, is mór an phribhléid dúinn é í a fháil agus táimid níos tiomanta ná riamh leanúint lenár gcuid oibre le #mimmitkoodaa. Beidh tionchar níos mó fós ag ár gclár de réir mar a rachaidh an líon rannpháirtithe i méid agus de réir mar a chuirtear lena scóip. Tá breis is 5000 bean agus na scórtha cuideachtaí rannpháirteach sa chlár anois. Is é an sprioc atá ann go mbeadh deich míle bean agus céad cuideachta rannpháirteach ann sa dá bhliain atá romhainn. Fuarthas aird dhearfach ó na meáin a bhuí leis an duais a bhuachan, rud a chuidigh linn níos mó comhpháirtithe dícheallacha a mhealladh chuig an gclár.

Cén chomhairle a chuirfeá ar eagraíochtaí eile i dtreo is go mbeadh rath orthu freisin agus iad i mbun gníomhaíochtaí agus cláir den chineál céanna? 

Mholfainn dóibh a bheith sonrach. B’fhiú rud nithiúil a thairiscint seachas díreach seimineár nó breis faisnéise a thabhairt dóibh. Sa chuid is mó de chásanna, is éasca teacht ar rannpháirtithe le haghaidh cláir éagsúla, go háirithe má tá rud saor in aisce á thairiscint agat. Inár gcás féin, bhí rath orainn toisc gur éirigh linn rannpháirtíocht na chéad chuideachtaí a chinntiú. Bhí an-tábhachtach leis sin mar is iadsan a dhéanann an chuid is mó den obair: íocann siad táille le haghaidh na n-imeachtaí seolta (cothú pobal) AGUS eagraíonn siad ceardlanna bunleibhéil (obair phraiticiúil, nithiúil). Roghnaíomar na chéad ocht gcinn de chuideachtaí go cúramach agus thugamar cuireadh dóibh ansin. Mar sin, d’éirigh linn cuideachtaí den scoth a mhealladh a léirigh a dtiomantas don chlár. Ó shin i leith, b’éasca i bhfad é forbairt air sin. Mar sin, seift mhaith is ea é tosú le rud praiticiúil chun dearbhú a thabhairt do choincheap an chláir nó d’aon smaoineamh tosaithe :) 

Conas a bhainfidh an eagraíocht úsáid as an gcistiú sonrach seo chun tuilleadh cuidithe a thabhairt don phobal?

In 2020, beidh an clár #mimmitkoodaa á leathnú ar fud na Fionlainne againn. Beidh imeachtaí spreagúla á seoladh againn ina roinnfimid scéalta gairme agus noda foghlama. Ina theannta sin, sna himeachtaí sin, léireoimid na poist agus na deiseanna gnó/oibre atá le fáil sa tionscal bogearraí agus an dóigh a bhféadfaidh mná an taithí phearsanta saoil agus oibre atá acu a úsáid i réimse na teicneolaíochta.

Anuas air sin, tá níos mó de na ceardlanna praiticiúla a bhfuil an-tóir orthu ar na bacáin ina bhféadfaidh mná triail a bhaint as cineálacha éagsúla córas bainistíochta ábhair, teangacha ríomhchlárúcháin, tástálacha intleachta saorga, haiceála bháin, etc.

Foilsíonn Comhlachas Bogearraí agus Ríomhghnó na Fionlainne scéalta gairme spreagúla faoi mhná ionas go bhféadfaidh mná spreagadh agus tacaíocht a thabhairt dá chéile agus teacht ar an tuiscint go bhféadfadh an teicneolaíocht faisnéise agus cumarsáide a bheith ina rogha ghairme acu. I do thuairimse, cé chomh mór is a chuidíonn sin le mná a n-áit féin a aimsiú sa tionscal bogearraí? 

Seoid an-luachmhar inár líonra is ea cumhacht na ndea-shamplaí agus na n-eiseamláirí. Nuair a chuirtear daoine éagsúla i láthair, agus cineálacha difriúla scéalta gairme acu, is féidir linn uile dea-shamplaí agus spreagadh a fháil uaidh sin dár dturas féin. Ar an dóigh sin, is féidir linn claontachtaí (comhfhiosacha nó neamh-chomhfhiosacha) atá fós i ndaoine sa tionscal bogearraí sa lá atá inniu ann a ísliú.

Anuas air sin, tá líonra á fhorbairt againn do na mná atá sa tionscal bogearraí cheana, nó a bhfuil spéis acu gairm bheatha a bhaint amach ann. Ghlac líon thar a bheith sásúil daoine páirt cheana féin sa seisiún ceisteanna agus freagraí a craoladh beo ar Instagram. Sin rud nár baineadh triail as riamh roimhe sin inár dtionscal.

An bhfuil sé beartaithe ag do líonra cuidiú le mic léinn bhaineanna óga ábhair ETIM (eolaíocht, teicneolaíocht, innealtóireacht agus matamaitic) a roghnú ar scoil nó ár éirigh leat dul i bhfeidhm orthu leis an tionscadal atá anois ann cheana?

Mná fásta atá i spriocghrúpa #mimmitkoodaa, ach is léir dúinn cheana gur eiseamláirí beoga iad na mná sin do mhná agus cailíní óga. Mura mbíonn ach tuiscint an-bhunúsach ag mná fásta ar fhorbairt bogearraí agus ar na féidearthachtaí is féidir le bogearraí a sholáthar tríd an digiteáil, i measc nithe eile, is fearr a ndeiseanna gairme go fóill féin. Ina theannta sin, beidh tionchar aige sin ar a líonra, ar a dteaghlach agus ar a gcuid cairde.

Reáchtáiltear líon mór díospóireachtaí sa Bhruiséil gach bliain. Is fir iad dhá thrian de na cainteoirí a bhíonn ar na painéil sin. Mar sin féin, is iomaí bean a bhféadfaí brath orthu chun saineolas agus éagsúlacht araon a thabhairt isteach i ndíospóireachtaí an Aontais. Chun dul i ngleic leis an éagothroime sin, is éard atá i gcroílár straitéis "The Brussels Binder", ardán a fhorbairt a d’fhéadfadh a bheith ina mhol do shaineolaithe baineanna agus, ina theannta sin, d'eagraithe painéal a bhíonn ar thóir cainteoirí. Rinne CESE Info agallamh le Juliane Schmidt faoina straitéis fhoriomlán chun painéil a thionóltar sa Bhruiséil, inar líonmhaire go mór na fir, a athrú.

CESE Info: Cén tábhacht atá ag an duais seo duitse agus do d’eagraíocht?

Juliane Schmidt: Is é is aidhm do "The Brussels Binder" athrú cultúrtha a dhéanamh ionas gurb é an gnáthrud é ionadaíocht chothrom a dhéanamh d'fhir agus do mhná. Is aitheantas é an duais ó CESE ar thábhacht ár gcomhraic. Ónár dtaobhna de, is ionann an duais sin a fháil agus saincheist ionadaíocht na mban a chur ar bharr an chláir oibre, agus san am céanna, beart a dhéanamh de réir ár mbriathair agus cur leis an tsochaí shibhialta bhríomhar ar fud na hEorpa.

Cén chomhairle a chuirfeá ar eagraíochtaí eile maidir le torthaí a bhaint amach trí ghníomhaíochtaí agus chláir den chineál céanna?

Tá "The Brussels Binder" bunaithe ar chur chuige an-chuimsitheach, a bhfuil sé mar aidhm leis sineirgí a chothú le comhpháirtithe éagsúla agus, san fhadtéarma, gréasán d’eagraíochtaí agus de ghrúpaí a bhfuil an dearcadh céanna acu a fhorbairt ar fud an Aontais Eorpaigh. Mar eagraíocht, leanaimid prionsabail fheimineacha na ceannaireachta. Mar chuid díobh, tá cumhacht a chomhroinnt le daoine eile agus an chumhacht atá ionainn féin a chothú. Oibrímid le hoibrithe deonacha agus le mná atá meáite ar an tsochaí a athrú. Is mór againn an chuimsitheacht agus an trédhearcacht agus ní mór an deis a bheith ag ár mbaill uile a gcuid smaointe agus tuairimí a chur in iúl.

Conas a bhainfidh an eagraíocht úsáid as an gcistiú sonrach seo chun tuilleadh cuidithe a thabhairt don phobal?

I dteannta feabhas a chur ar cháilíocht theicniúil ár mbonneagair agus ár suímh gréasáin (brusselsbinder.org), cuideoidh an cistiú le cúrsaí oiliúna agus ceardlanna a chur ar fáil (do ghairmithe baineanna, agus d’fhonn feachtas a mhúscailt in eagraíochtaí agus i gcuideachtaí). Ina theannta sin, beidh sé ina chuidiú le sraitheanna straitéisí a chur ar fáil d’eagraíochtaí agus rannpháirtithe comhdhála agus le teacht le chéile agus imeachtaí eile a eagrú d’fhonn pobal gairmithe baineanna agus saineolaithe a fhorbairt.

Is cuid de threocht dhomhanda iad cuótaí inscne chun ionadaíocht na mban a fheabhsú i gcomhlachtaí cinnteoireachta. Cad é do thuairim faoi sin? An dóigh leat gur toisc chinntitheach é cuótaí a thabhairt isteach chun cothromaíocht inscne a chinntiú ar phainéil agus i gcomhlachtaí? Céard eile atá ag teastáil?

Trí chuótaí a thabhairt isteach, tá deis againn meon daoine a athrú, feasacht a mhúscailt, agus cur le claontachtaí agus cleachtais neamh-chomhfhiosacha a sheachaint. San am céanna, is ábhar sách conspóideach agus deighilteach iad na cuótaí sin. Tá sé tábhachtach a aithint gur cheart cuótaí a bheith ina mbealach le sprioc a bhaint amach seachas a bheith ina gcríoch iontu féin. Anuas air sin, ní mór bearta eile a bheith ina dteannta, cuir i gcás, feachtais múscailte feasachta agus cúrsaí oiliúna (do bhainisteoirí agus do ghairmithe baineanna).